"Rabitə dünyası" qəzetinin 20 illik yubileyi keçirildi

Bu gün Rabitə və İnformasiya Texnologiyaları Nazirliyinin mətbu orqanı olan "Rabitə dünyası" qəzetinin 20 illik yubileyi qeyd olunub. SİA-nın məlumatına görə, tədbirdə çıxış edən Mətbuat Şurasının sədri Əflatun Amaşov bildirib ki, qəzet 20 illik fəaliyyəti dövründə bir sıra uğurlara imza atıb.

MŞ sədri onu da vurğulayıb kİ, bu mətbu orqanında digər sahələrdə çalışan insanlar üçün də əhəmiyyətli məlumatlar var: “Hazırda Azərbaycanda 20-ə yaxın sahə qəzetləri fəaliyyət göstərir. Bu qəzet vasitəsi ilə informasiya texnologiyaları bağlı ən son yenilikləri öyrənmək mümkündür. Buna görə də qəzet öz işini layiqincə həyata keçirir”.

Daha sonra çıxış edən Prezident Administrasiyasının (PA) ictimai-siyasi şöbəsinin müdiri Əli Həsənov vurğulayıb ki, Azərbaycanda söz azadlığı və siyasi plüralizm mövcuddur: “Ölkəmizdə olan kütləvi informasiya vasitələri operativliyi və obyektivliyi baxımından tək MDB-də deyil, bütün dünyada qabaqcıl yerləri tutur. Bu baxımdan “Rabitə dünyası” qəzetinin xidmətləri danılmazdır. Qəzet ilk baxışdan sahə qəzeti kimi görünür, ancaq onu oxuyub nəzərdən keçirsək şahidi olarıq ki, orada həmçinin ölkənin ictimai-siyasi hadisələri də yer alıb”.

Tədbirdə çıxış edən qəzetin baş redaktoru və nazirliyin mətbuat xidmətinin rəhbəri Müşfiq Əmirov mətbu orqanın tarixi haqqında qonaqlara məlumat verib. O bildirib kİ, 1992-ci ildə yaradılan nəşrin ilk nömrəsi dörd səhifədən ibarət olmaqla işıq üzü görüb və həftədə bir dəfə dərc edilib: “20 illik fəaliyyəti dövründə qəzet ölkə mətbuatında özünəməxsus yer tutub və fəaliyyəti yüksək qiymətləndirilib. Qəzetin səhifələrində Azərbaycanda həyata keçirilən İKT siyasəti, müasir informasiya texnologiyalarının tətbiqi, informasiya cəmiyyətinin formalaşması, ölkənin regionlarında rabitə şəbəkəsinin vəziyyəti, baş verən yeniliklər, mövcud problemlər, respublikanın informasiya-kommunikasiya texnologiyaları sektorunun inkişafı yer alır”.

Qəzetin redaktoru onu da əlavə edib ki, beynəlxalq rabitə sistemi, İKT sahəsində Azərbaycanda və xarici ölkələrdə keçirilən beynəlxalq konfranslar, forumlar, İT sənayesinin nüfuzlu şəxslərinin həyat və fəaliyyəti, sahə üzrə ixtisaslı kadrların hazırlanması ilə məşğul olan ali təhsil ocaqları, tarixdə əhəmiyyətli iz buraxmış texnoloji ixtiralar və digər məlumat haqqında qəzetdə müəllif yazılarını və digər aktual məsələləri əhatə edən mütəxəssis yazılarını oxumaq mümkündür: “Hazırda Azərbaycan dilində 36 səhifə və ingilis dillində 24 səhifədən ibarət olmaqla yüksək keyfiyyətli kağızda nəşr olunan "Rabitə dünyası" qəzeti tam rəngli formada və nəfis tərtibatda işıq üzü görür”.

Nazir Əli Abbasov da qəzetlə bağlı dəyərli fikirlərini tədbir iştirakçıları ilə bölüşüb və mətbu orqanında əməyi keçən hər kəsi təbrik edib.

Tədbirdə həmçinin qəzetin redaktoru və əməkdaşlarına Mətbuat Şurası və Azərbaycan Jurnalistlər Birliyinin diplomları təqdim olunub.

Səs.- 2012.- 21 noyabr.- S.23.