Artıq yetər!

İlham Əliyev: “Yaranmış vəziyyətə görə bütün məsuliyyət Ermənistanın hərbi-siyasi rəhbərliyinin üzərinə düşür”

Təxribatların arxasındakı maraq: Münaqişənin bitməməsi kimlərə lazımdır? II Qarabağ müharabisənin başa çatmasını simvolizə edən 10 noyabr bəyannaməsinin imzalanmasından sonra Prezident İlham Əliyev dəfələrlə çıxışlarında Qarabağ münaqişəsinin həll olunaraq, tarixə qovuşduğunu, artıq yeni quruculuq mərhələsinin başladığını bildirib. Lakin son günlərdə işğaldan azad olunmuş bölgələrdə təxribatların baş verməsi və digər qızışdırıcı addımlar, bəyanatlar regionda sülhün əldə olunmasını istəməyən qüvvələrin varğını göstərən faktorlardır. Xüsusilə də, noyabrın 16-17-də Ermənistan silahlı qüvvələrinin Laçın-Kəlbəcər və Tovuz rayonu istiqamətində Azərbaycan ordusunun mövqelərini müxtəlif çaplı silahlardan atəşə tutması ölkə gündəminin manşetini tamamilə dəyişib.

O zaman belə bir sual yaranır: Əgər müharibə bitibsə, o zaman sərhəddə niyə atışma var, Ermənistan niyə ordumuzun mövqelərini atəşə tutur?

Yerində ortaya çıxan haqlı suallardır... Amma cavab da yerindədir: belə ki, Qarabağ bir il bundan əvvələ qədər işğalda saxlanılan münaqişə zonası idi və 30 il ərzində burada yerləşən terrorçu qruplaşmaları Ermənistan himayə edirdi. Artıq müharibə bitib, amma Ermənistan ordusu siyasi rəhbərliyin sifarişləri ilə terrorçu missiyasını yerinə yetirməkdə davam edəcək. Və 44 günlük müharibə nəticəsində Ermənistan məğlub oldu. Artıq Zəngəzur dəhlizinin açılması qaçılmazdır və günün əsas reallığıdır. Digər tərəfdən, Ermənistanın təslimçi sülhə imza atmaqdan başqa yolu qalmayıb. Həmçinin, sərhəddəki son təxribatlardan sonra Nikol Paşinyanın “biz sülh sazişi imzalamağa hazırıq” deməsi də təsadüfi deyil. O qorxur ki, Ermənistandakı sərhəddəki təxribatları Azərbaycanın növbəti dəfə genişmiqyaslı anti-terror əməliyyatlarının başlamasına səbəb ola bilər. Ona görə də törədilən təxribatların ardınca dərhal ortaya “yumşaq” mövqe qoyur.

Prezidenti İlham Əliyev noyabrın 16-da Avropa İttifaqı Şurasının Prezidenti Şarl Mişellə telefon söhbət əsnasında Prezident Şarl Mişel Ermənistan-Azərbaycan sərhədində baş vermiş hadisələrlə bağlı narahatlığını ifadə edib.

Sərhəddə cərəyan edən hadisələrlə bağlı Şarl Mişelin müraciətinə cavab olaraq Prezident İlham Əliyev bildirib ki, dəfələrlə Ermənistan tərəfi Şuşa, Laçın, Kəlbəcər istiqamətində hərbi təxribatlara əl atıb və Ermənistanın son genişmiqyaslı hücumu bu gün baş verib.

Dövlətimizin başçısı Azərbaycan tərəfdən yaralıların olduğunu qeyd edərək, Ermənistanın təxribatlarına adekvat cavab verildiyini vurğulayıb.

Revanşizmə can atanların aqibəti acı olur

Bəli, bu, real faktordur. Belə ki, hadisələrə diqqət yetirsək, iflasdan qurtulmuş Ermənistanın rəhbərliyi bir müddət sonra revanşist qüvvələrlə bəzi xarici havadarların təzyiqi və təhriki ilə üçtərəfli Bəyannamədə öz üzərinə götürdüyü öhdəliklərdən yayınmağa cəhdlər göstərməyə başladı. Daha doğrusu, Ermənistan hökuməti ikibaşlı oyunlarla vaxt udmaq üçün bir-birinə diametral zidd olan bəyanatlar vermək xəttini tutdu. Ən gərgin məqamlar məhz sərhədlərin dəqiqləşdirilməsi və Zəngəzur dəhlizinin açılması ilə bağlı idi. Lakin İrəvanın bütün destruktiv səylərinə rəğmən, Azərbaycan beynəlxalq hüquq çərçivəsində Zəngəzur ərazisində Ermənistanla sərhədlərini tədricən bərpa edir, zəruri olan sərhəd və gömrük-nəzarət məntəqələrini qururdu. Nəticədə noyabrın 8-də Azərbaycan xalqı Zəfər bayramını qeyd etdiyi vaxtda ermənilər Şuşa ətrafında təxribata əl atdılar, onun səhəri günü ordumuzun Kəlbəcərdəki mövqelərinə yol çəkən mühəndis texnikaları atəşə tutuldu və elə həmin gün də 60 erməni hərbçi Qaragöl ətrafında heç bir hüquqi əsası olmayan post qurmağa cəhd göstərdi. Bütün bu təxribat cəhdlərinin qarşısını alan Azərbaycan, hətta Rusiyanın xahişi ilə Qaragöl ətrafında mühasirəyə aldığı 60 erməni hərbçinin Ermənistana qayıtmasına da imkan verdi.

