Ulu Öndər Heydər Əliyev Azərbaycanın qurucusu və memarıdır

"Səs" qəzetinin redaksiyasında Ulu Öndər Heydər Əliyevin 90 illik yubileyinə həsr olunmuş dəyirmi masa keçirildi

Dünən "Səs" qəzetinin redaksiyasında Ulu Öndər Heydər Əliyevin anadan olmasının 90-cı ildönümünə həsr olunmuş dəyirmi masa keçirildi. Dəyirmi masada YAP-ın Siyasi Şurasının üzvü, millət vəkili Musa (Urud) Quliyev Yeni Azərbaycan Partiyası Qadınlar Şurasının sədri Nurlana Əliyeva, YAP Siyasi Şurasının üzvü Vilayət Əliyev, YAP Nizami rayon təşkilatının sədri, Milli Məclisin deputatı Sədaqət Vəliyeva, YAP Nəsimi rayon təşkilatının sədri, millət vəkili Məlahət İbrahimqızı, millət vəkili Tahir Rzayev, Bakı şəhər Gənclər və İdman Baş İdarəsinin rəisi Raqif Abbasov, Azərbaycan Dövlət İqtisad Universitetinin ictimaiyyətlə əlaqələr və tələbələrlə iş üzrə prorektor əvəzi Zəfər Bayramov iştirak edirdilər.Tədbiri giriş sözü ilə açan "Səs" qəzetinin baş redaktoru Bəhruz Quliyev qeyd etdi ki, "Səs" qəzeti cəmiyyətin maraq dairəsində olan ən aktual, əhəmiyyətli mövzular çərçivəsində dəyirmi masalar təşkil edir. Növbəti dəyirmi masanın Ulu Öndərin 90 illik yubileyinə həsr olunduğunu tədbir iştirakçılarının diqqətinə çatdırdı. O bildirdi ki, Prezident İlham Əliyevin Ulu Öndərin 90 illiyinin qeyd edilməsi ilə bağlı imzaladığı məlum Sərəncama əsasən respublika miqyasında müxtəlif səpkili tədbirlərin keçirilməsi planlaşdırılıb: "Biz də "Səs" qəzeti olaraq cəmiyyətdə nüfuz sahibi olan bir neçə ziyalının iştirakı ilə Ulu Öndərin Azərbaycan müstəqilliyinin möhkəmləndirilməsi və formalaşdırılması istiqamətində gördüyü mühüm işlərə bir daha nəzər salmağa qərar verdik. Ümummilli Lider Heydər Əliyevin istər sovet məkanında yaşadığımız illərdə - 1969-cu ildən başlayaraq Azərbaycanın Birinci Katibi vəzifəsində çalışdığı zamanda, istərsə də 1993-cü ildə hakimiyyətə qayıdışından sonra müstəqil Azərbaycanın ictimai-siyasi və mədəni həyatında baş verən dönüş, inkişaf, eləcə də, ölkəmizin dünya məkanında özünəməxsus yer tutması Onun məqsədyönlü fəaliyyətinin məntiqi nəticəsidir. Heydər Əliyev 1993-cü ildə, ölkəmizdə siyasi böhran yaşandığı, vətəndaş müharibəsi təhlükəsi yarandığı, Ermənistanın təcavüzünün gücləndiyi bir vaxtda siyasi hakimiyyətə qayıdaraq Azərbaycanda ictimai-siyasi sabitliyin yaradılması üçün ciddi və təxirəsalınmaz addımlar atdı. Ulu Öndər ölkədə ictimai-siyasi, iqtisadi sabitliyin yaradılmasına uzaqgörən, məqsədyönlü siyasəti ilə nail oldu".B.Quliyev belə bir Tarixi Şəxsiyyətin 90 illik yubileyi ərəfəsində təşkil olunan tədbirdə Heydər Əliyevin hakimiyyəti dövründə yaşayan və ölkənin ictimai-siyasi və mədəni həyatında baş verən olayların şahidi olan iştirakçılara Ulu Öndərin fəaliyyəti, ölkənin çətin anlarında Onun atdığı addımlar və qərarlar ətrafında fikirlərini bölüşməyi təklif etdi.

"SƏS" QƏZETİNİN ƏMƏKDAŞI:

- Musa müəllim, yaxşı olardı ki, Ulu Öndərin Azərbaycan ictimai-siyasi, mədəni həyatında gördüyü işlərə diqqət yetirib, Heydər Əliyevin Azərbaycanın müstəqilliyi, dövlətçiliyi baxımından məqsədli fəaliyyətini xarakterizə edərdiniz.

