Yeni Azərbaycan Partiyası qurtuluş və tərəqqinin simvoluna çevrilmişdir

Yeni Azərbaycan Partiyası ötən əsrin 80-ci illərinin sonu 90-cı illərin əvvəllərində ölkəmizdə meydana çıxan mürəkkəb situasiyanın daxili məntiqindən, zamanın təxirəsalınmaz tələbindən irəli gələrək, Azərbaycan xalqının arzu və istəklərinin ifadəçisi kimi yaranan partiyadır. Belə bir siyasi təşkilatın yaranmasını şərtləndirən tarixi zərurət 1990-cı illərin əvvəllərində ölkəmizin düşdüyü mürəkkəb vəziyyətdən onu xilas etmək kimi misilsiz tarixi vəzifənin yerinə yetirilməsi arzusu və istəyi ilə əlaqədar idi.

Məlum olduğu kimi, 1991-ci il oktyabrın 18-də Azərbaycan müstəqillik haqda Konstitusiya Aktını qəbul etsə də, sonrakı illərdə respublikada bütün istiqamətlərdə dərin xaos və böhran yaranmışdı. 1988-ci ildən başlanan iqtisadi, siyasi, xüsusilə dövlət hakimiyyəti böhranı, həmin illərdə rəhbərliyə gətirilən səriştəsiz, müxtəlif xarici maraq qruplarının təlimatlarını icra edən siyasi qrupların gündən-günə güclənən erməni təcavüzünün qarşısını almaq, ordu yaratmaq, xalqı səfərbər etmək, vətənin təhlükəsizliyini və əhalinin rifahını təmin etmək əvəzinə öz hakimiyyətlərini qorumaq istiqamətində hətta vətəndaş qarşıdurmasına belə rəvac vermələri onsuz da mürəkkəb olan vəziyyəti daha da gərginləşdirmişdi. Məhz belə bir ağır şəraitdə Azərbaycanı gözləyən mümkün təhlükələrin qarşısını almaq məqsədilə xalqın sağlam qüvvələrinin, geniş təbəqələrinin böyük tarixi şəxsiyyət Heydər Əliyevə müraciəti, oktyabrın 24-də isə ziyalıların müraciətinə cavab məktubunda Ulu öndər Heydər Əliyevin yaranmış vəziyyəti dərindən təhlil etməsi və çıxış yolunu göstərməsi noyabrın 21-də Naxçıvanda Yeni Azərbaycan Partiyasının təsis edilməsi zərurətini reallaşdırdı. Yarandığı gündən Yeni Azərbaycan Partiyasının Ümummilli lider Heydər Əliyev tərəfindən müəyyənləşdirilən və uğurla tətbiq edilən əsas proqram məramı Azərbaycanın dövlət müstəqilliyinin qorunub möhkəmləndirilməsindən, ərazi bütövlüyünün təmin edilməsindən, demokratik, hüquqi, dünyəvi dövlət qurulmasından, əmin-amanlıq, ictimai-siyasi sabitlik, milli həmrəylik, güclü və sosial yönümlü iqtisadiyyat yaratmaqdan ibarət olmuş və ötən 20 ildə öz proqram məqsədlərinə, yəni müstəqillik dövlətçilik prinsipi, qanunçuluq prinsipi, azərbaycançılıq, vətənçilik prinsipi, varislik, yaradıcı təkamül prinsipi, konstruktiv əməkdaşlıq, vətəndaş həmrəyliyi prinsipi, sosial ədalət prinsiplərinə və s. sadiq fəaliyyət göstərmişdir. Ona görə də bu gün Azərbaycanın müstəqil dövlət olaraq inkişaf mərhələlərini təhlil edərkən tam məsuliyyətlə qeyd edirik ki, YAP-ın həyata keçirdiyi tədbirlər, qəbul etdiyi tarixi qərarlar ölkəmizin gələcək inkişaf perspektivlərinin müəyyənləşdirilməsi və Azərbaycan Respublikasının bu günki inkişaf səviyyəsinə çatması baxımından mühüm rol oynamışdır. Yeni Azərbaycan Partiyasının Sədri, Azərbaycan Respublikasının Prezidenti cənab İlham Əliyevin aşağıdakı sözləri də YAP-ın müstəqil Azərbaycan dövlətçiliyinin möhkəmlənməsində və inkişafında həyata keçirdiyi mütərəqqi fəaliyyətə verilən ən yüksək qiymətdir: «Biz azadıq, biz müstəqilik, biz güclü Azərbaycan yaradırıq, güclü dövlət qururuq. Mən bu dövlət quruculuğunda Yeni Azərbaycan Partiyasının rolunu çox yüksək qiymətləndirirəm».

