Bu gün Ulu öndər Heydər Əliyev əsil qəhrəman kimi xatırlanır

Müsahibimiz Milli Məclisin deputatı, Yeni Azərbaycan Partiyasının Xətai rayon təşkilatının sədri Hüseynbala Mirələmovdur

- Hüseynbala müəllim, Ulu öndər Heydər Əliyevin anadan olmasının 90-cı ildönümü bütün respublikada təntənə ilə qeyd olunur. Onun haqqında xatirələrinizi danışardınız?

- Ümummilli lider Heydər Əliyev sovet dönəmində də, müstəqillik dövründə də xalqına sədaqətlə xidmət etmiş, Azərbaycan coğrafiyasında yaşayan insanların qarşısında mühüm tarixi missiyanı reallaşdırmış dahi şəxsiyyət, Ulu öndər kimi xatırlanır.Ulu öndər Heydər Əliyev xalqın tələbilə 1993-cü ildə yenidən, bu dəfə müstəqil Azərbaycanın hakimiyyət başına gəldi. Azərbaycan xalqı bununla öz liderinə sonsuz inam və məhəbbətini nümayiş etdirərək, vəziyyətdən nicat yolunun yalnız Heydər Əliyevə bağlı olduğunu bildirdi.Ulu öndər Heydər Əliyev 1982-ci ildə Moskvaya gedərkən, respublikanı iqtisadi və siyasi sabitlikdə, ölkəni tərəqqidə qoymuşdu. 10 il sonra 1993-cü ildə isə müstəqil olmasına baxmayaraq, Azərbaycanı tamamilə dağılmış, müxtəlif klanlara bölünmüş, quldur qüvvələr tərəfindən talan edilmiş bir şəkildə təhvil aldı.Çox az bir müddət ərzində yenidən ölkəni dirçəltmək, siyasi institutların işini bərpa etmək, siyasi vəziyyətin sabitliyinə nail olmaq, qan tökülməsinin qarşısını almaq, yeni bazar islahatları həyata keçirmək, xalqın rifahın yüksəltmək doğrudan da, Heydər Əliyev tərəfindən nümayiş etdirilən əsil qəhrəmanlıq hesab edilə bilər.Heydər Əliyev möhkəm iradə və aydın zəka ilə xalqın gücünə arxalanaraq yeni və müstəqil Azərbaycan dövlətini qurmağa başladı və buna da nail oldu. Ümummilli liderimiz qloballaşan əsrin yeni çağırışlarına və hədəflərinə uğurla cavab tapdı.Bir faktı da qeyd edim ki, müstəqilliyimizin ilk illərində Azərbaycan beynəlxalq aləmdən faktiki təcrid olunmuş vəziyyətdə idi. Lakin Ümummilli liderimiz Heydər Əliyev qısa bir zamanda sabitliyi bərpa etməyə, ölkəni dinamik inkişaf yoluna çıxarmağa nail oldu. Azərbaycanda hüquqi, demokratik dövlət və vətəndaş cəmiyyəti quruculuğu istiqamətində böyük islahatlar həyata keçirilməyə başlandı. Ümummilli liderimiz Heydər Əliyev qısa zamanda MDB dövlətlərilə münasibətləri bərpa etdi. Bir çox dünya liderləri belə Heydər Əliyevin məsləhətlərinə və köməyinə eytiyac duyduğunu gizlətmirdi. Bu səbəbdəndir ki, bu gün Heydər Əliyev əsil qəhrəman kimi xatırlanır, Onun fəaliyyəti dünya liderləri tərəfindən də yüksək dəyərləndirilir.Böyük siyasətçilər, dövlət və ictimai xadimlər çox zaman bir-birlərini qiymətləndirməyə çalışırlar. Əgər ancaq rəsmi nitqlər və məktublardan nə isə öyrənməyə çalışsaq, onda yalnız müdrik və qəhrəman obrazlarını görə bilərik.Türkiyənin sabiq baş naziri Süleyman Dəmirəl Heydər Əliyevi şərqlilərə məxsus bəlağətlə «Azərbaycanın demokratik inkişafı naminə sinəsini qalxan edib qəhrəmanlıq edən əziz qardaşı» adlandırırdı.YUNESKO-nun baş direktoru Federiko Mayer Heydər Əliyevə müraciətlə «Siz dünya miqyasında qəbul edilmiş görkəmli lidersiniz» demişdi. Bu, doğrudan da, belədir.Fakt ondan ibarətdir ki, etiraflar çoxdur. Amerika diplomatiyasının eks-komandoru xanım Olbrayt da Heydər Əliyev haqqında fikirlərini deyərkən, «bu cür təntənə ilə qarşılanan ikinci prezident görmədim» bildirib.ABŞ diplomatiyasının nəhənglərindən sayılan Henri Kissincer isə məktubunda böyük bir proqram əhatə etmişdi. O, vurğulayıb ki, öz qarşısında ABŞ və Qərb dövlətlərilə əlaqələrin gücləndirilməsi məqsədini qoyan Heydər Əliyevin fəaliyyəti təqdirəlayiqdir. O, bazar iqtisadiyyatının gücləndirilməsi işinə xeyli zəhmət sərt etmişdir. Heydər Əliyev müstəqilliyin qorunması istiqamətində inadkarcasına və qətiyyətlə mübarizə aparır.Təbii ki, bu cür fikirlərin sayını dəfələrlə artırmaq mümkündür. Lakin bu cür fikirlərin hamısının ana xəttini Ümummilli lider Heydər Əliyevin xarakteri, Onun titanik fəaliyyəti, düşüncəsi və digər fenomen xüsusiyyətləri təşkil edib. Yəni, taleyin Ona bəxş etdiyi rolu artıqlaması ilə oynaya bildi. Onun bu tarixi məkanda etdiklərini isə təkcə bugünkü deyil, gələcək nəsillər də dönə-dönə qiymətləndirəcək.

