Hədəflərim böyükdür

Aytac Əliyeva: "Gələcək həyat yoldaşım məni burada görəcək və burada tanıyacaq"

Müsahibimiz YAP Gənclər Birliyinin sədr müavini Aytac Əliyevadır

- Aytac xanım, uşaqlığınız, məktəb və tələbəlik illəriniz necə keçib? Bu illəri necə xatırlayırsınız?

- Əvvəlcə gəlin, yeni açılmış bu rubrikanız münasibətilə sizi təbrik edim. Uğurlarınız və müsahibləriniz bol olsun. Suala gəlincə, belə deyək də, uşaqlıq illərim mənim üçün bir əlçatmaz dünyadır. Həqiqətən, uşaqlıq illərimə geri dönüb, yenidən yaşamaq istərdim. Uşaqlıqda çox nadinc olmuşam. Məhəlləmizdə yaz gələndə qonşularımız meyvə ağaclarını məndən qorumanın yollarını axtarırdılar. Çünki meyvələr hələ yetişməmiş, mən onları "yetişdirib", barlarını məhv edirdim... (gülür-red.) Həm də çox ədalı olmuşam. Məhəllədə sadəcə mənim velosipedim vardı və buna görə də forslanırdım. Amma dostlarıma da verirdim ki, sürsünlər. Bacım məndən böyük olduğuna görə, evdəkilər qonaqlığa və ya toya gedəndə onu aparırdılar. Mənim də buna acığım tuturdu və buna görə bacımla yola getmirdim. Amma sonradan başa düşdüm ki, həqiqətən də, uşaq olmuşam bu hərəkətləri edəndə. Buna baxmayaraq, uşaqlıq illərimin sonları həm ailəm üçün, həm də xalqımız üçün heç də ürəkaçan olmadı. Dağlıq Qarabağda baş verən hadisələr, torpaqlarımızın işğalı böyük sarsıntıya səbəb oldu. Mən o zamanlar "Cücələrim" rəqs ansamblına gedirdim. Yadıma gəlir ki, Xocalıda baş verən hadisələri eşidəndən sonra anam məni rəqsdən çıxardı. Sanki sabah olmayacaq... Dayım könüllü müharibəyə getdi və 2 ilə yaxın onu görmədik. 1994-cü ildə atəşkəs imzalandıqdan sonra geri döndü.

Məktəb illərim, artıq tamam başqa aləmdir mənim üçün. İbtidai sinif rəhbərim Gülcənnət müəllimə, Allah ona rəhmət eləsin, biz təzəcə dərsə başlayanda bir söz dedi və bu günə kimi mənim qulağımdadır: "Paxıllıq eləmə ki, onun pulu çoxdur, mənim az, paxıllıq eləmə ki, o gözəldir, mən kifir. Paxıllıq elə ki, o, əlaçıdır, mənsə yox. Paxıllıq elə ki, o, mübarizdir, mənsə tənbəl..." - deyə bilərəm ki, bu ifadənin mənim həyatımda yeri olduqca böyükdür. Elə birinci sinifdən qarşıma məqsəd qoydum ki, mən əlaçı olmalıyam, oldum da. 4-cü sinifdə imtahan verib, Bakü Türk Anadolu Lisesinə daxil oldum. Liseni də uğurla başa vurub, Qərb Universitetinin Siyasi elmlər fakultəsinin Politologiya ixtisasına daxil oldum və orada özümü, axtardığım və tapdım. Qrupda hər kəslə gizli və ya açıq rəqabət aparmışam. Qrupumuz universitetimizin, demək olar ki, ən əlaçı qrupu idi. Mən də bunu nəzərə alıb, ən əlaçı tələbə olmalıydım. Buna çətinlik çəkmədən müvəffəq oldum. Daha sonra magistr təhsilimi Bakı Dövlət Universitetinin Sosiologiya və psixologiya fakultəsində davam etdirdim. Bundan əlavə, Azərbaycan Respublikası Prezidenti yanında Dövlət İdarəçilik Akademiyasında ixtisasartırma kursunu başa vurdum. Hər üç təhsili fərqlənmə diplomu ilə bitirmişəm.

