UĞURLU 2012 - MÖHTƏŞƏM UĞURLARA DOĞRU

Arxada qoyduğumuz 2011-ci il ölkəmiz üçün uğurlu il olub. Belə ki, 2011-ci ildə ölkə qarşısında duran əsas vəzifələr öz həllini tapıb, Azərbaycanın uğurlu iqtisadi inkişafı təmin edilibdir. Azərbaycan Prezidenti İlham Əliyevin rəhbərliyi ilə ölkəmizdə həyata keçirilən sosial-iqtisadi islahatların sürətlənməsi inkişaf dinamikasının daha da möhkəmlənməsinə səbəb olub, iqtisadiyyatın modernizasiyası üçün əlverişli imkanlar yaradıb. Ölkə iqtisadiyyatının modernləşdirilməsi, siyasi, iqtisadi və sosial islahatların institusional baxımından dərinləşməsi, sosial reformaların yeni mərhələyə keçid alması makroiqtisadi məzmun təşkil edir. Geridə qoyduğumuz ilin yekunlarına görə, makroiqtisadi vəziyyət də sabit olaraq qalıb. Belə ki, ötən ildə inflyasiya 8 faiz təşkil edib, əhalinin pul gəlirləri isə 20 faizdən çox artıb. Göründüyü kimi, əhalinin pul gəlirləri inflyasiyanı iki dəfədən çox üstələyir. Ötən 8 ildə minlərlə müəssisə, 2 mindən artıq müasir məktəb, saysız-hesabsız səhiyyə ocaqları, olimpiya idman kompleksləri, mədəniyyət obyektləri tikilib istifadəyə verilib. Azərbaycanın şəhər, qəsəbə və kəndlərində genişmiqyaslı quruculuq-abadlıq işləri həyata keçirilib, onların siması müasirləşib. 2011-ci il də daxil olmaqla ötən dövrdə Azərbaycanda əhalinin rifahının yüksəldilməsi Prezident İlham Əliyevin həyata keçirdiyi daxili iqtisadi və sosial siyasətin əsas məqsədlərindən birini təşkil edib. Artıq bir milyona yaxın iş yeri açılıb, işsizliyin səviyyəsi 5,5 faizə, yoxsulluq isə 9 faizə düşüb. Ölkədə 500 mindən artıq adamı əhatə edən Ünvanlı Sosial Yardım Proqramı həyata keçirilir, 112 min ailə hər ay orta hesabla 130 dollara yaxın vəsait alır. Azərbaycanın uzunmüddətli dayanıqlı və tarazlı inkişafının təminatında isə investisiyaların cəlb edilməsi xüsusi önəm daşıyan amillərdəndir. İnvestisiyaların tələb olunan həcm və keyfiyyətinin təmin edilməsi məqsədilə ölkədə investisiya mühitinin daha da yaxşılaşdırılması qarşıda duran prioritet vəzifələrdəndir.

