II Azərbaycan Elm Festivalının açılış mərasimi keçirilib

Dünən AMEA-nın təşəbbüsü ilə keçirilən II Azərbaycan Elm Festivalının açılış mərasimi olub.

Tədbir iştirakçıları əvvəlcə Fəxri Xiyabana gələrək, xalqımızın Ümummilli Lideri, müasir müstəqil Azərbaycan dövlətinin Memarı və Qurucusu Ulu Öndər Heydər Əliyevin xatirəsini ehtiramla yad edib, məzarı önünə gül dəstələri qoyublar.

AMEA-nın əsas binasında təşkil olunmuş tədbiri giriş sözü ilə açan AMEA-nın prezidenti, akademik Akif Əlizadə II Azərbaycan Elm Festivalının ölkəmiz və elmimiz üçün böyük əhəmiyyət daşıdığını söyləyib: "Tədbirin əsas məqsədi elmimizin bugünkü nailiyyətlərini geniş ictimaiyyətə tanıtmaq, müasir elmi bilikləri təbliğ etmək, gəncləri elmi fəaliyyətə cəlb etməklə elmi-tədqiqat işlərinə marağı artırmaqdır. Həmçinin, festival ictimaiyyətin elm sahəsində əldə olunmuş yeniliklərlə tanış edilməsi, elm və cəmiyyət arasında dialoqun yaradılması baxımından böyük əhəmiyyətə malikdir".

Diqqətə çatdırıb ki, festival öz işinə noyabrın 1-də Naxçıvanda, noyabrın 2-də Sumqayıtda, noyabrın 4-də Şəkidə və noyabrın 5-də Gəncədə davam edəcək. 2014-cü ildə keçirilmiş I Elm Festivalında 15 mindən artıq insanın iştirak etdiyini xatırladan akademik A.Əlizadə qeyd edib ki, budəfəki tədbir miqyasına və məzmununa görə fərqlidir və bura qatılanların sayının 50 minə çatacağı gözlənilir.

AMEA-da magistr təhsilinin təşkilinin əhəmiyyətindən danışan akademik A.Əlizadə bunu elm və təhsilin inteqrasiyası istiqamətində əldə olunan mühüm nailiyyətlərdən biri kimi dəyərləndirib. Akademiyanın magistratura pilləsinə qəbulun nəticələrini açıqlayan A.Əlizadə qeyd edib ki, 2015-2016-cı tədris ili üçün 7 institutda 9 ixtisas üzrə magistraturaya qəbul keçirilib. Bu il isə 19 ixtisas üzrə 56 nəfər akademiyanın magistrantı adını qazanıb.

Tədbirdə təhsil naziri Mikayıl Cabbarov, Bakı Ali Neft Məktəbinin rektoru Elmar Qasımov, Bakı Dövlət Universitetinin rektoru, akademik Abel Məhərrəmov festival haqqında fikirlərini bölüşüblər. Diqqətə çatdırılıb ki, festival Azərbaycan elminin inkişafı və əldə olunan nailiyyətlərin təbliğində böyük töhfədir.

Daha sonra festival bədii hissə ilə davam edib. Festivalın marşı səslənib, əyləncəli elmi şoular nümayiş etdirilib, həmçinin, ABŞ-ın "Acidic Band" qrupu çıxış edib. AMEA rəhbərliyi, digər rəsmi şəxslər və fəxri qonaqlar AMEA-nın Alimlər Evində təşkil edilmiş sərgi ilə tanış olublar.

NƏZAKƏT

Səs.- 2016.- 1 noyabr.- S.8