İtaliya Prezidenti Nizami Gəncəvi Beynəlxalq Mərkəzinin üzvlərini qəbul edib

İtaliya Respublikasının Prezidenti Sergio Mattarella Prezident Sarayında Nizami Gəncəvi Beynəlxalq Mərkəzin nümayəndə heyətini qəbul edib. Qəbul mərasimi IV Qlobal Bakı Forumuna hazırlıq məqsədi daşıyan "Dinlərarası dialoq yolu ilə radikallaşma və ekstremizmə cavab" mövzusunda yüksək səviyyəli hazırlıq görüşü çərçivəsində baş tutub.

Diasporla İş üzrə Dövlət Komitəsindən qəzetimizə verilən məlumata görə, qəbulda iştirak edənlər sırasında Bolqarıstan Respublikasının prezidenti Rosen Plevneliyev, Makedoniya Respublikasının prezidenti Giorge İvanov, İSESKO-nun Baş direktoru Əbdüləziz Əl-Tuveyrci, İtaliya, Polşa, Xorvatiya, Andorra, Latviya, Ukrayna, Rumıniya, Moldova, Albaniya, Serbiya və Bolqarıstanın sabiq prezidentləri və Diasporla İş üzrə Dövlət Komitəsinin sədri Nazim İbrahimov da qəbulda iştirak edib.

Mərasimdə çıxış edən İtaliya prezidenti Sergio Mattarella müasir dünyada anti-tolerantlıq, zorakılıq, fərqlilərə qarşı nifrətə yer olmadığını qeyd edərək, daha yaxşı dünya üçün bu kimi qlobal problemlərin aradan qaldırılmasının zəruri olduğunu bildirib. Prezident Orta Şərqdə , Afrikanın bəzi ölkələrində dağıntılara, Avropanın bəzi şəhərlərində ölümə səbəb olan bu problemlərə qarşı mümkün olan bütün yollarla mübarizə aparmağın vacibliyini vurğulayıb. "Dinlərarası dialoq və hörmət birgə yaşayışın mühüm elementidir" deyə, İtaliya Prezidenti bildirib.

Latviyanın sabiq prezidenti VayraVike-Frayberqa öz çıxışında Nizami Gəncəvi Beynəlxalq Mərkəzinin əhəmiyyətini vurğulayaraq bildirib ki, mərkəz fəaliyyətində münaqişələrin qarşısının alınması və dinlərarası dialoqların təşkilinə böyük önəm verir. Dini fanatizmin tarixən səbəb olduğu münaqişələrdən , müxtəlif dini cərəyanların nümayəndələrinin dindən müharibə vasitəsi kim istifadə etməsindən danışan xanım Frayberqa ekstremist baxışlı siyasi və dini fanatiklərin sivil cəmiyyətlərin düşmənləri olduğunu qeyd edib.

NGBM-in həmsədri, İsgəndəriyyə Kitabxanasının direktoru İsmayıl Sərageldin dünyada mövcud aktual məsələlərin müzakirəsi üçün bu görüşün yüksək əhəmiyyətə malik olduğunu bildirib. Səragəldin Avropanı bürüyən qaçqın böhranı məsələsinə toxunub və bu sahədə kompleks tədbirlərin görülməsinin zəruriliyini vurğulayıb. O, bu sahədə müxtəlif konfessiyaların humanizm prinsiplərindən çıxış edərək qarşılıqlı əməkdaşlıq çərçivəsində fəaliyyət göstərməli olduqlarını diqqətə çatdırıb.

İtaliyanın sabiq xarici işlər naziri Franko Frattini isə nifrət və zorakılığa qarşı "İnsanlıq Paktının" mümkün qədər tez imzalanmasınının labüdlüyünü bildirib. "Mədəniyyətlərarası dialoq və tolerantlıq düşmənçiliyin qarşısını ala biləcək yeganə qayadır" deyə sabiq xarici işlər naziri qeyd edib.

Bayramova Zümrüd

Səs.- 2016.- 29 yanvar.- S.12