Ərəstun Mehdiyev: "Xocalı soyqırımına lazımı hüququ qiymətin verilməsinə dair işlərimizi gücləndirməliyik"

"Azərbaycan müstəqillik yolunda çox çətin yol keçib. Bu yolumuz Ermənistanın təcavüzü ilə müşahidə olunaraq daha keşməkeşli səciyyə daşıyıb". SİA-nın xəbərinə görə, bunu Azərbaycan Respublikası Prezidenti Administrasiyasının ictimai-siyasi məsələlər şöbəsinin müdir müavini Ərəstun Mehdiyev Milli Məclisdə Xocalı soyqırımı ilə bağlı qanun layihəsinin təqdimat mərasimində çıxış edərkən deyib.

O bildirib ki, ölkəmizin Ermənistan təcavüzünün aradan qaldırılması istiqamətindən səyləri bu gün də davam edir.

Onun sözlərinə görə, ölkəmizin azadlıq və müstəqillik yolunda ən ağrılı məqamlarından biri məhz Xocalıda törədilən kütləvi qırğın, soyqırımı aktı idi: "Biz mübarizə gedişində öz səsimizi qaldırmağa, təcüvüzün səbəb və fəsadlarını beynəlxalq ictmayyətə çatdırmağa çalışmışıq. İnformasiya müharibəsi sahəsində mühüm işlər görülür. Yeni müstəqillik qazanan dövlətin beynəlxalq aləmdə elədə əsaslı dayağının olmaması, düşmənlərimizin daha məkrli davranması, geniş resurslara söykənməsi bizim işimizi çətinləşdirirdi. Bu da Azərbaycanın apardığı işin mürəkkəbliyini, zəruriliyini qat-qat artırırdı. Xocalı soyqırımı Ermənistan siyasi rejimin törətdiyi ən ağır cinayətlərdən biridir".

Ermənistan təcavüzünün aradan qaldırılması ilə bağlı ilkin işlərə məhz Ulu Öndərin hakimiyyəti dövründə başlandığını deyən Ə. Mehdiyev qeyd edib ki, bu işlər sonradan davam etdirilib: "Məhz görülən işlərin nəticəsində Xocalı soyqırımına hüquqi qiymət verilməyə başlanılıb. Bununla bağlı fəaliyyət sonrakı dövrlərdə səngiməyib. Cari ilin 24 yanvarında Azərbaycan Prezidentinin Xocalı soyqırımının 25 illiyi ilə bağlı sərəncamı bu məsələyə diqqətimizi yönəldir. İndiyədək beynəlxalq aləmdə bununla bağlı tədbirlər keçirilsə də, məsələyə lazımi hüquqi qiymət verilmədiyi üçün qarşımızda mühüm işlər dayanır. Sərəncama əsasən, müvafiq tədbirlər planı hazlırlanıb, həyata keçiriləcək. Bu, bütün dövlət strukturlarının qarşısında duran əsas vəzifədir. Xocalı soyqırımı ermənilərin 100 ildə Azərbaycana qarşı həyata keçirdikləri vəhşiliklərin ən ağırıdır. Beynəlxalq aləmdə də soyqırım ən ağır cinayət əməli kimi qiymətləndirilir. Biz də bundan istifadə edərək ölkəmizə qarşı törədilən cinayət işinin günahkarlarını cəzlandırmağa çalışmalıyıq. Burada çox faktlar məlumdur. Onu törədənlər vaxtilə Ermənistan rəhbərliyində təmsil olunan şəxslər, keçmiş prezident Koçaryan, indiki rəhbər Sarkisyan və digərləridir. Onların çoxları öz çıxışlarında günahlarını gizlətməyə çalışmayıblar. Sarkisyan bu işdə yaxından iştirak etdiyini etiraf edərək, əməllərinə bəraət qazandırmağa çalışıb. Bu gün qarşımızda duran məsələ siyasi informasiya mübarizəsi işini gücləndirmək, məsələyə beynəlxalq qiymətin verilməsinə nail olmaqdır".

"Bu gün aparılan işlərin nəticəsində Xocalı qətliamını rəsmi şəkildə tanıyan ölkələrin sayı artır. Bu siyasi eləcə də informasiya sahəsində aparılan işlərin nəticəsidir. ABŞ-da da bu sahədə geniş fəaliyyət aparılır. Artıq ABŞ-ın 20-dən artıq ştatında Xocalı qətliam kimi qəbul olunub. . Bu gün bu sahədə xeyli uğurlar qazansaq da, təcrübə göstərir ki, gördüyümüz işlər bizim qalib çıxmağımız, torpaqlarımızın azad olunması, ona lazımı qiymətin verilməsi üçün kifayət deyil. Biz işimizi daha da intensivləşdirməli və məsələyə lazımi hüquqi qiymətin verilməsinə dair işlərimizi davam etdirməliyik. Bu baxımdan “Beynəlxalq cinayətlərin qarşısının alınması və onları törədən şəxslərin cəzalandırılması haqqında” qanun layihəsinin yüksək qiymətləndirirəm. Bu sənəd hüququ baxımdan işlərin yekunlaşmasına öz töhfəsini verəcək. Biz gələcək fəaliyyətimizi bu qanuna əsasən həyata keçirməliyik ki, bunu törədənlərin cəzalandırılmasına nail olaq, ərazi bütövlüyümüzü pozanlara qarşı zəruri işlərimizi görə bilək".

Səs.- 2017.-11 fevral.- S.6.