HEYDƏR ƏLİYEVİN MƏQSƏDYÖNLÜ SİYASƏTİ NƏTİCƏSİNDƏ HƏLƏ SOVET DÖVRÜNDƏ AZƏRBAYCANIN İNKİŞAF KONSEPSİYASI İŞLƏNİB HAZIRLANDI

MUSA QULİYEV:

- İlk olaraq, "Səs" qəzetinin mövcud olan bu ənənəsinin davamlılığına görə, minnətdarlığımı bildirmək istəyirəm. Bugünkü dəyirmi masa da yaşadığımız zaman üçün əhəmiyyətli bir mövzu üzərində qurulmuşdur. Ulu Öndərin Azərbaycan tarixində gördüyü işlərin sayı o qədərdir ki, bu yola nəzər salıb, ictimai-siyasi həyatdakı rolunu bir daha xarakterizə edib səciyyələndirmək maraq doğurur. Azərbaycan xalqının bugünkü inkişafı, gələcək uğurlarımız hər zaman Ulu Öndərin xatirəsinin məhz belə böyük qürurla yad edilməsinə səbəb olacaq. Tarixdən bəllidir ki, Azərbaycan xalqı özünün böyük şəxsiyyətləri ilə tanınıb. Belə ki, Azərbaycanın görkəmli hərbi xadimləri, tarixçiləri, elm fədailəri, sənətkarları olmuş və bu gün də var. Amma Heydər Əliyev siyasi görüşü, məfkurəsi ilə bütün bu insanların zirvəsində duran şəxsiyyətdir. Belə ki, Heydər Əliyev heç bir tarixi şəxsiyyətin Azərbaycan xalqının xoşbəxt gələcəyi naminə görmədiyi işlərə imza atıb. O, müstəqil Azərbaycan dövlətini qurdu, yaratdı və onun əbədiyaşarlığını təmin etdi. Müstəqil Azərbaycanın konsepsiyasını yaratdı və xalqı bu dövlət ətrafında birləşdirə biləcək ideyanın müəllifinə çevrildi. Heydər Əliyev həyatını Azərbaycan xalqının tanınması və inkişafı üçün həsr etmiş bir şəxsiyyətdir.Azərbaycanın sovet imperiyasının tərkibində yaşadığı tarixi dövrə nəzər yetirək. 1969-cu ilin 14 iyul tarixində Heydər Əliyevin Azərbaycanın Birinci Katibi təyin olunduğu zamanda ölkəmiz SSRİ-nin tərkibində olan respublikalar sırasında ən geridə qalmış ölkələrdən biri idi. Sadəcə olaraq, Azərbaycan aqrar xammal ölkəsi idi. Etiraf edək ki, Azərbaycanın həmin dövrdə elmi potensialı, sənaye potensialı demək olar ki, yox idi, sosial-mədəni tərəqqi də nəzərə çarpmırdı. Heydər Əliyevin məqsədyönlü siyasəti nəticəsində sovet dövründə Azərbaycanın inkişaf konsepsiyası işlənib hazırlandı. 1969-cu ilin avqust ayında keçirilən plenium demək olar ki, bütün dünyaya səs saldı. Heydər Əliyev SSRİ-yə göstərdi ki, əvvəlki qaydada yaşamaq və işləmək mümkün deyil. Həmin dövrdən etibarən Azərbaycanda aqrar sahədə inkişaf özünü büruzə verməyə başladı. Üzümçülük, pambıqçılıq sahəsində nailiyyətlər əldə olundu və Azərbaycanı bir sıra uğurlar müşayiət etdi. Eyni zamanda, Azərbaycanın sənaye potensialı yarandı. Artıq Sovet İttifaqının son dövründə Rusiya ilə yanaşı, Azərbaycan da özü-özünü təmin etmək potensialına malik idi. Azərbaycanın ali təhsil ocaqlarının sayının çoxalması, eləcə də, maddi-texniki bazasının güclənməsi, minlərlə abituriyentin SSRİ-nin müxtəlif təhsil ocaqlarına göndərilməsi və s. müstəqil Azərbaycanın inkişafı üçün sovet dönəmində qoyulan bir təməl idi. Keçmiş SSRİ məkanının ali təhsil ocaqlarında azərbaycanlıların təhsil alması üçün yaradılan şərait, sözsüz ki, böyük əhəmiyyət kəsb edirdi. Eyni zamanda, Naxçıvanski adına Hərbi Məktəbinin Azərbaycan dövlətində - müsəlman ölkəsində yaradılması özü bir cəsarət, qətiyyət tələb edən amildir.Azərbaycan müstəqilliyini 1991-ci ildə rəsmi olaraq elan etmiş olsa da, reallıq onu göstərir ki, ölkədə quruculuq-abadlıq işlərinin aparılması, siyasi sabitliyin təminatı Heydər Əliyevin hakimiyyətə qayıdışı - 1993-cü il tarixi ilə bağlıdır. Heydər Əliyev ölkədə hökm sürən hərc-mərcliyin, vətəndaş müharibəsinin, dövlətin parçalanmasının qarşısını aldı. 1990-cı ilin sonlarında Azərbaycanda artıq iqtisadi inkişafı dövr başlandı.

