Azərbaycançılıq ideologiyasından qaynaqlanan layihələr

Azərbaycanın sosial-iqtisadi, mədəni tərəqqisi, sivil dünya birliyinə inteqrasiyası, xalqın maddi rifahının yaxşılaşması naminə görülən işlərin miqyası geniş və çoxşaxəlidir. Ölkənin tərəqqisi və xalqımızın rifahı naminə Ümummilli Lider Heydər Əliyevin zəngin irsindən bəhrələnərək bu işə xidmət edən genişmiqyaslı proqram və layihələrın reallaşmasında Heydər Əliyev Fondunun gördüyü işləri qeyd etmək vacibdir. Elm, təhsil, mədəniyyət, səhiyyə, idman, ekoloji sahələrə aid proqram və layihələrin hazırlanıb həyata keçirilməsində təşəbbüskar olan fond qısa zamanda uğur və nailiyyətləri ilə seçilib və xalqın məhəbbətini qazanıb.

Sosial problemlərin həllinə yardımçı olmaq, xüsusi qayğıya ehtiyacı olan insanlara kömək göstərmək, insanların yaradıcı potensialının, bilik və bacarıqlarının aşkara çıxarılmasına, qabiliyyətlərini göstərməsinə, inkişaf etdirməsinə yardım etmək. Azərbaycan mədəniyyətinin geniş təbliği, sağlam mənəvi dəyərlərin qorunması ilə bağlı aparılan işlərə kömək etmək kimi dəyərlərin həyata keçirilməsinə fondun Moskva nümayəndəliyinin gördüyü işlər məhz azərbaycançılıq ideolgiyasına söykənən faktorlardır. Heydər Əliyev Fondunun vitse-prezidenti, fondun Moskva nümayəndəliynini rəhbəri Leyla Əliyeva uşaq və gənclərin hərtərəfli biliklərə malik vətəndaş kimi yetişdirilməsi işinə xidməti daim diqqətdə olub. Bütün bunların əsasında maarifləndirməni genişləndirmək, dünya təcrübəsindən istifadə edərək onun Azərbaycan milli-mənəvi dəyərləri zəmində aşkara çıxarıb tədbiqinə nail olmaq dövlətin milli maraqlarına söykənir.

Leyla Əliyevanın Moskvada gördüyü işlər milli-mənəvi dəyərlərimizin təbliğində atılan doğru yoldur. Məlumdur ki, onun təşəbbüsü ilə Moskvada “Qloballaşma şəraitində mədəniyyətlərin qarşılıqlı fəaliyyəti” kitabı çapdan çıxmışdır. Kitab Heydər Əliyev Fondunun Rusiya nümayəndəliyinin dəstəyilə ərsəyə gəlmişdir. Nəşr Azərbaycan xalqının Ümummilli Lideri Heydər Əliyevin xatirəsinə həsr olunmuşdur. Heydər Əliyev Fondunun Rusiya nümayəndəliyinin rəhbəri Leyla Əliyevanın kitaba yazdığı ön sözdə deyilir ki, Azərbaycan 1991-ci ildə müstəqilliyini bərpa etdikdən sonra ciddi iqtisadi və siyasi problemlərlə üzləşmiş və yalnız 1993-cü il iyunun 15-də Heydər Əliyevin hakimiyyətə qayıdışından sonra vəziyyət kökündən dəyişmiş, Ulu Öndər suveren Azərbaycan dövlətinin yaradılmasının əsasını qoymuşdur. Heydər Əliyev Fondunun Rusiya nümayəndəliyinin rəhbəri yazır: “Heydər Əliyev bütün həyatını öz ölkəsinə həsr etmişdir. Onun müdrikliyi, siyasi uzaqgörənliyi sayəsində bu gün Azərbaycan tərəqqi edir... Bu gün Heydər Əliyev sıralarımızda yoxdur, lakin müstəqil Azərbaycan yaşayır, Onun bütün həyatını həsr etdiyi iş yaşayır. Onun ideyaları yaşayır...”.

Bəli, Onun ideyaları yaşayır və geniş sferada təbliğ olunur. Elə Azərbaycan Respublikasının beynəlxalq nüfuzunun artırılması ilə bağlı tədbirlərin həyata keçirilməsinə yardımçı olan nümayəndəlik Azərbaycan həqiqətlərini dünyaya çatdırılmasında bir vasitəçi, ötürücü rol oynayaraq Ulu Öndər Heydər Əliyev ideyalarına sadiqliyini nümayiş etdirir. Leyla Əliyeva bu missiyanın öhdəsindən uğurla gəlir və bu gün Rusiyanın azərbaycanlı gəncləri fəaldırlar. Son illərdə həyata keçirdikləri “Qanın milləti yoxdur!”, “Sağlam olduğunu yəqin et, xəstəliyə “yox” de!” və s. aksiyalar reallaşıb.

