9 oktyabr prezident seçkilərində cənab
İlham Əliyevə səs verməklə Azərbaycanın
uğurlu gələcəyinə səs vermiş
olacağıq
Müsahibimiz
Azərbaycanın xalq şairi Fikrət Qocadır
- Fikrət müəllim, xalq bir çox xüsusiyyətləri ilə tanınır, sayılır və dünya xalqları içərisində fərqlənir. Bu xüsusiyyətlərdən ən yüksəyi, ən böyüyü mədəniyyətdir. Müstəqillik tariximizdə Azərbaycan ədəbiyyatının, mədəniyyətinin inkişafına diqqət və qayğını necə xarakterizə edərdiniz?
- Hər sahədə olduğu kimi, qeyd olunan istiqamətdə də inkişaf ulu öndər Heydər Əliyevin 1993-cü ildə hakimiyyətə qayıdışından sonrakı dövrü əhatə edir. Bir faktı qeyd etmək istərdim. Sovet dövründə «Qobustan» jurnalı dərc olunurdu. Jurnal çox çətinliklə çıxırdı. Demək olar ki, hər nömrəsi hay-küyə səbəb olurdu. 1988-1992-ci illərdə jurnal şam kimi sönürdü. Rəngli jurnalı rəngsiz belə çap etdirməyə vəsait yox idi. «Qobustan» demək olar ki, yada düşmürdü. Hansı ki, bu jurnal tariximizi, mədəniyyətimizi özündə əks etdirirdi. Ulu öndər Heydər Əliyevin 1993-cü ildə xalqın təkidli tələbi ilə hakimiyyətə qayıdışı bu jurnalın həyatında da yeni bir mərhələnin əsasını qoydu. Dahi şəxsiyyət jurnalın fəaliyyətini canlandırması üçün vəsait ayırdı, Yazıçılar Birliyinə dəstəyini göstərdi. Bu diqqət və qayğıdan sonra jurnalın rəngi demək olar ki, özünə qayıtdı. Bir jurnalın timsalında ulu öndər Heydər Əliyevin ədəbiyyatımıza, mədəniyyətimizə diqqət və qayğısını qeyd etdim.
- İnkaredilməz həqiqətdir ki, Azərbaycanın dövlətçilik tarixinin ən parlaq dövrü Heydər Əliyevin adı ilə bağlıdır. Həmin dövrün siyasi və iqtisadi aspektlərinin öyrənilməsi hər zaman öz aktuallığını saxlayır. Bu gələcək inkişafımızın əsas istiqamətlərini müəyyən etmək və bir daha dəqiqləşdirmək baxımından da zəruridir...
- Ulu öndər Heydər Əliyevin 1993-cü ildə hakimiyyətə Azərbaycanın hansı çətin dövründə qayıtdığını yada salaq. Ölkə dağılırdı, xaos, anarxiya, özbaşınalıq baş alıb gedirdi. Azərbaycan adlı dövlətin varlığı sual altında idi. Heydər Əliyev Azərbaycanı yenidən qurdu, beynəlxalq aləmdə tanıtdı. Onun dövlətçilik təcrübəsi uğurlarımızın artmasında, Azərbaycanın imzasının imzalar arasında xüsusi yer tutmasında mühüm rol oynadı. Heydər Əliyev ölkə iqtisadiyyatının inkişafını önə çəkərək bu istiqamətdə əhəmiyyətli addımlar atmağa başladı. Qeyd edək ki, Heydər Əliyev müstəqil Azərbaycan dövlətinin təməlini hələ 1969-cu ildə respublikaya rəhbərliyinin birinci dövründə qoymuşdur. Sovet imperiyasının tərkibində olduğu müddətdə respublikada milli hərbi kadrların hazırlığı məqsədilə hərbi məktəblərin açılması, ölkəmiz üçün zəruri sahələr üzrə peşəkar mütəxəssislərin hazırlanması üçün keçmiş ittifaqın ali məktəblərinə gənclərin göndərilməsi, Konstitusiyada Azərbaycan dilinin dövlət dili kimi təsbit olunması məhz ulu öndər Heydər Əliyevin adı ilə bağlıdır. Ölkənin iqtisadi potensialından səmərəli istifadə üçün qurulan yüzlərlə zavod, fabrik, emal sexləri, formalaşdırılan müstəqil energetika sistemi ulu öndərin xalqa töhfələri idi. Bütün bunların hamısı ulu öndərin dövlətçilik təcrübəsindən irəli gəlirdi. Dövləti qoruyub saxlamaq, onu bina kimi inşa etmək, toxunulmazlığını nəzərə alıb, qurmaq gərəkdir. Ulu öndər Heydər Əliyev Azərbaycanın müstəqillliyini qorudu, düşünülmüş və məqsədyönlü siyasəti ilə uğurlara yol açdı.