"SƏS" QƏZETİNİN ƏMƏKDAŞI:

- Vilayət müəllim, Ulu Öndər Heydər Əliyevin hakimiyyəti dövründə idarəçiliyin, azərbaycançılıq məfkurəsinin, dövlətçilik siyasətinin mahiyyətinə nəzər salıb, bu gün cəmiyyət tərəfindən bu gerçəkliklərin necə səciyyələndirərdiniz?

AZƏRBAYCANIN GÖZƏLLƏŞMƏSİ, İQTİSADİ İNKİŞAFI, SİYASİ SABİTLİYİ, ELMİ POTENSİALI, TURİZM İMKANLARI HƏR BİR AZƏRBAYCANLIYA MƏMLƏKƏTİMİZLƏ BAĞLI QÜRUR HİSSİ KEÇİRMƏYƏ ƏSAS VERİR

VİLAYƏT ƏLİYEV:

- Ulu Öndər Heydər Əliyev bütün keyfiyyətləri ilə bəşəriyyətdə nadir şəxsiyyət olaraq yer alıb. Bütövlükdə türk dünyasını götürsək, çox tanınmış şəxsiyyətlər olub. Amma konkret olaraq, deyim ki, bir əsrdə türk dünyasının iki böyük nəhəngi tarixdə silinməz izlər salıb - Heydər Əliyev və Mustafa Kamal Atatürk. Ayrı-ayrılıqda dövlətlərin yetirmələri olan bu Şəxsiyətlər bəşəriyyət üçün, türk dünyası üçün əvəzsiz xidmətlərə malikdirlər. Onların hər biri dünyaya açılan qapıda xalqına məxsus milli dəyərləri yaymağa, təbliğ etməyə qadir olan Simalardır. Hər iki Şəxsiyyət dövlətçiliyi yaradıb, xalqı əsarətdən xilas ediblər. Heydər Əliyev şəxsiyyəti və gördüyü işləri vurğulamaq üçün aylarla zaman lazımdır. Bugünkü Azərbaycan reallıqları məhz Onun məqsədli fəaliyyətini əks etdirir. Azərbaycanın 200 il keçə bilmədiyi inkişaf yolunu Heydər Əliyev qısa bir zaman məsafəsində keçmişdir. Dövlətin bazasını, bünövrəsini quran Heydər Əliyevdir. Heydər Əliyev cismani dünyasını dəyişməzdən öncə Azərbaycan dövlətinin gələcəyini belə düşünmüş və Azərbaycan xalqına müraciət edərək müasir dövrdə dövlət başısı missiyasını daşıya biləcək, İlham Əliyevin Prezidentliyə layiq olduğunu irəli sürmüşdür. Bu gün Azərbaycanda gedən inkişafın və əldə olunan nailiyyətlərin nəticəsidir ki, dünya ölkələri Azərbaycanla əlaqələrini genişləndirir. Dünyanın Amerika, Fransa, Almaniya, İngiltərə kimi ölkələri Azərbaycanla əlaqələri müxtəlif aspektlərdə qurur, genişləndirir ki, bunun da təməli Ulu Öndər tərəfindən qoyulmuşdur. Sovet imperiyası dağıldıqdan sonra bütün sahələrdə olan böhran vəziyyətdən çıxmaq, ölkəni inkişafa doğru aparmaq təbii ki, böyük siyasi görüş, məqsədli fəaliyyət, iradə, məntiq tələb edirdi. Bu gün biz yeraltı sərvətlərimizdən qürur duyuruq. Təbii ki, dünyanın bir çox ölkələri də məhz bu maddi, yeraltı sərvətlərinə görə Azərbaycanı tanıyır. Onu da xüsusi qeyd etmək yerinə düşər ki, ölkədəki sabitlik, eləcə də, Azərbaycanın bütün şərtlərə lazımı səviyyədə əməl etməsi, dünya ölkələri ilə əməkdaşlığın davamlılığına səbəb olan amillərdir. Bu gün Azərbaycanın gözəlləşməsi, iqtisadi inkişafı, elmi potensialı, turizm imkanları hər bir Azərbaycanlıya məmləkətimizlə bağlı qürur hissi keçirməyə əsas verir. Bütün bunların əsası Heydər Əliyevin fəaliyyətinin məntiqi nəticəsidir. Azərbaycanda beynəlxalq festivalların, konfransların və s. mötəbər tədbirlərin keçirilməsi Azərbaycanda hökm sürən sabitilikdən, əmin-amanlıqdan xəbər verir. Heydər Əliyev çox böyük şəxsiyyət olub, çox böyük şəxsiyyət olaraq da tarixdə əbədiyaşarlıq qazanıb.

