Ölkəmizdə insanların sağlamlığı prioritet məsələ kimi daim diqqətdə saxlanılır

Azərbaycan Prezidentinin sərəncamları ilə Azərbaycan səhiyyəsi bütün xüsusiyyətlərinə görə, özünün yeni inkişaf mərhələsini yaşayır

Azərbaycan son dövrdə inkişaf tempini sürətləndirərək, dünyanın aparıcı və inkişafda olan ölkələri sırasında yüksək mövqeyə malikdir. Əldə olunan nailiyyətlər ölkənin milli maraqlarının zəminində formalaşıb, eləcə də, dövlət tərəfindən həyata keçirilən milli strategiya, yürüdülən ictimai, siyasi, mədəni mövqe məhz belə imicin Azərbaycan ətrafında yaranmasına gətirib çıxarıb. Azərbaycan iqtisadiyyatının əsasını təşkil edən neft və bununla bağlı imzalanan beynəlxalq sazişlər, müqavilələr dövlətin maliyyə vəsaitinin yüksəlməsinə və bunun müqabilində ölkənin bütövlükdə sferasının dəyişməsinə səbəb olub.

Qürurla deyə bilərik ki, Azərbaycanda həyata keçirilən sosial-iqtisadi siyasət nəticəsində müşahidə olunan uğurlu inkişaf həyatımızın hər bir sahəsini əhatə edir. Bu inkişaf əhalinin sağlamlığının qorunması kimi vacib bir sahədən də yan keçməyib. Səhiyyəyə diqqət və qayğının artırılması Azərbaycanın səhiyyə sistemini dövrlə ayaqlaşan, qlobal dəyişikliklərə cavab verən və tərəqqi edən bir sahəyə çevirməkdədir. Səhiyyədə bir çox istiqamətlər üzrə islahatlar aparılır, dövlət proqramları reallaşır, səhiyyə infrastrukturunun təkmilləşdirilməsinə irihəcmli investisiyalar qoyulur, genişmiqyaslı işlər görülür. Müxtəlif aspektlərdən səhiyyədə aparılan uğrulu islahatlar əhalini sağlamlığının təminatına, onun tam şəkildə dünya standartları səviyyəsində qurulmasına istiqamətlənib. Bu məqsədlə son illər səhiyyənin maddi-texniki bazası möhkəmləndirilib. Azərbaycan dövləti insanların sağlamlığını prioritet məsələ kimi daim diqqət mərkəzində saxladığından son 11 ildə ölkə büdcəsində səhiyyə xərcləri 11 dəfədən çox artıb. Azərbaycanda müasir tibb avadanlığı və cihazlarla təchiz olunmuş 500-dən çox səhiyyə müəssisəsi əhalinin istifadəsinə verilib.

ÖLKƏNİN MALİYYƏ İMKANLARININ ÇOXALMASI SƏHİYYƏYƏ AYRILAN MALİYYƏ VƏSAİTİNİN ARTMASINA İMKAN VERİR

Ölkədə Avropa standartlarına uyğun ən son texnologiyalarla təchiz olunmuş diaqnostika mərkəzləri, xəstəxanalar əhaliyə lazımi xidmət edir. Hər növ müasir tibbi avadanlıq və ləvazimatlarla təchiz olunmuş xəstəxanalar dünya standartlarına uyğunlaşdırılıb. Yeni istifadəyə verilən, təmir və bərpa olunan səhiyyə ocaqlarına dünyanın inkişaf etmiş ölkələri olan Almaniya və İsveçrə kimi ölkələrdən avadanlıqlar gətirilir.

Ana və uşaqların sağlamlığının qorunması məsələsi də dövlətin daim diqqət mərkəzindədir. Son illər ölkəmizdə bu sahədə nailiyyətlər əldə edilib. Bakı şəhərində Respublika Perinatal Mərkəzi, Naxçıvanda, Gəncədə, Lənkəranda, Qubada, Sabirabadda və Şəkidə regional perinatal mərkəzlər yaradılıb, müasir avadanlıqlarla təchiz edilib. Bu da respublikanın şəhər və rayonlarında keyfiyyətli perinatal xidmətlərdən istifadənin əhali arasında bərabər şəkildə bölünməsinin təmin olunmasına imkan yaradıb. Ölkəmizdə talassemiyalı və hemofiliyalı xəstələrin müalicəsində müsbət nəticələr əldə edilmişdir. Son 11 ildə talassemiyadan ölüm göstəricisi 5 dəfə, hemofiliyadan ölüm isə 2 dəfə azalıb. Bu xəstəliklərdən əziyyət çəkənlərin təhlükəsiz donor qanı ilə təminatı məsələsi də praktik olaraq həll edilmişdir. Qan tədarükü 6,8 tondan 30,1 tonadək artmışdır. Hazırda tibb müəssisələrinin və xəstələrin donor qanına olan ehtiyacı tam ödənilir.

Göründüyü kimi, ölkənin maliyyə imkanlarının çoxalması və həyata keçirilən siyasi kurs dövlət büdcəsindən səhiyyəyə ayrılan maliyyə vəsaitinin artmasına imkan verir və Azərbaycan səhiyyəsində bir sıra işlərin keyfiyyətlə həyata keçirilməsinə şərait yaradılıb. Bütün bunlar gələcəyin təminatı olan insan faktorunun daim diqqətdə olduğunu, onların fiziki cəhətdən sağlam və gümrahlığının diqqətdə saxlanıldığını göstərir.