Beləliklə, 1993-cü ildən keçən 20 il müddətində Azərbaycan xalqı iqtisadi böhrandan, hərbi-siyasi qarşıdurmadan, sosial tənəzzüldən, mədəni iflasdan və nəhayət mənəvi aşınmadan xilas oldu.

Məlumdur ki, Azərbaycanda aqrar sahə iqtisadiyyatın mühüm bir hissəsini təşkil edir və bu sahənin də inkişafının əsası aparılacaq torpaq islahatlarının nəticələrindən asılı idi.

Ulu öndərimiz Heydər Əliyevin təşəbbüsü və rəhbərliyi ilə ümumxalq müzakirələrindən sonra torpaq islahatı proqramı hazırlandı və bu proqram əsasında torpaq islahatlarının həyata keçirilməsini təmin edən hüquqi baza yaradıldı.

«Torpaq islahatı haqqında» Azərbaycan Respublikasının 16 iyul 1996-cı il tarixli Qanunu, «Dövlət torpaq kadastrı, torpaqların monitorinqi və yerquruluşu haqqında» Azərbaycan Respublikasının 22 dekabr 1998-ci il tarixli Qanunu, «Torpaq icarəsi haqqında» Azərbaycan Respublikasının 12 mart 1999-cu il tarixli Qanunu, Azərbaycan Respublikasının 25 iyun 1999-cu il tarixli Qanunu ilə təsdiq edilmiş «Azərbaycan Respublikası Torpaq Məcəlləsi», «Torpaq bazarı haqqında» Azərbaycan Respublikasının 7 may 1999-cu il tarixli Qanunu da daxil olmaqla qəbul edilmiş 52-dən çox fərman, qanun və digər hüquqi normativ aktlar respublikamızda torpaq islahatlarını həyata keçirməyə əsaslı zəmin yaratdı. Beləliklə, Heydər Əliyev Naxçıvan MR-a rəhbərlik etdiyi dövrdə Culfa rayonunun Şurut və Gal kəndlərində bünövrəsini qoyduğu torpaq islahatları bütün ölkəyə tətbiq edilməyə başlandı. «Aqrar islahatların həyata keçirilməsini təmin edən bəzi normativ-hüquqi aktların təsdiq edilməsi barədə» Azərbaycan Republikası Prezidentinin 10 yanvar 1997-ci il tarixli 534 saylı Fərmanından sonra islahatların sürətlə həyata keçirilməsi prosesi başladı.

Respublikanın kənd təsərrüfatının inkişafında mühüm nailiyyətlər əldə edilməsinə səbəb olan bu islahatları digər dövlətlərdə həyata keçirilən analoji islahatlardan bu siyasətin müəllifi və icraçısı Heydər Əliyevin müəyyənləşdirdiyi 4 mühüm prinsip fərqləndirirdi.

Birincisi, Azərbaycanda torpaqlar məhz onun təşəbbüsü ilə vətəndaşlara pulsuz olaraq əvəzsiz verildi. Nəticədə 3 milyon 500 minə qədər insan torpaq mülkiyyətçisinə çevrildi. Bu isə yeni, güclü mülkiyyətçilər sinfi yaratmaqla, yeni torpaq əkinçi münasibətləri formalaşdıraraq, torpaqdan səmərəli və məhsuldar istifadəetməni şərtləndirdi, torpağa qayğı və doğma münasibəti zəruri etdi.

