AZƏRBAYCAN QADINININ LƏYAQƏT VƏ ALİLİK SİMVOLU

Mehriban Əliyeva - varlığı və fəaliyyəti ilə ölkəsinə ucalıq şərəfi gətirən dəyərli Azərbaycan xanımı

"Həyatda hər bir kəsin yerini və taleyini tarix müəyyən edir. Odur ki, nə böyük, nə də kiçik rollar olmur. Öz həyat kitabını yazmağa ancaq sənin şəxsi, dərk edilmiş məsuliyyətin imkan verir".

Mehriban Əliyeva

Respublikanın ictimai-siyasi, mədəni və sosial həyatında aparıcı qüvvəyə malik olan Azərbaycan qadını həm də dünya miqyasında beynəlxalq cəmiyyətin nüfuz sahibinə çevrilib. Onun qadın gözəlliyi, qadın iradəsi, saflığı və sədaqəti, əlbəttə ki, xalqımızın çoxəsrlik milli-mənəvi dəyərləri sistemində formalaşıb. Bütün sahələrdə əməyi olan Azərbaycan xanımı dövlətin inkişafında, dövlətçilik ənənələrinin möhkəmlənməsində əvəzsiz, müstəsna rola malikdir.

Bu gün müasirimiz olan Heydər Əliyev Fondunun prezidenti, Azərbaycanın Birinci Xanımı, YUNESKO və İSESKO-nun xoşməramlı səfiri, millət vəkili Mehriban xanım Əliyeva da məhz Azərbaycanın ictimai-siyasi və mədəni həyatında əhəmiyyətli rola malikdir. Azərbaycanda baş verən nəhəng sıçrayışlarda, ölkənin simasının gündən-günə dəyişməsində, dünyanın nüfuzlu dövlətləri sırasında layiqli yer qazanmasında Mehriban xanım Əliyevanın danılmaz fəaliyyəti, genişmiqyaslı layihələri öz uğurlu nəticəsini verib. Onun həyata keçirdiyi layihələr yerli əhəmiyyətli sosial problemlərin həllinə, xüsusi qayğıya ehtiyacı olan insanlara kömək məqsədi daşıyır. İnsanların yaradıcı potensialının, bilik və bacarıqlarının aşkara çıxarılmasına, qabiliyyətlərini göstərməsinə, inkişaf etdirməsinə yardım edir. Azərbaycan mədəniyyətinin geniş təbliği, sağlam mənəvi dəyərlərin qorunması ilə bağlı aparılan işlər, uşaq və gənclərin hərtərəfli biliklərə malik vətəndaş kimi yetişdirilməsi istiqamətində önəmlidir. Azərbaycan həqiqətlərini dünya ictimaiyyətinə çatdırmaq, uşaq müəssisələrinin infrastrukturlarını, səhiyyə və tibbi təsisatları inkişaf etdirmək istiqamətində böyük mahiyyət daşıyan addımlar Mehriban xanım Əliyevanın humanizm prinsiplərinə söykənir.

Öz varlığı ilə məmləkətinə şərəf gətirən Azərbaycanın Birinci Xanımının fəaliyyəti Azərbaycan haqqında olan təsəvvürlərin ciddi şəkildə dəyişilməsi ilə nəticələnib. Azərbaycan haqqında olan təsəvvür, insan haqqında olan təsəvvür Onun layihələri əsasında tamam fərqli bir şəkildə meydana çıxdı. Bütün dünyaya müstəqil dövlətdə yaşayan qadın obrazının lazımi şəkildə təqdiminə nail oldu. Öz peşəkarlığı, dünya arenasında baş verən hadisələrə yanaşması ilə humanist insan obrazını canlandırdı. Azərbaycan mədəniyyətinin dünya mədəniyyətinin tərkib hissəsinə daxil olmasında atdığı addımlar çox əhəmiyyətli hadisədir. YUNESKO-nun, İSESKO-nun, eləcə də digər beynəlxalq nüfuzlu mədəniyyət təşkilatlarının elə bir tədbiri yoxdur ki, orada Azərbaycanın milli-mənəvi dəyərlərindən, mədəniyyətindən, qədim folklorundan söz açılmasın. O, tarixi həqiqətləri, tarixi faktları, dünyanın nüfuzlu təşkilatlarının iştirakı olan tədbirlərdə qonaqlara çatdıraraq, maraqlı faktlar əsasındakı çıxışları ilə ölkə həyatında baş verən hadisələrin təbliğinə nail olub. Eyni zamanda Onun humanizminin nəticəsi olaraq Azərbaycan əhalisinin sağlamlığı, xoşbəxtliyi geniş bir sferanı əhatə edib. Belə ki, ahıllara, qocalara, uşaqlara qayğı ilə yanaşmaq məsuliyyəti çox dəyərli Mehriban xanımın fəaliyyətində özünü təsdiqləyib.

