Yeni Azərbaycan Partiyasının 20 il ərzində keçdiyi yol əslində, çağdaş dövlətimizin yaşadığı tarixdir

Müsahibimiz Yeni Azərbaycan Partiyası Siyasi Şurasının üzvü, Milli Məclisin deputatı Məlahət İbrahimqızıdır

- Məlahət xanım, hazırda ölkəmizin bütün guşələrində Yeni Azərbaycan Partiyasının yaradılmasının 20 illik yubileyi qeyd olunur. İstərdik ki, belə bir əlamətdar tarixlə bağlı, partiyamızın ötən illər ərzində keçdiyi yol barədə fikirlərinizi bildirəsiniz...

- İlk olaraq, mən 20 illik yubiley münasibətilə partiyamızın bütün üzvlərini ürəkdən təbrik edirəm, onlara siyasi fəaliyyətlərində yeni-yeni uğurlar arzulayıram. Ümumiyyətlə, 600 min nəfərə yaxın üzvü olan Yeni Azərbaycan Partiyası ötən 20 ildə heç də asan yol keçməyib, çətin və şərəfli tarix yaşayıb. Bu gün ölkəmizin hansı səmtinə baxsaq, partiyamızın nailiyyətlərini görə bilərik. Hazırda iqtidarda olan YAP vaxtilə müxalifətdə də olub. Ötən il xalqımız Azərbaycanın müstəqilliyinin 20 illiyini, bu il isə YAP-ın yaranmasının 20 illiyini qeyd edir. Bu isə o deməkdir ki, partiyamızın keçdiyi yol əslində, çağdaş dövlətimizin keçdiyi yoldur. Bu yollar paralel şəkildə inkişaf edib və başqa cür də ola bilməz. Partiyamızın yaradıcısı, eyni zamanda çağdaş Azərbaycanın memarı Ulu öndər Heydər Əliyevin müəyyənləşdirdiyi inkişaf strategiyası öz bəhrəsini verir və bu strategiya nəticəsində dövlətimizin üçrəngli bayrağı dünyanın ən ali beynəlxalq qurumunun - BMT Təhlükəsizlik Şurasının üzvü kimi dalğalanır. Möhtərəm Prezidentimiz, Yeni Azərbaycan Partiyasının Sədri İlham Əliyev dünyanın ən uca kürsülərindən çıxış edərək ölkəmizin maraqları müdafiə edir. Əlbəttə ki, bu uğura nail olunması üçün böyük işlər görülüb, dövlətimiz böyük yollar keçib. Qeyd etmək lazımdır ki, Azərbaycan BMT TŞ-da təmsil olunan qeyri-daimi dövlətlər arasında az sayda ölkələrdəndir ki, böyük səs çoxluğu ilə quruma üzv seçilib. Bu, Azərbaycan dövlətinin apardığı uğurlu siyasətin bəhrəsidir. Eyni zamanda, bu, ölkəmizin siyasətinin qiymətləndirilməsinin göstəricisidir.

- Yeni Azərbaycan Partiyasının yaradılmasını hansı amillər zəruri edirdi?

- Təbii ki, ötən 20 il ərzində qazanılan uğurları qiymətləndirmək üçün 1992-1993-cü illərdəki Azərbaycanı göz önünə gətirmək lazımdır. Dövlət büdcəsi boş idi, siyasi xaos baş alıb gedirdi, vətəndaş müharibəsi təhlükəsi başlayırdı, ölkədə seperatizm meylləri yaranmışdı. Bütün sahələrdə isə böhran nəticəsində ölkə iflic vəziyyətinə düşmüşdü. Belə olan təqdirdə insanların sabaha ümidi itmişdi, Ermənistan tərəfindən isə torpaqlarımızın işğalı davam edirdi. YAP-ın yaranması məhz belə bir dövrdə baş verdi. Xalqın və dövlətin gələcəyini düşünən ziyalılar Ulu öndər Heydər Əliyevə bu partiyanın yaradılması ilə bağlı müraciət etdilər və 21 noyabr 1992-ci ildə YAP-ın təsis konfransı keçirildi. Partiya yaranandan bir neçə ay sonra Ulu öndər Heydər Əliyev xalqın təkidli tələbi ilə hakimiyyətə gəldi. Dövləti bu böhrandan çıxarmaq isə hər kəsin işi deyildi. Böyük dövlət xadimi, Ulu öndər Heydər Əliyev isə özünün qətiyyəti və müdrikliyi, siyasi uzaqgörənliyi ilə Azərbaycanı ağır böhrandan xilas etdi.