İkincisi, torpaqların ən yararlısı və keyfiyyətlisi özəlləşdirildi. Başqa sözlə, MDB məkanının digər ölkələrindən fərqli olaraq vətəndaşa yararsız və ya az yararlı torpaqlar deyil, keçmiş kolxoz və sovxozların ən yararlı və münbit torpaqları verdi. Eyni zamanda Azərbaycan Respublikasının fiziki və hüquqi şəxslərinə öz mülkiyyətlərindəki torpaq sahələri üzərində müstəsna hüquqlar, alqı-satqı, bağışlama, icarəyə və ya istifadəyə vermə, vərəsəlik, girov qoyma və s. kimi hüquqlar verdi ki, bu da Azərbaycanda torpaq islahatlarının keçmiş SSRİ-nin digər respublikalarında olduğu kimi formal deyil, əsaslı zəmində və fundamental şəkildə həyata keçirildiyini sübut etdi.

Üçüncüsü, respublikamızın ərazisində yaşayan bütün vətəndaşlara harada yaşamasından və kimliyindən asılı olmayaraq torpaqlardan istifadə və icarə hüququ verildi, eyni zamanda Azərbaycanın hər bir vətəndaşı torpaq alqı-satqısı prosesində, torpaqla bağlı müxtəlif müqavilə və əqdlərin bağlanmasında iştirak etmək hüququ əldə etdi. Başqa sözlə, torpaq əmlakçısına çevrilmiş 3 milyon beş yüz min nəfər subyektdən başqa respublika əhalisinin yerdə qalan hissəsi də torpaq - vətəndaş münasibətlərindən kənarlaşdırılmadı. Yəni, hər bir Azərbaycan vətəndaşı respublikamızda formalaşan torpaqla bağlı yeni mülkiyyət münasibətlərində birbaşa iştirakçı olmaq hüququ qazandı.

Dördüncüsü, xüsusilə qeyd etmək lazımdır ki, məhz ümummilli lider Heydər Əliyevin təşəbbüsü ilə Azərbaycanda Azərbaycan vətəndaşı olmayan fiziki və hüquqi şəxslərə torpağa mülkiyyətçilik hüququ verilməmişdir ki, bu da nəinki mühüm iqtisadi, həmçinin ciddi siyasi əhəmiyyət daşıyır. Məhz ölkənin aqrar-iqtisadi siyasətinin müəllifi, böyük dövlət adamı Heydər Əliyevin sosial-ədalət prinsipinə söykənən yuxardakı tezisləri əsasında formalaşdırılan və 1993-2003-cü illərdə onun Fərman və Sərəncamları ilə qanuniləşdirilən, düzgün icra mexanizimləri ilə həyata keçirilən aqrar siyasətin nəticəsi Azərbaycanda aqrar sahənin günü-gündən inkişafına səbəb oldu.

Qeyd etmək lazımdır ki, qəbul edilən kifayət qədər mükəmməl qanunların sayəsində bu gün dövlət mülkiyyətində saxlanılan və bələdiyyə mülkiyyətinə verilən torpaqlar da son nəticədə Azərbaycan vətəndaşlarının rifahı naminə istifadə edilir. Belə ki, bələdiyyə mülkiyyətinə verilən torpaqlar alqı-satqı, istifadə, icarə və s. qaydalarda, dövlət mülkiyyətində olan torpaqlar da yenə icarə və istifadə qaydasında əhalinin xidmətinə verilir. Nəticə etibarıilə bütün qanunlar ölkədə aqrar sahənin inkişafına hüquqi əsas yaratmaqla xalqın maddi rifahının yaxşılaşdırılmasına zəmin yaratmış oldu.

Heydər Əliyevin aqrar siyasəti olaraq həyata keçirilən və hazırda möhtərəm prezident, Yeni Azərbaycan Partiyasının sədri cənab İlham Əliyev tərəfindən davam etdirilən torpaq islahatlarının növbəti mərhələləri böyük dinamizimlə bu gün daha da dərinləşməkdədir.

Xalqımızın mütləq əksəriyyətinin səs çoxluğu ilə 2003-cü il Prezident seçkilərində Dövlət başçısı seçilən möhtərəm Prezidentimiz, cənab İlham Əliyev tərəfindən imzalanmış 24 noyabr 2003-cü il tarixli «Azərbaycan Respublikasında sosial-iqtisadi inkişafın sürətləndirilməsi tədbirləri haqqında» fərman aqrar sahənin inkişafına da böyük təkan vermiş, bu bölmədə çalışan insanlara əlverişli şəraitin yaradılmasına səbəb olmuşdur.

