"Siyasi partiyaların cəmiyyətdə rolu"

"Səs" qəzetinin redaksiyasında bu mövzuda ölkənin aparıcı partiyalarının iştirakı ilə dəyirmi masa keçirilib

"Səs" qəzeti tərəfindən ənənəvi olaraq, ölkəmizin həyatında mühüm əhəmiyyət kəsb edən, günün aktual və prioritet mövzuları ətrafında silsilə xarakterli dəyirmi masalar təşkil olunur. Bu dəyirmi masalarda xalqımızın tarixi, milli-mənəvi dəyərləri ilə yanaşı, ölkəmizdə dövlət başçısının rəhbəriliyi ilə həyata keçirilən islahatlar və layihələr ətrafında dövlət nümayəndələrinin, millət vəkillərinin, ictimai təşkilat rəhbərlərinin iştirakı ilə müzakirələr aparılır.Növbəti dəyirmi masa "Siyasi partiyaların cəmiyyətdə rolu" mövzusunda keçirilib. Dəyirmi masada Yeni Azərbaycan Partiyası Beynəlxalq Əlaqələr Komissiyasının katibi, millət vəkili Elman Nəsirov, Azərbaycan Sosial Demokrat Partiyasının sədri, millət vəkili Araz Əlizadə, Vəhdət Partiyasının sədri, millət vəkili Tahir Kərimli, Azərbaycan Demokrat Partiyasının sədr müavini Taliyət Əliyev, AMİP-in siyasi şurasının üzvü Əli Orucov, Müasir Müsavat Partiyasının sədr müavini İbrahim Həsənov, Azərbaycan Təkamül Partiyasının sədri Teyyub Qənioğlu, Azadlıq Hərakatçıları İB-nin sədri Təhmasib Novruzov, AXCP sədri Əli Kərimlinin əmisi oğlu, "Azərbaycan Fermeri" qəzetinin baş redaktoru Nuhəli Kərimov, gənc fəal Fuad Muradov və media nümayəndələri iştirak ediblər.Dəyirmi masanı giriş sözü ilə "Səs" qəzetinin baş redaktoru Bəhruz Quliyev açaraq, bu gün Azərbaycan Prezidenti cənab İlham Əliyevin rəhbərliyi ilə həyata keçirilən müasir dövrün tələblərinə uyğun siyasi islahatların, icra edilən iqtisadi proqram və sərəncamların ölkəmizin nüfuzunun sərhədlərini genişləndirməklə bərabər, insan amilinin də inkişafına güclü təkan verdiyini diqqətə çatdırıb.

Bəhruz QULİYEV, "Səs" qəzetinin baş redaktoru:

- Bu gün Azərbaycan Prezidenti İlham Əliyev ölkədə sosial məsələlərin həllini, əhalinin rifahının yüksəlişini prioritet məsələ hesab edir və ölkəmizdə bu istiqamətdə ardıcıl tədbirlər həyata keçirilir. Bütün bunlar Azərbaycanda dövlət və xalq birliyinin bariz nümunəsidir. Elman müəllim, qətiyyətlə deyə bilərik ki, müasir dövrümüzdə Ulu Öndər Heydər Əliyevin siyasi kursu Azərbaycan Prezidenti Cənab İlham Əliyev tərəfindən uğurla həyata keçirilir. Ölkəmizdə çoxsaylı fərman və sərəncamlar imzalanıb və parlamentdə müvafiq qanunlar qəbul olunub. Ölkəmizdəki ictimai-siyasi vəziyyəti necə xarakterizə edərdiniz?

Elman NƏSİROV, Yeni Azərbaycan Partiyası Beynəlxalq Əlaqələr Komissiyasının katibi, millət vəkili:

