Azərbaycan Cümhuriyyəti- 100 il

Bu il Azərbaycan Xalq Cümhuriyyətinin yaradılmasının 99 ili tamam olur. İstiqlal Bəyannaməsinin elan edildiyi 1918-ci ilin 28 may tarixi dövlət müstəqilliyinin bərpa edilməsi günü hazırda Respublika Günü kimi qeyd edilir.

Ölkə Prezidenti İlham Əliyev bu günlərdə Azərbaycan Xalq Cümhuriyyətinin 100 illik yubileyinin dövlət səviyyəsində keçirilməsi ilə bağlı Sərəncam imzalayıb.

Sərəncamda qeyd olunur ki, 1918-ci il may ayının 28-də Azərbaycanın müstəqilliyini bəyan edən İstiqlal Bəyannaməsi qəbul edildi: "Yeni qurulan Azərbaycan Xalq Cümhuriyyəti öz üzərinə götürdüyü çətin tarixi vəzifəni imkanlarının ən son həddində çalışaraq, şərəflə yerinə yetirdi. Azərbaycanın ilk Parlamenti və Hökuməti, Dövlət Aparatı təşkil edildi, ölkənin sərhədləri müəyyənləşdirildi, bayrağı, himni və gerbi yaradıldı, ana dili dövlət dili elan edildi, dövlət quruculuğu sahəsində ciddi tədbirlər həyata keçirildi. Ölkənin ərazi bütövlüyü və milli təhlükəsizliyi təmin edildi, qısa müddətdə yüksək döyüş qabiliyyətli hərbi hissələr yaradıldı, milli tələblərə və demokratik prinsiplərə uyğun dövlət orqanları quruldu, maarifin və mədəniyyətin inkişafına xüsusi diqqət yetirildi, Azərbaycanın ilk universiteti təsis olundu, təhsil milliləşdirildi, xalqın sonrakı illərdə mədəni yüksəlişi üçün zəmin hazırlayan, ictimai fikir tarixi baxımından müstəsna əhəmiyyətli işlər görüldü".

Sözügedən Sərəncamda vurğulanır ki, Azərbaycan xalqı ötən dövr ərzində milli dövlətçilik atributlarının bir çoxunu qoruyub-saxlaya bildi: "Ümummilli Lider Heydər Əliyevin respublikada uğurla gerçəkləşdirdiyi siyasət xalqımızın tarixi-mədəni yaddaşını özünə qaytararaq, milli mənlik şüurunu inkişaf etdirdi, azərbaycançılıq məfkurəsi işığında müstəqillik arzularının güclənməsi və yaxın gələcəkdə yenidən həqiqətə çevrilməsinə zəmin yaratdı. 1991-ci ildə müstəqilliyinin bərpasına nail olarkən müasir Azərbaycan Respublikası özünün qədim dövlətçilik ənənələrinə sadiq qaldığını göstərdi, Xalq Cümhuriyyətinin siyasi və mənəvi varisi olmaqla onun üçrəngli bayrağını, gerbini və himnini qəbul etdi. Xalqımız Cümhuriyyətin istiqlalını dünyaya yaydığı 28 May Gününü həmin vaxtdan Respublika Günü olaraq təntənə ilə qeyd edir".

Müstəqilliyimiz əbədidir, dönməzdir, sarsılmazdır!

Belə bir deyim vardır: müstəqilliyi qoruyub-saxlamaq onu qazanmaqdan daha çətindir. Tarixi gedişat sübut edir ki, bu, həqiqətən, belədir. XX əsr ərzində Azərbaycan iki dəfə müstəqillik imkanı qazandı. 1918-ci il 28 may tarixi ilə qurulan Azərbaycan Xalq Cumhüriyyəti cəmi 23 ay yaşaya bildi. Mövcud şərait, xarici müdaxilə və daxili çəkişmlər AXC-nin süqutu ilə nəticələndi. Yalnız bundan 70 il sonra Azərbaycan yeni bir müstəqillik imkanı qazandı. 1980-ci illərin sonu, 90-cı illərin əvvəllərindən etibarən SSRİ daxilində cərəyan edən hadisələr Azərbaycana öz milli müstəqilliyini yenidən bərpa etmək imkanı qazandırdı. 1991-ci il oktyabrın 18-də Azərbaycan Respublikası Ali Sovetinin sessiyasında "Azərbaycanın dövlət müstəqilliyi haqqında Konstitusiya Aktı"nın qəbulu ilə Azərbaycan ikinci dəfə öz dövlət müstəqilliyini elan etdi. Lakin ilk vaxtlar bu sənəd, sadəcə, kağız rolunu oynayırdı.

Ömrü qısa olmasına rəğmən, 23 ay ərzində çox böyük işlər görülmüş və parlamentdə dövlət quruculuğu ilə bağlı ciddi qərarlar qəbul olunmuşdu.

XX əsrin sonlarında qurulan Azərbaycan Respublikası, bu baxımdan, dediklərimizə əyani sübutdur. Əgər Ulu Öndərimiz Heydər Əliyev xalqın təkidli tələbi ilə 1993-cü il iyun ayının 15-də yenidən hakimiyyətə qayıtmasaydı, indi qurduğumuz respublikanın da ömrü uzun olmaya bilərdi. Ümummilli Liderimiz Heydər Əliyev yenidən hakimiyyətə qayıdışı ilə Azərbaycanın müstəqil dövlətçilik ənənələrinin inkişaf etdirilməsi, möhkəmləndirilməsi və onun dünya dövlətləri sırasında öz layiqli yerlərindən birini tutması sahəsində yeni bir mərhələ başlandı, milli ideologiyamızın əks olunduğu dövlətçilik konsepsiyası hazırlandı. Hansı ki, bu gün də Azərbaycan bu konsepsiyanın üzərində inkişaf edir, yeni-yeni uğurlara imza atır. Ulu Öndərin də qeyd etdiyi kimi, "Müstəqilliyimiz dönməzdir, əbədidir, sarsılmazdır!"

Bu gün biz əminliklə deyə bilərik ki, Ümummilli Liderimizin qurduğu dövləti ölkə başçısı İlham Əliyev də qoruyub-saxlayır və bunun nəticəsində dünyanın rəngarəng siyasi xəritəsində Azərbaycan xüsusi yerə sahibidir. İmzalanan Sərəncam da, məhz bu müstəqilliyimizin bu gün də qorunub-saxlanıldığının, əbədi, sarsılmaz olduğunun, Azərbaycanın dövlətçilik ənənələrinin indi də yaşadığının göstəricisidir.

RƏFİQƏ KAMALQIZI

Səs.- 2017.- 20 may.- S.7

.