Bu prinsipial yanaşmanın və ardıcıl siyasətin nəticəsində hazırda torpaq islahatlarının birinci mərhələsi başa çatdırılıb və digər mərhələləri ilə bağlı Komitə tərəfindən təxirəsalınmaz tədbirlər həyata keçirilməkdədir.

Torpaq islahatlarının başa çatdırılmış birinci mərhələsində respublikamızda mövcud olmuş 2032 təsərrüfat, yəni kolxoz və sovxozlar ləğv edilərək, onların əkinə yararlı münbit torpaqları əhaliyə paylanılmışdır. Hər bir subyektə verilən torpaq onlara mülkiyyət hüququnu təsdiq edən hüquqi sənəd, Dövlət aktları ilə rəsmiləşdirilərək, naturada sahiblərinə tanıdılıb. Bu mərhələdə işğal olunmuş rayonlarımız istisna olmaqla ölkəmizdə torpaq payı almaq hüququ olan 873 618 ailədən 869 268-nə torpaq payı verilib. Bu isə 3 442 778 subyekt deməkdir. Ölkəmizdə torpaq islahatı 99,5% yerinə yetirilib. Torpaq islahatları nəticəsində torpaq üzərində üç mülkiyyət forması müəyyənləşib. Azərbaycanın vahid torpaq fondunu təşkil edən 8 641 506 hektar torpaq sahəsindən 4 913 639 hektarı, başqa sözlə 56,9%-i dövlət mülkiyyətində saxlanılıb; 2 032 744 hektarı, yəni 23,5%-i bələdiyyə mülkiyyətinə verilib, 1 695 123 hektarı, yəni 19,6%-i isə xüsusi mülkiyyətə ayrılıb.

Vətəndaşların qanuni istifadəsindəki torpaqların onların mülkiyyətinə verilməsi ilə bağlı Dövlət Torpaq və Xəritəçəkmə Komitəsi tərəfindən respublika üzrə mövcud 4551 kənd və qəsəbənin 3255-də həyət¬yanılar altında olan torpaq sahələrində aparılan çöl ölçmə işləri artıq tamamlanmışdır. 3090 kənd üzrə 907906 ailəyə isə qanuni istifadəsində olan həyətyanı sahələri ilə bağlı müvafiq texniki sənəd işlənib təqdim edilmişdir.

Respublika ictimaiyyətinin tələbatını ödəmək məqsədilə xüsusi məzmunlu xəritələrdən – 1:600 000 miqyaslı «Azərbaycanın tarixi və mədəniyyət abidələri» xəritəsi, ümumcoğrafi xəritələrdən – 1:500000 miqyaslı «Azərbaycan Respublikasının Ümumcoğrafi» xəritəsi və 1:50 000 000 miqyaslı Dünyanın fiziki xəritəsi hazırlanmışdır.

İctimai-iqtisadi xəritələrdən – 1:10 000 miqyaslı 4 vərəqli Bakı şəhərinin inzibati planı, 1:300 000 miqyaslı 4 vərəqli Azərbaycan Respublikasının siyasi-inzibati xəritəsi, Azərbaycan Səfəvilər dövləti (XVI) tarixi xəritəsi tərtib edilərək nəşr edilmişdir. 40 səhifədən, 36 xəritədən ibarət olan IX siniflər üçün «Dünyanın iqtisadi və sosial coğrafiyası Atlası» tədris materialları əsasında tərtib edilərək nəşr edilmiş, hazırlanmasına 2002-ci ildən başlanılan müxtəlif növ Atlaslar toplusunun yeni nəşr nümunəsi əlavə edilmişdir. Azərbaycan ensiklopediyası üçün 17 ədəd müxtəlif məzmunda xəritələr tərtib edilərək, Ensiklopediya Mərkəzinə təhvil verilmişdir.