- İlk olaraq, "Səs" qəzetinin ənənəsinə sadiq qalaraq, bu gününmüz üçün əhəmiyyət kəsb edən, aktual olan "Siyasi partiyaların cəmiyyətdə rolu" mövzusunda dəyimi masa təşkil etdiyiniz üçün minnətdarlığımı bildirirəm. Dəfələrlə dəyirmi masaların iştirakçısı olmuşam və çox açıq və obyektiv şəkildə müzakirələrin aparıldığının şahidinə çevrilmişəm. Yeni Azərbaycan Partiyası Beynəlxalq Əlaqələr Komissiyasının katibi olaraq onu bildirim ki, Azərbaycanda dövlət başçısının rəhbərliyi ilə sabitlik, təhlükəsizlik və əmin-amanlıq təmin edilib. Sabitlik olmayan yerdə hər hansı tərəqqi və islahatı həyata keçirmək qeyri-mümkündür. Dünya qloballaşır, dəyişir, yeni çağırışlar və təhdidlər meydana gəlir. Həyatın özü islahatları qaçılmaz və davamlı edir. Ona görə də, Cənab İlham Əliyev tərəfindən Azərbaycanda siyasi-iqtisadi islahatlar davam etdirilir. Məhz bu islahatlar nəticəsində, ölkəmizin inkişafı təmin edilir. Sosial siyasətin mərkəzində Azərbaycan vətəndaşı, onun sosial rifah halının daha da yaxşılaşdırılması, ölkəmizin və vətəndaşlarımızın təhlükəsizliyinin təmin olunması dayanır. Xalq Cənab Prezidentin atdığı addımları, birmənalı olaraq, dəstəkləyir. Sual yarana bilər ki, xalqımız nəyə görə dövlət başçısının həyata keçirdiyi daxili və xarici siyasətini belə dəstəkləyir? Bunun bir cavabı var: Cənab Prezident üçün əsas məsələ milli maraq və milli mənafe məsələsidir. Xalqımızın milli maraq və milli mənafeyini müdafiə əsas istiqamətdir. Heç bir böyük beynəlxalq təşkilatın, siyasi dairənin, yaxud dövlətin diktəsi altında deyil, məhz Azərbaycan xalqının milli mənafeyindən irəli gələn siyasət həyata keçirilir və həmin siyasətin nəticəsində, təhlükəsiz Azərbaycan mövcuddur. Azərbaycanın dinamik inkişafı və beynəlxalq nüfuzunun, mütəmadi olaraq, artması bəzi dairələr tərəfindən qısqanclıq və narahatlıqla qarşılanır. Həmin anti-Azərbaycan dairələri ölkəmizə qarşı qarayaxma kampaniyası aparır və qərəzli yanaşma nümayiş etdirirlər. Odur ki, hər bir vətəndaş Azərbaycandakı bu təhlükəsiz mühiti, sabitliyi göz bəbəyi kimi qorumalıdır.

Xaricdə mövcud olan anti-Azərbaycan qüvvələri öz niyyətlərini Azərbaycanda həyata keçirə bilmirlər. Səbəb isə, ölkəmizdə mövcud olan xalq və iqtidar birliyidir. Azərbaycan Prezidentinin prinsipiallığı, yürütdüyü mükəmməl daxili və xarici siyasət, bütün məqamlarda, Azərbaycanı ancaq işıqlı gələcəyə aparıb və bundan sonra da aparacaq.

Cənab İlham Əliyev kimi bir Liderin rəhbər olduğu ölkədə heç bir məkrli niyyəti, qara ideologiyanı, absurd ssenariləri həyata keçirmək mümkün deyil. Anti-Azərbaycan qüvvələr ölkənin daxilində müəyyən siyasi qruplaşmalarla dialoqa girib, siyasi sabitliyi və əmin-amanlığı pozmağa çalışırlar. Təbii ki, bunun müxalifətçiliklə heç bir əlaqəsi yoxdur. Təki ölkəmizdə güclü və sağlam müxalifət olsun. Sadəcə olaraq, müxalifət adı altında hansısa beynəlxalq siyasi dairələrin mənafeyinə xidmət edərək, ölkəmizdəki sabitliyi pozmaq, artıq bu, xəyanətdir. "Mən müxalifətəm" iddiasında olan qüvvələr cəmiyyətdə müəyyən qədər dəstək ola bilərdi ki, onlar iqtidarın qazandığı uğurlara sevinə bilərdi. Sual edirəm ki, bir dəfə görmüsünüz ki, özünü radikal müxalifət liderləri sayan şəxs desin ki, aprel döyüşləri bizim zəfərimiz idi. Bunu deməyə özündə güc tapsın. Amma radikal müxalifətin lideri özünün facebook səhifəsində belə yazır: "Görək Cocuq Mərcanlıya neçə nəfər qayıdacaq və qayıdacaqsa, neçə gün qalacaq?". Heç bunu erməni belə söyləməz.

Biz ölkəmizədəki sabitliyi, iqtidar olaraq da, müxalifət olaraq da, göz bəbəyimiz kimi qorumalıyıq. Çünki bu, milli məsələdir.

Bəhruz QULİYEV:

- Həqiqətən də, siyasi mövqeyimizdən asılı olmayaraq, biz ölkəmizdəki təhlükəsizliyi qorumalı, bir nöqtəyə vurmalıyıq. Bildiyiniz ki, 2015-ci ildə Türkiyədə baş verən hadisələr zamanı gördük ki, türklər siyasi vəziyyətin gərginləşdiyi bir vaxtda hər şeyi bir kənara qoyaraq, birləşdilər. Milli məsələlərdə biz birləşməyi bacarmalıyıq. Bu gün ölkəmizdə iqtisadi sferada islahatlar prosesi dərinləşdikcə, dövlət vətəndaşların sosial müdafiəsinin gücləndirilməsi ilə bağlı üzərinə yeni-yeni öhdəliklər götürür, sosialyönümlü siyasətin miqyasını daha da genişləndirir. Bu gün proqram xarakterli iqtisadi və sosial layihələr həyata keçirilir. Belə bir zamanda, Azərbaycanı mənəvi terrora məruz qoyanlar və onların missionerləri bu gün özələrin müxalifət hesab edə bilərmi? Dəyimi masada iştirak edən konstruktiv müxalifətin nümayəndələrinə sual edirəm. Bu gün, həqiqətən də, anti-Azərbaycan qüvvələrə dəstək verənlərə ehtiyac varmı?