“HƏYATIMIZI NƏİNKİ SAĞLAM, HƏM DƏ MARAQLI VƏ

RƏNGARƏNG EDƏN NƏ VARSA HAMISININ QORUNUB

SAXLANMASINA BİRGƏ

TÖHFƏ VERMƏLİYİK”

Leyla xanımın layihələri sırasında gənclərin yeni qlobal ekoloji kampaniyası olan İDEA-nı xüsusilə qeyd etmək lazımdır. İDEA ətraf mühit kampaniyası regionda ətraf mühit məsələlərilə məşğul olan ən böyük təşkilatdır. Gənclərlə əməkdaşlığa xüsusi önəm verən kampaniyanın ətraf mühitin qorunması ilə bağlı yaradıcı yanaşması vardır. Bu kampaniya çərçivəsində artıq ilk addımlar atılıb. Belə ki, BMT İnkişaf Proqramı ilə saziş imzalanıb, Qəbələdə gənc ekoloqlar üçün beynəlxalq düşərgə keçirilib. İDEA müasir dövrün çağırışlarına cavab təşəbbüsüdür. Müasir dövrümüzdə ekologiya və ətraf mühitin qorunması vacib məsələlərdən olduğundan ekoloji problemlərin nəticələri diqqətdədir. Leyla xanım Əliyevanın müsahibələrinin birində dediyi kimi, biz planetimizə görə məsuliyyət hiss etməli və bioloji müxtəlifliyin, həyatımızı nəinki sağlam, həm də maraqlı və rəngarəng edən nə varsa hamısının qorunub saxlanmasına birgə töhfə verməliyik. Məhz bu münasibətin məntiqi olaraq İDEA qlobal gənclik ekoloji kampaniyasına start verilib. Qeyd edək ki, İDEA kampaniyası artıq bir sıra ekoloji təşkilatlar tərəfindən dəstəklənib. İDEA xətti ilə həyata keçirilən tədbirlərdə gənclərin və tələbələrin demək olar ki, bütün iri təşkilatları iştirak edir. Bu, “Bir planet - bir gələcək” devizini bir daha təsdiq edir. İDEA Azərbaycanda “böyük Qafqaz beşliyi” deyilən, yox olmaq təhlükəsi ilə üzləşən beş heyvan növünü müəyyən edib. Bunlar ayı, qartal, canavar, ceyran və Qafqaz bəbiridir. Kampaniyanın rəhbəri problem barəsində Azərbaycan və dünya ictimaiyyətini maksimum məlumatlandırmaq və yox olmaq təhlükəsi qarşısında olan növlərin qorunub saxlanması üçün konkret layihələr həyata keçirməyi qarşıya məqsəd qoyub.

“MÜHARİBƏ CİNAYƏTİNİN

XOCALI ŞAHİDİ. ERMƏNİSTAN MÜTTƏHİM KÜRSÜSÜNDƏ”

Heydər Əliyev Fondunun dəstəyi ilə artıq neçə illərdir ki, “Xocalıya ədalət” kampaniyası çərçivəsində dünyanın bir çox ölkələrində qeyd olunur. Soyqırımına həsr olunmuş silsilə tədbirlər fondun nümayəndəliyi tərəfindən silsilə olaraq təbliğat materialları əsasında bir sıra şəhərlərdə keçirilir. “Xocalı soyqırımı” filmi, ermənilərin Xocalıda törətdikləri vəhşilikləri əks etdirən fotoşəkillər və müxtəlif illərdə xarici ölkələrin nüfuzlu nəşrlərində Xocalı soyqırımı haqqında dərc edilmiş materiallar nümayiş olunur. “Qarabağ həqiqətləri” bukleti də bu sırada önəmlidir. Buklet Qarabağın tarixi, münaqişənin başlanması, Xocalı soyqırımı, erməni təcavüzünün nəticələri, erməni terror təşkilatlarının Azərbaycana qarşı fəaliyyəti haqqında ətraflı informasiya almağa imkan verir. Dünya ictimaiyyətinə Xocalı soyqırımı haqqında obyektiv və dürüst informasiya çatdırmağa, ictimai rəyi formalaşdırmağa yönələn belə tədbirlərə müxtəlif qurumların, diplomatik missiyaların nümayəndələri, şəhər sakinləri, eləcə də xarici kütləvi informasiya vasitələrinin əməkdaşları dəvət olunurlar. “Xocalıya ədalət” musiqi manifestinin təqdimat mərasimi də bu sırada görülən işlərdəndir. Azərbaycan xalqı Xocalı qurbanlarının xatirəsini daim yad edir və bu həqiqətlərin dünya ictimaiyyətinə çatdırılması üçün dövlətimiz bütün imkanlardan geniş istifadə edir. XX əsrin sonunda Azərbaycan xalqına qarşı törədilmiş Xocalı soyqırımı tariximizin ən acı səhifəsi kimi gənclərimizin vətənpərvərlik tərbiyəsində mühüm rol oynamalıdır. Gənclər tarixdən nəticə çıxarmalı, gələcəkdə bu kimi faciələrin bir daha baş verməməsi üçün daha mübariz olmalıdırlar. Xocalı faciəsinin və bütövlükdə ermənilərin Azərbaycan xalqına qarşı apardıqları etnik təmizləmə və soyqırımı siyasətinin konkret tarixi faktlarla gənclərimizin diqqətinə çatdırılması hər bir dövlət orqanının ümdə borcu və vəzifəsi olmalıdır.

