«Azərbaycan-2020: gələcəyə baxış» İnkişaf Konsepsiyasının reallaşdırılması nəticəsində aqrar sektorun əhəmiyyətli tərəqqisi müşahidə olunacaq

Müsahibimiz Milli Məclisin Aqrar siyasət komitəsinin üzvü Tahir Süleymanovdur

- Tahir müəllim, sevindirici haldır ki, artıq YAP-ın 600 mininci üzvünə partiya vəsiqəsi təqdim edildi. Bu fakt bir daha partiyamıza olan ümumxalq sevgisini isbatladı, həmçinin, onun ölkənin avanqard siyasi qüvvəsi olduğunu sübut etdi. Sizcə, Yeni Azərbaycan Partiyasına olan bu axın və inam nə ilə bağlıdır?

- Bu, bir həqiqətdir ki, bu gün Yeni Azərbaycan Partiyası nəinki ölkəmizin, hətta, regionumuzun ən güclü siyasi təşkilatıdır. Yarandığı gündən YAP-ın Ümummilli lider Heydər Əliyev tərəfindən müəyyənləşdirilən və uğurla tətbiq edilən əsas proqram məramı Azərbaycanın dövlət müstəqilliyinin qorunub möhkəmləndirilməsindən, ərazi bütövlüyünün təmin edilməsindən, demokratik, hüquqi, dünyəvi cəmiyyət qurulmasından əmin-amanlıq, ictimai-siyasi sabitlik, milli həmrəylik, güclü və sosialyönümlü iqtisadiyyat yaratmaqdan ibarət olub və hakim partiya bu 20 ildə öz proqram məqsədlərinə uyğun fəaliyyət göstərib. Məhz buna görə də, ümumxalq partiyasına çevrilən, 600 mindən artıq üzvü olan YAP bu müddət ərzində ölkədə keçirilən prezident, parlament və bələdiyyə seçkilərində inamlı qələbələr qazana bilib.

Müstəqil Azərbaycan dövlətinin qurucusu, YAP-ın yaradıcısı, Ümummilli liderimiz Heydər Əliyev Azərbaycanın müstəqilliyinin dönməzliyinin təmin edilməsi, ölkənin tərəqqisi, iqtisadiyyatın yüksəlişi, xalqın rifahının yaxşılaşması, uğurlu neft strategiyasının həyata keçirilməsi, milli-mənəvi dəyərlərimizin qorunması, ölkənin təhlükəsizliyini təmin etmək iqtidarında olan ordunun yaradılması, Azərbaycanın beynəlxalq aləmdə nüfuzunun yüksəlməsi naminə ardıcıl siyasət həyata keçirdi və bu prosesdə YAP daim ön sıralarda oldu. Bu gün də YAP üzvləri ölkəmizin daha da güclənməsi naminə partiyamızın Sədri, Prezident İlham Əliyevin həyata keçirdiyi siyasətin ən fəal dəstəkçiləri olmaqla bu siyasətin uğurlarını xalq arasında geniş təbliğ etməkdədir.

- Ölkənin inkişafından danışarkən, 2012-ci ilin yekunları üzərində Azərbaycanın bugünkü siyasi və iqtisadi vəziyətinə qısa təhlil verməyinizi istərdik…

- Əlbəttə ki, Azərbaycanın bu günkü inkişafından danışarkən, ilk olaraq, iqtisadi sahədəki nailiyyətləri vurğulamaq lazımdır. Məhz, yola saldığımız 2012-ci ili uğurlu sosial-iqtisadi göstəricilərlə başa vuran ölkəmizin inkişaf tempi davam edib, iqtisadi indikatorlar sürətlənib, güclü maliyyə sabitliyi potensialı möhkəmlənib, inflyasiyanın birrəqəmli həddə qorunub saxlanması təmin edilib, iqtisadiyyatın çoxşaxəliliyi sürətlənib. Yola saldığımız ildə başlıca makroiqtisadi hədəfləri milli iqtisadiyyatın artımı fonunda iqtisadi və sosial proqramların icrasına maksimum nail olmaq, qiymət indekslərinə koordinasiyalı şəkildə nəzarət etmək və əhalinin pul gəlirlərinin artım dinamikasını stimullaşdırmaq, eyni zamanda, çevik pul siyasətinin həyata keçirilməsi sayəsində valyuta bazarında sabitliyi qoruyub saxlamaqdan ibarət olub və hökumət bu meyarlara tam nail olub.

Prezident İlham Əliyevin rəhbərliyi ilə həyata keçirilən təmkinli, qətiyyətli və çevik mükəmməl iqtisadi strategiya nəticəsində islahatların davamlılığı təmin edilib, iqtisadi inkişaf daha da sürətlənib. Həyata keçirilən düşünülmüş iqtisadi siyasət, liberallaşmanın struktur və keyfiyyət baxımından dərinləşməsi, sahibkarlığa dövlət dəstəyinin artırılması, rəqabət qabiliyyətinin təmin olunması, kompleks islahatlar iqtisadiyyatın şaxələndirilməsinin əsas komponentləri olub. Dövlət başçısı tərəfindən həyata keçirilən irimiqyaslı, məqsədyönlü islahatların ardıcıllıq və peşəkarlıqla həyata keçirilməsi ölkəmizin maliyyə qüdrətinin daha da yüksəlməsinə, valyuta rezervlərinin artmasına da zəmin yaradıb.