«Azərbaycan Respublikası regionlarının sosial-iqtisadi inkişafı Dövlət Proqramı (2004-2008-ci illər)» üzrə tədbirlərin Dövlət Torpaq və Xəritəçəkmə Komitəsinin funksiyasına aid hissəsinə uyğun olaraq, Dövlət Torpaq və Xəritəçəkmə Komitəsi tərəfindən görüləcək işlərin planı hazırlanmış və həmin iş planına əsasən Azərbaycan Respublikasının İqtisadi İnkişaf Nazirliyi, Regionların Sosial-İqtisadi İnkişafı Dövlət Proqramı katibliyinə təqdim edilmişdir. Komitə tərəfindən bu Proqramla bağlı görülən, torpaqların məhsuldarlığının artırılması, onların eroziyasının və şoranlaşmasının qarşısının alınması, torpaq kadastrının yaradılması, torpaq sahələri üzərində mülkiyyət hüquqlarının rəsmiləşdirilməsi prosedurlarının sadələşdirilməsi işləri ilə yanaşı, Komitənin yerli struktur vahidlərində yeni iş yerləri açılmışdır ki, bu da öz növbəsində yerli mütəxəssislərin işsizlik problemlərinin aradan qaldırılmasına xidmət etməklə bərabər, eləcə də vətəndaşların torpaqla bağlı torpaqayırma işlərinin Komitənin yerli strukturları vasitəsilə operativ baxılıb həll edilməsinə şərait yaratmışdır.

Sadalanan faktlardan göründüyü kimi bu gün Respublikamızın ictimai, siyasi, iqtisadi, mədəni, ideoloji və s. həyatının bütün istiqamətlərində olduğu kimi aqrar sektorda da ulu öndərimiz Heydər Əliyevin siyasi kursu uğurla davam etdirilməkdədir. Məhz bu cür uğurlu Proqramın həyata keçirilməsinin və onun icrası ilə bağlı görülən işlərə tələbkarlıqla yanaşmanın nəticəsidir ki, respublikamızın iqtisadi və sosial həyatında dünyada analoqu olmayan nailiyyətlər əldə edilmişdir.

Bakı-Tbilisi-Ceyhan neft kəmərinin, Bakı-Tbilisi-Ərzurum qaz kəmərinin fəaliyyətə başlaması imkan verir ki, Azərbaycan uzunmüddətli dayanıqlı iqtisadi potensialını, həm də enerji təhlükəsizliyini möhkəmləndirsin.

Qeyd etdiklərimiz YAP-ın sədri, ölkə prezidenti cənab İlham Əliyevin rəhbərliyi ilə həyata keçirilən, xalq tərəfindən dəstəklənən geniş miqyaslı proqramların, iqtisadi-sosial siyasətin uğurla reallaşmasının məntiqi nəticəsidir ki, bu gün Azərbaycan dünyada ən sürətlə inkişaf edən yüksək iqtisadi göstəriciləri ilə fərqlənən ölkələrdən biridir. Və bu nəticə etibarilə ölkəmizin həm iqtisadi sahədə, həm də siyasi sahədə inkişafına, dövlətçiliyimizin möhkəmlənməsinə, respublikamızın demokratik imicinin formalaşmasına gətirib çıxarır.

Faktlardan göründüyü kimi, respublikamız cənab Prezident İlham Əliyevin rəhbərliyi altında sosial-iqtisadi, mədəni-mənəvi, siyasi-ideoloji və elmi müstəvidə özünün tərəqqi dövrünü yaşayır. Əldə edilən nailiyyətlərə isə hər ötən gün daha yeniləri əlavə olunur. Əminliklə deyə bilərik ki, bu uğurlar Azərbaycan dövlətçilik tarixinin ən parlaq səhifələri kimi ümummilli tərəqqimizdə özünəməxsus yer tutmaqdadır.

Möhtərəm prezidentimiz İlham Əliyevin uğurlu idarəetmə qabiliyyəti onun qarşıdakı illər üçün siyasi qələbəsini şərtləndirir. İqtisadiyyatda müşahidə olunan dinamizm yeni mərhələ - 2008-2013-cü illər üçün iqtisadi islahatların bütün komponentləri ilə məzmun baxımından tamamilə yeni xarakter almasında əlverişli zəmin yaradır. Cənab prezidentimiz İlham Əliyev Yeni Azərbaycan Partiyasının IV qurultayında demişdir: «Mən Azərbaycanı ən inkişaf etmiş ölkə kimi görmək istəyirəm və buna nail olmaq üçün bizim hər cür imkanlarımız var. Xalqın iradəsi var, sabitlik var, cəmiyyət və iqtidar arasında birlik var. Mən Azərbaycanın gələcəyinə nikbinliklə baxıram və Azərbaycanın çox parlaq gələcəyinə əminəm».