- Fikrət
müəllim, son on ilin reallıqları sizdə hansı təsəvvürü
yaradır?
- Heydər
Əliyev məktəbindən dərs alan,
onun yolunu davam etdirən Prezident İlham Əliyev hər
addımında bu siyasətə sadiq olduğunu nümayiş
etdirir. Bir müqayisə aparmaq istərdim.
Ali məktəb elədir ki, oxuyub təhsil
alırsan, necə oxudun, necə başa vurdun, o qədər də
düşündürücü olmur. Yəni
təhsil aldığın dövrdə nə əldə
etdinsə, o olur. Amma cənab İlham
Əliyev Heydər Əliyev məktəbindən dərs
alıb, ondan dövlətçilik təcrübəsini
öyrənib. Ölkənin
qarşıdakı illəri üçün proqramını
necə tərtib etməyi öyrənib. Gəlin,
bugünkü Azərbayanı 10 il bundan
öncəki Azərbaycanla müqayisə edək. Hər gün Azərbaycanın həyatında
mühüm hadisə ilə yadda qalır. Azərbaycan artıq beynəlxalq tədbirlərin
keçirilməsi üçün əsas məkan olub.
Dövlət başçısı İlham
Əliyevin qeyd etdiyi kimi, əvvəlki illərdə ölkə
reallıqlarını təbliğ etmək üçün
bu və ya digər ölkəyə səfər etməyə
böyük zərurət duyulurdusa, bu gün artıq Azərbaycan
gündəlik belə təqdimatlarını edir. Hər həftə ölkəmizdə belə
mühüm tədbirlər keçirilir.
Heydər
Əliyev məktəbindən dərs alan
cənab İlham Əliyev müxtəlif xarici dilləri
öyrənməyə maraq göstərməklə eyni
zamanda Azərbaycan həqiqətlərinin dünya ictimaiyyətinə
yüksək səviyyədə çatdırılması
üçün bir imkan əldə etdi. Dövlət
başçısı İlham Əliyevin dünyanın
nüfuzlu təşkilatlarının tribunasından müxtəlif
dillərdə ölkə reallıqlarını bəyan etməsi
böyük ruh yüksəkliyi yaradır. Azərbaycan böyük inkişaf yolundadır.
Bu yolun uğurlu davamı ölkəmizin
qarşısında böyük perspektivlər açır.
Azərbaycan zəngin tarixə, mədəniyyətə
malik olan ölkədir. Şərq və Qərb dəyərlərini
özündə birləşdirən Azərbaycan
tolerantlıq, sülhsevərlik və qonaqpərvərlik ənənələrinə
sadiqdir. Müstəqil Azərbaycan bu
gün sürətlə inkişaf edən azad və
dünyaya açıq bir ölkə kimi tanınır və
nüfuz qazanır. Azərbaycan müxtəlif
mədəniyyətlər və svilizasiyalar arasında
korpü rolunu oynayır. Hər bir Azərbaycan
vətəndaşı çalışdığı sahədən
asılı olaraq üzərinə düşdüyü vəzifəni
yüksək səviyyədə yerinə yetirməklə bu
körpünün daha da möhkəmlənməsinə
öz töhfəsini verməlidir.
