Veteranlar hesabat verdi

Bu gün Respublika Veteranlar Təşkilatının 2015-ci ildə gördüyü işlərə dair hesabat konfransı keçirilib. SİA-nın məlumatına görə, tədbir iştirakçıları əvvəlcə Fəxri Xiyabanda Ümummilli liderin məzarını, daha sonra Şəhidlər Xiyabanını ziyarət ediblər. Hesabat konfransında əvvəlcə "Günəşli" yatağında baş verən faciənin qurbanları bir dəqiqəlik sükutla yad edilib.İclasda Azərbaycan Respublikasının Dövlət Himni səsləndirilib.Konfransda çıxış edən Respublika Veteranları Təşkilatının sədri Dadaş Rzayev ölkədə veteranlara göstərilən diqqət və qayğıdan bəhs edərək, buna görə ölkə Prezidentinə təşəkkür edib.Təşkilatın cari ilki fəaliyyəti haqqında məlumat verən D.Rzayev qeyd edib ki, 2015-ci il Azərbaycan veteranları üçün yadda qalan il olub: "Belə ki, bu il veteranlara geniş sahəyə malik inzibati bina təhvil verilib. Respublikanın rayon və şəhərlərində 50-yə yaxın veteranlar təşkilatının inzibati binası istifadəyə verilib. Həmçinin Böyük Vətən Müharibəsinin 70 illik yubileyi təntənəli şəkildə qeyd edilib. Ümüd edirəm ki, bu işlər yenə də davam etdiriləcək. Bizim də nöqsanlarımız var və onları aradan qaldırmaq üçün təşkilatın rayonlardakı nümayəndəlikləri daha ciddi nəzarət olunacaq. Bəzi rayon nümayəndəlikləri işlərinin öhdəsindən gələ bilmir. Onların işlərində dönüş yaradacağına inanırıq”.İclasda çıxış edən veteranlar onlara göstərilən diqqət və qayğıya görə Ölkə Başçısına təşəkkürlərini bildiriblər.Milli Məclisin vitse-spikeri Bahar Muradova söyləyib ki, Azərbaycanda mövcud olan vətəndaş cəmiyyəti institutlarına daxil olan veteranlar təşkilatının özünəməxsus prinsipləri var: “Mən hər zaman bu təşkilatın nümayəndələrini özümə dost bilmişəm və bu gün sizlərlə gözəl günlərdən birini yaşayıram. Azərbaycan müstəqilliyini yeni əldə edən zaman mən Prezident Aparatının ictimai-siyasi şöbəsində veteranlar təşkilatları ilə işin əlaqələndiricisi idim. O illər çox çətin iş qrafikində fəaliyyət göstərirdik. Ulu Öndər aparatda gecələməli olurdu. Belə bir çətin durumda bütün dəyərlərə hörmətlə yanaşan Dahi Lider Heydər Əliyev veteran təşkilatlarının fəaliyyətinə diqqəti əsirgəmirdi. O zaman mən gənc idim. Həyatını xalqına, dövlətinə xidmətdə keçirmiş ağsaqqalllarla, ağbirçəklərlə işləmək gənc olaraq məni bir qədər çəkindirsə də, bu təşkilat məni öz ağuşuna alaraq özünün doğma insanına çevirdi. Ötən illər ərzində ölkənin imici, infrastrukturu, insanların həyat tərzi dəyişsə də, bu insanların prinsipiallığı, vətənə, torpağa, xalqa olan məhəbbətləri dəyişmədi. Bütün bunlar onların vətəndaşlıq mövqeyindən irəli gəlir. Öz əməli fəaliyyəti ilə Azərbaycan cəmiyyətinə, gənclərə nümunə olan veteran adı daşıyan insanlardan öyrənəcəyimiz çox şey var”.Azərbaycan Prezident Administrasiyasının (PA) İctimai-siyasi məsələlər şöbəsinin müdir müavini Ərəstun Mehdiyev isə çıxış edərək veteranların ölkə həyatının bütün sahələrində yaxında iştirak etdiyini vurğulayıb. Onun sözlərinə görə, gənclərimizin vətənpərvərlik ruhunda böyüməsində veteranların xüsusi rolu var.Sonda təşkilatı məsələlərə baxılıb, Respublika Müharibə, Əmək və Silahlı Qüvvələr Veteranları Təşkilatının təsis etdiyi döş nişanının təltif edilməsi mərasimi keçirilib.

Səs.- 2015.- 11 dekabr.- S.7