Araz ƏLİZADƏ, Azərbaycan Sosial Demokrat Partiyasının sədri, millət vəkili:

- Əvvəla, onu deyim ki, mitinqlərin keçirilməsinin günahı məndədir. Azərbaycanda ilk mitinqi 1988-ci ildə mən keçirmişəm. Nəyə görə günah məndədir? Mən mitinqlə insanlara mübarizə yolunu göstərmişəm və sonralar geri çəkilmişəm. Amma təəssüf ki, müxalifətdə olan qüvvələr də, mitinqdən başqa, bir mübarizə yolunu tanımırlar. Nə tələbələr, nə də gənclərlə görüşlər keçirmirlər. Hətta deyirlər ki, bizə ali təhsil müəssisələrində gənclərlə görüşlər keçirməyə icazə vermirlər. Dəvət et gəncləri öz qərargahına, orada müxtəlif məzmunda görüşlər təşkil et. Onların məqsədi başqadır. 2013-cü ildə keçirilən prezident seçkiləri zamanı "Milli Şura"nın lideri Cəmil Həsənli bir proqramı ortaya qoya bilmədi. Bir neçə dəfə ondan soruşanda ki, proqramın hanı? O, iki səhifəlik bir yazı dərc elədi və absurd fikirlərini ortaya qoydu. Məsələn, deyirdi ki, təhsilə ayrılan xərcləri iki dəfə artıracağam. Təhsil müəssisələrində çalışan işçilərin maaşını 300 faiz artıracağam. Siz adi hesabı bilmirsiniz. 200 faiz dövlət büdcəni artırırsınız, 300 faiz isə maaşları. Bu necə mümkündür? Məsələ ondadır ki, bu insanlar inkişaf etmirlər. Öz üzərilərində işləmirlər. 12 il akademiyada işləyib, bir elmi məqalə yaza bilməyən insan, ölkəyə rəhbərlik etmək istəyir. O ki qaldı mitinqlərin keçirilməsinə, ondan qorxmaq lazım deyil. Onlar düşünürlər ki, izdihamlı mitinqlər keçirə bilərlər. "Bəlkə də qaytardılar", fikri ilə yaşayırlar. Artıq onlar yalançı çobana çeviriliblər, xalq onlara inanmır və mintinqlərə getmir. Özləri öz əməlləri ilə özlərini ifşa edirlər.

Tahir KƏRİMLİ, Vəhdət Partiyasının sədri, millət vəkili:

- Bugünkü dəyirmi masa çox dəyərli bir mövzunu əhatə edir. Azərbaycan Respublikasının Konstitusiyası çoxpartiyalı bir sistemi nəzərdə tutur. Eyni zamanda, siyasi partiyalar haqqında qanun da bütün siyasi təşkilatlara eyni bərabər hüquqları özündə ehtiva edir. Bu prinsiplərə və qanunlara hər zaman riayət edilir və hesab edirəm ki, siyasi partiyalar haqqında qanuna daim əməl edilməlidir. Yəni partiyalar özünün təşkilati-hüquqi vəziyyətini müəyyən etməlidir. Bu, nə deməkdir? İstənilən uğurun üç komponenti mövcuddur. Birincisi, lider krental və xarizmatik tipli olmalı. İkincisi, siyasətçilər və partiyalar gücə malik olmalı, üçüncüsü isə, bu partiyaların üzvləri və tərəfdarları olmalıdır. Bunların əsasında özünəuyğun şərtləri də var. Biz azadlıq mübarizəsində həm müstəqillik uğrunda, həm də cəmiyyətdə hüquqi-demokratik mühitin yaradılması uğrunda mübarizə aparmışıq. O zaman biz inqilabi dəyişikliklər haqqında düşünürdük. Həmin vaxtlar bir sistem idi. Bizi başa düşən və ideyalarımızı dəstəkləyən hakim nümayəndələr yox idi. AXC-Müsavat iqtidarında təmsil olunanlar da xalqın arzu və istəklərinin ifadəçisi ola bilmədilər. Bu baxımdan da, hakimiyyət qısa bir müddətdə süquta uğradı. İndi də, o zamankı hakimiyyət nümayəndədəri olmuş partiya sədrləri və funksionerləri eyni səhvləri davam etdirirlər. İndiki hakimiyyət isə xalqın maraq və mənafeyini uğurla həyata keçirir. Ona görə də, xalq-hakimiyyət birliyi mövcuddur. Bu da, beynəlxalq təsirlərləri müəyyən qədər neytrallaşdıra bilir. Azərbaycan tam şəkildə siyasət yeridir ki, bu da kiminsə xoşuna gəlmir. Əgər bu gün Azərbaycanda sabitlik pozulsa, hansı demokratiyadan danışmaq olacaq? Hansı iqtisadi artımdan, Qarabağ probleminin sülh yolu ilə həllindən söhbət açmaq mümkün olacaq? Müxalifət liderlərini milli maraqlar düşündürmür. Onlar üçün fərqi yoxdur. O zamankı hakimiyyətdə olduqları düşüncədədirlər ki, eybi yoxdur, Qarabağı verəydilər, təki hakimiyyətdə qalaydılar, həm də canımız qurtarardı. Amma Azərbaycan Prezidenti İlham Əliyev qətiyyətlə bəyan edir ki, nəinki Qarabağı, eləcə də, tarixi torpaqlarımız olan Zəngəzuru və İrəvanı da geri alacağıq. Bu gün hər bir sahədə böyük islahatlar həyata keçirilir. Məqsəd nədən ibarətdir? Şəffaflığı təmin etmək, rüşvətxaorluğu və korrupsiyasını aradan qaldırmaq, əhalinin sosial-iqtisadi vəziyyətini daha da yaxşılaşdırmaq. Müxalifət deyir ki, ver, hakmiyyəti mən idarə edim. Sizlərin hakimiyyəti idarə etmək potensialınız varmı. Axı bütün bu məsələlərdən keçmişik. Birmənalı tərzdə demək olar ki, bu gün xalq sizə inanmır, etibar etmir.

