YAP xalqın sosial sifarişi nəticəsində yaranmış ümummilli partiyadır

Müsahibimiz YAP Siyasi Şurasının üzvü, Ekologiya və Təbii Sərvətlər Nazirinin müavini Firdovsi Əliyevdir

- Firdovsi müəllim, hazırda Azərbaycan xalqının böyük əksəriyyəti YAP-ın yubileyini qeyd edir. Ölkəmizin müxtəlif yerlərində böyük ruh yüksəkliyilə çoxsaylı tədbirlər keçirilir. Bu isə onu göstərir ki, xalqın YAP-a olan inamı və etimadı çox yüksəkdir. YAP-ın ümummilli partiyaya çevrilməsinin səbəbləri qismində nələri görürsünüz?

- Əlbəttə ki, bu gün Azərbaycanda ən böyük sosial dəstəyə və inama malik olan siyasi təşkilat Yeni Azərbaycan Partiyasıdır. Bu qədər insan sevgisinə nail olmaq isə bir-iki günün işi olmayıb. Elə partiyanın yaranışından bu günə qədər həyata keçirdiyi milli maraqlara uyğun siyasət onun xalqın partiyasına çevrilməsinə səbəb olub. Xüsusilə qeyd etmək istəyirəm ki, müasir siyasi partiyaların bütün xüsusiyyətlərini özündə ifadə edən Yeni Azərbaycan Partiyası təsis olunan da belə xalqın partiyası kimi imic qazanmışdı. Çünki, partiyanın yarandığı və formalaşdığı ərəfədə ictimai-siyasi atmosfer, həmçinin, sosial-iqtisadi vəziyyət bunu şərtləndirmişdi.

Xatırlatmaq yerinə düşər ki, 1991-ci ildə müstəqillik əldə olunduqdan sonra hər kəs firavan və azad həyat haqqında düşünürdü. Milli ideyanın intişar tapması hər bir azərbaycanlıda qurub-yaratmaq həvəsi formalaşdırmışdı. Amma hakimiyyətin siyasi oyunbazlar tərəfindən ələ keçirilməsi nəticəsində ölkədə xaos hökm sürməyə başladı. Tam formalaşmamış siyasi institutlar vətəndaşlarla ünsiyyət qura bilmədi, iqtisadi və sosial sahədə lazımi addımlar atılmadı, ordu quruculuğu həyata keçirilmədi, Azəbaycan adlı coğrafiyada yaşayan müxtəlif etnosların və konfessiyaların daşıyıcılarının vahid platformada birləşdirəcək ideologiya işlənmədi, həmin ərəfədə xalq hərəkatından sui-istifadə edilərək, yaradılmış siyasi partiyalar isə üzərilərinə düşən funksiyaların öhdəsindən gələ bilmədi və ya gəlmək istəmədi. Beləliklə də, cəmiyyətdə passivlik formalaşdı, müstəqillik ərəfəsindəki ruh yüksəkliyindən əsər-əlamət qalmadı. Bu da öz növbəsində dövlətçiliyin möhkəmləndirilməmiş əsaslarının dağılmasına, torpaqlarımızın Ermənistan tərəfindən işğal olunmasına gətirib çıxardı. Həmin hadisələr bizim gözlərimiz önündə cərəyan edib. Hətta, bir vətəndaş olaraq, həmin dövrün ağır zərbələrini də hiss etmişik. Elə olurdu ki, bu gün söz azadlığından və demokratiyadan dəm vuran bəzi insanlar hakimiyyətdə olduqları zaman jurnalistlərə qarşı çox qəddar rəftar nümayiş etdirirdilər. Azərbaycanın demokratikləşməsi, müasirləşməsi və müstəqilliyinin müdafiə edilməsi naminə o dövrün problemlərini qabardan media nümayəndələrini döyürdülər, maşınların yük yerlərinə salırdılar.

Məhz, belə bir şəraitdə dövlətin düşdüyü çətin durumdan çıxması və xalqın enerjisinin tərəqqiyə istiqamətləndirilməsi üçün milli maraqları təmin edəcək LİDERƏ və siyasi partiyaya ehtiyac duyulurdu. Xalq artıq xaosun hökm sürdüyü, ayrı-ayrı şəxslərə məxsus silahlı qruplaşmaların hədələr yağdırdığı, çörək sıralarının və ərzaq çatışmazlığı kifayət qədər qabarıq olduğu bir ölkədə yaşamaq istəmirdi. Bu səbəbdən də, cəmiyyətimizin ziyalı təbəqəsi insanların ümidlərini doğrulda biləcək yeganə ŞƏXSİYYƏTƏ – Ümummilli lider Heydər Əliyevə müraciət ünvanladı, Onun ölkəyə rəhbərliyə gəlməsini xahiş etdilər.