- Ümummilli lider Heydər Əliyev müstəqil Azərbaycana rəhbərliyi dönəmində bir çox möcüzələrə imza atdı. Onlardan biri, hətta, birincisi «Əsrin müqaviləsi» oldu. Məhz, Azərbaycanı çiçəkləndirən bu cür möcüzələr hansı amillərin hesabına baş tuturdu?

- Müxtəlif xalqların «nəticə işin tacıdır» kimi və ya buna oxşar deyimləri var. Yəni, geoloq əməyinin tacı yerin alt qatlarında gizlənən sərvətlərin kəşfidir, kəşfiyyat buruğundan göyə fışqıran neft fəvvarəsidir. Eyni zamanda, uğurlu fəaliyyət üçün hər kəsdə də olmayan, iradə amili də vacib faktor kimi qeyd olunmalıdır. Emersonun kəlamı ilə desək, mümkün olmayanı yalnız insan mümkün etməyə qadirdir. Müxtəlif zamanlarda filosoflar, yazıçılar, siyasətçilər insan iradəsinin təbiəti haqqında düşünüblər. Cek London iradəni sehirkar vasitə adlandırıb. Hansı daşlardan hörülmüş olsa da, «dünyada elə bir möhkəm divar tapılmaz ki, insan iradəsi və düşüncəsinin yolunu kəsə bilsin», - bu isə Braziliya yazıçısı Jorji Amadunun kəlamıdır.Xarakter isə mükəmməl tərbiyə edilmiş iradədir. İradə sərkərdənin də, dövlət xadiminin də, alimin də amalını əmələ çevirən qüvvədir, qüdrətdir. İradə – Suvorov, Jukov, de Qoll, Ruzvelt, Korolyov və Mendeleyev kimi şəxsiyyətlərin, xarakterlərin də özəyi və özülüdür. Məhz, Ümummilli lider Heydər Əliyevin də bu cür iradəsi, möcuzələr yaradacaq xarakteri var idi. Böyük idarəçilik təcrübəsinə və reallığa söykənən iradə - Heydər Əliyevin məhz bu məziyyətləri neft strategiyasının uğurla gerçəkləşdirilməsini şərtləndirmişdi.Neftçi Baba bu təsərrüfatda öz işini ağıllı və səmərəli qurmaqla, «Əsrin müqaviləsi»nin üç yaşı tamam olandan sonra ilkin neftin çıxarılması əlamətdar hadisə kimi qeyd olundu. O zaman Bakı bayram edirdi. Yeni yataqdan çıxan «qara qızıl» isə ağ günlərdən xəbər verir. Ənənəyə görə bu təbii sərvətdən azca üzə yaxmaqla bayramlaşırdılar. Heydər Əliyev də, o zaman ARDNŞ-ın vitse-prezidenti İlham Əliyev də, fəxri qonaqlar da bu neftçi adətinə əməl edirdilər.Yeni neft strategiyasının parlaq göstəricisi yüz milyonlarla dollar vəsaitin toplandığı Neft Fondudur. Bu gün sözügedən vəsait sosial problemlərin həllinə, bütün resrublika vətəndaşlarının yaşayışının yaxşılaşdırılmasına sərf edilir.Azərbaycana gələn sərmayələrin məbliği bir çox MDB ölkələrinin göstəricilərini qabaqlayır. Bu yalnız iqtisadi sərfəliliklə deyil, həm də respublikadakı sabit iqlimlə, demokratik və hüquqi əsasların bərqərar olmasıyla şərtlənir. Xarici mütəxəssislər, tərəfdaşlar bu cəhəti xüsusi vurğulayırlar. Məhz, bu gün neft strategiyası nəticəsində Azərbaycan 7 kəmərlə neft-qaz ixrac, dünyanın onlarla dövlətinə karbohidrogen resurs nəql edir. Azərbaycan xalqı isə ixrac olunanlardan əldə etdiyi maliyyə əsasında, müasir həyat standartlarını mənimsəyir.- Ümummilli liderimizin xalqımızın qarşısında reallaşdırdığı tarixi missiyalardan birini də Azərbaycanın müstəqilliyinin əbədiliyini təmin etmək üçün siyasi varisini elan etməsi idi…

