“Eurovision” Mahnı Müsabiqəsinin rəmzi açarı Azərbaycandan İsveçə aparıldı

Şərqlə Qərbin kəsişməsində yerləşən Azərbaycan “Eurovision-2012” Mahnı Müsabiqəsində milliyyətindən və siyasi baxışlarından asılı olmayaraq, Bakıya toplaşanları bir məşəl ətrafında birləşdirdi

Son illərdə ictimai-siyasi, sosial-mədəni həyatın müxtəlif sahələrində beynəlxalq miqyaslı layihələrə uğurla imza atan Azərbaycan “Eurovision-2012” Mahnı Müsabiqəsinə ev sahibliyi etməklə növbəti nailiyyətini də əldə etdi. “Eurovision-2012” Mahnı Müsabiqəsi yarışmanın 57 illik tarixinə yeni səhifəni yazdı. Bu tarixi hadisə avropalıların yaddaşında işıqlı xatirə tək iz saldı. Azərbaycan tarixi hadisəni yaşadı.

Qeyd edək ki, Avropa ölkələri xalqlarının mədəni hayatında böyük rol oynayan müsabiqəyə ölkəmiz 2008-ci ildən qoşulsa da, qısa bir zamanda qələbələr əldə etdi. “Eurovision” Mahnı Müsabiqəsində 3 il ardıcıl iştirak edən Azərbaycan hər dəfə ilk yerlərdən birini tutmaqla, artıq bu layihənin qalibi adına iddiaçı olduğunu qətiyyətlə ortaya qoydu. 2011-ci ildə keçirilən yarışmada 43 ölkə arasında Azərbaycan təmsilçiləri Nigar Camal və Eldar Qasımov 221 xal qazanaraq, Azərbaycanın adını “Eurovision” Mahnı Müsabiqəsi tarixinə qalib ölkə kimi yazdılar. Bununla da ölkəmiz növbəti yarışmaya ev sahibliyi etmək hüququna yiyələndi. Tarixi nailiyyətdən sonra Prezident İlham Əliyevin “Eurovision-2012” Mahnı Müsabiqəsinin Bakı şəhərində keçirilməsi haqqında” Sərəncamına əsasən, yaradılan Təşkilat Komitəsinin fəaliyyəti nəticəsində müsabiqəyə hazırlıq işləri ilə yanaşı, “Baku Crystal Hall”un inşası da qısa zamanda uğurla sona yetdi. Əldə olunan nəticələr “Eurovision” Mahnı Müsabiqəsinin rəhbərliyi, Avropa Yayımları Birliyi, ümumiyyətlə, dünya ictimaiyyəti tərəfindən yüksək qiymətləndirildi.

Azərbaycan müsabiqəyə yüksək səviyyədə ev sahibliyi etməklə bütün Avropaya, dünyaya təşkilatçılıq bacarığını və yüksək qonaqpərvərlik ənənəsini göstərə bildi. “Eurovision” layihəsinin rəhbəri Yan Ola Sand müsabiqəyə hazırlığı hələ Cenevrədə keçirilən Məşvərət Qrupunun iclasında belə dəyərləndirmişdir: “Bir neçə dəfə ölkənizdə olduğum üçün Azərbaycanın bu yarışmaya çox ciddi, sevinc, maraq və məsuliyyətlə hazırlaşdığının şahidiyəm. Bu tədbirin Azərbaycanın hüdudlarından kənarda yayımlanması ən müasir texnoloji vasitələrlə həyata keçiriləcək”.

Bəli, hər şey möhtəşəm şəkildə təşkil olundu. Şəhərimizin görkəmi, abadlıq işləri, tarixi-mədəni dəyərlərin qabarıq təqdimatı və s. ən xırda məqamlar nəzərə alınmaqla, Azərbaycan qapısını Avropalılırın üzünə açdı. Ölkəyə şöhrət gətirəcək tarixi bir gün kimi dünyaya səs saldı. Hər bir kəs Bakıda təşkil olunan bu şouya heyrətini belə gizli saxlaya bilmədi.

Azərbaycan bütün Avropaya mədəniyyətini və xalqını tanıtmaq, qonaqpərvərliyinin şahidi olmaq imkanını yaratdı. Ta qədimdən “Odlar Yurdu” kimi tanınan Azərbaycanın “Odlar Diyarı” olduğunu əks etdirmək və “Eurovision” ab-havasını yaşatmaq üçün müsabiqənin “Light Your Fire!” şüarı altında keçirilməsi də əbəs deyildi. Avropa ölkələrinin təmsilçiləri məşəl ətrafına toplaşıb, sevgilərini izhar etdilər. Milliyyətindən, dinindən və siyasi baxışlarından asılı olmayaraq, Bakıya toplaşanları gözəl musiqi ahəngi öz ətrafında birləşdirdi.