Sonrakı proseslər isə hər kəsin xatirindədir. 1992-ci ilin noyabr ayının 21-də YAP-ın Naxçıvanda təsis konfransı keçirildi, Ümummilli lider Heydər Əliyev partiyanın Sədri seçildi, Ulu öndərin hakimiyyətə gətirilməsi və dövlətçiliyin xilası üçün işləmiş şəxslər İdarə Heyətində, Siyasi Şurasında təmsil olundular.

Beləliklə də, YAP-ın yaranması hansısa qrupun maraqlarından irəli gəlmədi, əksinə xalqın sosial sifarişi nəticəsində yarandı. Ona görə də, YAP-a xalqın partiyası da demək tamamilə doğru olardı.

- Diqqətçəkən məqam ondan ibarətdir ki, Naxçıvadakı təsis konfransından sonra qısa bir zamanda respublikanın hər yerində YAP-ın şəhər və rayon təşkilatları yaradıldı. Bu hansı faktorla əlaqəli idi?

- Bilirsiniz, YAP-ın yaranması ərəsində AXC-Müsavat hakimiyyətinin anti-milli siyasətindən əziyyət çəkən və bezən insanlar respublikanın hər yerində o zamanki hakimiyyətə qarşı birləşmişdilər. Yəni, YAP-ın yaranmasına sosial sifariş həmin yerlərdən gəlirdi. Artıq demək olar ki, insanlar özləri səfərbər olmuşdular ki, Ümummilli lider Heydər Əliyevin ətrafında birləşsinlər. Amma aydın idi ki, AXC-Müsavat hakimiyyəti repressiv siyasət həyata keçirirdi, insanları təqib və həbs edirdi. YAP-ın təsis olunması sanki həmin insanların qarşısındakı siyasi-inzibati məhdudiyyəti aradan qaldırdı. Qısa müddət ərzində respublikanın hər yerində YAP-ın şəhər və rayon təşkilatları yaradıldı.

Respublikada YAP-ın sürətlə özünə tərəfdar toplamasının da əsas səbəbləri aydın idi. Ona görə də, əminliklə deyə bilərəm ki, bütün bunların səbəbi ilk növbədə, Ulu öndər Heylər Əliyev ŞƏXSİYYƏTİNƏ olan məhəbbətlə və YAP-a olan inamla bağlı idi. Xalqın sevgisinin nəticəsi idi ki, müxalifət partiyası kimi yaranmış YAP fomalaşdıqdan cəmi 6 ay sonra hakimiyyətə gəldi. YAP da hakim partiya kimi verdiyi sözləri yerinə yetirdi, xalqın gözləntilərini reallığa çevirdi.

- Firdovsi müəllim, vurğuladınız ki, YAP-ın hakim partiyaya çevrilməsindən sonra ölkədə xalqın gözləntilərini reallığa çevirdi. Bu gözləntilər nələrdən ibarət idi?