Mehriban xanım Əliyeva tərəfindən yaradılan Heydər Əliyev Fondunun genişmiqyaslı fəaliyyəti nəinki Azərbaycanda, onun hüdudlarından kənarda belə əks-səda doğurub. Fond görkəmli siyasi xadim Heydər Əliyevin ölməz ideyalarını dəstəkləyərək, ölkənin sosial-iqtisadi, mədəni tərəqqisi, sivil dünya birliyinə inteqrasiyası, xalqın maddi rifahının yaxşılaşması naminə fəaliyyətini davam etdirir. Bu yol Heydər Əliyevin müəyyən etdiyi, işləyib hazırladığı siyasətin öyrənilməsinə, təbliğinə və bu ideyaların həyata keçirilməsinə doğru yönəlib. Məhz buna görə Heydər Əliyev Fondu bir sıra dost dövlətlərdə nümayəndəliklər yaratmağı, eləcə də, bu ölkələrdə fəaliyyət göstərən analoji qeyri-hökumət qurumları ilə əməkdaşlıq əlaqələri qurmağı məqsədyönlü hesab edərək, Rusiya Federasiyasında, Rumıniyada, Türkiyədə və ABŞ-da nümayəndəliklərini yaratdı. Fondun bu nümayəndəlikləri Azərbaycanın beynəlxalq nüfuzunun artırılması ilə bağlı həqiqətləri dünya ictimaiyyətinə çatdırır.

Hər bir mükafat görülən işə verilən dəyərdir

Hər bir azərbaycanlı üçün fərəhlidir ki, Azərbaycanın Birinci Xanımı Mehriban xanım Əliyevanın fəaliyyəti beynəlxalq səviyyədə diqqətdədir. Onun gördüyü işlər cavabsız qalmamış, dünya dövlətləri, nüfuzlu təşkilatlar tərəfindən müxtəlif adlara, mükafatlara layiq görülmüşdür. Mesenatlıq və xeyriyyəçilik fəaliyyətinə görə, təhsil və mədəniyyət müəssisələrinin dəstəklənməsinə, Rusiya və Azərbaycan xalqları arasında dostluğun möhkəmləndirilməsində sanballı töhfələrinə görə Rusiyanın "Yüzilliyin mesenatları" Beynəlxalq Xeyriyyə Fondunun "Yaqut Xaç" ordeninə, sivilizasiyalararası dialoq daxil olmaqla, müxtəlif sahələrdə genişmiqyaslı və fədakar fəaliyyətinə, qayğıya ehtiyacı olan uşaqlara diqqətinə, onların yaşayış şəraitinin yaxşılaşmasına, təhsilə, həmçinin, islam aləmində görülən işlərə böyük dəstəyinə görə İSESKO-nun xoşməramlı səfiri adına layiq görülüb. Genişmiqyaslı xeyriyyəçilik fəaliyyətinə, bəşəriyyətin ali ideallarına xidmət sahəsində yüksək nailiyyətlərinə görə "Qızıl ürək" beynəlxalq mükafatı, mərhum Polşa prezidenti Lex Kaçinski tərəfindən Azərbaycanla Polşa arasında dostluq münasibətlərinin inkişafındakı xidmətlərinə görə "Xidmətlərə görə" Böyük Komandor Xaçı ordeni, Fransanın eks-prezidenti Nikolya Sarkozinin sərəncamı ilə "Şərəf Legionu" ordeninin zabit dərəcəsi ilə təltif edilməsi və digər belə mükafatlar Onun fəaliyyətinin real qiymətidir.