Regionlarda kompleks islahatlar və iqtisadiyyatın şaxələndirilməsi

Keçən müddət ərzində Prezident İlham Əliyevin rəhbərliyi ilə həyata keçirilən təmkinli, qətiyyətli, çevik və mükəmməl iqtisadi strategiya nəticəsində islahatların davamlılığı təmin edilib. Həyata keçirilən düşünülmüş iqtisadi siyasət, liberallaşmanın struktur və keyfiyyət baxımından dərinləşməsi, sahibkarlığa dövlət dəstəyinin artırılması, rəqabət qabiliyyətinin təmin olunması, kompleks islahatlar iqtisadiyyatın şaxələndirilməsinin əsas komponentləri olub. Dövlətimizin başçısı tərəfindən irimiqyaslı, məqsədyönlü islahatların ardıcıllıq və peşəkarlıqla həyata keçirilməsi ölkəmizin maliyyə qüdrətinin daha da yüksəlməsinə, valyuta rezervlərinin artmasına da zəmin yaradıb. Təkcə ötən 2011-ci ildə ölkənin regionlarında mövcud olan iqtisadi potensialdan səmərəli istifadə olunması, sosial-iqtisadi vəziyyətin yaxşılaşdırılması və iqtisadiyyatın tarazlı inkişafının təmin edilməsi infrastruktur sahələrinin bərpası və genişləndirilməsinə, yeni istehsal və emal müəssisələrinin, təhsil, səhiyyə, idman-sağlamlıq, mədəniyyət obyektlərinin istifadəyə verilməsinə səbəb olub. Regionların sosial-iqtisadi inkişafına dair ilk proqramın uğurla başa çatmasından sonra qəbul olunmuş ikinci Dövlət Proqramının icrasının cari 2011-ci ildə də sürətlənməsi qeyri-neft sektorunun inkişafına, yeni iş yerlərinin və müəssisələrin yaradılmasına, bununla əhalinin məşğulluğunun artırılmasına və yoxsulluğun azaldılmasına, regionlarda kommunal xidmət və sosial infrastruktur təminatının həcmi və keyfiyyətinin yüksəldilməsinə, iqtisadiyyata investisiya qoyuluşunun artmasına mühüm təkan verib, bu istiqamətdə geniş imkanlar açıb. Bu ilin əvvəllərindən başlayaraq, Prezident İlham Əliyevin bölgələrə müntəzəm səfərlərinin və rayonlarda əhali ilə keçirilən görüşlərinin intensiv xarakter alması, eləcə də, yerlərdə sosial-iqtisadi vəziyyətlə hərtərəfli tanış olması, regionların inkişafı, yoxsulluğun azaldılması ilə bağlı müəyyən edilmiş strateji proqramlar üzrə konkret tapşırıqlar və göstərişlər verməsi proqramın icrasının və əhatəliliyinin daha da sürətləniməsinə səbəb olub. Bu, eyni zamanda, bir daha dövlət başçısının regionların inkişafına xüsusi diqqət və qayğısının, dövlət proqramlarının icrasına birbaşa nəzarətinin göstəricisidir.

Qeyri-neft sektorunun inkişafı yeni investisiyalara şərait yaradır

Sevindirici hal ondan ibarətdir ki, 2011-ci ildə ölkə iqtisadiyyatının qeyri-neft sektoru böyük templərlə artmışdır. Ötən ildə Azərbaycanda liberal iqtisadi sistemin qurulması, sahibkarlığın inkişafına geniş şəraitin yaradılması, zəngin təbii sərvətlərdən və regionların potensialından səmərəli istifadə, qeyri-neft sektorunun inkişafı, investisiya mühitinin daha da yaxşılaşdırılması, yerli məhsulların rəqabət qabiliyyətinin yüksəldilməsi Azərbaycan iqtisadiyyatının inkişafını təmin edib. Respublikada cəlbedici investisiya mühitinin yaradılmasının nəticəsində il ərzində ölkəyə bütün maliyyə mənbələri hesabına əsaslı miqdarda investisiya qoyulub. Təqdirəlayiq haldır ki, ölkədə yaradılmış əlverişli biznes mühiti Azərbaycan şirkətlərinin maliyyə imkanlarının artmasına və onların yalnız ölkə daxilində deyil, eləcə də, xarici ölkələrdə investisiya yatırmalarına imkan yaradıb. İnfrastruktur və sosialyönümlü Dövlət İnvestisiya Proqramının icrası nəticəsində nəqliyyat, kommunal, su ehtiyatları və irriqasiya, energetika və sənaye, ekologiya, kənd təsərrüfatı, sosial infrastruktur obyektlərinin tikintisi həyata keçirilib.

Nəqliyyat sektorunun inkişafı - yeni təməllər, yeni layihələr...

Keçən il nəqliyyat sektoruna böyük investisiyalar qoyulmuşdur. Azərbaycanda bu tendensiya artıq ənənəvi mənzərəyə çevrilib. Bu sektor ölkə iqtisadiyyatı üçün çox böyük əhəmiyyət daşıyır. Avtomobil yolları tikilir, yeni təyyarələr alınır. Görülən işlər çərçivəsində Ələtdə böyük beynəlxalq ticarət limanının təməli qoyulub, gəmiqayırma zavodunun tikintisinə başlanılıb. Bütün bunlar böyük sərmayə tələb edən layihələrdir. Həyata keçirilməsi nəzərdə tutulan bütün layihələr arasında əsas layihələr artıq reallaşıb və ya artıq onların icrasına başlanıb.