Tələbəlik illərinin öz duzlu məqamları var - dərsdən qaçmaq, "axşam işıqlar sönmüşdü, suyumuz kəsilmişdi, qaz yox idi" - kimi yalanlar uydurmaq. Təəssüf edirəm ki, mən bunlardan istifadə etməmişəm, dərsdən qaçmamışam, düzü qrupumuz etməyib, bəlkə etsəydi, mən də palaza bürünüb, ellə sürünərdim (gülür-red.). İkinci qrupda may ayında Qubaya getdik, orada asma körpüdən çaya düşdüm. Qrup yoldaşlarım yığışanda, yada salıb gülürük (gülür-red.).

Ictimai fəaliyyətə, məhz tələbəlik illərində gəlmişəm. Ikinci kursda yeni yaradılmış Tələbə Gənclər Təşkilatının sədri seçildim. Gənclər və İdman Nazirliyi, Bakı şəhər Gənclər və İdman Baş İdarəsi, Səbail rayonu icra hakimiyyəti tərəfindən təşkil olunan bütün tədbirlərdə iştirak etməyə başladım, gənclərin ictimai-siyasi həyatında fəallığıma görə müxtəlif diplom və təltiflərə layiq görüldüm. Bütün bunların kuliminasiyası 2007-ci ildə oldu. Mən çox az sayda gənclərlə birlikdə 2 fevral günündə ölkə başçısı cənab İlham Əliyev tərəfindən qəbul edildim və çox maraqlı görüşümüz oldu.

- YAP sıralarına qoşulmağınız necə baş verdi?

- Qeyd etdiyim kimi, tələbəlik illərində mən özümü tapdım. Həyatdan nə istədiyimi, həyata gəliş missiyamı müəyyən elədim. İndi növbə siyasi əqidə seçimi idi ki, mən bunu 1993-cü ildən etmişdim. Ailəmin bütün üzvləri Yeni Azərbaycan Partiyasının üzvüdür. Yaşım imkan verəndə, mən də doğma partiyamıza üzv oldum.

Deyir niyyətin hara, mənzilin ora. Deməli, may ayı idi, Ümummilli Lider Heydər Əliyevin anadan olmasının 80 illik yubiley tədbirləri keçirilirdi. Artıq yaşım 18-i haqlamışdı. Mən qrup yoldaşım Təranə ilə birlikdə gəldik hazırda işlədiyim YAP İcra Katibliyinə. Qapıdakı polisə partiyaya üzv olmaq istədiyimizi bildirdik və polis də bizi YAP Səbail rayon təşkilatına göndərdi. Ünvanı səhv saldığımıza görə, bir yolu düz 3 dəfə gedib gəldik, amma nəticə etibarilə istədiyimiz yerə gedib çıxa bilmədik. Çox yorulmuşduq deyə, dedik qalsın səhərə. Səhər isə universitetə gələndə, öyrəndik ki, elə universitetimizin tərkibində ərazi ilk təşkilatı var və ərizə yazmaqla heç yana getmədən, elə universitetimizdən YAP-a üzv ola bilərik... Vaxt itirmədən ərizəmizi yazdıq və bir aydan sonra artıq biz Yeni Azərbaycan Partiyasının üzvü idik. Bundan sonra YAP Gənclər Birliyinin keçirdiyi tədbirlərdə iştirak elədim, müxtəlif çıxışlarım oldu, diplomlar aldım. Düşünürəm ki, bu gün YAP İcra Katibliyində işləməyim taleyin mənə hədiyyəsi oldu, siyasi əqidəmə bu qədər bağlı olduğum üçün məni mükafatlandırdı.

- YAP Gənclər Birliyində təmsil olunmağın, siyasi fəaliyyət göstərməyin bir qadın üçün çətinlikləri və üstünlükləri nədən ibarətdir?

- Yeni Azərbaycan Partiyası bu gün həm ölkəmizin, həm də regionun ən böyük siyasi təşkilatıdır. Belə bir təşkilatın gənclər birliyində təmsil olunmaq, həqiqətən də, böyük məsuliyyət tələb edir. YAP Gənclər Birliyi öz ətrafında 200 mindən çox ölkə gəncini birləşdirir. Bu gənclər Prezident cənab İlham Əliyevin siyasi kursunu dəstəkləyir və bir ordu kimi ölkəmizin müdafiəsindədir.