Ümumiyyətlə, dünyada böhranların aradan qaldırılması ilə bağlı müəyyən modellər var və mən əminəm ki, gələcəkdə politologiya elmində böhranlardan çıxmaq üçün Heydər Əliyev modeli araşdırılacaq və bundan beynəlxalq səviyyədə istifadə olunacaq. Azərbaycan tarixən strateji regionda yerləşib və tarixin hər zamanında bu region super güclərin maraqlarının toqquşduğu məkan olub. Bu müasir tariximizdə də belədir. Xüsusən də, Azərbaycanın mühüm karbohidrogen ehtiyatlarına malik olması, İpək Yolunun məhz bu regiondan keçməsi supergüclərin maraqlarının toqquşması üçün əsas səbəblərdəndir. Belə bir strateji regionda o cür çətin vəziyyətlərdən çıxmağı yalnız Ulu öndər Heydər Əliyev kimi dahi siyasətçi bacarardı. Ulu öndərimiz Azərbaycanı ağır böhrandan çıxardı və ən qısa zamanda dünyanın investisiya maraqlarını ölkəmizə yönəltməyi bacardı. 1994-cü ilin may ayında atəşkəs imzalanandan sonra həmin ilin sentyabr ayında «Əsrin müqaviləsi» bağlandı. Bu isə xalqımızda gələcəyə baxışları nikbinləşdirdi. Həqiqətən də, bugünkü inkişafımızın təməli məhz o zamandan qoyuldu. Məhz, bu müqavilədən sonra bir sıra mühüm layihələr dünyanın aparıcı dövlətlərinin maraqlarını Azərbaycanla uzlaşdırdı və ölkəmizə yatırılan investisiyalar artdı. Bu isə o demək idi ki, Azərbaycan sabit ölkə kimi böyük dövətlərin diqqətini cəlb etdi və böyük şirkətlər iqtisadiyyatımıza kapital qoymağa başladılar. Məhz, Ulu öndərimiz Heydər Əliyevin siyasi kursu müasir Azərbaycanın təməli oldu. Bu kurs nəticəsində ard-arda böyük layihələr həyata keçirildi, Bakı-Tbilisi-Ceyhan, Bakı-Tbilisi-Ərzurum layihələri reallaşdırıldı və hazırda Bakı-Tbilisi-Qars layihəsi icra olunur. Azərbaycanın ən böyük layihələrindən biri də TANAP layihəsidir ki, bir müddət öncə Türkiyə ilə imzalandı. Yəni bütün bu layihələr çağdaş dövlətimizin daha da möhkəmlənməsi üçün bir zəmanətə çevrilməklə yanaşı, Azərbaycanı dünyaya tanıtdı, dövlətimizin güclənməsinə, vətəndaşlarımızın rifahının yaxşılaşmasına şərait yaratdı. Bunun nəticəsidir ki, dünya maliyyə böhranının çətinliklərini yaşadığı halda, Azərbaycan bütün layihələrin reallaşdırılması üçün tədbirlər görür.

Bildiyiniz kimi Azərbaycan Ermənistanın işğalı nəticəsində öz torpaqlarını itirib, bir milyon vətəndaşımız qaçqın və məcburi köçkün durumuna düşüb. Vaxtilə bu vətəndaşlar çox pis vəziyyətdə, çadır şəhərciklərində, vaqonlarda yaşamağa məcbur idi, dövlətimiz onları saxlamaq üçün xarici donorlara ehtiyac duyurdu. Eyni zamanda, Azərbaycan informasiya blokadasına alınmışdı. Ulu öndər Heydər Əliyev Azərbaycanı informasiya blokadasından xilas etdi, həqiqətləri dünyaya çatdırdı. Dünya ictimaiyyəti Azərbaycanın işğala qaldığını eşitdi, bildi. Heydər Əliyev dünyanın bir sıra nöqtələrindən donorları ölkəmizə cəlb edə bildi. Bu donorların, sərmayələrin köməyi ilə ölkəmizdə iqtisad durum tədricən yaxşılaşdı. Amma bu gün artıq Azərbaycan özü donor ölkəyə çevrilib. Ölkəmiz dünyanın bir sıra yerlərində humanitar aksiyalar keçirir, insanlara kömək göstərir. Bu gün aclıq çəkən, çətinlikdə olan ölkələrə Azərbaycan dövləti, Heydər Əliyev Fondu köməkliklər edir, insanlara yardım göstərir. Hətta Qərbi Avropada, İtaliyada humanitar layihələr reallaşdırılır. Azərbaycan sərmayə qoyulan ölkədən sərmayə yatıran ölkəyə çevrilib. Ölkəmizin hər yerində böyük infrastrukturlar yaradılır, layihələr, proqramlar həyata keçirilir. Əlbəttə ki, bütün bunlar böyük nailiyyətdir. Bu nailiyyətlərin qazanılması eyni zamanda 20 illik yubileyini qeyd edən partiyamızın uğurlarıdır.

