Xarici təşkilatlar da müxalifətin perspektivinə inanmır

Elşən Musayev: "Müxalifət liderləri nə qədər dərin getsələr, bir o qədər özlərini batıracaqlar"

Müsahibimiz Demokratik Maarifçilik Partiyasının sədri Elşən Musayevdir

- Elşən müəllim, müxalifətin zəifliyi, pərakəndəliyi fonunda müxtəlif blok və qurumların yaradılmasına səy göstərilməsi mövcud ağır vəziyyətin düzəldilməsinə nə dərəcədə yardımçı ola bilər?

- Azərbaycan müxalifəti illər boyu nəyə qadir olduğunu nümayiş etdirib və elə bu mənzərəyə, eyni zamanda, onların zaman-zaman yürütdüyü siyasətə əsaslanaraq, bundan sonra həmin qüvvələrin görə biləcəkləri işlərin də dairəsini təxmin etmək olar. Amma müxalifət liderlərinə qədər dərinə getsələr, bir o qədər özlərini batıracaqlar. Çünki onların xisləti, ambisiyası birlik anlayışının tam fövqündə durur. Bu insanlarda imtina və ümumi mənafedən çıxış etmə mədəniyyəti yoxdur.

- Müxalifət pərakəndəliyin aradan qaldırılması üçün kütləvi aksiyalar keçirməyi planlaşdırır. Sizcə, hədəflərinə nail olmaqda aksiyalar onlara kömək edə bilərmi?

- Hansı kütlə və ya hansı kütləvilikdən söhbət gedir? Bir müddət öncə keçirmiş olduqları aksiyaların fiaskosunu, rəzalətini nə tez unutdular? Axı müxalifət qüvvələrinin bir tək təşkilatları deyil, həm də ideyaları, fikirləri, məramları da pərakəndədir. Yaxşı bəs bunu kim aradan qaldıracaq? Buyurub keçirsinlər. Eyni ilə söylədiyim kimi, nə qədər uzun yol qət etsələr, bir o qədər də öz ifşalarına yaxınlaşacaqlar. Müxalifət qüvvələrinə yaraşan da elə budur. Müxalifət öz abırına hakim olmasa da, Azərbaycan qanunları öz göstərişlərinə hakimdir və əsla hansısa siyasi qüvvə üçün xüsusi ayrıcalıqlar tətbiq etməyib. Hər bir siyasi qüvvənin mövcudluğuna da, fəaliyyətinə də bərabər təminatlar yaradıb. Bundan sonra da həmin rentabelliyi qoruyub saxlayacaq. Amma haqqında danışdığımız müxalifət seçkiqabağı hansı oyunları çıxardıb, həmin qanunlar üzərində hansı təhrifləri etməyə çalışacaq- bax, bu, artıq tam başqa bir söhbətin mövzusudur.

- Müxalifətin arxasında hansısa xarici maraqlı qüvvələr və beynəlxalq təşkilatlar ola bilərmi?

- Belə bir dəstəkçiyə nail olmaq cəhd müxalif funksionerlər tərəfindən ola bilər. Düşünürəm ki, müxtəlif zaman kəsiklərində də oxşar presidentlərlə qarşılaşmışıq. Bir vaxtlar mitinqlərdə narıncı köynəklər geyinilirdi, xarici dövlətlərin bayraqları dalğalandırılırdı, bir başqa ölkənin prezidentinin portreti qaldırılırdı. Və inanın, bu, elə-belə jestlər deyildi. Daha dəqiqi dünyaya və inqilab ixrac edənlərə mesaj idi ki, dediyiniz hər şeyi edərik, yetər ki, bizi dəstəkləyin. İndi də belə bir halla qarşılaşmayacağımıza kimsə zəmanət verə bilməz. Amma bir nüansa da toxunum ki, beynəlxalq təşkilatlar qeyd olunan təşəbbüsdə bulunduqları zaman belə, bunu müxalifətə olan sevgilərindən və ya həmin müxalifətin dəstəkçisi olmaq arzularından irəli gəlmir. Onlar bu zavallıları alət kimi o yan -bu yana fırlayıb, danışdırıb, ortaya ataraq öz maraqlarını təmin etməyə çalışırlar. Vəssalam. Yoxsa kimin nəyinə lazımdır bu uğursuzlar? Hansı özünə hörmət edən təşkilat onların perspektivinə inanar? Bu baxımdan, xarici maraqlı qüvvələrin müxalifət liderləri ilə iş birliyi reallıqdan çox-çox uzaqdır.

GÜLYANƏ

Səs.- 2013.- 22 may.- S.11.