- Əvvəldə bildirdiyim kimi, xalq müstəqillikdən firavan və xoşbəxt həyat gözləyirdi. Onların gözləntiləri azad olmaqla yanaşı, sərbəst fəaliyyət göstərən vətəndaşa çevrilməkdən, terror polisindən uzaq olmaqdan, inkişaf etmiş bir şəhər və rayonların sakini kimi yaşamaqdan, xarici dövlətlərin tanınmış universitetlərində təhsil almaqdan, kreativ və qabiliyyətli nəslin yetişdiricisi kimi tarixə düşməkdən ibarət idi. Yeni Azərbaycan Partiyasının Sədri, Ümummilli lider Heydər Əliyev insanların bu gözləntilərini mərhələli şəkildə reallığa çevirməyi bacardı. Ulu öndər ilk növbədə, xalqımızı və torpaqlarımızı düşməndən qorumaq üçün güclü ordu formalaşdırdı, Ermənistanın təcavüzünün qarşısını aldı. İkincisi, Ümummilli lider Heydər Əliyev iqtisadi-sosial problemləri həll etmək üçün mühüm addım atdı – «Əsrin müqaviləsini» imzaladı. Üçüncüsü, ölkədə iqtisadi münasibətləri tənzimləmək üçün özəlləşdirmə siyasəti həyata keçirdi, aqrar islahatlara start verərək, torpaqları kəndlilərə qaytardı. Dördüncüsü, demokratik siyasi sistemin formalaşdırılması və hüquqi dövlətin təməlinin qoyulması üçün Konstitusiyanı hazırladı və xalq da onu qəbul etdi. Beşincisi, siyasi islahatlar həyata keçirildi, ölkədə ölüm hökmü ləğv edildi, mətbuat üzərindəki senzura aradan qaldırıldı. Altıncısı, sosial qanunvericilik gücləndirildi və insanların maddi rifah halının yüksəldilməsi istiqamətində ciddi addımlar atıldı. Mən burada rəqəmlər sadalayıb oxucularımızı yormaq istəmərəm. Amma hər kəs bilməlidir ki, AXC-Müsavat hakimiyyətinin 1993-cü ildə qoyub qaçdığı Azərbaycan tamamilə dəyişmiş vəziyyətə gətirildi, büdcəsi dəfələrlə artmış, siyasi-hüquqi baxımından daha da güclənmiş dövlətə çevrildi. Bir sözlə, 1993-2003-cü illər ərzində Ümummilli lider Heydər Əliyevin rəhbərliyi müasir Azərbaycan dövləti quruldu. Bu səbəbdən də, biz əminliklə və şübhəsiz olaraq, deyə bilərik ki, müasir Azərbaycanın qurucusu və banisi Ulu öndər Heydər Əliyevdir.

- Yeni Azərbaycan Partiyasının fəaliyyətindən danışarkən, Siz LİDER faktoruna da diqqət çəkdiniz. Bu mənada istərdik Ümummilli lider Heydər Əliyevin fəaliyyətilə bağlı fikirlərini söyləyəsiniz…

- Təbii haldır ki, Azərbaycanın yeni tarixinin bütöv bir mərhələsi bilavasitə dünya səviyyəli siyasətçi, zəmanəmizin fenomenal qabiliyyətə malik bənzərsiz şəxsiyyəti Heydər Əliyevin adı ilə bağlıdır. Ümummilli liderimizin adı özünü azərbaycanlı sayan hər bir kəsin qəlbində sadəliyi, səmimiyyəti, alicənablığı, vətənpərvərliyi və bütün digər yüksək insani keyfiyyətləri ilə unudulmaz izlər buraxıb. Bu dahi insanın adı Azərbaycan xalqının simvoluna, əməlləri isə şəxsi hünər rəmzinə çevrilib, həyat və fəaliyyəti doğma xalqına və torpağa məhəbbət və sədaqət meyarı olub.

Ulu öndər Heydər Əliyevin sarsılmaz polad iradəsi və qətiyyəti, xalqın tərəqqisi yolunda yorulmaq bilmədən çalışması, fədakar əməyi sayəsində müasir Azərbaycanın bünövrəsi ucaldılıb. Ulu öndər Heydər Əliyev elə bir şəxsiyyət, görkəmli siyasətçi olub ki, Onun gördüyü işləri tarixçilər uzun illər boyu öyrənəcək, tədqiq edəcək, əsərlər yazılacaq, ideyaları nəsildən-nəsillərə keçərək yaşayacaq. Bu qüdrətli şəxsiyyətin müəyyən etdiyi yol dinamik inkişafı təmin edən strateji xətt olaraq ölkəmizə və xalqımıza daim uğur gətirib. Zəngin hadisələrlə dolu gərgin dövrlərdə Ümummilli lider Heydər Əliyev Azərbaycan dövlətini ən çətin sınaqlardan məharətlə çıxararaq ölkəmizin ictimai-siyasi, iqtisadi və mədəni-mənəvi tərəqqisinə nail olub. Ulu öndər Heydər Əliyevin müstəsna xidmətlərinin ictimai-siyasi mahiyyəti hələ uzun illər tədqiqatçıların diqqət mərkəzində olacaq.

Bu dahi şəxsiyyət müstəqil Azərbaycanın sosial-iqtisadi və siyasi əsaslarının möhkəmləndirilməsində, dünyanın aparıcı dövlətlərinin etibarlı tərəfdaşına çevrilməsində, sözün həqiqi mənasında, böyük işlər görüb. Ulu öndərimizin həm keçmiş sovet dönəmində, həm də müstəqil Azərbaycanda həyata keçirdiyi layihələri, reallaşdırdığı bütün işləri sadalamaqla qurtaran deyildir. Bu böyük və bənzərsiz şəxsiyyət millətini bütün bəlalardan hifz edib qoruyub, respublikada ictimai-siyasi sabitliyi təmin edib, vətəndaş qarşıdurmasını aradan qaldırıb, ölkənin parçalanmasının qarşısını almaqla milli qurtuluşu təmin edib.

