Qürur və fəxarət yeri- Azərbaycan gəncliyi

Müsahibimiz Sumqayıt YAP gənclər birliyinin sədri Elmar Məmmədovdur

Elmar Məmmədov: "Dünyada öz gəncliyinə, bu qədər diqqət ayıran və qayğı göstərən ikinci Prezident tapmaq çətindir"

- Elmar müəllim, Azərbaycan gəncliyinin ölkənin ictimai-siyasi həyatında fəallığını qənaətbəxş hesab etmək olarmı?

- Bu gün ki, Azərbaycan gəncliyi ölkənin ictimai-siyasi həyatında böyük fəallıq göstərir. Gənclərin ictimai-siyasi həyatda rolunun artırılması, onların layiqli vətəndaş kimi yetişməsi, elmi biliklərinin daha da təkmilləşdirilməsi, həmçinin, asudə vaxtlarının səmərəli təşkili istiqamətində də bir çox layihələr həyata keçirilmiş və bu istiqamətlərdə işlər davam etdirilir. YAP üzvlərinin fəallığı ölkə Prezidentinin həyata keçirdiyi siyasətin dəstəklənməsi deməkdir. Fərəhli haldır ki, Prezident İlham Əliyev YAP üzvlərinin cəmiyyətdə gedən ictimai-siyasi proseslərdə nümayiş etdirdikləri fəallığı yüksək qiymətləndirməklə bərabər, bu yönümdəki fəaliyyətin daha da genişləndirilməsini məqsədəuyğun sayır. "Gənclərin təhsilə, elmə, müasir informasiya-kommunikasiya texnologiyalarına olan marağının artması, vətənpərvərliyi və ictimai-siyasi fəallığı gələcəyə böyük inam yaradır. Prezident İlham Əliyevin ən çox diqqət yetirdiyi və prioritet hesab etdiyi sahələrdən biri məhz Azərbaycan gəncliyi olub. Dövlət başçısı gənclərin 4 forumunu keçirməklə yanaşı, gənclər və idmançılarla Bakıda və bölgələrdə onlarla görüş keçirib. Məhz Prezidentin təşəbbüsü ilə Azərbaycan gəncliyi ilə bağlı 2005-2009, 2011-2015-ci illəri əhatə edən iki Dövlət Proqramı qəbul edilib. İndi Azərbaycan gəncləri dövlət hesabına dünyanın ən qabaqcıl ali məktəblərində təhsil alırlar və dünyanın ən təminatlı gəncləri sırasında öncül yerlərdə dayanırlar. Mən onu söyləmək istəyirəm ki, bəlkə dünyada öz gəncliyinə, bu qədər diqqət ayıran və qayğı göstərən ikinci Prezident tapmaq çətindir.

- Yeni Azərbaycan Partiyasına seçilməklə nəyi özünüzə məqsəd seçdiniz?

- Ölkədə və xaricdə gedən siyası proseslərə qoşulmaq , Azərbaycanın tarixini, reallıqlarını, Azərbaycanın uğurlarını adi bir ictimai təşkilatlar tərəfdən yox, siyasi bir partiya vasitəsi ilə dünyaya çatdırmaq ücün seçdik . Mən bir gənc olaraq YAP-ın sıralarına daxil olmaqla ölkədə gedən siyasi proseslərdə, seçki orqanlarında yaxından iştirak etməyə başlamışam. YAP Azərbaycan tarixində yeganə partiyadır ki, yaranarkən siyasi hakimiyyətə gəlməyi, hakimiyyət uğrunda mübarizə aparmağı yox, ölkəni mövcud böhrandan çıxarmağı qarşısına məqsəd kimi qoymuşdur . Azərbaycan tarixində indiyə qədər 600 mindən çox üzvü olan siyasi partiya olmayıb. Bu rəqəmə sadəcə statistika nöqteyi-nəzərindən baxılmamalıdır. Bu, insanların YAP-a, partiyanın yaradıcısı Ulu Öndər Heydər Əliyevin zəngin siyasi irsinə, YAP-ın Sədri, ölkə Prezidenti İlham Əliyevin həyata keçirdiyi siyasətə münasibəti, Azərbaycandakı ictimai-siyasi duruma verdikləri yüksək qiymətin göstəricisidir. Ölkəmizin əldə etdiyi bütün uğurların müəllifinin YAP olduğunu qeyd edə bilərəm. Partiyamız bu illər ərzində güclənibdir, aparıcı partiyaya cevrilibdir. Heç bir siyasi qüvvə Yeni Azərbaycan Partiyası ilə rəqabət aparmaq iqtidarında deyil. Hətta digər bütün siyasi qüvvələr birləşsələr, yenə də bizim işimizə, siyasətimizə bunun heç bir təsiri olmayacaqdır.