Bütün bu göstəricilər ölkəmizin çox dinamik və uğurla inkişaf etdiyini deməyə əsas verir. Dünyada və Avropada iqtisadi sahədəki mənfi proseslərə baxmayaraq, Azərbaycan inamla qabağa gedir. Prezident İlham Əliyevin istiqamətləndirdiyi bugünkü siyasəti müstəqilliyimizin dönməzliyinə və əbədiləşdirilməsinə, ölkənin milli inkişafına xidmət edən həmin sağlam, möhkəm təməl üzərində qurulub. Əldə olunan uğurları təhlil edərkən bir çox maraqlı məqamlar özünü ehtiva edir. Bu tarixi nailiyyəti şərtləndirən faktorlar barədə danışarkən, ilk növbədə, nəzərə alınmalıdır ki, Azərbaycan sürətlə inkişaf edən, müasirləşən, böyük beynəlxalq nüfuza malik demokratik, dünyəvi ölkədir. Prezident İlham Əliyevin rəhbərliyi ilə Azərbaycanda qısa dövr ərzində mühüm iqtisadi və sosial proqramlar, layihələr həyata keçirildi, əhalinin rifah halının yüksəldilməsi, yoxsulluğun və işsizliyin aradan qaldırılması sahəsində böyük nəticələr əldə olundu. Dünyanın aparıcı iqtisadi, maliyyə və reytinq təşkilatlarının hesabatlarında Azərbaycanın nailiyyətləri yüksək qiymətləndirilir. Dünya İqtisadi Forumu ölkələrin rəqabət qabiliyyətliliyi ilə bağlı hesablamalarında Azərbaycan 55-ci yerə layiq görülüb. Bütün MDB məkanında iqtisadiyyatın rəqabət qabiliyyətliliyinə görə Azərbaycan liderdir. Həmçinin, 2011-ci ilin son aylarında dünyanın ən nüfuzlu araşdırma və sorğu şirkətlərindən biri olan “Gallup İnternational”ın dünyanın 51 ölkəsində apardığı “Qlobal Ümid və Ümidsizlik Barometri” adlı sorğusuna əsasən, Azərbaycan inkişaf etməkdə olan ölkələr qrupu üzrə 51 ölkə içərisində 8-ci yeri tutub. Bu da, o deməkdir ki, ölkə əhalisi gələcəyə ümid bəsləyir, növbəti ildə rifah səviyyəsinin daha da yüksələcəyinə inanır və ölkəmizin 2012-ci ildə inkişafına böyük nikbinliklə baxır. Bütün bu göstəricilər sosial-iqtisadi sahədə Azərbaycanın əldə etdiyi nailiyyətlərin dünya səviyyəsində qəbul olunduğunu təsdiq edir. Ötən il Azərbaycanın 155 ölkənin səsini qazanaraq, BMT Təhlükəsizlik Şurası kimi dünyanın ən mötəbər siyasi formatında təmsilçilik hüququ əldə etməsi ölkəmizə böyük etibarın, etimadın əyani göstəricisidir.

Həmçinin, 2011-ci ildə Azərbaycanın Avropanın ən möhtəşəm musiqi müsabiqəsi olan “Eurovision”da qələbəsi bizim gənclərimizin, cəmiyyətimizin, xalqımızın böyük nailiyyətidir. Bu qələbə bir daha Azərbaycanı bütün dünyaya tanıtdı, ölkəmizə olan marağı artırdı. Əlbəttə, qələbə, ilk növbədə, yarışmada iştirak edən gənclərimizin yüksək istedadı, bacarığı sayəsində mümkün oldu. Eyni zamanda, ötən ilin aprelində Azərbaycan Prezidentinin Sərəncamı ilə “Azərbaycan gəncliyi 2011-2015-ci illərdə” Dövlət Proqramının təsdiq olunması, dekabrın 20-də isə Gənclər və İdman Nazirliyi yanında Gənclər Fondunun təsis edilməsi Azərbaycan dövlətinin gənclərə diqqət və qayğısının bariz nümunəsidir. Beləliklə də, 2011-ci il Prezident İlham Əliyevin rəhbərliyi altında böyük inkişaf yolu keçərək, mühüm tarixi dövrə yekun vurdu və öz inkişafının yeni mərhələsinə qədəm qoydu.

Rəfiqə Kamalqızı

Səs.- 2012.- 17 yanvar.- S.6.