-
Demokratik cəmiyyətin varlığını təsdiqləyən
əsas amillərdən biri də azad, beynəlxalq standartlara
uyğun seçkilərin keçirilməsidir. Ölkəmizin siyasi həyatında əhmiyyətli
rol oynayacaq prezident seçkilərinin ərəfəsindəyik.
Bununla bağlı fikirlərinizi bilmək istərdik.
- ABŞ
kimi böyük dövlətdə prezidentliyə iki namizəd
olur. Hansı ki, bu ölkənin 200 milyondan çox əhalisi
var. 9 milyonluq əhalisi olan Azərbaycanda isə prezidentliyə
20 namizəd var. Təbii ki, bu, ölkəmizdə demokratik
inkişafın yüksək səviyyədə
olmasının göstəricisidir. Bütün
siyasi partiyalara, ictimai birliklərə fəaliyyətlərini
normal şəkildə qurmaları üçün hər
cür şərait yaradılır. Bu
gün namizədlər arasında müxətlif siyasi partiyaların
təmsilçilərini olması da bu reallıqdan irəli gəlir.
Bir həqiqəti unutmayaq ki, ölkəyə rəhbərlik
böyük dövlətçilik təcrübəsi,
böyük məsuliyyət tələb edir. Ölkəsinin bu gününü, gələcəyini
düşünən rəhbər təbii ki, fəaliyyətini
gündəlik proqram əsasında qurur. Bu
böyük məsuliyyəti üzərinə götürmək
üçün ona hazır olmaq lazımdır. 20 namizədin hər birinə hörmətlə
yanaşıram. Amma reallığa yüksək
dəyər verirəm. Reallıq Azərbaycanın
bugünkü inkişafıdır. Bu
inkişafı, tərəqqini ölkəmizə yaşadan isə
dövlətimizin düşünülmüş və məqsədyönlü
siyasətidir. Namizədliyini irəli
sürən hər kəs ölkəni yaxşı
dolandırmaq bacarığından danışır. Azərbaycan demokratik ölkədir. Hər kəs öz fikrini sərbəst, azad söyləmək
imkanına malikdir. Hər kəsin fikirlərinə
hörmətlə yanaşılır. Amma
təbii ki, namizədliyini irəli sürən şəxs bu
ölkə, xalq üçün nə işlər
gördüyünü də düşünməlidir. Bu, mənim fikrimdir.
Prezident İlham Əliyevin gördüyü işlər
göz qabağındadır. Açıq cəmiyyətdə
yaşayırıqsa, demokratiyadan danışırıqsa, hər
kəsin irəli sürülən namizəd haqqında öz
fikirlərini sərbəst söyləmək imkanı
vardır. Bunu da normal qəbul etmək
lazımdır. Müxalifət ölkədə
demokratik şəraitin olmamından gileylənir. Amma kimsə hansısa namizədin ünvanına
reallığa uyğun olaraq müsbət fikirlər səsləndirirsə,
dərhal onu tənqid edir, hay-küy qoparırlar. Bu, artıq demokratiya deyil.
Hər kəs ölkəsinin, dövlətinin gələcəyini
düşünməlidir. Əgər bunu istəyiriksə,
təbii ki, layiqli namizədə səs verməliyik. Azərbaycan 22 ilə yaxındır ki, dövlət
müstəqilliyini bərpa edib. Bu dövr
ərzində qazanılan uğurların miqyasına diqqət
yetirmək kifayətdir ki, ölkəmizin inkişafı barədə
aydın təsəvvür yaransın. 20
faiz torpaqlarımız işğal altında, bir milyon
soydaşımız qaçqın və köçkün vəziyyətindədir.
Azərbaycan dövləti məsələnin
sülh yolu ilə həlli üçün səylər
göstərir. Ölkəmiz diplomatik
mübarizədə böyük uğurlar qazanıb. İqtisadi imkanların genişlənməsi fonunda hərbi
qüdrətimiz möhkəmlənir. Ölkə
Prezidenti İlham Əliyev münaqişənin həllində
hərb variantını istisna etmir. Bəyan
edir ki, sülh danışıqları səmərə vermədiyi
təqdirdə Azərbaycan işğal altında olan
torpaqlarını hərb yolu ilə azad edəcək. Təbii ki, bu qətiyyət, qeyd etdiyimiz kimi, Azərbaycanın
hərbi qüdrətinin günbəgün artmasına əsaslanır.
