Hücum diplomatiyası gücləndirilir

İlham Əliyev: “Diplomatların fəaliyyəti Qarabağla

bağlı həqiqətlərin dünyaya çatdırılmasına istiqamətlənməlidir”

Məlum olduğu kimi, bu günlərdə Xarici İşlər Nazirliyində Azərbaycan Respublikasının diplomatik xidmət orqanları rəhbərlərinin beşinci müşavirəsi keçirilib. Müşavirədə Azərbaycan Respublikasının Prezidenti İlham Əliyev çıxış edərək Azərbaycanın xarici siyasətinin öz prinsipiallığı və müstəqilliyi ilə seçildiyini bildirib. Dövlət başçısı qeyd edib ki, ölkəmizin uğurlu inkişafı və son illərdə iqtisadi müstəqilliyimizin tam şəkildə təmin olunması bizə xarici arenada öz sözümüzü deməyə, maraqlarımızı müdafiə etməyə imkanlar açıb. Prezident bu siyasətin beynəlxalq birlik tərəfindən də təqdirlə qarşılandığını, bizimlə əməkdaşlıq etmək istəyən ölkələrin sayının artdığını, Azərbaycanın özünü dünyada etibarlı dost və tərəfdaş kimi təsdiq etdiyini vurğulayıb. Eyni zamanda, gənc müstəqil dövlət üçün BMT Təhlükəsizlik Şurasına üzv seçilməyimizi tarixi hadisə adlandıran dövlətimizin başçısı bildirib ki, bu, ölkəmizin qısa müddətdə nə qədər böyük yol keçdiyini göstərib.

Hücumçu diplomatiya, intensiv hərbi və balanslı xarici siyasət

Azərbaycanın beynəlxalq siyasəti bu kriteriyalar üzərində qurulub. Ötən əsrin sonlarında Ümummilli Liderimiz Heydər Əliyevin müəyyənləşdirdiyi və addım-addım tətbiq etdiyi bu xarici siyasət kursu bu gün artıq özünü doğruldub. Hər halda nəticə göz qabağındadır. Nəticə isə bundan ibarətdir - bu gün bölgədə Azərbaycanla rəqabət aparmaq iqtidarında olan ikinci bir dövlət yoxdur. Azərbaycanın həm iqtisadi potensialı, həm hərbi gücü, həm də beynəlxalq aləmdəki çəkisi bütün digər region dövlətlərindən qat-qat üstündür. Azərbaycan bölgədə cərəyan edən bütün siyasi prosesləri öz xeyrinə yönəldə bilib. Azərbaycanla hesablaşırlar, ölkəmiz dünya dövlətləri tərəfindən bərabərhüquqlu tərəfdaş kimi qəbul edilir. Sözügedən müşavirədə Prezident İlham Əliyev bildirib ki, Azərbaycan beynəlxalq aləmdə çox etibarlı tərəfdaş kimi tanınır: “Xarici siyasətimiz daxili siyasətimizin davamıdır. Bu gün Azərbaycanın xarici siyasəti prinsipiallığı və müstəqilliyi ilə seçilir. Bunun əsas səbəbi, əlbəttə ki, güclü siyasi iradənin mövcudluğudur. Çünki güclü siyasi iradə olmasa, heç bir ölkə müstəqil siyasət apara bilməz”.