Ölkə daxilində və dünya arenasında həyata keçirdiyi layihələrin əhəmiyyətini nəzərə alan Prezident İlham Əliyev Mehriban xanım Əliyevanı Vətənimizin ən ali mükafatı, "Heydər Əliyev" ordeni ilə təltif edərkən bildirmişdir ki, fondun bütün təşəbbüsləri milli ruha əsaslanır: "Modernləşmə, müasirləşmə, dünya birliyinə inteqrasiya, Azərbaycanın milli maraqlarının müdafiə edilməsi, Azərbaycanın olduğu kimi dünyaya təqdim edilməsi - bütün bu şərəfli funksiyalar bu fondun üzərinə düşür."

Milli-mənəvi dəyərlərimizin hamisi

"Sivilizasiyalararası dialoq" həftəsi çərçivəsində Parisdə keçirilmiş "Azərbaycan mədəniyyətlərin və sivilizasiyaların qovşağında" adlı tədbirdəki çıxışında Mehriban xanım əsl vətənpərvərlik nümayiş etdirmişdir: "Azərbaycan Şərq ilə Qərbin qovuşduğu məkanda yerləşir. Şərq və Avropa dəyərlərini qəbul edən, hansı yolla getməyi yaxşı bilən müasir ölkədir. Azərbaycan dünyəvi dövlətdir, yüksək mədəniyyəti və tolerantlığı ilə fərqlənən ölkədir." Qiymətli dəyərlərimizin YUNESKO-nun "Dünya İrs Siyahısı"na salınmasının təşəbbüskarı olan Mehriban xanımın vurğuladığı kimi indi kütləvi, mədəniyyət stereotiplərinin hakim olduğu bir şəraitdə milli ənənələrin qorunub saxlanılması, onlara qayğı ilə düşünülmüş münasibət göstərilməsi son dərəcə vacibdir.

Mehriban xanım Əliyevanın çoxşaxəli fəaliyyətində milli mədəniyyətimizin inkişafı naminə həyata keçirilən layihələr xüsusilə fərqlənir. ONUN təşəbbüsü ilə bəşəriyyətin şifahi və qeyri-maddi irsinə dair şah əsərləri dünya siyahısına daxil olunan muğam sənətinin qorunub saxlanılması və təbliği istiqamətində görülən misilsiz işlər təqdirəlayiqdir. Bir çox tarixi abidələrimizin, minillərlə yaşı olan Novruz bayramının mədəni irs siyahısına daxil olunması Mehriban xanımın xidmətlərinin nəticəsidir.

24 tanınmış korifey xanəndənin ifasında səslənən muğamların toplandığı "Qarabağ xanəndələri" musiqi albomunun nəşri kifayətdir ki, dünya xalqları Azərbaycan musiqi mədəniyyətinin zəngin tarixi barədə ətraflı məlumat alsın. "Muğam" jurnalının, "Muğam ensiklopediyası"nın nəşri Azərbaycan xalqına məxsus zəngin sənətin təbliğində böyük əhəmiyyətə malikdir. Azərbaycana məxsus muğam sənətinin qorunub saxlanılması, eyni zamanda təbliğini nəzərdə tutan "Muğam irs", "Muğam dəstgah", "Muğam-antologiya" layihələri Heydər Əliyev Fondunun prezidenti Mehriban xanım Əliyevanın şəxsi təşəbbüs və xidmətlərinin nəticəsidir. Görülən işlərin davamı kimi maraq doğuran televiziya-muğam müsabiqələri demək olar ki, dünyanın hər yerində izlənildi və tamaşaçı rəğbəti qazandı. Analoqu olmayan və Şərq xalqlarına məxsus muğamın yaşadılması üçün nəzərdə tutulan, milli köklərə bağlılığı ifadə etməklə müasirlik, yenilik aşılayan Muğam Mərkəzinin istifadəyə verilməsi də bu istiqamətdə həyata keçirilən misilsiz xidmətlərin davamıdır.