Çünki xarici düşmənlərlə iş birliyi quraraq, millətə və dövlətçiliyə qarşı çıxırsınız. Belə müxalifət dağılmağa məhkumdur. Hər kəsin keçmişi, içi mən qarışıq, ayağında buxovdur.

Azərbaycan müxalifəti Suriyada proseslər yeni-yeni başlayanda, mütəmadi çıxışlar edirdilər ki, 5 milyondan artıq adam demokratiya uğrunda mübarizəyə başlayıblar. Onlar bunu fərəhlə danışırdılar. Bəs indi niyə onlar bu məsələdən danışmırlar? Suriyada hanı o demokratiya? Bu mənada, xaricdən ölkəmizə qarşı olan təhdidlərin də arxasında ölkəmizdən istifadə etmək dayanır. Məsələ ondadır ki, Azərbaycan bu beynəlxalq qlobal təsirləri müəyyən qədər neytrallaşdırır və müstəqil siyasət yeridə bilir. Təbii ki, bu müstəqil siyasət kiminsə xoşuna gəlmir.

Bu gün Azərbaycanda sabitlik pozulsa, hansı demokratiyadan danışmaq olar. Bu gün Azərbaycan Prezidenti İlham Əliyev deyir ki, nəinki Qarabağ, indiki Ermənistan da Azərbaycanın tarixi torpağıdır. Açığını deyək ki, bizlər cürət edib o sözləri deyə bilmirik. Bu mənada, hesab edirəm ki, radikal müxalifət lideri də konsepsiya ortaya qoymalıdır. Bunların dedikləri yalnız "Məşədi İbad" filmindəki kimi "aç qapını, gələk səni öldürək" deyiminə bənzəyir. Müxalifət deyir ki, "sən çıx otur, mən sənin yerinə hakimiyyətə gəlim". Sən hakimiyyətə gəldiyin təqdirdə, bəs sənin kadr üçün potensialın, proqramın var? Ax biz bütün bu məsələlərdən keçmişik. Onlar parlamentdən, hansısa dövlət orqanından yıxılan kimi, dönüb radikal müxalifət olurlar. Bunların hər birini xalq görür. Xalq hər şeyi çox gözəl bilir.

BƏHRUZ QULİYEV:

- Hansısa bir partiyanın nümayəndəsi olmasından asılı olmayaraq, bizim bir milli şüurumuz, bir milli ideyamız, bir dövlətimiz var. Buna görə, hər bir Azərbaycan vətəndaşı məsuliyyət daşıyır. Taliyət müəllim, sizcə, ümummilli məsələlərdə bizim birləşməyimiz mümkündürmü?

Taliyət ƏLİYEV, Azərbaycan Demokrat Partiyasının sədr müavini:

- Təbii ki, milli maraq kəsb edən məsələlərdə qarşıya qoyulan məqsədə çatmaq üçün iqtidar və müxalifət münasibətləri sivil bir formada normallaşmalı və bu sağlam bir mühitdə baş tutmalıdır. Hesab edirəm ki, bu gün Azərbaycan cəmiyyətində buna ciddi ehtiyac var. Bundan bir xalq, dövlət, cəmiyyət qazanmış olar. Bu baxımdan, sivil münasibətlərin yaranması vacibdir. Milli məsələlərdə, birmənalı olaraq, deyə bilərəm ki, siyasi mənsubiyyətdən söhbət gedə bilməz. Əks- təqdirdə, bu, Azərbaycan dövlətinə və xalqına xəyanət demək olardı. Məlumdur ki, aprel döyüşlərində hamı bir hədəfə vurdu. Hətta bizim partiyanın bir üzvü aprel döyüşlərində şəhid oldu. Hər bir Azərbaycan vətəndaşı, qeyd etdiyim kimi, siyasi mənsubiyyətindən asılı olmayaraq, döyüşməyə də, hakimiyyətin yanında olmağa da hazır olmalıdır və biz bunu bəyan da etmişdik. Sağlam düşüncə sahibi olan bir kəs qeyri-münasibət nümayiş etdirə bilməz. Azərbaycanda olan ictimai-siyasi məsələlərə gəlincə, qısa şəkidə vurğulamaq istəyirəm ki, ölkəmizdə dövlət başçısı hər bir vətəndaşının probleminə həssas tərzdə yanaşır və onu həll edir. Xüsusilə, bu ilin əvvəlindən başlayaraq, Azərbaycan Prezidenti İlham Əliyevin təşəbbüsü ilə sosial sferada həyata keçirilən islahatlar, imzalanan fərman və sərəncamlar bunu bir daha təsdiq edir. Bu gün Azərbaycanda sosial problemlərin həlli ilə bağlı çox böyük işlər həyata keçirilir. Bütün bunlar Azərbaycanın daha xoş gələcəyi naminə reallaşır.

Əli ORUCOV, AMİP-in siyasi şurasının üzvü:

- Siyasi partiyaların cəmiyyətdə rolu olduqca aktual olan bir mövzudur. İlk olaraq, bildirim ki, Azərbaycan sovet məkanında 70 il totalitar bir rejimdə, təkpartiyalı rejimdə yaşayıb. Müstəqillik əldə edən Azərbaycanda çoxpartiyalılığın yaranmasına zəruriət var idi. Müstəqil dövlətimizdə təkpartiyalı sistemdən çoxpartiyalı sistemə keçidin əsası qoyuldu. 1992-ci ildə Azərbaycan müstəqillik qazanandan sonra zərurət yaranmışdı ki, ölkədə yeni bir siyasi təşkilat yaransın. O dövrə qədər müəyyən qruplar var idi, amma onlar siyasi partiya səviyyəsində deyildilər, qeydiyyatdan da keçməmişdilər. Bu boşluğu ilk dəfə Azərbaycan Milli İstiqlal Partiyası doldurdu. Bundan sonra isə, ölkədə təkpartiyalı sistemdən çoxpartiyalı sistemə keçidin əsası qoyuldu. Daha sonra Yeni Azərbaycan Partiyası yarandı və digər partiyalar qeydiyyatdan keçdi. Bu, çox mütərəqqi bir hal idi. Çoxpartiyaların olması ölkənin dayanıqlığı və rəqabəti deməkdir. Siyasi partiyaların olması cəmiyyətin sosial siyasiləşməsinə gətirib çıxarır. Sivil ölkələrdə, adətən, siyasi partiyaların inkişafına da böyük dəstək verilir. Azərbaycan Respublikasının Konstitusiyasının birinci maddəsində göstərilir ki, hakimiyyətin mənbəyi xalqdır. Bu gün ölkədə 55 siyasi partiya qeydiyyatdan keçib. Mitinqlərə gəlincə, deyim ki, Azərbaycan Konstitusiasında, eləcə də, beynəlxalq hüquqda sərbəst toplaşmaq vətəndaşların hüquqi normalarıdır. Bu, vətəndaşların sərbət toplaşması haqqıdır. Məsələ ondadır ki, mitinqlərin siyasi mübarizə vasitəsi kimi istifadəsinə zəruriət var, ya yox? Siyasi partiyalar, təbii ki, qərarlarını müstəqil şəkildə verir, strategiya və taktikalarını müstəqil şəkildə müəyyənləşdirirlər. Biz deyə bilmərik ki, hansısa bir partiya nəyisə səhv, yaxud düz edir. Təəssüf ki, bütün mübarizələr tükənəndə, mitinqlərə əl atırlar. Çox təqdirəlayiq haldır ki, bugünkü dəyirmi masada siyasi partiyaların bir neçəsi bir yerə toplaşıb və bir-birlərinin fikirlərini dinləyir, müzakirlər qarşılıqlı şəkildə aparılır. Görürsünüz, Türkiyədə partiyalar arasında siyasi debatlar çox qızğın şəkildə aparılır. Amma milli maraqlara gələndə, sıx birləşməyi bacarırlar. Məsələn, Türkiyədə çevirlişə cəhd olanda, onlar bir araya gəlib birləşdilər. Çünki onları ortaq maraqlar - milli maraqlar birləşdirirdi. Mən hesab edirəm ki, siyasi mübarizədən və rəqabətdən qaçmaq lazım deyil. Partiyalar bir-birinə düşmən kimi yox, tərəfdaş kimi yanaşmalıdır.

