Elmira Axundova: “Biz qətnamələrə yox, ordumuzun gücünə arxalanmalıyıq”

“Belə bir vacib sənədin qəbul olunması Azərbaycanın böyük uğurudur”. Bu fikirləri SİA-ya açıqlamasında millət vəkili Elmira Axundova deyib.O, Azərbaycanın lehinə qəbul olunan qətnaməni yüksək qiymətləndirdiyini bildirib: “Bu qərarı intizarla gözləyirdik. Çünki əhalimizin susuz qalması, Sərsəng su anbarının daşma təhlükəsi böyük problemdir. Təxribat olacağı halda fəlakət yaşana bilər. Millət vəkili Elxan Süleymanovun xidmətləri çox böyükdür. O, elə bir beynəlxalq təşkilat qalmayıb ki, orada Azərbaycanın haqq səsini ucaltmasın. Ümumilikdə, nümayəndə heyətimiz fədakarlıq göstərdilər və uğurlu nəticə əldə olundu”.Millət vəkili qeyd edib ki, qəbul olunmayan sənəd də bizim üçün əhəmiyyətlidir: “Amma qəbul etməliyik ki, AŞPA-da bizi istəmiyən erməni lobbisi güclüdür və daha aktivdir. Millət vəkili Səməd Seyidovun rəhbərliyi ilə Azərbaycan nümayəndə heyəti də kifayət qədər aktiv fəaliyyəti ilə seçilir. Təəssüf ki, bu fəallıq ikinci bir sənədin qəbuluna yetmədi. Avropada yüz minlərlə azərbaycanlılar yaşayır. İstərdim ki, soydaşlarımız bu sənədlər müzakirəyə çıxarılmadan öncə hərəsi aidiyyatı quruma teleqrama vurardı, hər hansı aksiya keçirərdi, etirazlarını bildirərdi. Orada lazımınca varlı həmvətənlərimiz də var. Hazırda lobbimizin fəaliyyəti nisbətən aktivləşib, amma bu düşmənlə müqayisədə yenə də azdır. Bu məsələdə XİN günahkar deyil. Diplomatlarımız böyük işlər görür. Sadəcə olaraq xaricdəki lobbi təşkilatlarımız aralarındakı didişmələrlə məşğuldur. Başa düşməliyik ki, bizim bir vətənimiz var-Azərbaycan. Bu yolda daxili didişmələrə son qoyub düşmənə qarşı birlikdə iş aparmalıyıq”.Onun sözlərinə görə, millət vəkili Fazil Mustafa da dediyi kimi sənədin qəbul olunmamasında saxtakarlıq amili də rol oynaya bilər: “Çünki orada bizi istəməyən, erməniləri istəyən, xristianlara daha çox dəstək verən avropalı parlamentarilər çoxdur. Hazırki zamanda Avropada müsəlmanlara qarşı səlib yürüşü var. Onlardan qorxurlar, qəbul etmirlər. Bu faktoru da unutmayaq. Cəmi 4 səs qərar qəbuluna çatmadı. Yəni 70 nəfər əleyhinə, 66 nəfər lehinə oldu. Mən bunu normal qəbul edirəm. Hesab edirəm ki, bu faciə deyil. Gələn dəfə daha yaxşı hazırlaşıb bu sənədin qəbuluna nail ola bilərik. Ancaq bir həqiqət də var ki, bu qətnamələr elə də həlledici rol oynamır. BMT TŞ-nin 20 ildən çoxdur ki, Ermənistan əleyhinə 4 qətnaməsi var amma hər hansı xeyrini görə bilmirik”.Biz yalnız ordumuza inanmalıyıq: “Məni daha çox sevindirən məsələ Azərbaycan ordusunun strateji rola malik yüksəkliyi ermənilərdən geri alması oldu. Özümüzə inanmalıyıq. Heç kim bizə torpaqlarımızı qaytarmayacaq. Ordumuzun gücünə arxalanmalıyıq”.

Səs.- 2016.- 28 yanvar.- S.5