Digər başlıca makroiqtisadi hədəfləri əhalinin real gəlirlərinin artımı, milli valyutanın dəyərinin qorunması, iqtisadiyyatda aktivlik əmsalının yüksəldilməsi və digər amillərlə bağlı olub. Dövlətin həyata keçirdiyi iqtisadi siyasət bu makrotələblərin realizasiyası ilə nəticələnib. İqtisadiyyatın çoxvektorluluğu, maliyyə, valyuta və sosial sabitliyin gücləndirilməsi fonunda əhalinin pul gəlirlərinin artması, sosial yaşayış imkanlarının yaxşılaşması mümkün olub.

Azərbaycanda həyata keçirilən güclü maliyyə siyasəti və iqtisadi inkişaf dinamikası, eyni zamanda, ixrac potensialının yüksək artımı respublikamızın maliyyə sabitliyinin möhkəmlənməsinə dərin zəmin yaradıb və eyni zamanda, valyuta gəlirlərinin çoxalmasını təmin edib.

Ölkədə yüz minlərlə insanı əhatə edən sosial tərəqqi və əməkhaqlarının artırılması ilə bağlı dövlət siyasəti hökumətin vətəndaşlara olan yüksək diqqət və qayğısının nəticəsidir. Sosial sahədə islahatlar prosesi dərinləşdikcə dövlət vətəndaşların sosial müdafiəsi və rifah halının yaxşılaşdırılması üçün üzərinə götürdüyü öhdəlikləri tam məsuliyyəti ilə həyata keçirir, sosial reformaların bütün elementlərinin tətbiqini dərinləşdirir.

Təbii ki, sosial-iqtisadi sahədə həyata keçirilən siyasətin nəticəsində formalaşan yüksək rihaf mühiti siyasi-ictimai həyata da öz təsirini göstərir. Hazırda ölkədə yüksək siyasi-ictimai sabitlik hökm sürməkdədir və bu fakt da cəmiyyətimizin bütün sahələrinin dinamik inkişafına öz təsirini göstərir. Məhz, bu ictimai-siyasi sabitliyin fonunda da xalq-hakimiyyət birliyinin aydın görünür. Düşünürəm ki, ölkənin sabit və dinamik inkişaf dövrü yaşaması perspektivdə də öz bəhrələrini verəcək.

- Məlum olduğu kimi, siz Milli Məclisin Aqrar siyasi komitəsinin üzvüsünüz. Ölkənin aqrar sektorundakı vəziyyəti necə qiymətləndirirsiniz?

- Bu gün Azərbaycanda kənd təsərrüfatının inkişafı istiqamətində olduqca münbit bir şərait yaradılıb. Ulu öndərimiz Heydər Əliyevin əsasını qoyduğu və bu gün hörmətli Prezidentimiz İlham Əliyevin uğurla davam etdirdiyi aqrar siyasət kursunun nəticəsi olaraq bu sahədəki boşluqlar aradan qaldırılıb, kənd təsərrüfatının inkişafı ilə bağlı mühüm sənədlər, o cümlədən, ərzaq təhlükəsizliyi və regionların sosial-iqtisadi inkişafı haqqında dövlət proqramları təsdiq olunub. Bu proqramlar Azərbaycanın ərzaq təhlükəsizliyinin təminatı istiqamətində atılmış mühüm addımlardır.

Qeyd etmək lazımdır ki, qloballaşan dünyanın vacib problemləri sırasında artıq təhlükəlilik dərəcəsinə görə ərzaq və su çatışmazlığı problemi də çox ciddidir. Kənd təsərrüfatı sahəsinin inkişaf etdirilməsi Azərbaycanın təbii enerji resursları ilə yanaşı hələ uzun müddət regionda lider ölkə mövqeyini təmin edə bilər. Bütövlükdə təhlükəsizlik sahəsində dövlət fəaliyyətinin hüquqi əsasını müvafiq qanunvericilik aktları təşkil edir. Azərbaycan Respublikasında bilavasitə əhalinin etibarlı ərzaq təminatı ilə bağlı olaraq «Aqrar sahədə dövlət lizinq şirkətlərinin maddi-texniki bazasının möhkəmləndirilməsinə əlavə dəstək verilməsi barədə» Azərbaycan Respublikası Prezidentinin Sərəncamını xüsusi qeyd etmək olar. Bu isə fermer və kəndli təsərrüfatlarına maddi-texniki dəstəyin daha da artması və bununla da ərzaq istehsalının həm daxili, həm xarici bazar üçün təminatına şərait yaradıb. Bu gün ölkəmizdə ərzaq təhlükəsizliyi məsələsi ölkə əhalisini təmin edəcək həcmdə məhsulun istehsalı və emalı potensialının mövcudluğu, ölkə əhalisi tərəfindən istehlak edilən ərzağın keyfiyyəti, dövlət əhəmiyyətli strateji ərzaq məhsullarının ölkədaxili istehsalı kimi komponentləri özündə birləşdirir.