Bir xanım olaraq, bu işdə olmaq, əlbəttə, müəyyən çətinliklər yaradır. Şərq dünyasının özünəməxsusluğu, həm də xanımlarının daha çox incə, daha çox qayğıya, nəvazişə, ailəyə ehtiyac duymasıdır. Lakin siyasət səhnəsində aslanın erkəyi-dişisi olmur. Daima mübarizədəsən və seçilmək, qalib və qəbuledilən olmaq üçün üzərində çalışmalısan. Gənclik çılğınlıq sevir, lakin siyasət yox. Ona görə, burada gənclik çılğınlığını unutmalısan. Üstünlüklərinə gəlincə, burada çox üstünlüklər var (gülür-red.). Azərbaycan oğlanlarının, kişilərinin xanımlara qarşı daima diqqətli, nəzakətli, nəvazişli olması, əlbəttə, bu sahədə də işimizə yarayır və bizə müstəsna üstünlüklər verir.

- YAP Gənclər Birliyinin ofisində xanımlar çoxluq təşkil edir . Qadınların bu aktivliyinin səbəbi nədir?

- Partiya rəhbərliyi, nəinki YAP Gənclər Birliyindəki, həmçinin, ümumilikdə, qadın üzvlərinə qarşı daima diqqətlidir. Bu diqqət ölkə başçısı, partiyamızın Sədri cənab İlham Əliyevdən gəlir və biz xanımların da sevincinə səbəb olur. Partiyamız daima fəal, yenilikçi, özünü təsdiq edən qadınlara diqqət göstərib və onların layiq olduqları yerdə təmsil olunmaları üçün əlindən gələni edir. Düşünürəm ki, YAP Gənclər Birliyinin ofisindəki bu göstərici də dediklərimin məntiqi nəticəsidir.

- Siyasi karyeranız hazırda fəaliyyət göstərdiyiniz sahə şəxsi həyatınıza mane olmur ki?

- Bu gün məşğul olduğum sahə, karyeram şüurlu şəkildə seçdiyim yoldur və mən bu yolda xoşbəxtəm. Düzdür, bəzən düşünürəm ki, hər bir xanıma ailə lazımdır və mən işim, karyeram deyərək, burada gecikmişəm. Karyerada qazandığım uğurun davamını şəxsi həyatımda hələ ki, gətirə bilməmişəm. Amma nə etmək olar?! Hələ hər şey qarşıdadır (gülür-red.).

- Həyat yoldaşınız işinizə "senzura" qoysa bundan vaz geçərsinizmi?

- Bilirsiniz, mən bu gün siyasətdə, belə deyək də, böyük siyasi meydana gedən yolda müəyyən uğur qazanmışam. Hələ pilləkənin ilkin pilləsindəyəm. YAP Gənclər Birliyinin sədr müaviniyəm, gənclər tərəfindən qəbul edilir, sözüm eşidilir və özümü təsdiq etmişəm. Üzr istəyirəm, gələcək həyat yoldaşım da məni burada görəcək və məni burdan tanıyacaq. Belə olan halda isə "senzuranın" qoyulması inandırıcı gəlmir. Nə bilim, mən belə düşünürəm ən azından (gülür-red.). Lakin onu da deyim ki, mən də Azərbaycan, Şərq dünyasına aid xanımam və ailənin önəmini anlayır və ailədə vəzifə bölgülərini gözəl başa düşürəm. Gələcəkdə ailə həyatı qurduqda, ailəmin milli dəyərləri qoruyub-saxlayan nümunəvi olması üçün, təbii ki, əlimdən gələni əsirgəməyəcəm.

- Son olaraq iş və şəxsi həyatınızda hədəfləriniz nələrdir?

- Hədəflər böyükdür, təki Allah nəsib eləsin. İlk olaraq, onu deyim ki, hər bir halda mütaliəmi davam etdirməliyəm və elmi dərəcə almaq üçün üzərimdə işləməliyəm. Makiavellinin gözəl fikri var: "Məqsəd vasitəyə haqq qazandırır". İnsani və müəyyən dəyərləri çıxmaqla, məqsədimə çatmaq üçün üzərimdə durmadan işləməliyəm və özümü daha geniş siyasi arenada təsdiqləməliyəm. Bunun üçün Prezidentimiz biz gənclərə bütün şəraiti yaradıb, qalıb bizlərin bundan yararlanması.

Şəxsi həyata gəlincə, burada da ilk hədəfim kifayət qədər mütaliəli, məni anlayan, işimə dəyər verən və ailə başçısı olmağa hazır olan bir insanla tanış olub, ailə həyatı qurmaqdır. Ailə kiçik dövlətdir və mən də öz kiçik dövlətimlə böyük dövlətimə xeyir vermək istəyərəm.

Ruqiyyə Cəfərova

Səs.- 2013.- 17 mart.- S.10.