"SƏS" QƏZETİNİN ƏMƏKDAŞI:

- Ulu Öndər Heydər Əliyevin siyasi düşüncəsi, məqsədyönlü fəaliyyəti, dövlətin müstəqilliyinin qorunması və təməlinin daha da möhkəmləndirilməsi məqsədi ölkə həyatının bütün sahələrinin inkişafına yönəlmiş və bunun məntiqi olaraq Azərbaycan qısa bir zamanda uğurlara sahib olmuşdur. Məlahət xanım, bütün bunların sırasında Dahi Öndər Heydər Əliyev fəaliyyətində qadın siyasəti, vətəndaş cəmiyyətinin formalaşmasında qadınların rolu diqqətdə olmuş, buna xüsusi önəm vermişdir. Ulu Öndərin qadın siyasətini necə qiymətləndirərdiniz?

ZAMAN ÖTDÜKCƏ HEYDƏR ƏLİYEVƏ VERİLƏN QİYMƏT DAHA DA ALİLƏŞİR, ZƏNGİNLƏŞİR

MƏLAHƏT İBRAHİMQIZI:

- Azərbaycanın dövlət qurucusu və yaradıcısı Ulu Öndərin 90 illik yubileyinin keçirilməsi ilə bağlı bu gün təşkil etdiyiniz dəyirmi masa ilk tədbirlərdən biri olduğuna görə "Səs" qəzetinə öz minnətdarlığımı bildirirəm. Ulu Öndər elə bir simadır ki, hər gün Nurlu Simanın gördüyü işləri, əməlləri xatırlayır, xoş təəssüratlar yaşayırıq. Zaman Ulu Öndərin gördüyü böyük işlərə öz qiymətini verib. Qeyd edim ki, yaşadığımız sovet dövründə Ulu Öndər Moskvaya Siyasi Büroya dəvət olunduqdan sonra Azərbaycan artıq tamam başqa bir dövrünü yaşayırdı. Heydər Əliyevin başladığı bəzi işlər yarımçıq qaldı. Azərbaycanda yaşanılan durğunluq dövrü, sonrakı illərdə sovet hakimiyyətinin dağılması ölkəmizdə siyasi vəziyyətin dəyişməsi ilə nəticələndi. Bütün sahələrdə yaranmış böhran, anarxiya, xaos dövlətimizin xəritədən silinmək təhlükəsini ortaya qoymuşdu. 1990-cı ildə 20 Yanvar hadisəsində xalqımızın başına gətirilən oyunlar, blokada vəziyyəti artıq Azərbaycanın Heydər Əliyev Şəxsiyətinə böyük bir tələbatın olduğunu göstərirdi. Heydər Əliyevin xalqın istək və təkidi ilə 1993-cü ildə hakimiyətə qayıdışı Ona göstərilən ən böyük etimad idi. Müraciət Azərbaycanın düşmüş olduğu bu xaosdan qurtarmaq üçün ünvanlanmışdır. Ulu Öndər bu çağırışa müsbət cavabını verdi. Heydər Əliyevin xalqın təkidli tələbi ilə Azərbaycana qayıdışı Azərbaycanın varlığını qorudu. Onun mövcudluğunu qorudu. Bu gün Azərbaycan varsa, bizlər varıqsa, birmənalı olaraq deyə bilərik ki, bu Ulu Öndər Heydər Əliyevin xidmətləridir. Sabit ölkənin vətəndaşıyıqsa, bu, Heydər Əliyevin xidmətləridir. Bu gün Azərbaycanda təməli qoyulmuş işlər Heydər Əliyevin bütövlükdə həyatını həsr etdiyi fəaliyyətinin məntiqi nəticəsidir. Heydər Əliyev Azərbaycanı uğurlu gələcəyə aparan strategiyanı müəyyənləşdirdi. Zaman ötdükcə, Heydər Əliyevə verilən qiymət daha da aliləşir, zənginləşir. Heydər Əliyev elə bir siyasi simadır ki, Onun fəaliyyəti ilə bağlı danışdıqca sona yetməz.

(Ardı var)

Zümrüd BAYRAMOVA

Səs.- 2013.- 14 fevral.- S.8-9.