Tədqiqatçı-alimin 75 illik yubileyi qeyd olundu

Azərbaycan Yazıçılar Birliyində Hacı Tofiq Seyidzadənin 75 illik yubileyinə həsr olunmuş tədbir keçirildi. Tədbiri giriş sözü ilə açan BSU-nun dosenti Nazim Mirzə 50 illik tələbəlik dostu Hacı Tofiq Seyidzadənin keçdiyi şaxəli yaradıcılıq yolundan danışaraq bu yaxınlığın təməlinin 1960-cı ildən Axundov adına ADPİ-də tələbəlik illərindən qoyulduğunu bildirdi. O, qeyd etdi ki, işində dəqiq, bacarıqlı olan dəyərli qələm sahibi, tədqiqatçı-alim, 50 kitab müəllifi, çoxlu elmi və publisistik məqalələrin müəllifi Hacı Tofiq Seyidzadə bu qədər uğurları yalnız gərgin zəhməti bahasına qazanıb: "Bu gün Hacı Tofiq Seyidzadə nüfuzlu ziyalı və alimdir. Biz onunla fəxr edirik. Tanrı hər kəs üçün rəsmi çalarlar müəyyənləşdirir: dünyaya gəlişi, həyatda sığortalanmış və sığortalanmamış yaşamları ilə. Zamanında Azərbaycanla doğmalığı olmuş rus şairi Sergey Yesenin bu məqam üçün fikrini təqribən belə ifadə edib: "Filan tarixdə filan yerdə doğuldum, filan vaxt təhsil aldım, filan işdə işləyirəm. Həyatımın qalanı şeirlərimdədir".

Natiq onun keçdiyi yolu vərəqləyərək bildirdi ki, 34 illik pedaqoji fəaliyyəti dövründə o, 14 il Sədərək 1 №-li kənd orta məktəbinin nəzdində fəaliyyət göstərən axşam-qiyabi məktəbdə direktor əvəzi, 1996-1997-ci illərdə Sədərək 1 saylı orta məktəbdə direktor vəzifələrində çalışıb: "Pedaqoji fəaliyyətdə uğurlar qazandığına görə 1984-cü ildə Naxçıvan Müəllimlərin Təkmilləşdirmə İnstitutu onun iş təcrübəsindən bəhs edən xüsusi bülleten buraxıb. Və pedaqoji təcrübəsi Naxçıvan MR məktəbləri arasında yayılması tövsiyə edilib. MR-də 29-dan çox elmi-praktik konfrans və müşavirələrin iştirakçısı olub, həmçinin bu konfrans və müşavirələrdə pedaqoji sahədə qazandığı uğurlardan çıxışlar da edib".

Qeyd olundu ki, onun bu fəaliyyəti yüksək qiymətini almış və müxtəlif mükafatlarla təltif edilmişdir. Belə ki, Azərbaycan SSR maarif nazirinin əmri ilə "baş müəllim", "metodist müəllim" adını alıb. Azərbaycan SSR Maarif Nazirliyinin, Naxçıvan MSSR Ali Soveti Rəyasət Heyətinin fəxri fərmanlarına layiq görülüb. Ankara şəhərində Beynəlxalq Uluslar Araşdırmalar Akademiyasının fəxri professoru, "Qızıl qələm" mükafatı laureatı adına layiq görülüb. Bütün bunlarla yanaşı, "İlin alimi - İlin ziyalısı", 2012-ci ildə yenə də həmin birliyin "İlin nüfuzlu ziyalısı", Xeyriyyə İctimai Birliyinin "Müqəddəs kəlam" və Azərbaycan Jurnalist Həmkarlar İttifaqının (Azərbaycan KİVİH) "Xalqın nüfuzlu ziyalısı" fəxri diplomları ilə təltif edilib. Bu günlərdə Azərbaycan Respublikası "Avropa Nəşr Mətbu Evi" komissiyasının qərarı ilə Qızıl medala layiq görülüb.

Tədbirdə çıxış edən AMEA-nın Torpaqşünaslıq və Aqrokimya İnstitutunun laboratoriyasının müdiri professor Paşa Zamanov əməksevər, tarixçi alimin Sədərək tarixini araşdırdığını və sanballı əsərlərin müəllifi olduğunu bildirdi.

ADPU-nun tarix fakültəsinin dosenti İbadulla Məmmədov, Azərbaycanın əməkdar zootexniki İslam Məmmədov, "Azad Azərbaycan" qəzetinin şöbə müdiri, yazıçı-rejissor Ağalar İdrisoğlu, alim, şair Şamil Zaman, şair Oqtay Rza və başqaları çıxış edərək, H.T.Seyidzadənin şəxsi dəyərlərindən, elmi, publisitik, pedaqoji fəaliyyətindən danışaraq, öz zəhməti ilə uğurlar qazandığını bildirdilər.

Tədbirdə ARME-nin aktyorları H.T.Seyidovun qələmə aldığı "Sədərək şairləri" kitabından nümunələr səsləndirdilər. Sonda yubiliyar Hacı Tofiq Seyidov tədbir iştirakçılarına və bu yubileyi təşkil edənlərə öz minnətdarlığını bildirdi.

NƏZAKƏT

Səs.- 2013.- 17 may.- S.7.