Cənab İlham Əliyevin 2003-cü il prezident seçkilərində verdiyi vədi əzmlə yerinə yetirdiyi tarixi bir sübutdur. Azərbaycan xalqı yaxşı bilir ki, hörmətli prezidentimiz İlham Əliyev 2003-cü ildə prezident seçkiləri ərəfəsində vəd verdiyi bütün məsələləri uğurla yerinə yetirməyi bacardı.

YAP-ın IV qurultayında cənab İlham Əliyev qürurla qeyd etdi ki, 2003-cü ildə prezident seçkiləri ərəfəsində mən demişdim ki, ölkədə 600 min iş yeri açılacaq. Çoxları təəccüblənirdi ki, 5 il ərzində bunu etmək necə mümkün olacaq. Biz isə buna nail olduq. Mən demişdim ki, 5 ildən sonra ölkəmizdə bir dənə də çadır düşərgəsi qalmayacaqdır. Həmin düşərgələrdə isə 10 minlərlə insan yaşayırdı. On iki çadır düşərgəsindən axırıncısı bu il ləğv edildi. Biz ölkəmizin enerji təhlükəsizliyi məsələsini tam həll etmişik və artıq başqa ölkələrində enerji təhlükəsizliyini təmin edirik.

Bəli, bu inam Heydər Əliyev zəkasından doğan günəşin ölməz işığı olan Yeni Azərbaycan Partiyasının proqramından güc aldığından cənab İlham Əliyevin rəhbərliyi altında Regional İnkişaf Proqramı bölgələrdə ən iri layihələrin həyata keçirilməsi üçün mükəmməl sənəd kimi iqtisadi siyasətin məzmununa yeni çalarlar əlavə etdi.

Bu işdə Heydər Əliyev Fondunun Prezidenti, hörmətli millət vəkilimiz, UNESKO-nun və İSESKO-nun xoşməramlı səfiri, ölkəmizin birinci xanımı hörmətli Mehriban xanım Əliyevanın müstəsna xidmətləri göz önündədir.

Heydər Əliyev Fondu yarandığı gündən həm ölkəmizdə, həm də beynəlxalq aləmdə xüsusi rəğbət qazanmışdır. Heydər Əliyev Fondunun fəaliyyəti cəmiyyətin bütün əhəmiyyətli sahələrini əhatə edir. Fondun “Yeniləşən Azərbaycana yeni məktəb” proqramı son illər ölkəmizdə reallaşdırılan ən uğurlu layihələrdən olmuşdur. Bu Proqram çərçivəsində ölkəmizin müxtəlif bölgələrində onlarla yeni məktəblər tikilmiş, yüzlərlə məktəblər əsaslı şəkildə təmir edilmişdir. Bundan başqa, “Təhsilə dəstək” layihəsi, “Uşaq evləri və internat məktəblərinin inkişafı” proqramları da öz növbəsində Azərbaycanda təhsilin inkişafını sözün əsl mənasında ictimai hərəkata çevirmişdir. Heydər Əliyev Fondunun təhsilin inkişafı sahəsində gördüyü işlər tək ölkəmizlə məhdudlaşmır. Belə ki, Fond Gürcüstanda və Moskvada azərbaycanlıların təhsil aldığı məktəblərə də kompüter dəstləri, məktəb ləvazimatları və digər avadanlıqlar hədiyyə etmişdir. Pakistan İslam Respublikasının zəlzələdən zərər çəkmiş Müzəffərabad şəhərində Fondun maliyyə dəstəyi hesabına müasir tələblərə cavab verən ümumtəhsil məktəbi inşa edilmişdir.

Mədəni irsin qorunması və beynəlxalq aləmdə təbliği istiqamətində görülən işlər də Heydər Əliyev fondunun çoxsahəli fəaliyyətinin bir istiqamətidir. Məhz Mehriban xanımın səyləri nəticəsində Azərbaycan muğamı UNESKO kimi nüfuzlu beynəlxalq qurum tərəfindən bəşəriyyətin şifahi qeyri-maddi irsinin şah əsərləri siyahısına daxil edilmişdir. Bakıda Beynəlxalq Muğam Mərkəzi tikilmişdir ki, bu mərkəz muğamlarımızın qorunub saxlanması və inkişafı, dünyada yayılması və beynəlxalq muğam tədbirlərinin keçirilməsi məqsədi daşıyır.