Teyyub QƏNİOĞLU, Azərbaycan Təkamül Partiyasının sədri:

- Hüquqi bir dövlətdə mitinqlərin keçirilməsi normal bir haldır. Təbii ki, hər bir şey sağlam tərzdə həyata keçirilməlidir. Mən hər zaman bildirmişəm ki, hər hansı bir siyasi partiyanın mövqeyi iqtidarın mövqeyinə zidd ola bilər. Amma bu mövqe dövlətimizə ziddirsə, buna getmək olmaz. Ölkənin mənafeyinə xələl gətirən hansısa bir addımın atılması qəbulolunmazdır. Əlbəttə ki, vətəndaşlıq mövqeyi önəmli məsələdir. Biz ölkədə sabitliyi, təhlükəsizliyi, inkişafı qoruyub, təmin etmək üçün hamılıqla çalışmalıyıq. Sabitliyimizi pozmaq istəyənlərin, inkişafımıza mane olmağa çalışanların qarşısını almalıyıq. Bu gün ölkəmizdə dövlət başçısı tərəfindən geniş islahatlar həyata keçirilir. Azərbaycan Prezidenti İlham Əliyev ölkədə sosial məsələlərin həllini, əhalinin rifahının yüksəlişini prioritet məsələ hesab edir və ölkəmizdə bu istiqamətdə ardıcıl tədbirlər həyata keçirilir. Bu islahatlar planlı, Azərbaycan dövlətinin sosial-iqtisadi inkişafına uyğun, dövlət büdcəsinin imkanlarına və hazırlanan proqramlara uyğun olaraq həyata keçirilir. Bu, bir daha göstərir ki, Azərbaycan dövlətinin siyasətinin əsasında xalqın rifahının yüksəldilməsi dayanır. Əlbəttə ki, bu islahatlar davam etdiriləcək.

Nuhəli KƏRİMOV, "Azərbaycan Fermeri" qəzetinin baş redaktoru:

- Bu gün istənilən siyasi partiyanın mövqeyindən asılı olmayaraq, Qarabağ probleminini həllində birlik olmalıdır. Bu məsələ hər bir azərbaycanlının ümumi məsələsidir. Bu məsələdə siyasi mənsubiyyətindən asılı olmayaraq, yumruq kimi birləşməliyik. Ölkəmizdə müxalifət deyilən bir məkan ki var, onların hər birində şəxsi maraq mövcuddur. Biz bugünkü reallıqları görmək üçün tariximiz, vərəqləməliyik. Müstəqilliyimizin ilk illərinə nəzər salaq. Ulu Öndər Heydər Əliyevin hakimiyyətə qayıdışına qədər olan dövrdə ölkədə hökm sürən anarxiya və özbaşınalıq ölkəni iflic vəziyyətinə salmışdı. O illər çox çətin və ağır illər idi. Heydər Əliyev bu dövlətin inkişaf strategiyası hazırladı və uçurumda olan Azərbaycanda inkişaf mərhələsi başlandı. O illəri yaşayan xalq yenidən tarixin təkrar olunmasını istəyərmi? Bu gün Ulu Öndər Heydər Əliyev siyasi kursunu uğurla davam etdirən Azərbaycan Prezidenti İlham Əliyevin həyata keçirdiyi ardıcıl və düşünülmüş sosial-iqtisadi siyasəti nəticəsində, ölkəmizin davamlı inkişafı təmin edilib, ölkə iqtisadiyyatında qeyri-neft sektorunun çəkisi ciddi şəkildə artıb. Əsası Ulu Öndərimiz Heydər Əliyev tərəfindən qoyulan və Azərbaycan Prezidenti İlham Əliyev tərəfindən uğurla və yeni dövrün tələblərinə uyğun şəkildə inkişaf etdirilən dövlət siyasəti nəticəsində, Azərbaycan dünyaya yeni və nümunəvi inkişaf modeli təqdim edir. İqtisadiyyatın modernləşdirilməsi, qeyri-neft sektorunun inkişafı ilə bağlı irimiqyaslı layihələrin reallaşdırılması nəticəsində yeni iş yerləri açılıb, əhalinin həyat səviyyəsi yüksəlib və məşğulluğu artıb. Sosial rifah halının, insanların həyat səviyyəsinin yüksək olmadığı cəmiyyətdə, dövlətdə böyük nailiyyətlərlə müşayiət edilən inkişafdan söhbət açmaq mümkün deyil. Sosial siyasət insanların həyatının bütün sahələrinin yaxşılaşdırılmasını, sosial ədalət prinsipinin reallaşdırılmasını, əhalinin etibarlı sosial müdafiəsinə nail olunmasını əhatə edir. Ermənipərəst dairələrin sifarişlərini yerinə yetirən xaricdəki antimilli ünsürlər isə, Azərbaycan xalqına və dövlətinə qarşı təhqir kampaniyası aparır, xalqımızın milli-mənəvi dəyərlərini hədəfə alırlar. Azərbaycanda illərdir sistemili şəkildə görülən işlər və aparılan siyasət milli iqtisadiyyatımızın yüksəlişini təmin edib. Xatırlayırıq ki, hələ qlobal maliyyə böhranı dövründə Azərbaycan iqtisadiyyatı öz sabitliyi ilə seçildi və həmin prosesdən, demək olar ki, zərər çəkməyən azsaylı dövlətlərdən olduq. Bunun arxasında isə, illərdir düzgün istiqamətlənən dövlət siyasəti dayanırdı.