"GÖRÜLƏN VƏ GÖRÜLƏCƏK TƏDBİRLƏR NƏTİCƏSİNDƏ İLİN SONUNA QƏDƏR DƏRMANLARIN QİYMƏTLƏRİ KƏSKİN ŞƏKİLDƏ AŞAĞI DÜŞMƏLİDİR"

Azərbaycan Prezidenti Cənab İlham Əliyevin fərman və sərəncamları ilə Azərbaycan səhiyyəsi müasir dövrümüzdə bütün xüsusiyyətlərinə görə, özünün yeni inkişaf mərhələsini yaşayır. Onu da qeyd edək ki, hazırda ölkəmizdə 30-dan çox tibb müəssisəsi təmir olunur, tikilir. Sözsüz ki, bu inkişaf insanların sağlam həyat tərzi yaşamasında önəmli faktordur.

Belə uğurların olduğu bir zamanda keyfiyyətsiz dərman peraparatlarının satışa çıxarılması və qiymətlərin baha olunması hallarına təsadüf olunur. Dərman vasitələri ilə təchizat sahəsində problemlərin aradan qaldırılması bu günün aktual məsələrindən biridir. İnsan həyatı və sağlamlığına zərbə vura biləcək hallara təsadüf olunacaq halda ciddi tədbirləri həyata keçirilməsi qaçılmazdır. Prezident İlham Əliyevin Sədrliyi ilə Nazirlər Kabinetinin 2015-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında ölkə başçısının vurğuladığı kimi, qiymətlər süni şəkildə qaldırılır. Ölkə başçısı onu da bildirib ki, başqa ölkələrlə müqayisədə Azərbaycanda bəzi dərmanların qiymətləri bir neçə dəfə bahadır və insanlar məcbur olub bu dərmanları alırlar: "Dərman insanların həyatıdır, onların sağlamlığıdır. Bu sahədə pozuntulara yol verən insanlar vicdansızdırlar. Başa düşürsünüz nə edirlər? İnsanlar nə etsinlər? Ona resept yazırlar, o da gedir alır. Nəyi alır, hansı keyfiyyətdədir? O, onu qəbul etməlidir, yoxsa yox? O, haradan bilsin? Dərd burasındadır. Ona görə, bax, biz bu sosial və mənəvi pozuntuları aradan götürəcəyik".

Təbii ki, bu prosesdə həkim məsuliyyətsizliyi ön plandadır. Pasientin dərmanları qəbul etməsi həkim tərəfindən müəyənləşdirilir. İnsan öz sağlamlığını Hipokrat andı içmiş həkimə həvalə edir. Ölkə başçısının çıxışında vurğuladığı kimi, həkim resepti yazır, deyir ki, sən bu dərmanı filan yerdən almalısan:"Hətta reseptlə satılmayan vitaminlərə də resept yazırlar. Bu, böyük bir biznes şəbəkəsidir. Bu biznes kimin hesabınadır? Adi insanın hesabına. Adi insan da məcbur olub gedir ona verilən reseptlə dərman alır. Heç bilmir nə alır. Sonra dərmanın ona kömək edib-etməməsi ilə əfsuslar olsun ki, heç kim maraqlanmır".

Təbii ki, Azərbaycana gətirilən dərman peraparatları müxtəlif ölkələrdə istehsal olunur. Bu baxımdan qiymətlər də müxtəlifdir. Ucuz və keyfiyyətsiz dərman məhsullarının ölkəmizə gətirilməsinin qarşısını almaq məqsədilə tədbirlər görüləcək. Azərbaycan Prezidenti bu sahədə çox ciddi pozuntular olduğunu bildirərək bu pozuntulara son qoyulacağını qeyd edib:"Həm şəffaflıq təmin ediləcək, hər bir vətəndaş biləcək ki, hansı dərmanı alır və hansı qiymətə alır. Qiymətlərin yuxarı səviyyəsi müəyyən ediləcək. Heç kim o səviyyədən baha sata bilməyəcək. Dərmanları satanlar da burada öz gəlirlərini götürəcəklər. Onların da normal gəlir səviyyəsi olmalıdır. Ancaq bu səviyyə 100, 200, 300 faiz olmamalıdır. Heç yerdə belə özbaşınalıq yoxdur. Görülən və görüləcək tədbirlər nəticəsində ilin sonuna qədər dərmanların qiymətləri kəskin şəkildə aşağı düşməlidir".

Ölkə başçısının tapşırığının icrası olaraq Səhiyyə Nazirliyinin də təmsil olunduğu Tarif Şurası tərəfindən artıq bir sıra dərmanların qiymətinin tənzimlənməsi barədə qərar qəbul edilib və nəticədə baxılmaq üçün təqdim olunmuş dərmanların qiyməti nəzərə çarpacaq dərəcədə aşağı salınıb. Sentyabr ayının 15-dən başlayaraq artıq bu qərar tətbiq olunmağa başlanılacaqdır.

Dərman preparatlarının qiymətinin tənzimlənərək aşağı salınması, həmçinin dövlət müəssisələri tərəfindən də bu preparatların alışına müsbət təsir göstərməklə əhaliyə pulsuz təqdim edilən dərmanların çeşidinin artımına, həmçinin bu siyahıya daha da keyfiyyətli və effektiv dərman preparatlarının daxil olunmasına şərait yaradacaqdır. Bu isə, öz növbəsində, əhaliyə göstərilən tibbi xidmətin keyfiyyətinin artırılmasına müsbət təsir edəcəkdir.

Qeyd olunanları əhalinin dərman təminatının yaxşılaşdırılması sahəsində olduqca mühüm addım kimi qiymətləndirmək olar.

Nəzakət ƏLƏDDİNQIZI

Səs.-2015.- 5 avqust.- S. 10.