Fondun sosial sahədə reallaşdırdığı layihələr də xalqa xidmətin bariz nümunəsidir. “Diabetli uşaqlara ən yüksək qayğı”, “Talassemiyasız həyat naminə”, “Kor və görmə qabiliyyəti zəif olan insanlar üçün İKT-yə çıxışın təmin edilməsi”, “Hərəmiz bir ağac əkək” layihələri müstəqil dövlətimizdə hiss olunan sosial problemlərin həllinin aradan qaldırılmasına bilavasitə təkan vermişdir.

Azərbaycan həqiqətlərinin də dünyaya çatdırılmasında da Heydər Əliyev fondunun rolu böyükdür. “Qarabağ həqiqətləri” toplusu, “Xocalı soyqırımı” filmi, “Azərbaycana qarşı müharibə: mədəni irsin hədəfə alınması”, “Müharibə və tarixi-mədəniyyət abidələrimiz”, xarici nəşrlərdən tərcümə edilmiş “Türklər və dünya: munis tariximiz”, “Bakı-Tbilisi-Ceyhan boru kəməri: Qərbə açılan neft pəncərəsi”, “Azərbaycan təbiəti”, “Yuxuların çin olduğu yerdə”, “Bəyazidin müdafiəsi: həqiqət və yalan”, “Əlahəzrətin general-adyutantı” kitabları məhz Mehriban xanım Əliyevanın təşəbbüsü ilə hazırlanaraq bütün dünyada həqiqət carçılarına çevrilmişdir. 4 min səhifəlik “Azərbaycan” portalı isə öz konkret məlumatları ilə dünyanın hər yerində Azərbaycanla bağlı informasiya əldə etməyə xidmət edir. Mehriban xanım Əliyevanın təşəbbüsü ilə yaradılan bu portal eyni zamanda Heydər Əliyev Fondu tərəfindən Azərbaycanda elektron hökumətin qurulmasına ən böyük dəstəkdir.

Heydər Əliyev Fonduna Mehriban xanım Əliyeva kimi bir insanın rəhbərlik etməsi, Azərbaycanın çiçəklənməsi yolunda gördüyü böyük işlər həm də ona görə uğurludur ki, Azərbaycan Milli Məclisinin deputatı, UNESKO-nun və İSESKO-nun xoşməramlı səfiri Mehriban xanım Əliyevanın özü müasir Azərbaycanın dövlətçilik fəlsəfəsinin yaradıcısı ulu öndərimiz Heydər Əliyev siyasi akademiyasından dərs alıb. Məhz elə Mehriban xanım Əliyevanın Azərbaycan mədəniyyətinin, təhsilinin, elminin, incəsənətinin durmadan artan yaradıcı inkişafında gördüyü işlər bir daha sübut edir ki, o Ulu öndərimizin fenomenliyinin daha böyük miqyasda tanıdılması üçün bundan sonra da nələr etməyin vacibliyini dərk edən insanlar arasında öncüllük edənlərin ön sırasındadır.

Heydər Əliyev Fondunun rəhbərliyi ilə Qobustan dövlət tarixi-bədii qoruğunun virtual muzeyinin yaradılması və Azərbaycan Portalında yerləşdirilməsi ilə bağlı görülən işlərlə əlaqədar, Qobustan dövlət tarixi-bədii qoruğu ərazisində yerləşən milli sərvətlər xəzinəsinin qorunması və gələcək nəsillərə çatdırılması, eləcə də, Azərbaycan Respublikasının qədim mədəni irsinin geniş miqyasda təbliğ olunması məqsədi ilə YAP-ın sədri, Azərbaycan Respublikasının Prezidenti möhtərəm cənab İlham Əliyev 11 iyun 2007-ci il tarixli Sərəncam imzalamışdır. Heydər Əliyev Fondu və Dövlət Torpaq və Xəritəçəkmə Komitəsi bu Sərəncamdan irəli gələn vəzifələrlə əlaqədar Azərbaycanın qədim irsi olan Qobustanın dünya miqyasında tanıdılmasına və təbliğ olunmasına kömək etmək məqsədi ilə birgə layihə həyata keçirir. Layihə çərçivəsində Qobustan dövlət tarixi-bədii qoruğunun virtual muzeyinin yaradılması və Azərbaycan portalında yerləşdirilməsi nəzərdə tutulmuşdur.