- Əvvala onu deyim ki, filosofların böyük müəllimi Konfutsi vaxtı ilə yazırdı ki, «dahilər ölüm qabağı çox mühüm işlər haqqında düşünürlər». Heydər Əliyevin düşüncəsində də bu məqamda ən mühüm iş müstəqil Azərbaycanın gələcək taleyi idi.

Düşüncələr Onu rahat buraxmırdı. Ölüm zaman fürsətini hər an əlindən ala bilərdi deyə gözünə yuxu getmirdi. Axı Onun, müstəqilliyinə XX əsrin son onilliyində qovuşmuş, dünyanın amansız mübarizəsində azad ölkə adının təsdiqinə yenicə nail olmuş, sağının-solunun diş qıcadığı Azərbaycan adlı müqəddəs məmləkəti başsız qoyub getməyə sadəcə haqqı yox idi. Özü buna belə qərar vermişdi. Çünki bilirdi ki, Ona «Baba» deyən millətin, xalqın onun özünə gümanları nə qədər çox olsa da, sözünə ehtiyacı daha böyükdür. O bilirdi ki, Azərbaycanın müstəqilliyi hələ o qədər də möhkəm deyildi ki, onun gələcəyi üçün narahat olmayasan. Bəs yarımçıq qoyduğu işlər necə olsun? Azərbaycanın gələcəyinin asılı olduğu bu işləri kim tamamlasın?Heydər Əliyevin son qərarı, əslində, Azərbaycana son borcu, son xidməti idi. Bu qərardan Azərbaycan dövlətinin taleyi asılı idi. Heydər Əliyev bu son borcunu da şərəflə yerinə yetirdi. Onun doğma xalqına ünvanladığı son müraciət Vətənə ləyaqətlə xidmətin son nümunəsi idi. Dəbdəbədən, ritorikadan uzaq, xalqın qavradığı dildə, Heydər Əliyevin üslubunda olan son dərəcə səmimi müraciət «İnanıram ki, mənim axıra çatdıra bilmədiyim taleyükü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm» sözlərilə bitirdi.2003-cü il oktyabrın 3-də respublikanın əksər qəzetləri unudulmaz Prezident Heydər Əliyevin bu müraciətini birinci səhifədə dərc etdilər. İlk təəssürat xalqı kövrəltdi. Onlar müraciəti Ümummilli liderin vəsiyyəti kimi qəbul edib, ona əməl etməyi özlərinə borc bildikləri bu əməl Azərbaycanın müstəqilliyininə əbədiliyinə, iqtisadi tərəqqinin, demokratiyanın dönməzliyinə xidmət etdi. Bu gün Prezident İlham Əliyevin Ulu öndər Heydər Əliyevin siyasi kursunu layiqincə davam etdirməsi nəticəsində Azərbaycan qlobal əhəmiyyətli ölkəyə çevrilib, xalqımızın rifahı isə dəfələrlə yüksəlib.

- Hüseynbala müəllim, öncə qeyd etdiyimiz kimi, artıq respublikada Ulu öndərin 90 illik yubileyi münasibətilə tədbirlər keçirilir. YAP Xətai rayon təşkilatı bu mənada hansı işləri görür?

- Doğru qeyd edirsiniz ki, Ümummilli liderimizin xatirəsi müxtəlif tədbirlərlə ümumrespublika səviyyəsində qeyd olunur. Bu cür tədbirlər əlbəttə ki, YAP Xətai rayon təşkilatı tərəfindən də rayonumuzda təşkil edilir və həyata keçirilir. Bununla bağlı isə tədbirlər planımız var və ona uyğun möhtəşəm işlər reallaşdıracağıq.Ümumiyyətlə, bu tədbirlərin əsas mahiyyətini Ulu öndərimizə olan xalq sevgisi, Onun ideyalarına sadiqlik təşkil edir. Düşünürəm ki, hər il olduğu kimi, bu il də Ümummilli liderimizin xatirəsinin yad edilməsi yüksək səviyyədə baş tutucaq.

Səs.- 2013.- 6 aprel.- S.10.