Azərbaycan Polisi-illərdən və nəsillərdən yadigar...

...Görkəmli dövlət xadimi Heydər Əliyevin dövlətimizin mühüm sütunlarından saydığı, onun müəyyən etdiyi hüquq-mühafizə siyasəti kursunun fəal iştirakçılarından biri, cinayətkarlığa qarşı mübarizə, ictimai qaydanın və ictimai təhlükəsizliyin qorunması kimi məsul vəzifələri yerinə yetirən, konstitusiya-dövlət quruluşunun müdafiəsində mühüm xidmətləri olan, Azərbaycanın suverenliyi və ərazi bütövlüyü uğrunda döyüşlərdə işidlik və şücaət göstərmiş, yaşı yüzü haqlamağa barmaqla sayılacaq illər qalmış Azərbaycan Polisinin yaranmasından 96 il ötür.

Bu sıradan bir tarix deyil. 96 il bundan öncə azadlıq adlı ucalığa doğru yürüyən babalarımız üçrəngli bayrağın sevdası ilə qarşılarını kəsən bütün əngəllərdən üzüağ, alnıaçıq çıxmağı bacardılar. Çünki tarix onlara çox şey öyrətmişdi. Haqqı bulmaq, haqqa varmaq nə qədər çətin olsa da, o gələcək nəsillər üçün hava, su kimi lazım idi. Gələcəyini özgür görməyən bir millətin sabahına günəş doğa bilərdimi? Bu sulların bir cavabı vardı: Ya şəhid olmalı, ya da qazi.

Azərbaycan Polisinin keçdiyi tarixi yol haqqında çox yazılıb, çox deyilib. Ancaq hələ tarixə dönəsi, yazılası, gələcəyə miras üçün qalacaq elə şanlı səhifələr var ki...

Və bu gün Azərbaycanımızın gələcəyinə ümidlə baxdığı hər bir insanına tarixi həqiqətləri çatdırmağın şərəfli bir iş olduğunu anlamağın, yorulmadan qələmə sarılmağın özü də Vətən qarşısında həmişə xatırlanacaq vəfa borcu və tarixi bir işdir.

XX əsrdə yenidən müstəqilliyinə qovuşmuş, olumla ölüm arasında qalan, torpaqlarının itirmək təklükəsi ilə ağır günlar yaşayan, (qəribə səslənsə də, onu demək həqiqətin üstündən xətt çəkməz) ordusu olmayan bir dövlətin torpaqlarını onun polisinin qoruması ilk baxışdan qəribə görünsə də bu bir həqiqətdir. Torpaqlarımızın azadlığı uğurunda əlinə silah alıb erməni millətçilərinə qarşı döyüşən oğullara silahdan istifadə qaydalarını, ilk döyüş taktikasını da məhz polisdə can qoyan oğullarımız öyrətdi.

Xalqın təkidli tələbindən sonra həyatını belə risq altına ataraq siyasət meydanına atılan ulu öndərin ən yaxın silahdaşı, səsinə ilk öncə səs verən, tapşırıqlarına əməl edən də yenə Azərbaycan Polisi idi. Çünki ideoloji baxımdan hazırlıqlı, silahın dilini bilən həmkarlarımız düşmənə qarşı, sözün əsl mənasında, rəşadətlə vuruşaraq elə bir qəhrəmanlığa imza atdılar ki, bu gün də onların adı gələndə fəxarət hissi ilə sinəmiz qabarır, ruhları qarşısında baş əyirik.

Ölüm qorxusunu ürəklərində çoxdan “öldürmüş” həmkarlarımızın şücaətləri bəlkə də cild-cild kitablara sığmaz. Onlar öz qanlarıyla Azərbaycan Polisinin döyüş tarixini yazdılar. Həmin döyüşlərdə 1695 həmkarımız və hərbi qulluqçumuz şəhidlik zirvəsinə ucaldı, 1710 nəfər ağır xəsarət aldı. Göstərdikləri fədakarlığa və şücaətlərə görə 68 nəfərə “Azərbaycanın Milli Qəhrəmanı” adı verildi. Onlar bizə gözlərini qırpmadan, uf demədən ömrünü Vətənə bağışlamağın əlifbasını öyrətdilər, bayraq kimi gözümüzdə müqəddəslik timsalına çevrildilər...