- Yeni Azərbaycan Partiyasının Nizamnaməsində və prinsiplərində bir çox önəmli məqamlar var. Sizcə, partiyamızın ideya və prinsipləri həyatda öz əksini necə tapır?

- Bütün qeyd olunanlar - inkişafımız, dövlətimizin güclənməsi məsələsi partiyamızın Nizamnamə və Məramnaməsində nəzərdə tutulan prinsiplərdir. Azərbaycançılıq ideyası dövlətimizin birliyinə, güclənməsinə ən böyük dayaqdır. Məhz bu ideya Azərbaycanı separatizmdən qorudu, parçalanmadan xilas etdi. Ulu öndərimiz tərəfindən əsası qoyulan və Prezidentimiz İlham Əliyev tərəfindən davam etdirilən siyasət nəticəsində, 1995-ci ildə qəbul olunan Konstitusiyamızın müddəaları, azərbaycançılıq ideyaları, qanunçuluq, sosial ədalət və digər partiyamızın digər prinsipləri uğurla həyata keçirilir. Təbii ki, bu gün də Azərbaycana qarşı olan, bizim uğurlarımıza sevinməyən qüvvələr var. Biz həmin qüvvələrə qarşı monolit bir güc kimi sipər olmalıyıq. Azərbaycan xalqının və dövlətinin bir daha sınağa çəkilməsinə imkan verməməliyik.

Qeyd etdiyim kimi YAP ötən illər ərzində böyük və şərəfli bir yol keçibdir. Partiyamızın müstəqil Azərbaycanın qurulmasında, inkişafında mühüm xidmətləri var. Gələcəkdə bu, tariximizə belə də yazılacaq. YAP-ın ən böyük qələbəsi Azərbaycanın üçrəngli bayrağının Xankəndidə, Şuşada dalğalandırılması olacaq. Biz buna inanırıq və əminik. İnanırıq ki, bizlər Ali Baş Komandanımızın fəaliyyəti, qətiyyəti nəticəsində buna nail olacağıq və gələcək inkişafımızı, daha böyük fəaliyyətimizi Dağlıq Qarabağ ərazisində həyata keçirəcəyik.

- Yeni Azərbaycan Partiyasının yüksək nüfuzu şərtləndirən mühüm amillərdən biri də onun geniş beynəlxalq əlaqələrə malik olmasıdır. Bu amil partiyanın daha da güclənməsində nə dərəcədə rol oynayır?

- Ölkəmizin ən güclü siyasi qüvvəsi olan YAP həmçinin, geniş beynəlxalq əlaqələrə malikdir. Deyə bilərəm ki, bu baxımdan da partiyamız böyük nailiyyətlər əldə edib. Partiyamızın beynəlxalq əlaqələri günü-gündən möhkəmlənir, dünya miqyasında ən tanınan partiyalar sırasına daxil olur. YAP bölgənin ən böyük, güclü partiyasıdır. Eyni zamanda, Avropanın ən böyük qrup partiyası olan Avropa Xalqları Partiyası ilə fəal əməkdaşlıq edirik. YAP bu siyasi təşkilatın tədbirlərində fəal şəkildə iştirak edir. Eyni zamanda, Avropa Xalqları Partiyasının nümayəndələri də partiyamızın tədbirlərinə qatılırlar.

YAP Asiya qitəsində ən böyük siyasi təşkilat olan Asiya Siyasi Partiyalarının Beynəlxalq Konfransının (İCAPP) və bu təşkilatın rəhbər orqanı olan Daimi Komitənin üzvüdür. 300-dən çox siyasi partiyanın təmsil olunduğu bu təşkilatda YAP öz fəallığı ilə seçilir. Elə bunun nəticəsidir ki, Bakı şəhərində 22-23 noyabr tarixlərində İCAPP-ın böyük toplantıları keçiriləcək. YAP Gənclər Birliynin sədr müavini İCAPP-ın yeni yaradılmış gənclər təşkilatının vitse-prezidenti seçilib. Partiyamız eyni zamanda bir sıra beynəlxalq tədbirələrə də ev sahibliyi edib. Dəfələrlə, istər Gənclər Birliyi, istərsə də Qadınlar Şurasının xətti ilə partiyamız mühüm tədbirlər reallaşdırıb. Təbii ki, bütün bunlar YAP-ın artıq beynəlxalq miqyasda nüfuzundan xəbər verir. Bu amil partiyamızın böyük nailiyyətidir.