İslam Mədəniyyətinin Paytaxtı elan olunan dövrdə Bakıda "Muğam aləmi" Beynəlxalq Musiqi Festivalının təşkili dünya xalqlarının diqqətini Şərq ilə Qərbin qovuşuğunda yerləşən və sivilizasiyaları birləşdirən Azərbaycana yönəltdi. Festival çərçivəsində keçirilən elmi simpoziumda maraqlı çıxışı ilə diqqəti cəlb edən və müxtəlif ölkələrdən muğamın sehrinə yığışan qonaqlara bir daha Azərbaycan xalqına xas, eyni zamanda bütün dünya musiqi ictimaiyyəti üçün dəyərli olan muğam sənətinin əbədiyaşarlığı barədə açıqlama verən Mehriban xanım Əliyeva vurğuladı ki, belə bir festivalın keçirilməsi muğamsevərlər üçün fəxrdir: "Hər bir azərbaycanlı üçün muğam xüsusi əhəmiyyət daşıyır. Qərblə Şərqin arasında, Böyük İpək Yolu üstündə yerləşən Azərbaycan sivilizasiyaların qovuşduğu bir məkanda əsrlər boyu öz mədəniyyətini formalaşdırmışdır."

Muğamın insanlara bəxş etdiyi mənəvi zövqün, zənginliyin, duyğuların heç nə ilə əvəz oluna bilməməsini diqqətə çatdıran Heydər Əliyev Fondunun prezidenti bildirdi ki, muğam Azərbaycan xalqına xas olan ən gözəl xüsusiyyətlərin daşıyıcısıdır: "Torpağa, köklərə bağlılıq, vətənpərvərlik, milli ləyaqət hissi, qonaqpərvərlik, xeyirxahlıq, mərhəmət, emosional zənginlik - bütün bu hisslər muğam fəlsəfəsinin əsasındadır. Odur ki, desəm muğam gözəlliyin və məhəbbətin rəmzidir, səhv etmərəm."

26 avqustun - Beynəlxalq Azərbaycan Muğamı Günü və İpək Yolu üstündə yerləşən ölkələrin musiqisi günü kimi qeyd olunması rəmzi məna daşıyır. Bu tarixdə Azərbaycanın milli-mənəvi dəyərlərinin təbliğatçısı Mehriban xanım dünyaya göz açmışdır. Fondun təşəbbüsü ilə hər il Qəbələdə Beynəlxaq Musiqi festivallarının keçirilməsində məqsəd dünya və milli musiqimizin pərəstişkarlarını bir araya toplamaqla musiqinin dili, qüdrəti ilə xalqları bir-birinə yaxınlaşdırmaq, sülhə, sabitliyə çağırmaqdır.

Anaların, uşaqların sevimlisi, qayğıkeşi Mehriban xanım Əliyeva!

Millət vəkili seçildiyi Xəzər rayonu ərazisində, xüsusilə beş min il tarixə malik Qala Açıq Muzey Kompleksində aparılan tikinti-bərpa və yenidənqurma işləri ilə maraqlanan Mehriban xanım ərazidəki memarlıq incilərinə tariximizdən bu günümüzə uzanan illərin bələdçisi, əsrlərin yadigarlarıının qorunub saxlanılmasına vətənpərvərlik duyğusu ilə diqqət yetirir. "Yeniləşən Azərbaycana yeni məktəb" layihəsinin təşəbbüskarı olan fondun dəstəyi və YUNESKO-nun iştirakı ilə Bakıda keçirilən dünyada savadlılığın dəstəklənməsi üzrə regional konfranslar çərçivəsində "Avropada subregional çərçivədə savadlılıq problemlərinə baxış: tərəfdaşlıq əlaqələrinin qurulması və innovativ yanaşmaların tətbiqinə dəstək" beynəlxalq konfrans Azərbaycanda elmin, təhsilin inkişafı istiqamətində həyata keçirilən dövlət siyasətinin uğuruna baxış idi.

Bəlkə də ONUN qədər uşaqları sevən, körpələrin sağlam böyüməsi üçün əlindən gələni əsirgəməyən, neçə-neçə anaya övlad sevinci bəxş edən, ölkədə təhsilin inkişafı üçün beynəlxalq təşkilatların imkanlarından maksimum istifadə edən ikinci bir vətənpərvər ola bilməz. Heydər Əliyev Fondunun "Uşaq evləri və internat məktəblərinin inkişafı" proqram və layihələrinə uyğun olaraq həyata keçirilən yenidənqurma və bərpa işləri ilə maraqlanan, gənc nəslin fiziki və əqli inkişafına diqqətlə yanaşan Mehriban xanım fiziki cəhətdən zəif inkişaf etmiş uşaqlar üçün nəzərdə tutulan layihələrə xüsusi qayğı ilə yanaşır. Mehriban xanımın təşəbbüsü ilə ən müasir obyekt kimi yenidən qurulan internat evləri ən müasir informasiya texnologiyaları ilə təchiz edilmişdir. Uşaq evləri və internatların yenidən qurulması təşəbbüsünü irəli sürən Heydər Əliyev Fondunun prezidentinin diqqət və qayğısı nəticəsində 30-dan artıq təlim-tərbiyə müəssisəsi ən müasir avadanlıqlarla təmin olunmuş, valideyn himayəsindən məhrum körpələrin fiziki cəhətdən sağlam, hazırlıqlı vətəndaş, zəngin biliyə malik insanlar kimi yetişməsi istiqamətində önəmli tədbirlər həyata keçirilmişdir.