- Prezident İlham Əliyevin gənclərlə bağlı təsdiq etdiyi Dövlət Proqramının gənclərin mənzil- məişət problemlərinin həllinə hansı təsirləri olub?

- İpoteka kreditlərini xüsusilə qeyd etmək yerinə düşər. Çünki bu gün sosial ipoteka gənclərin sosial-məişət problemlərinin həllində böyük yer tutur və bundan daha yaxşı bəhrələnmək üçün müəyyən təkmilləşdirmələr də aparılır. Bunun üçün ölkəmizin kifayət qədər imkanları var. Gənc ailələrə dövlət qayğısının artırılması, mənzil şəraitlərinin yaxşılaşdırılması, proqramda öz əksini tapıb.

- Sizcə, Azərbaycan gəncləri xarici ölkələrdə öz intellektləri, bilik və bacarıqları ilə ölkəmizi xaricdə təmsil edə bilirlərmi?

-Azərbaycan gəncləri xarici ölkələrin ali təhsil ocaqlarında təhsil alırlar. Biz fəxr edə bilərik ki, Azərbaycan gəncliyi beynəlxalq arenada, təşkilatlarda çox aktiv, bacarıqlı, ləyaqətli şəkildə ölkəmizi təmsil edir. Türkiyədə və digər Avropa ölkələrində yetərincə gənclər ordusu var. Mən fəxrlə qeyd edə bilərəm ki, aktiv və bacarıqlı gənclərimiz ölkəmizi beynəlxalq arenada təmsil edirlər. Xocalı soyqırımı ilə bağlı aparılan kampaniya da bunu göstərdi ki, Azərbaycan gəncliyi birlikdə olmağı bacarır.

- Heydər Əliyev Fondunun vitse-prezidenti Leyla xanım Əliyevanın fəaliyyətini Azərbaycan gəncliyi üçün bir nümunə hesab edirsinizmi?

- Heydər Əliyev Fondunun vitse- prezidenti Leyla xanım Əliyeva Azərbaycan gəncliyi üçün əsil nümunədir. Azərbaycanın sürətli inkişafı ölkəmizdə elmin, mədəniyyətin, texnologiyaların, təhsilin, səhiyyənin, idmanın inkişafına böyük töhfələrini verir. Heydər Əliyev Fondunun vitse-prezidenti Leyla xanım Əliyevanın məqsədli fəaliyyəti müxtəlif sahələri əhatə etməklə, Azərbaycanın imicinin formalaşması baxımından da daima diqqətdədir. Dünyanın hansı məkanında olmasından asılı olmayaraq, Leyla xanım Əliyeva Azərbaycanın bugünkü mənzərəsini və tarixi dəyərələrini dünya ictimaiyyətinə birmənalı olaraq çatdırır. Bu gün bütün dünyanı sürətli inkişafı və çiçəklənməsi ilə heyran qoyan Azərbaycanın qədim və zəngin tarixi və bu günü artıq bir çoz dünya ölkələrinə məlumdur. Azərbaycanın dünyaya müasir, inkişaf edən və zəngin mədəni irsə malik ölkə kimi tanıdılmasında Leyla xanım Əliyevanın məqsədyönlü fəaliyyəti birmənalı olaraq qarşılanır. Xatırladaq ki, dünya ictimaiyyətini Xocalı soyqırımı haqqında daha çox məlumatlandırmaq məqsədi ilə "Xocalıya Ədalət" beynəlxalq məlumat kampaniyası Heydər Əliyev Fondunun vitse-prezidenti, Dialoq və Əməkdaşlıq Uğrunda İslam Konfransı Gənclər Forumunun Mədəniyyətlərarası dialoq üzrə baş əlaqələndiricisi Leyla Əliyevanın təşəbbüsü ilə 2009-cu ildə irəli sürülüb. Hazırda faciənin mənəvi və siyasi-hüquqi cəhətdən tanınmasına yönəlmiş bu kompaniya dünyanın 35-dən çox ölkəsində uğurla həyata keçirilir.

Ruqiyyə Cəfərova

Səs.- 2013.- 1 mart.- S.10.