Regionların sosial-iqtisadi inkişafı Dövlət Proqramları da bu mənada xüsusi əhəmiyyətə malikdir. Regionların sənayeləşməsilə yanaşı aqrar sahənin inkişafı həm ölkənin ərzaq təhlükəsizliyinin təminatı, həm də yerlərdə məşğulluğun artırılması və beləliklə, əhalinin sosial rifahının yüksəldilməsi istiqamətində dövlətin səylərinin effektivliyinin artırılmasına xidmət edir. 2009-2013-cu illəri əhatə edən regionların sosial-iqtisadi inkişafı Dövlət Proqramı daha geniş və əhatəli olmaqla bölgələrin bütün ərazisində kompleks tədbirlərin həyata keçirilməsini nəzərdə tutur. Dövlət Proqramında ölkə iqtisadiyyatının bütün sahələri və regionlar üzrə bu vaxta qədər həll olunmamış bütün məsələlərin, o cümlədən, bütün bölgələrdə hər bir kəndin konkret problemlərinin, əhalini narahat edən məsələlərin əks olunması prioritet vəzifə kimi qarşıya qoyulub. Bu proqramda nəzərdə tutulan taxıl, xüsusilə buğda istehsalının, üzümçülüyün, meyvəçiliyin və digər məhsulların inkişafının dəstəklənməsi, cins heyvandarlıq komplekslərinin inkişaf etdirilməsi və "Aqroferma"ların yaradılmasının dəstəklənməsi, aqroemal müəssisələri şəbəkəsinin genişləndirilməsinin və kənd təsərrüfatı məhsullarının rəqabət qabiliyyətliliyinin artırılması məqsədilə mütərəqqi texnologiyaların tətbiqinin dəstəklənməsi də kənd təsərrüfatında nəzərdə tutulan başlıca layihələrdən hesab olunur. Fikrimcə, qarşıdakı dövrdə bu proqramların göstərəcəyi effekt daha qabarıq hiss olunacaq. Bu gün ölkəmizdə demək olar ki, ərzaq təhlükəsizliyinin təminatı ilə bağlı bütün problemlər öz həllini tapır. Artıq Azərbaycan öz taxıl ehtiyacını ödəməyə demək olar ki, hazırdır. Dövlət Taxıl Fondunun yaradılması respublikamızın ərzaq təhlükəsizliyinin təmin olunması ilə bağlı həyata keçirilən mükəmməl strategiyanın tərkib hissəsi kimi qiymətləndirilməlidir. Həmçinin, bu gün sevindirici haldır ki, Azərbaycan ətçilik və taxılçılıq üzrə 80 faiz öz tələbatını ödəyə bilir. Meyvə-tərəvəz məhsulları ilə özümüzü təmin edirik.

Ümumiyyətlə, ölkəmizdə kənd təsərrüfatının inkişafı dövlətin diqqət və qayğısı ilə əhatə olunub. Azərbaycanda həyata keçirilən aqrar islahatların nəticəsində kənd təsərrüfatında torpaq və əmlak üzərində xüsusi mülkiyyətçilik bərqərar olunub, kiçik və orta sahibkarlığın inkişafına yaradılan şərait olduqca yüksək səviyyəyə çatıb, aqrar sahədə müasir texnika və texnologiyalar, yeni bilik və informasiyalar şəbəkəsi genişlənib. Bununla yanaşı, kənd təsərrüfatında torpaq və əmlakdan səmərəli istifadəyə imkanlar artırılıb, qəbul edilən qanunlar, dövlət proqramları, ayrılan subsidiyalar kənd təsərrüfatının bütün sahələrinin paralel inkişafına yol açıb. Bu mənada parlamentin Aqrar siyasət komitəsi də öz üzərinə düşən məsuliyyəti dərk edir və qanunlarımızın daha təkmil bir forma alması üçün öz gücünü səfərbər edir.

Bununla yanaşı, düşünürəm ki, Prezident İlham Əliyevin Sərəncamı ilə təsdiqlənmiş «Azərbaycan-2020: gələcəyə baxış» İnkişaf Konsepsiyasının reallaşdırılması nəticəsində də aqrar sektorun əhəmiyyətli tərəqqisi müşahidə olunacaq. Əlbəttə ki, bu gün qəbul olunan qanunlar da həmin inkişafın labüdləşdirilməsində mühüm rol oynayacaq.

Səs.- 2012.- 10 yanvar.- S.10.