Bütün bunlar onu göstərir ki, xalqımız Yeni Azərbaycan partiyasına, onun qurucusu olan ulu öndər Heydər Əliyevə və bu gün YAP-a sədrlik edən ölkə prezidenti, Heydər Əliyev siyasi kursunun layiqli davamçısı cənab İlham Əliyevə böyük inam bəsləyir. Bu möhtəşəm inam 2008-ci il 15 oktyabr prezident seçkilərində də bir daha möhtərəm prezident İlham Əliyevin hətta müxalifət partiyalarının etiraf etdikləri kimi tam qələbəsində öz əksini tapdı.

Yeni Azərbaycan Partiyasına bütövlükdə qədirbilən Azərbaycan xalqının inamının gündən-günə artması bir də özünü onda göstərir ki, 1992-ci ildə 550 nəfər konfrans iştirakçılarının ulu öndər Heydər Əlievin partiyaya sədr seçilməsi ilə fəaliyyətə başlayan YAP nəinki ölkəmizdə, bütövlükdə Qafqaz regionunda ən böyük, güclü, siyasi təşkilatdır.

Respublikanın regionların sosial-iqtisadi inkişafına dair Dövlət Proqramının uğurla reallaşdırılması, o cümlədən yeni istehsal müəssisələrinin yaradılması, infrastruktur layihələrin həyata keçirilməsi, geniş abadlıq, quruculuq işləri bölgələrin simasını, həqiqətən, gözəlləşdirmişdir. Ölkədə açılmış 1 milyondan çox iş yerinin tam əksəriyyəti məhz bölgələrin payına düşür.

Bəli, bu bir həqiqətdir. Yeni Azərbaycan Partiyasının siyasi sistemin inkişafında fəal rol oynamasına 1993-cü, 1998-ci, 2003-cü və 2008-ci ilin Azərbaycan Respublikasının Prezidenti seçkilərində də Yeni Azərbaycan Partiyası tərəfindən irəli sürülən namizədlərin xalq tərəfindən böyük dəstək alması bir daha əyani sübut idi.

İnkişaf etmiş dünya ölkələrinin ön sıralarında addımladığını Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2012-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasda Yeni Azərbaycan Partiyasının sədri, Prezidentimiz cənab İlham Əliyev bir daha qürurla təsdiqləyərək demişdir: «Ölkəmizin strateji valyuta ehtiyatları ilin əvvəlindən təxminən 5 milyard dollar artmışdır, hazırda 45 milyard dollar səviyyəsindədir. Deyə bilərəm ki, bu, dünya miqyasında çox böyük rəqəmdir və Azərbaycan o ölkələrdəndir ki, böyük valyuta ehtiyatlarına malikdir. Ölkənin ərazi ölçülərinə və əhalinin sayına görə, hesab edirəm ki, əgər valyuta ehtiyatlarımızı adambaşına hesablasaq biz dünya miqyasında ən qabaqcıl yerlərdən birindəyik. Çox sevindirici hal ondan ibarətdir ki, böyük investisiya layihələrinin dövlət xətti ilə həyata keçirilməsinə baxmayaraq, strateji valyuta ehtiyatlarımız azalmır, əksinə artır».

Bu bir həqiqətdir ki, YAP-ın hakimiyyətə gəldiyi illərdən başlayaraq, ölkəmizdə bir çox sahələrdə, o cümlədən, aqrar sektorda dünyada analoqu olmayan sürətli inkişaf özünü göstərməkdədir. İnanırıq ki, bu uğurlu işlər YAP-ın sədri, ölkə Prezidenti cənab İlham Əliyevin rəhbərliyi altında hələ bundan sonrakı illərdə də uğurla davam edəcəkdir.

Qərib Məmmədov,

Dövlət Torpaq və Xəritəçəkmə

Komitəsinin sədri

yap.org.az

Səs.- 2012.- 6 noyabr.- S.10-11.