"Hər bir uşağın ailəyə ehtiyacı var" layihəsinə uyğun olaraq uşaqların ailələrə verilməsi kimi önəmli kampaniyaların həlli istiqamətində maraqlı tədbirlərin keçirilməsinə nail olan Mehriban xanımın təşəbbüslərinin əsasında bir vəzifə dayanır: Vətən üçün sağlam düşüncəli, layiqli, bacarıqlı övladlar yetişdirilsin.

Mehriban xanım ana və uşaqların sağlamlığının qorunmasının daim əsas prioritet kimi diqqətdə saxlanılmasına çalışır, ən son texnologiya, avadanlıqların tətbiqinə ciddi diqqət yetirir. Diabetli, hemofiliyalı, fiziki cəhətdən qüsurlu uşaqların sağlamlığı qayğısına qalan Mehriban xanımın bilavasitə diqqət və qayğısı ilə həyata keçirilən " Talassemiyasız həyat naminə", "Diabetli uşaqlara ən yüksək qayğı", "Kor və zəif görən uşaqların İKT-yə çıxışının təmin olunması" kimi layihələr üzrə görülən işlər, Bakıda Talassemiya Mərkəzinin, tələbatı ödəyəcək qədər ehtiyata malik Qan Bankının yaradılması xeyirxahlıq, vətənpərvərlik hisslərini birləşdirən humanist duyğulardır.

Çoxşaxəli fəaliyyətində yorulmaq bilmir Mehriban Əliyeva. Hər gördüyü işdən ilhamlanır, yeni bir layihənin icrası qarşıya qoyulur: "İnsan gördüyü işin haqlı, xeyirli və lazımlı olduğuna daxilən inandıqda həvəslə işləyir, fiziki yorğunluq isə mənəvi məmnunluqla ödənilir" - deyir Mehriban Əliyeva. Gecəli-gündüzlü əmək, fəaliyyət Azərbaycanla, doğulub, boya-başa çatdığı məmələkətlə bağlıdır.

Mehriban xanım Əliyeva həm də Milli Məclisin deputatıdır. Onun aministiya ilə bağlı müraciəti və azadlıqdan məhrum olunmuş çoxlu sayda insanların humanizm prinsiplərinə əsaslanaraq azadlığa buraxılmasına nail olub. Bu reallıq Mehriban xanım Əliyevanın bir qadın, ana, ictimai xadim kimi fəaliyyətini göz önündə canlandırır. Gördüyü işlər böyük məsləkinin gerçəkləşməsidir. Onun fəaliyyəti hər zaman diqqətdədir və Mehriban xanım Əliyevaya böyük etimad göstərilir. Yeni Azərbaycan Partiyasının V Qurultayında Mehriban xanım Əliyevanın YAP-ın Sədr müavini vəzifəsinə irəli sürülməsi Ona göstərilən daha bir etimad idi.

"Həyatda hər bir kəsin yerini və taleyini tarix müəyyən edir. Odur ki, nə böyük, nə də kiçik rollar olmur. Öz həyat kitabını yazmağa ancaq sənin şəxsi, dərk edilmiş məsuliyyətin imkan verir."

Göründüyü kimi, bu sözləri ilə xalqa xidmətin hər zaman dəyərli olduğunu bildirən Mehriban xanım üçün məsuliyyətin və yerinə yetirilmiş vəzifənin də böyük-kiçikliyi yoxdur. Yalnız xalqa xidmət istəyi, insanları sevindirəcək, imkansızlara yardım, humanistlik və xeyirxahlıq duyğuları var.

RƏFİQƏ KAMALQIZI

Səs.- 2015.- 27 avqust.- S.3-4-5