“Xocalıya ədalət” rep üslubunda yazılmış mahnı Leyla Əliyevanın təşəbbüsü ilə Azərbaycan həqiqətlərinin dünyaya çatdırılmasında bir vasitə oldu. Mahnıya çəkilən klipin çəkilişləri Şəhidlər Xiyabanında və Ağcabədi rayonunu qaçqın düşərgəsində aparılmışdır. Mahnıda müasir rep ritmləri ilə yanaşı milli musiqimizin elementləri - muğam və balaban musiqisindən istifadə edilmişdir. Xocalı soyqırımının 23-cü ildönümü münasibəti ilə silsilə tədbirlər keçirilib. Braziliyada, Londonda, Koreyada və onlarla dünya ölkələrində Azərbaycan həqiqətləri müxtəlif şəkildə təqdim edilib. Bütün bunlarla yanaşı, bu yaxınlarda Koreya dilində Xocalı soyqırımı haqqında videoçarx hazırlanaraq, ən böyük axtarış saytı olan “Naver”, eləcə də “Google” və “Youtube”da yerləşdirilib.

Videoçarxda Xocalı hadisələrinin XX əsrin ən böyük faciəsi kimi tarixə yazıldığı, faciə zamanı yüzlərlə dinc sakinin erməni silahlı qüvvələri tərəfindən vəhşicəsinə qətlə yetirildiyi, dözülməz işgəncələrə məruz qaldığı və doğma yurd-yuvalarından didərgin salındığı bildirilir. Videoçarxda, həmçinin faciə şahidlərinin dəhşətli hadisələrlə bağlı sadaladıqları faktlara yer verilib. Heydər Əliyev Fondunun vitse-prezidenti Leyla Əliyevanın rəhbərliyilə həyata keçirilən “Xocalıya ədalət!” beynəlxalq təbliğat-təşviqat kampaniyası çərçivəsində “Müharibə cinayətinin Xocalı şahidi. Ermənistan müttəhim kürsüsündə” adlı kitab çapdan çıxıb. Avropa Azərbaycan Cəmiyyəti tərəfindən Sankt-Peterburqda və İstanbulda çap olunmuş kitab rus və türk dillərindədir.

Kitaba ön sözü Leyla Əliyeva yazıb:”...1992-ci il fevralın 25-dən 26-na keçən gecə müasir tarixin ən faciəli qətliamlarından biri baş vermişdir. Ermənistan silahlı qüvvələri keçmiş sovet qoşunlarının bölgənin mərkəzi Xankəndində dislokasiya edilmiş hərbi hissəsinin köməyilə Xocalı şəhərinin dinc azərbaycanlı əhalisinə qarşı etnik təmizləmə siyasəti həyata keçirmişdir. Bu hadisə dünya mediasının o zaman bölgədə olan bütün nümayəndələri və hadisədən xəbər tutan informasiya agentlikləri tərəfindən kütləvi qətliam kimi qiymətləndirilmişdir. Azərbaycan xalqı baş verənləri dərin kədər hissi ilə qarşılamış, qətliam qurbanlarını şərəflə dəfn etmiş, bu amansız faciədən xilas olanların yenidən həyata bağlanması üçün var qüvvəsini səfərbər etmişdir”.

“Müharibə cinayətinin Xocalı şahidi. Ermənistan müttəhim kürsüsündə” kitabı Xocalı soyqırımı haqqında Qərbdə ingilis dilində çap edilmiş ilk müstəqil nəşrdir. Kitabda Xocalı hadisələrinin şahidlərinin müsahibələri, faciə barədə beynəlxalq dövri mətbuatın materialları, xarici tədqiqatçıların mövqeyi, beynəlxalq təşkilatların hesabatları və xarici fotoqraflar tərəfindən çəkilmiş nadir fotolar yer alıb.

Heydər Əliyev Fondunun Moskva nümayəndəliyin gördüyü işlərin hər birinin əsasında vətənə xidmət, Azərbaycan dəyərlərinin təbliği, eləcə də onun milli mədəniyyəti, incəsəntinin təbliği dayanır. Bu görülən işlərin də ideyası məhz bu prinsiplərə söykənir.

Nəzakət ƏLƏDDİNQIZI

Səs.- 2015.- 4 mart.- S4.