Prezident İlham Əliyevin xarici siyasət konsepsiyasında Ermənistan-Azərbaycan, Dağlıq Qarabağ münaqişəsinin ədalətli həlli xüsusilə mühüm yer tutur. Aparılan uğurlu diplomatiya nəticəsində nüfuzlu beynəlxalq təşkilatlar haqqın və ədalətin Azərbaycanın tərəfində olduğunu etiraf edir, Ermənistanı təcavüzkar dövlət kimi tanıyırlar. Bütün çıxışlarında olduğu kimi, sözügedən müşavirədə də xarici siyasətlə bağlı əsas məsələnin Ermənistan-Azərbaycan, Dağlıq Qarabağ münaqişəsinin həlli olduğunu bildirən Prezident İlham Əliyev təəssüflə qeyd edib ki, bu istiqamətdə nəticələr yoxdur. Dövlətimizin başçısı Azərbaycanın məsələni dinc yolla həll etmək istəyini bildirib və vurğulayıb ki, bununla yanaşı, Ermənistanın qeyri-konstruktiv mövqeyi, eləcə də beynəlxalq hüququn işləməməsi və güc amilinin əsas rol oynaması məsələnin hərbi yolla həllini istisna etmir. Azərbaycan Prezidenti bu səbəbdən də ordu quruculuğumuzla bağlı aparılan ardıcıl siyasətimizin düzgün olduğunu vurğulayıb. Dövlət başçısı Prezident İlham Əliyev bildirib ki, diplomatların fəaliyyəti ilk növbədə Qarabağla, o cümlədən İrəvan xanlığı ilə bağlı həqiqətlərin dünyaya çatdırılmasına istiqamətlənməlidir. Prezident İlham Əliyev bir daha vurğulayıb ki, Azərbaycan ərazisində ikinci erməni dövlətinin yaranması qətiyyən mümkün deyil və Azərbaycan buna heç vaxt imkan verməyəcək.

Ermənistan tərəfindən işğal olunmuş torpaqlarımızın azad edilməsi sahəsində diplomatik səylərin davam etdirildiyini, səfirliklərin bu istiqamətdə fəaliyyətinin məqsədyönlü olduğunu, Qarabağ məsələsinə dair ədalətli, yəni maraqlarımızı təmin edən beynəlxalq təşkilatların qətnamə və qərarlarının kifayət qədər qəbul edildiyini, hüquqi bazanın möhkəm və sarsılmaz olduğunu vurğulayan Prezident İlham Əliyev bildirib ki, bu məsələ ilə bağlı Ermənistanın mövqeləri çox zəifdir, bizim mövqelərimiz isə çox güclüdür. “Biz bölgədə söz sahibiyik və bundan sonra mövqeyimiz daha da möhkəm olacaqdır. Biz heç vaxt imkan verə bilmərik ki, Ermənistan hər hansı bir siyasi, iqtisadi, enerji və nəqliyyat layihəsinə qoşulsun. Biz onları təcrid etmişik, bunu gizlətmirik. Gələcəkdə təcridetmə siyasətimiz davam etdirilməlidir. Bu, öz bəhrəsini verir. Əgər məsələni sülh yolu ilə həll etmək üçün bizə daim mesajlar göndərən tərəfdaşlar, doğrudan da, istəyirlər ki, bölgədə də sülh olsun, Ermənistan işğal edilmiş torpaqlardan çıxmalıdır. Çünki əks-təqdirdə məsələnin başqa yolla həll edilməsi istisna deyildir. Biz bunu heç vaxt istisna etməmişik. Beynəlxalq hüquq bu haqqı bizə verir. Sadəcə olaraq, Azərbaycanın sülhsevər siyasəti, bölgədə gedən proseslərə artan məsuliyyəti və Azərbaycanın bölgədə artıq sabitləşdirici amil kimi çıxış etməsi bizi bu radikal addımlardan, hələ ki, çəkindirir. Ona görə, məsələnin tezliklə həlli hər tərəfin marağında olmalıdır”.

Beləliklə, bütün bunlar bizim güclü dövlətə sahib olduğumuzu bir daha sübut edir. Dəqiq konsepsiyamızın, inkişaf proqramımızın olması bunu bir daha məqsədyönlü formaya çevirir. Prezident İlham Əliyevin də qeyd etdiyi kimi, “Bizim artıq güclü dövlətimiz vardır-müstəqil Azərbaycan dövləti. Bizim dəqiq konsepsiyamız vardır. Bu poqramın reallaşması nəticəsində Azərbaycan inkişaf etmiş ölkələrin sırasına daxil ediləcəkdir. Əgər gələcəklə bağlı fikirlərimizi bir cümlə ilə ifadə etsək deməliyik: Biz inkişaf etmiş ölkəyə çevrilməliyik!”

RƏFİQƏ KAMALQIZI

Səs.-2014.- 9 iyul.- S.2.