Azərbaycan dövləti gücünü ortaya qoya bildi. Bu, ölkədə gedən iqtisadi, siyasi islahatlar, aparılan böyük quruculuq işləri nəticəsində gerçəkləşdi. Onu da etiraf edək ki, Azərbaycanın bu səviyyədə yüksəlməsi, beynəlxalq tədbirlərə ev sahibliyi etməsi heç də dünya məkanında birmənalı olaraq qarşılanmır. Dövlətimizə qarşı anti-Azərbaycan siyasəti bir çox hallarda özünü göstərir. Bu, bir sıra qüvvələrin, beynəlxalq təşkilatların dövlətimizə qarşı qısqanclıq hissinin məntiqi olaraq təzahür olunur.

Azərbaycana qarşı təşkilatlanmış, böyük maliyyə imkanlarına malik olan erməni lobbisi və dünya erməniləri tərəfindən ölkəmizə qarşı kampaniya aparılsa da, əsassız ittihamlar, əsassız iddialar, düşmənçilik addımları heç bir nəticə vermir. Ermənistanın, erməni lobbisinin riyakar siyasətçilərinin əsassız ittihamları Azərbaycan reallıqları qarşısında qüvvəsini itirir. Aparılan təbliğat işləri qarşısında Azərbaycanın əsaslı faktları bu addımların qarşısına sədd çəkir. Bir sıra beynəlxalq təşkilatlar və dairələr tərəfindən “Eurovision-2012” müsabiqəsinə kölgə salmağa, müəyyən təxribatların törədilməsinə, beynəlxalq ictimaiyyətdə fikir çaşqınlığı yaradılmasına cəhd olunsa da, Azərbaycan müsabiqəni tam uğurla sona çatdırdı və hər kəs reallıqları gözü ilə görüb, ölkəmizin sabit mühitində dövlətlərini lazımı şəkildə təmsil etdilər.

Bəli, bu gün Azərbaycan dünya arenasından tamam fərqli görünür. Dünyanın aparıcı dövlətlərinin rəsmi nümayəndələrinin, eləcə də, müsabiqə təmsilçilərinin ölkəmizlə bağlı söylədiyi fikirlər Azərbaycan həqiqətlərinə yetirilən diqqətin təzahürü tək meydana çıxır. Ölkəmizin artan iqtisadi potensialı, milli- mənəvi dəyərlərimiz, qonaqpərvərliyimiz şəhərimizdəki xarici qonaqların diqqətindən kənarda qalmadı və dünya mətbuatının səhifələrində Azərbaycan reallıqları işıqlandırıldı. Bir daha dünyaya bəlli oldu ki, coğrafi baxımdan Şərqlə Qərbin kəsişməsində, əlverişli mövqedə yerləşən Azərbaycan zəngin mədəniyyətə, tarixə malik olmaqla yanaşı, inkişaf etmiş müstəqil dövlətdir.

“Eurovision-2012” Mahnı Müsabiqəsində İsveç təmsilçisi Lorinə “Eyforiya”, yəni “Həddindən çox şadlanmaq” mahnısı qələbə gətirdi. Möhtəşəm “Bakı Kristal Zalı” səhnəsində Lorinin final şousundaca Bakıya sevgi etirafları da səsləndi. “Səni sevirəm, Bakı”- deyərək öz hisslərini Azərbaycan xalqına çatdıran İsveç təmsilçisi Lorinin bu sözləri coşğu ilə qarşılandı. Yan Ola Sand tərəfindən “Eurovision-2013”-ün İsveçdə keçiriləcəyini təsdiqləyən sənədlər Lorinə təqdim edildi.

Müsabiqənin məlum şərtlərinə görə, Azərbaycan qalib olmuş ölkəyə musiqi yarışmasının açarını rəsmi olaraq təqdim etməlidir. Bakı Şəhər İcra Hakimiyyətinin başçısı Hacıbala Abutalıbov musiqi yarışmasının rəmzi açarını Malmö şəhər meriyasının qədim binasında Şəhər Şurasının başçısı Kent Anderssona təqdim edərək, isveçli həmkarına uğurlar arzulayıb.

“Eurovision” Musiqi Müsabiqəsi xalqlar arasında bir körpüdür. Sağlam rəqabət və əməkdaşlığın genişlənməsində müstəsna rola malikdir. İnanırıq ki, 2012-ci ilə böyük uğurla dünyaya səs salan yarışmanın builki tarixi də möhtəşəm keçəcək və Azərbaycan təmsilçisi musiqi tariximizə daha bir əlamətdar zamanı həkk edəcək. Dünyada gedən qloballaşma prosesləri Azərbaycandan yan ötməsə də, milli mədəniyytimiz, milli musiqimizə xüsusi önəm verilir, orijinal şəkildə dünya ictimaiyyətinə təqdim olunur.

Nəzakət ƏLƏDDİNQIZI

Səs.- 2013.- 19 yanvar.- S.5.