Ötən il Azərbaycan Polisinin 95-ci ildönümü ilə bağlı keçirilən tədbirdə ona ən böyük qiyməti, dəyəri yenə də ölkə Prezidenti, Silahlı Qüvvələrin Ali Baş Komandanı cənab İlham Əliyev verdi. Onun Polis Akademiyasında etdiyi proqram xarakterli çıxışı Azərbaycan Polisinin gələcək hədəflərini müəyyənləşdirməsinin, demək olar ki, əsasını qoydu. Ölkə başçısının bu gün polisə qara yaxanlardan, onun xidmətini, fəaliyyətini haqsız yerə tənqid edən qaragüruhçulardan fərqli olaraq dediyi: “Polis orqanlarının inkişafı, polisdə sağlam ab-havanın yaranması, polis orqanlarının öz vəzifə borcunu ləyaqətlə yerinə yetirməsi-bütün bu məsələlər ölkəmizin ümumu inkişafına çox müsbət təsir göstərmişdir”,- fikri bir daha onu təsdiq edir ki, utopiyadan uzaq, öz “qızıl vaxtını” dövlətinin və xalqının rifahı, inkişafı naminə xərcləyən, həqiqəti olduğu kimi deməyi bacaran İlham Əliyev Azərbaycanımızın inkişafı üçün atılan hər bir addımı, göstərilən ən kiçik xidməti belə diqqətdən kənarda qoymur, əksinə ona dəstək və yardımçı olur.

“Azərbaycan Polisinin çox böyük və şərəfli yolu var. Bu yol Azərbaycan dövlətçiliyinin yoludur”,-deyən, ölkə başçısı polisin sabitliyin keşiyində ayıq-sayıq durmasının əsas səbəblərindən biri kimi uğurla aparılan dövlət siyasəti ilə bağlayır: “Azərbaycanda bax, bugünkü vəziyyətin, sabitliyin, inkişafın, gələcəyə inamın təməlində dövlət siyasəti dayanır. Düzgün, müdrik dövlət siyasəti ki, bu siyasətin mərkəzində Azərbaycan vətəndaşıdır. Eyni zamanda, polis işçilərinin fəaliyyəti, onların peşəkarlığı, ictimai asayişin onlar tərəfindən qorunması bu sabitliyi daha da möhkəmləndirir. Mən çox şadam ki, Azərbaycanda polis orqanlarında islahatlar uğurla gedir, peşəkarlıq artır”.

Qeyd olunmalıdır ki, polisin sabitliyin keşiyində ayıq-sayıq durması, cinayətkarlıqla mübarizədə dönməzlik nümayiş etdirməsi həm də ondan xəbər verir ki, işləmək, çalışmaq, bilik və bacarığını nümayiş etdirmək üçün hər cür şərait yaradılıb, müasir avadanlıqlarla tam təchiz olunmuş xidməti binalar istifadəyə verilib. Yəni baş vermiş cinayətin üstünün qısa zamanda açılması peşəkarlıqla yanaşı, texniki təminatın da göstəricisidir.

Aparılan islahatlar, əldə olunan nailiyyətlər, vətəndaş-polis münasibətlərinin qurulması onu deməyə əsas verir ki, vətəndaşların üzləşdikləri problemlərin həlli DİN rəhbərliyinin diqqətindədir və prioritetdir. Ölkə başçısı bütün çıxışlarında bu məsələyə xüsusi önəm verir və məmurları canla-başla xalqa xidmət etməyə çağırır: “ Bir daha demək istəyirəm - mütləq Vətənə sədaqət, xalqa sədaqət, xalqa xidmət etmək lazımdır. Hər bir vəzifə sahibi bilməlidir ki, o, xalqa xidmət etmək üçün bu vəzifəni tutub, o cümlədən də mən. Bu vəzifəni mən, ancaq xalqa xidmət etmək üçün icra edirəm. Hər bir vəzifəli şəxs öz məsuliyyətini dərk etməlidir, Vətən üçün, xalq üçün çalışmalıdır. Bax, əgər hər bir yerdə, hər bir səviyyədə bu prinsiplər tam üstünlük təşkil etsə, onda ölkəmiz daha da sürətlə qabağa gedəcəkdir”.

Yeri gəlmişkən, onu da qeyd edək ki, ötən il, Azərbaycan Polisinin 95 illik yubileyinə həsr olunmuş mərasimdə ölkə başçısının polis və vətəndaş münasibətlərinə toxunması diqqətçəkən, günümüz üçün aktual məsələlərdən idi. Cənab İlham Əliyevin cəmiyyət dəstəkli polisə olan inamın yaradılması sabitliyin qorunmasının, cinayətkarlıqla və terrorçuluqla və digər qanunazidd əməllərlə mübarizənin əsasıdır,-deməsindən sonra əlavə şərhə ehtiyac qalmır.

Hafiz Təmirov,

polis kapitanı

Səs.-2014.- 3 iyul.- S.5.