- Digər mühüm məqamlardan biri ölkə gənclərinin Yeni Azərbaycan Partiyasına olan böyük marağı və bu marağın ifadəsi olaraq partiyamızın sıralarına qoşulmasıdır. Gənclərin YAP-ın sıralarına axınının perspektiv baxımından əhəmiyyəti nədər ibarətdir?

- Bəli, partiyamızın sıralarında gənclərin böyük qüvvə kimi çıxış etməsi çox vacib bir göstəricidir. Sevindirici haldır ki, yüksək intellektli, bilik və bacarıqlı gənclər Yeni Azərbaycan Partiyasının sıralarına qoşulurlar. Bu gün partiya üzvlərinin 40 faizə qədərinin gənclərdən ibarət olması gələcək nailiyyətlərimizdən də xəbər verir. İstər partiyamızın yaradıcısı, Ulu öndər Heydər Əliyevin zamanında, istərsə də Prezident İlham Əliyev fəaliyyətində partiyamızda gənclərlə iş əsas vəzifələrdən biri olub. Bu prioritetin, Prezidentimizin gənclər siyasətinə verdiyi önəmin nəticəsidir ki, partiyamıza gənclərin kütləvi axını müşahidə olunur.

Bu gün sosial şəbəkələr vasitəsilə də gənclər partiyamıza daxil olmaq istəklərini ifadə edirlər. Nəzərə almaq lazımdır ki, bu gün dünyada gedən ictimai-siyasi proseslərdə gənclərin rolu artıb. Azərbaycan da dünyanın bir parçasıdır. Azərbaycan gəncliyi də qaranı ağdan seçməyi gözəl bacarır. Gənclərimiz yeni informasiya texnolorgiyalarını gözəl mənimsəyirlər. Bunu etiraf etmək lazımdır ki, gənclər bu günü, gələcəyi dəyərləndirməyi daha yaxşı bacarırlar. Bu mənada gənclər YAP-ın, möhtərəm Prezidentimiz İlham Əliyevin həyata keçirdiyi siyasəti görürlər, bəyənirlər. Bu səbəbdən də həmin gənclər Prezidentimizin Sədri olduğu YAP-ın üzvü olmaq arzularını bildirirlər. Onlar həm də bu partiyada özlərinin intellektlərini, resurslarını, bacarıqlarını reallaşdırmaq imkanı görürlər. Bu mənada partiyamızda gənclərə gözəl şərait yaradılıb. Partiyamızın həyata keçirdiyi layihələr çərçivəsində gənclər özlərini təsdiq edirlər, daha da inkişaf edirlər. Bu bizim üçün də bir qürürdur. Bu günlərdə «Azərbaycan 2013:QƏLƏBƏ» «facebook» səhifəsi oxunaqlığına, üzvlərinin sayına görə birinci yerə çıxıb. Bu qrupda təmsil olunan insanların əksəriyyəti gənclərdir və bunun özü vacib bir göstəricidir. Bütün bunlar həm Prezident, həm də partiyamızın Sədri kimi cənab İlham Əliyevin apardığı siyasətə gənclərimizin verdiyi dəyər, qiymətdir. Gənclər öz gələcəklərini bu partiyada görürlər və dövlətimizə bu partiyanın xətti ilə xidmət etmək istəyirlər.

- Məlahət xanım, siz həmçinin, YAP Nəsimi rayon təşkilatının sədrisiniz. Rəhbərlik etdiyiniz təşkilatın fəaliyyəti haqqında da məlumat vermənizi istərdik...

- YAP Nəsimi rayon təşkilatı 600 min nəfərlik partiya ailəsinin bir parçasıdır. 112 ərazi ilk partiya təşkilatında təxminən 23 min nəfər birləşib. Təşkilatımızda gənclərin sayı 50 faizə çatmaq üzrədir. Biz bu gənclərin gücünə, intellektinə güvənirik.

Qeyd etmək istəyirəm ki, bizim rayon təşkilatımız Bakı şəhərinin böyük bir hissəsini özündə cəmləşdirir. Partyamızın üzvləri bütün ictimai-siyasi proseslərdə aktivlik nümayiş etdirirlər, bütün seçkilərdə fəal şəkildə iştirak edirlər. Təşkilatımızın sıraları daim genişlənməkdədir və bu proses uğurla davam edir. Biz bundan sonra da qarşımızda duran vəzifələri layiqincə yerinə yetirməyə səylə çalışacağıq.

yap.org.az

Səs.- 2012.- 21 noyabr.- S.19.