Azərbaycanın uğurları, Cənab Prezidentin müdrik siyasəti nəticəsində reallaşan nəzərəçarpan inkişaf anti-Azərbaycan qüvvələr tərəfindən qısqanclıqla qarşılanır. Qeyri-sağlam düşüncəyə malik satqın, xəyanətkar və hoqqabazlar bunu həzm edə bilmirlər.

İBRAHİM HƏSƏNOV:

- 1993-cü il illə bu günümüzü müqayisə etsək, böyük nailiyyətlər əldə olunduğunu görərik. Hər bir Azərbaycan vətəndaşı ölkəmizin iqtisadi gücü və qüdrətinin ilbəil artmasının şahidi olur, iqtisadi inkişafın nəticələrini özünün həyat səviyyəsinin yüksəlməsində hiss edir. Müstəqillik dövründə Azərbaycanın həyata keçirdiyi islahatlar, dövlət proqramları, layihələr Azərbaycanın imicini dəyişib, onu sürətlə inkişaf edən ölkəyə çevirib. Təbii ki, inkişafı inkar etmək olmaz. Bu inkişafı biz Azərbaycanın bütün regionlarında və paytaxt Bakıda görürük. İctimai-siyasi sabitliyin yüksək səviyyədə təmin edildiyi ölkəmizdə bürokratik əngəllər və korrupsiya halları aradan qaldırılıb. Azərbaycan iqtisadiyyatında ardıcıl müşahidə olunan inkişaf meyilləri, ayrı-ayrı sahələrdə əldə edilən müsbət nəticələr dövlətin sosialyönümlü siyasətinin daha da gücləndirilməsinə imkan verir. Bu gün ölkəmizdə, bildiyiniz kimi, Azərbaycan Prezidenti İlham Əliyevin rəhbərliyi ilə genişmiqyaslı islahatlar aparılır. Həqiqətən də, Azərbaycan dövlətinin sosial sahədə atdığı addımlar vətəndaşına olan diqqət və qayğısının təzahürüdür. Dövlətimiz tərəfindən aparılan islahatlar bütün sahələri əhatə edir. Azərbaycan Prezidenti İlham Əliyev məhkəmə-hüquq sistemində də islahatların aparılacağın bildirib. Bu, gözəniləndir.

Bu gün özünü müxalifət adlandıran bir qrup şəxslər insanları mitinqə çağırırlar. Doğrudur, Azərbaycan Konstitusiyasında insanların sərbət toplaşmaları onların haqqıdır. Hər kəs birləşə, toplantı keçirə bilər. Ancaq bütün bunlar icazəli şəkildə keçirilməlidir. Bakı Şəhər Baş Polis İdarəsindən Bakı Şəhər İcra Hakimiyyətinə məlumat verilib ki, keçirilən mitinqdə ictimai qaydalar pozulub. Əli Kərimli mitinq zamanı kəskin surətdə dövlətimizə qarşı əsassız çıxışlar etmişdi. Biz təmsil olunduğumuz partiyanın sədrinin imzası ilə məktub hazırlayıb, baş prokurorluğa göndərdik. Cinayət Məcəlləsinin 323-cü maddəsinə görə, dövlət başçısının şərəf və ləyaqətinin ləkələnməsi cinayətdir.

Azərbaycanın uğurlarına, Cənab Prezidentin müdrik siyasəti nəticəsində reallaşan inkişafa kölgə salmağa cəhd etsələr də, buna nail ola bilməzlər.

TƏHMASİB NOVRUZOV:

- 1993-cü ildən bu günə qədər ölkəmizdə genişmiqyaslı işlər görülüb. 1993-cü ildən sonra Azərbaycan dövlətinin dirçəlməsi, onun mövqeyinin və təməlinin möhkəmlənməsində Ulu Öndərin rolu əvəzsiz olmuşdur. Ulu Öndər Heydər Əliyevin hakimiyyətə qayıdışından sonra, qısa bir müddət ərzində, iqtisadi dirçəliş başlandı, terror cəhdləri və çevriliş cəhdlərinin qarşısı alındı, ordu yaradıldı, konstitusiya qəbul olundu, azərbayançılıq ideyası yaradıldı və Azərbaycanda bu ideyanın çox uğurlu bir inkişafı başladı.

