YAP Qadınlar Şurasının nümayəndələri "Günəşli" yatağında xəsarət alanlara baş çəkiblər

Dünən Yeni Azərbaycan Partiyasının (YAP) Qadınlar Şurasının nümayəndələri Mərkəzi Neftçilər Xəstəxanasına gələrək "Günəşli" yatağındakı 10-cu dərin dəniz özülündə baş verən yanğın və qəza nəticəsində xəsarət alan neftçiləri ziyarət ediblər.

YAP Qadınlar Şurasının üzvləri xəstələrin səhhəti və müalicəsi ilə maraqlanıb, onların sağlamlıq durumu barədə həkimlərdən məlumat alıblar. Xəstəxananın şöbə müdiri Ədalət Abdullayev xəstələrin durumu haqqında məlumat verib və hazırda 12 nəfərin müalicə olunduğunu bildirib.

YAP Qadınlar Şurasının sədri, partiyanın İdarə Heyətinin üzvü Nurlana Əliyeva belə bir faciəli hadisənin baş verməsindən təəssüfünü bildirib və qeyd edib ki, bu hadisə bütün Azərbaycan qadınlarını üzür: "Çünki qadın həm anadır, bacıdır, həyat yoldaşıdır. Həmin qəza nəticəsində həyatını itirən insanların anaları, bacıları, həyat yoldaşları kədər içindədirlər və biz də onların kədərinə qoşuluruq. Çünki bu hadisə bütün xalqımızın faciəsidir. Prezident İlham Əliyevin tərəfindən matəm elan olunması da hadisənin ümumxalq faciəsi səviyyəsində anıldığını təsdiqləyir".

N.Əliyeva qeyd edib ki, Mərkəzi Neftçilər Xəstəxanasında müalicə alan 12 nəfərdən heç birinin həyatı üçün problem yoxdur. Çünki onların müalicəsi ilə peşəkar həkimlər məşğul olur: "Müalicə olanların hər biri ilə görüşdük, onlara Allahdan şəfa dilədik. Onlar xalqımızın qəhrəman övladlarıdır, çünki elə bir şəraitdə çalışırlar. Müalicə olunanların bəziləri digər yoldaşlarının xilası üçün də köməklik göstəriblər. Biz belə oğullarımızla qürur duyuruq. Biz itkin düşənlərin tezliklə tapılmalarını arzu edirik. Onların ailələri, eləcə də bizlər çox nigaranıq".

Qeyd edək ki, YAP Qadınlar Şurası tərəfindən müalicə olunan neftçilərin hər birinə hədiyyələr təqdim olunub.

R.HÜSEYNOVA

Səs.- 2015.- 10 dekabr.- S.10