Həmçinin, Azərbaycan Müdafiə Nazirliyi təxribatlar təkrarlanarsa, daha sərt və təsirli tədbirlərin görüləcəyi barədə noyabrın 10-da qarşı tərəfə ciddi xəbərdalıq etdi. Noyabrın 14 və 15-də Kəlbəcərdəki mövqelərimizi Ermənistan ərazisindən atəşə tutaraq, dövlət sərhədinin bu istiqamətindəki yüksəklikləri ələ keçirməyə, beləliklə də, daha əlverişli mövqelərə və hərbi üstünlüyə malik olmağa cəhd göstərdi. Amma Azərbaycan Ordusunun endirdiyi zərbələrlə təxribatçılar qaçmağa məcbur edildi, bütün yüksəkliklər və məntəqələr isə Silahlı Qüvvələrimizin nəzarətində qaldı Ermənistan növbəti dəfə tam iflasa uğradı.

Və son günlər Azərbaycan-Ermənistan dövlət sərhədində baş vermiş hadisələr, həmçinin Qarabağda atəş səslərinin eşidilməsi Ermənistanın qəsdən vəziyyəti gərginləşdirmək cəhdidir.

Aleksandr Perenciyev: “Ermənistanda revanşistlərin gəcələyi yoxdur”

“Ermənistandakı revanşist qüvvələr münasibətləri qızışdırmaqda maraqlıdırlar. Onların təxribatları əksinə, rəsmi Bakı və İrəvanı Rusiyanın vasitəçiliyi ilə öz aralarında sərhəd xətti yaratmağa və Sərhəd Müqaviləsi imzalamağa sövq edəcək. Sonrakı perspektivdə isə sülh müqaviləsi bağlanacaq”. Bu sözləri Plexanov adına Rusiya İqtisadiyyat Universitetinin Politologiya və Sosiologiya kafedrasının dosenti, hərbi politoloq Aleksandr Perenciyev deyərək bildirib ki, revanşistlər Cənubi Qafqazın iki qonşu dövləti arasında münasibətlərin tənzimlənməsi üzrə danışıqlar prosesini nə qədər pozmağa çalışacaqlarsa, rəsmi Moskvada bu prosesi öz məntiqi sonluğuna çatdırmaq üçün bir o qədər motivasiya yaranacaq.

Ukraynalı siyasi ekspert Aleksandr Dudçak deyib bildirib ki, genişmiqyaslı münaqişəyə çevrilə biləcək təxribatı təşkil edən hər kəs Ermənistanın və Azərbaycanın maraqlarına zidd hərəkət edən təxribatçıdır: “Hər iki tərəf hərbi əməliyyatların başlamasına görə qarşı tərəfi günahlandırır. Ancaq təxribatı üçüncü tərəfin təşkil etməsi də tamamilə mümkündür”.

Aleksandr Dudçak bildirib ki, Paşinyan və komandasının hərəkətlərini “düşünülmüş” adlandırmaq mümkün deyil: «Bir ara Paşinyan bəyan edirdi ki, “Rusiya Ermənistanın təhlükəsizliyinin real təminatçısı sayıla bilməz” və Qərbdən kömək diləyirdi. Buna baxmayaraq, xarici təhlükələri dərk edən Ermənistan KTMT-də qaldı. Azərbaycan Qarabağda hərbi əməliyyatlara başlayandan sonra Qərb heç də qeyri-adi nəsə edərək, Ermənistana yardım göstərmədi. Rusiya isə münaqişəni dayandırmaq üçün əlindən gələni etdi. Ola bilsin ki, indiki təxribat da Rusiyanı Qafqazdakı müharibəyə sürükləmək cəhdidir. Təəssüf ki, regionda sabitliyin pozulmasından və hərbi əməliyyatların yenidən başlamasından faydalanan xarici qüvvələr var. Onlar həm erməni, həm də Azərbaycan xalqının nümayəndələrini terrorçuluğa sövq edə bilərlər. İki xalqı bir-birinə qarşı qoymaqla üçüncü tərəf mənfəət əldə edir və Rusiya da daxil olmaqla, hər kəsə ziyan dəyir”.