Ulu öndər Heydər Əliyevin adı bu gün, sözün həqiqi mənasında, Azərbaycan dövlətinin rəmzi kimi səslənir. Bugünkü güclü, qüdrətli Azərbaycanı O, öz əlləri ilə yaradıb, inkişaf etdirib, bütün dünyaya tanıdıb. Ümummilli liderimiz ölkəmizin siyasi, sosial-iqtisadi inkişaf konsepsiyalarını işləyib hazırlayıb, dönmədən həyata keçirilməsini təmin edib. Xalqımız Heydər Əliyev kimi Ümummilli liderilə fəxr edir, qürur duyur, əməlləri ilə Onun ideyalarını həyata keçirməyə çalışır.

- Artıq bu həqiqətdir ki, bu gün Ulu öndər Heydər Əliyevin əsasını qoyduğu siyasi kurs Prezident İlham Əliyev tərəfindən uğurlu şəkildə davam etdirilir…

- Bədi, biz sevinirik ki, Ulu öndərimizin ideyaları möhtərəm Prezident İlham Əliyev tərəfindən uğurla davam etdirilir və ötən müddət ərzində dövlətimizin başçısının yorulmaz fəaliyyəti nəticəsində Azərbaycan dünyanın ən dinamik inkişaf edən ölkələrindən birinə çevrilib. Zaman Heydər Əliyev siyasətinin alternativsizliyini və xalqın İlham Əliyevi dəstəkləməklə ən doğru addım atdığını göstərir. Bütün beynəlxalq təşkilatlar birmənalı şəkildə etiraf edirlər ki, cənab Prezident İlham Əliyev dövlət sükanı arxasına keçdikdən sonra Azərbaycanın inkişafı daha da sürətlənib, ümumi daxili məhsul istehsalının artım tempinə görə dünyanın lider dövlətlərindən birinə çevrilib. Xalq 2003 və 2008-ci illərdə Prezident İlham Əliyevə səs verməklə, əslində, Heydər Əliyev kursunun davamına, Azərbaycanın dünya birliyində özünə layiqli yer tutaraq söz sahibinə çevrilməsinə, Xəzər neftinin çoxvariantlı marşrutla dünya bazarına çıxarılmasına, tikinti, quruculuq və abadlıq işlərinin daha da genişləndirilməsinə, enerji və nəqliyyat təhlükəsizliyinin davamlılığına, ölkənin ərzaq təhlükəsizliyinin təmin olunmasına, Azərbaycanın Cənubi Qafqazdakı lider rolunun daha da möhkəmlənməsinə, sahibkarlığın inkişafına və yeni iş yerlərinin açılmasına, güclü və müasir ordu quruculuğuna, bütövlükdə Azərbaycanın sürətli və davamlı inkişafının yeni mərhələyə qaldırılmasına, ölkə vətəndaşlarının xoşbəxt və firavan yaşayışının etibarlı şəkildə təmin edilməsinə dəstək verdi. Ona görə də, Prezident İlham Əliyev fəaliyyətinin ilk günlərindən xalqın sonsuz məhəbbətini qazandı – müdrik siyasəti, Heydər Əliyev ideyalarına sədaqəti, təmkin və uzaqgörənliyi, xalqına olan qədərsiz sevgisi ilə! Bir LİDER və ŞƏXSİYYƏT kimi İlham Əliyev xarakterinin ən bariz xüsusiyyətlərindən biri – sözünün sahibi olmasıdır. Azərbaycan xalqı qəti əmindir: onun Prezidenti vəd veribsə, sözsüz yerinə yetirəcəkdir. "Azərbaycan xalqı xoşbəxt, firavan yaşamağa layiqdir və bundan ötrü əlimizdən gələni əsirgəməyəcəyik" – vədini də Prezident İlham Əliyev şərəflə yerinə yetirməkdədir. Bu mənada əminliklə deyə bilərəm ki, 2013-cü ildə də xalq yenidən Heydər Əliyevi siyasətini uğurla davam etdirən Prezident İlham Əliyevə dəstək verəcək.

yap.org.az

Səs.- 2012.- 22 noyabr.- S.5.