Hüseyn Cavidin 130 illik yubileyi ilə bağlı görüləcək işlərə start verildi

2012-ci ildə Azərbaycanın dahi şairi, böyük mütəfəkkir Hüseyn Cavidin anadan olmasının 130 ili tamam olur. H.Cavidin yubileylərinin respublikamızda və xaricdə yüksək səviyyədə qeyd olunması artıq bir ənənə halını almışdır. Bu il də yubileyə yüksək səviyyədə hazırlıq işləri görülür. H.Cavidin ev-muzeyindən aldığımız məlumata görə, yubiley münasibətilə muzey silsilə tədbirlər hazırlayır. Bu münasibətlə Hüseyn Cavidin ev-muzeyi onun özünün və ümumiyyətlə Cavidlər ailəsinin həyat və yaradıcılığını əks etdirən təqvim hazırlamışdır. Təqvimin tərtibatı olduqca maraqlıdır. Belə ki, təqvimdə Cavidlər ailəsinin həyatında baş verən tarixi məqamlar və onların izahı öz əksini tapmışdır. Təqvimin ikinci səhifəsində H.Cavidin həyat və yaradıcılığı barədə ətraflı məlumat verilmişdir. Təqvimin hər bir səhifəsində Hüseyn Cavidin əsərlərindən parçalar verilmişdir. H.Cavidin şəxsiyyətinin və yaradıcılığının tanıdılması və təbliğində bu təqvimin rolu çox böyük olacaq.

H.Cavidin anadan olmasının 130 illiyinə həsr edilmiş “Hüseyn Cavid yaradıcılığı çağdaş təfəkkür işığında” adlı beynəlxalq elmi konfrans 2012-ci il 24 oktyabr tarixində keçiriləcək. Konfrans Hüseyn Cavidin həyat və yaradıcılığına həsr olunur.

Hüseyn Cavidin anadan olmasının 130 illik yubileyinin keçirilməsi üçün hazırlıq işləri xarici ölkələrdə də böyük həvəs və intuziazmla aparılır. Belə ki, yubiley Bakıda və Naxçıvanda keçirilməklə yanaşı, Hüseyn Cavidin ev-muzeyinin direktoru filologiya elmləri doktoru Gülbəniz Babaxanlının və Azərbaycanın Özbəkistandakı fövqəladə və səlahiyyətli səfirliyinin ikinci katibi Səbuhi Əhmədovun birgə təşkilatçılığı ilə Özbəkistanın paytaxtı Daşkənd şəhərində də keçiriləcəkdir.

Yubiley tədbirinə hazırlıq çərçivəsində görülən işlərdən ən önəmlisi H.Cavidin əsərlərinin özbək dilinə tərcümə edilməsidir. Bu günlərdə tanınmış özbək şairi Usman Kuçkar “Şeyx Sənan” əsərinin tərcüməsini tamamlayıb, fevralın sonlarında isə “Səyavuş” əsərinin də tərcüməsi tamamlanacaq. Beləliklə, fevralın sonlarına H.Cavidin 3 əsərinin tərcüməsi artıq tamamlanmış olacaq. Yubiley tədbirinin keçirilməsi ərəfəsində “Topal Teymur”, “Şeyx Sənan”, “Səyavuş” pyesləri özbək dilində bir kitabda nəfis bir şəkildə nəşr olunacaqdır. Hüseyn Cavidin ev-muzeyinin və Azərbaycanın Özbəkistandakı fövqəladə və səlahiyyətli səfirliyinin birgə təşkilatçılığı ilə Özbəkistanın paytaxtı Daşkənd şəhərində düzənlənəcək H.Cavidin xatirə gecəsində kitabın təqdimat mərasimi də planlaşdırılır.

Qeyd edək ki, 2008-2011-ci illərdə H.Cavidin xeyli sayda kitabı nəşr olunmuşdur. H.Cavidin 5 cildlik külliyyatı, “Hüseyn Cavidin həyat və sənət yolu” adlı biblioqrafik göstərici, “Azərbaycanın qeyri-maddi mədəniyyət abidələri və Ərtoğrol Cavid” 10 cilddə, “Məhəbbətdir ən böyük din” adlı şairin şeirlərinin fransız dilinə tərcümə olunmuş kitabı, “Cavid hikməti” seçmə aforizmləri, çoxcildli Cavidşünaslıq tədqiqatlar toplusunun I, II, III, IV, V cildləri və digər kitablar bu sıradandır.

Zümrüd

Səs.- 2012.-31 yanvar.- S.12.