Ümummilli Liderin bizə ərməğan qoyub getdiyi zəngin irsi müstəqil Azərbaycan dövlətinin sütun dirəkləridir. Məhz bu qüdrətli sütunlar üzərində ucalan müasir Azərbaycan güclü ola bilib. 2003-cü ildən sonra Azərbaycanın inkişafında yeni bir mərhələ başladı. Prezident İlham Əliyevin uzaqgörən və praqmatik siyasəti nəticəsində, Azərbaycan regionun ən güclü və nüfuzlu dövlətinə çevrilib. Həqiqətən də, Azərbaycan son illərdə bütün istiqamətlər üzrə böyük uğurlara imza atıb. Davamlı inkişafı ilə tanınan ölkəmizdə təhlükəsizlik yüksək səviyyədə qorunur və ictimai-siyasi sabitlik möhkəmlənir. Bu gün Azərbaycan inkişaf və tərəqqi dövrünü yaşayır. Xüsusilə, regionların sosial-iqtisadi inkişafı ilə bağlı mərhələli dövlət proqramlarının qəbul və icra olunması hər bir bölgənin davamlı inkişafını təmin edib. Təbii ki, bu uğurlar ölkəmizdə hökm sürən sabitliyin və əmin-amanlığın mövcudluğunu təsdiqləyir.

Məni narahat edən məsələ odur ki, dövlət başçısı Azərbaycan xalqını narazı salan bir məmuru vəzifəsindən azad etdikdən sonra bir həftə keçməmiş bəzilərinin müxalifətin hansısa bir küncündən səsi gəlir. Dəfələrlə biz bunun şahidi olmuşuq. Ölkə başçısı hakimiyyətdə olduğu zaman xalqın etimadını doğrultmayan, korrupsiya ilə məşğul olan bir məmuru vəzifədən kənarlaşdırırsa, bütün müxalifət partiyaları da həmin şəxsə qarşı olmalıdırlar. Əksinə, onu tərif edir, dövlətə qarşı çıxış etməsinə çalışırlar. Bu gün "Səs" qəzetinin təşkil etdiyi belə dialoqlara cəmiyyətin ehtiyacı var. Azərbaycanın uğurları hər bir vətənini sevən insanı qürurlandırır.

FUAD MURADOV:

- Bu gün bir çox pariyalar sovet ideologiyasından qalmış təfəkkür ilə yaşayırlar. Birdəfəlik bilməlidirlər ki, ya alt dövlətə, ya da üst dövlətə xidmət etməlidirlər. Onların fəaliyyətində heç nəyi görə bilmirik. Yalnız insanlara "ağıl" verməklə məşğul olurlar. Müxalifətin mitinqlərinə gəlincə, bildirim ki, normal siyasi fəaliyyət göstərməmələri ucbatından cəmiyyət tərəfindən qəbul edilmir və keçirdikləri aksiyalarda uğursuzluğa düçar olurlar. Bu müxalifət xaricdən maliyyələşərək, Azərbaycanın qəsdinə durun erməni qüvvələrinə xidmət edir. Bəzi xarici kəşfiyyat idarələrinə xidmək göstərirlər. Birbaşa erməni hökumətinə xidmət edirlər. Bu gün ölkəmizdə Cənab Prezidentin rəhbərliyi ilə demokratik mühit var və belə bir mühitdə istənilən bir siyasi baxış nöqtəsi ola bilər. Antimilli qüvvələr bundan istifadə edərək gənclərimizə təsir göstərməyə çalışırlar. Bunlar müxalifət deyillər. Əgər müxalif fikirlidirlərsə, gəlib fikirlərini bəyan etsinlər, tələblərini, məqsədlərini ortaya qoysunlar. Axı bunların heç bir məqsədi, istəyi yoxdur. Amerika-Azərbaycan yolunu Bakı-Qazax yoluna çeviriblər. Məramını açıqla, bilinsin ki, xalqına, millətinə və dövlətinə xidmət edirsən. Azərbaycan dövlətinə, Azərbaycan xalqına qarşı lazımsız ifadələr işlədib, xalq arasında çaxnaşma salmaq cəhdləri nə məqsəd daşıyır? Azərbaycanın Ümummilli Lideri Heydər Əliyev hakimiyyətə qaydışı ilə müstəliq dövlətimizi qurdu və onun təməlini möhkəmlətdi. Amma 1993-cü ilə qədər Azərbaycanda hökm sürən xaos və anarxiya ölkəmizi uçuruma aprırdı.

Bunlar 1990-cı illərin əvvəllərində hansı vəziyyətdə idilərsə, bu gün də, eyni vəziyyətdədirlər. Çünki onlar mənsub olduqları siyasi düşərgədə heç bir islahatlar aparmayıblar. Cəmiyyət onların anormal siyasət apardıqlarını görür və bu baxımdan, onlara nifrət edir. Bu gün ölkəmizə yetişən gənclər nəsli möhkəm iradəli, açıq dünyagörüşlü, savadlı və yetkindir. Onları hansısa antimilli düşüncə ilə yollarından sapdırmaq mümkün deyil.

Nəzakət ƏLƏDDİNQIZI

Səs.- 2019.- 5aprel.- S.8-9