Dövlət büdcəsindən ayrılmalar
zamanı ilk yerdə müdafiə xərclərinin
dayanması bu sahənin inkişafına göstərilən
diqqət və qayğıdan qaynaqlanır. Ulu öndər Heydər Əliyev bildirirdi ki,
sülh danışıqlarını cəsarətlə
aparmaq üçün güclü ordun olmalıdır.
Bir əsas məqamı da qeyd edək ki, bu gün orduda xidmət
edən əsgər və zabitlərin böyük əksəriyyəti
ulu öndər Heydər Əliyevin 1970-ci illərdə
yaratdığı C.Naxçıvanski adına
hərbi liseyin yetirmələridir. Dövlət
qurmaq, onu qorumaq böyük məsuliyyətdir. Heydər Əliyev Azərbaycan hakimiyyətinə
qayıdışı ilə ölkəmizi dağılmaqdan,
məhv olmaqdan xilas etdi, Azərbaycan adlı dövlətin
varlığını dünyaya nümayiş etdirdi. Heydər Əliyev siyasətinə sadiqlik hər
addımda özünü təsdiqləyir. Xalqımız tam əmindir ki, Azərbaycan dövlətinin
uğurlu siyasəti nəticəsində işğal
altında olan torpaqlarımız azad olacaq,
soydaşlarımız öz doğma yurd -yuvalarına
qayıdacaq. Ölkəmizi
qarşıdakı illərdə daha böyük uğurlar
gözləyir.
Prezident İlham Əliyevin son on ildə
gördüyü işləri təbii ki, bir yazıda qeyd etmək
mümkünsüzdür. Bir faktı qeyd etmək
kifayətdir ki, Azərbaycan Cənubi Qafqazın parlayan ulduzu
kimi nüfuz qazanır. İnkişafın
Azərbaycan modelinin mövcudluğu beynəlxalq səviyyədə
dəstəklənir. Uğurlu
sosial-iqtisadi islahatlar nəticəsində paytaxtla bölgələr
arasında fərq aradan götürülüb. Rayonlarımızın sosial-iqtisadi inkişafı hər
kəsdə qurur hissi yaratmalıdır. Bakıətrafı
qəsəbələrin sosial-iqtisadi durumu yüksək səviyyədədir.
Dövlət başçısı İlham
Əliyev infrastukturun yeniləşməsinə xüsusi diqqət
yetirir. Yeni yollar çəkilir, yeraltı
keçidlər tikilir, sakinlərin rahat gediş-gəlişi
təmin edilir. Qısa müddətdə
paytaxtdan uzaqlaşırsan, qayıtdıqda böyük
inkişafın, yeniliyin şahidi olursan. Belə
sürətli inkişafa, tikinti, quruculuq işlərinə səs
vermək gərəkdir.
Dövlət başçısı İlham Əliyev
daim bildirir ki, həyata keçirilən siyasətin əsasında
Azərbaycan vətəndaşı dayanır. Atılan
addımlara, görülən işlərə diqqət yetirsək,
bu reallığı aydın şəkildə görə bilərik.
Gerçəklikləri düzgün dəyərləndirmək
lazımdır. Bu günümüz
sabahımıza, sabahımız gələcəyimizə
stimul olmalıdır.
Cənab İlham Əliyevin son on ildə ulu öndər
Heydər Əliyevin siyasi kursunu uğurla davam etdirərək
Azərbaycanı zirvələrə yüksəltməsindən
qürur duyuram. 9 oktyabr prezident seçkilərində cənab
İlham Əliyevə səs verməklə Azərbaycanın
uğurlu gələcəyinə səs vermiş
olacağıq.
yap.org.az
Səs.- 2013.- 17
sentyabr.- S.8.