RAGT Azərbaycanı bütün dünyada təbliğ etmək əzmindədir Təşkilatın rəhbəri Leyla xanım Əliyevanın məqsədli fəaliyyəti öz missiyası, yükü və məsuliyyəti baxımından əhəmiyyətlidir

Fəaliyyətə başladığı zamandan xalqımızın mənəvi sərvətinin və milli mədəniyyətinin təbliği və inkişafı istiqamətində mühüm işlər görən Rusiyalı Azərbaycan Gənclər Təşkilatı çoxşaxəli fəaliyyəti ilə millət və dövlət maraqları baxımından əhəmiyyətli layihələri uğurla gerçəkləşdirir. Həyata keçirilən layihələr təşkilatın sədri, Heydər Əliyev Fondunun vitse-prezidenti, Rusiyalı Azərbaycan Gənclər Təşkilatının sədri Leyla xanım Əliyevanın vətənsevərlik hisslərinə, milli düşüncəyə söykənən fəaliyyətinin təzahürü olaraq qiymətini alır. Qurumun fəaliyyəti günü-gündən genişlənir və bütün dünyanı əhatə etməyə başlayır. Bu gün artıq RAGT yetkin və çox fəal təşkilat kimi öz üzərinə düşən missiyanı gerçəkləşdirir. Məlum olduğu kimi, təşkilatın coğrafiyası Rusiyanın 70-dən çox regionunu əhatə edir. Moskvanın 25-dən çox ali məktəbində azərbaycanlı tələbə klubları yaradılıb. RAGT bu missiyanın öhdəsindən uğurla gəlir və bu gün Rusiyanın azərbaycanlı gənclərinin hərəkətverici qüvvəsidir.

Leyla xanım Əliyevanın çoxşaxəli fəaliyyəti humanizm prinsipləri ilə silahlandığından, həyata keçirilən irimiqyaslı layihələrinin sədası inkişaf etmiş, nüfuzlu dövlətlərdən, ən mötəbər beynəlxalq qurumlardan belə eşidilir. Bu, Leyla xanımın gənc olmasına baxmayaraq, bacarıq və artıq peşəkarlığının təzahürüdür. Rusiyanın Azərbaycanlı Gənclər Təşkilatının dördüncü hesabat-seçki konfransında Leyla xanım Əliyevanın yenidən RAGT sədri seçilməsi onun fəaliyyətinə verilən qiymətin təzahürüdür. Ötən dövr ərizində Leyla xanım Əliyeva tərəfindən qarşıya qoyulmuş vəzifələrin yerinə yetirilməsi və uğurla həyata keçirilmiş layihələr bunu əsaslandırır. Müasir dövrümüzdə RAGT ətrafında aparıcı qüvvə olan gəncləri sıx birləşdirib, Rusiya və Azərbaycan gənclər təşkilatları arasında öz layiqli yerini tutub.

Həqiqətən də, Azərbaycan həqiqətlərinin bu gün dünya ölkələrində yüksək səviyyədə yayımlanmasında Leyla xanımın xidmətləri vurğulanmalıdır. Belə ki, müasir həyatımızda ölkəmizin siyasi, ictimai və mədəni mənzərəsi yüksək səviyyədə təbliğ edilir. Azərbaycan diasporu ilə əlaqələrinin genişləndirilməsi bu sahədə uğurun göstəricilərindən biridir. Rusiyadakı azərbaycanlı gənclərin sıx birləşməsində və onların Rusiya cəmiyyətinə inteqrasiya etməsində, Azərbaycanın bugünkü reallıqlarının Rusiya ictimaiyyətinə çatdırılmasında, Azərbaycan və Rusiya xalqları arasında dostluğun möhkəmləndirilməsində böyük əhəmiyyət daşıyır. Heydər Əliyev Fondunun Rusiya Federasiyasındakı nümayəndəliyinin, Rusiyanın Azərbaycanlı Gənclər Təşkilatının rəhbəri Leyla xanım Əliyevanın məqsədli fəaliyyəti beş ilə yaxın bir məsafədə öz missiyası, yükü və məsuliyyəti baxımından əhəmiyyət kəsb edir. Ölkənin sərhədlərindən kənarda azərbaycançılıq ideyasını təbliğ edən, milli-mənəvi dəyərləri qeyri-millətlərə təqdim edən Leyla xanım Əliyevanın qısa zamanda əldə etdiyi nailiyyətlər hər bir azərbaycanlı üçün örnəkdir. Müxtəlif sahələri əhatə edən layihələrin gerçəkləşməsi məqsədini qarşıya qoyan Leyla xanım gerçəkləşdirdiyi təhsil, səhiyyə, mədəniyyət, idman, sosial sahədə analoji layihələri Rusiya Federasiyasında böyük əks-səda verib. Azərbaycan mədəniyyətinin, incəsənətinin, ədəbiyyatının təbliği istiqamətində də çox mühüm işlər görülüb.

Təşkilat tərəfindən İDEA kampaniyası çərçivəsində həyata keçirilən tədbirləri də vurğulamaq vacibdir. İDEA müasir dövrün çağırışlarına cavab təşəbbüsüdür. İDEA Azərbaycanda “böyük Qafqaz beşliyi” deyilən, yox olmaq təhlükəsi ilə üzləşən beş heyvan növünü müəyyən edib. Bunlar ayı, qartal, canavar, ceyran və Qafqaz bəbiridir. Təşkilat bu məsələ ilə bağlı Azərbaycan və dünya ictimaiyyətini maksimum məlumatlandırmağı və yox olmaq təhlükəsi qarşısında olan növlərin qorunub saxlanması üçün konkret layihələri həyata keçirməyi qarşıya məqsəd qoyub.

RAGT-ın layihələrinin sayı məhdud deyildi. Leyla xanımın sözləri ilə desək, təşkilatın ən müxtəlif sahələrdə müxtəlif layihələr həyata keçirmək təcrübəsi və ustalığı artıb. Buna görə fəaliyyətinin coğrafiyası daha da genişlənmiş, Azərbaycanı bütün dünyada təbliğ etmək əzmindədir. Bu, nümayəndəliyin prioritet vəzifəsidir.

Nəzakət ƏLƏDDİNQIZI

Səs.- 2012.- 30 noyabr.- S.4.