Elxan Şahinoğlu: “Paşinyan etiraf edib ki, beynəlxalq aləmdən və beynəlxalq təşkilatlardan dəstək ala bilmirlər”

Göründüyü kimi, min bir oyuna girərək kulonluq edən Paşinyan qotur qoyun kimi qaşınmaya düşüb. Belə ki, Ermənistanın baş naziri Nikol Paşinyan noyabrın 18-də sərhəddəki son olaylarla bağlı parlamentdə çıxış edərək, deputatların suallarına cavab verib. «Atlas» Araşdırmalar Mərkəzinin rəhbəri Elxan Şahinoğlu Ermənistan baş nazirinin çətin vəziyyətə düşdüyünü bildirib: «Paşinyanın çıxışından və suallara verdiyi cavablardan onun hansı qərarlar çıxaracağı qənaətinə gəlmək olar. Birincisi, Paşinyan etiraf edib ki, uzun illər Ermənistanla Azərbaycan arasında sərhəd olmayıb, çünki Ermənistan Azərbaycan ərazilərinə nəzarət (işğal) edib. Ona görə də hazırkı toqquşmalar qeydə alınır. Yəni Paşinyan mövcud toqquşmaları labüd hesab edir. İkincisi, Paşinyan etiraf edib ki, beynəlxalq aləmdən və beynəlxalq təşkilatlardan dəstək ala bilmirlər və bu proses o hakimiyyətə gəlmədən öncə formalaşmağa başlayıb.

“Böyük dövlətlər Ermənistanın şikayətlərindən beziblər” deyən Paşinyan bu məsələdə haqlıdır, hətta İrəvana müxtəlif zamanlarda dəstək verən dövlət və mərkəzlər ermənilərin daimi ağlaşmalarından beziblər. Paşinyan “böyük dövlətlər və beynəlxalq təşkilatlar Ermənistana və Azərbaycana məsləhət görürlər ki, problemlərinizi öz aranızda həll edin” fikrində də haqlıdır. Bununla, əslində, Paşinyan Qarabağ klanının simasında radikal müxalifətə işarə edib ki, Rusiyaya olan ümidlər özünü doğrultmur, Ermənistan Azərbaycanla qarşıdurmada təklənib. Elə bunun nəticəsidir ki, Ermənistan hakimiyyəti sərhəd məsələsində Rusiya və Kollektiv Təhlükəsizlik Müqaviləsi Təşkilatına dəstək məqsədilə yazılı müraciət etməyi lazım bilmir. Görünür, anlayırlar ki, müraciət nəticəsiz qalacaq.

Üçüncüsü, Nikol Paşinyan parlamentdəki çıxışında bildirib ki, Azərbaycanla bütün məsələləri həll etməyə, o cümlədən Bakı ilə sülh sazişini imzalamağa və sərhədi müəyyənləşdirməyə hazırdır. Paşinyan çıxışının bu hissəsində ikibaşlı danışıb. Azərbaycan üçün Ermənistanla imzalanan sülh sazişi o deməkdir ki, rəsmi İrəvan nəhayət ki, Azərbaycanın ərazi bütövlüyünü - Qarabağı Azərbaycan ərazisi kimi tanıyacaq. Paşinyan buna hazır deyil. Onun nəzərdə tutduğu sülh sazişi Qarabağ məsələsini “mötərizəyə alır”, yəni bu məsələ ilə Minsk Qrupu məşğul olmalıdır. Belə sülh sazişi isə bizə lazım deyil”.

İtalyan senatoru Urania Papatheudən Ermənistana sərt etiraz - “Artıq yetər...”

İtaliya Senatının “İrəli İtaliya” Partiyasından üzvü, senator Urania Papatheu Azərbaycan-Ermənistan dövlət sərhədində Ermənistan tərəfinin həyata keçirdiyi sonuncu hərbi təxribatları pisləyən və ölkəmizi dəstəkləyən açıqlamalar verib. Senatorun açıqlamaları İtaliyanın “AgenParl”, “Agenzia Nova”, “LaPresse”, “Askanews”, “Dire”, “9Colonne” xəbər agentlikləri tərəfindən yayılıb.

Azərbaycan-Ermənistan dövlət sərhədində son günlər ərzində Ermənistan tərəfinin növbəti təxribatlarını dəf edərkən Azərbaycanın 7 hərbçisinin həlak olduğunu, daha 10 nəfərin isə yaralandığını bildirən italyan senator “Artıq yetər demək vaxtıdır, Avropa İttifaqı müdaxilə etməli, irəliyə doğru addım atmalı və hələ də müharibə etmək istəyənləri qətiyyətlə pisləməlidir”, – deyə son günlər ərzində baş verən erməni təxribatlarına sərt etirazını bildirib.

“Sanki keçən il noyabrın 10-da müharibə başa çatdıqdan sonra bu günə qədər mina partlayışının qurbanı olan 160-dan çox mülki azərbaycanlı azmış kimi Ermənistan tərəfi öz təxribatlarına davam edir”, – o deyib. “Bu dramatik vəziyyət Ermənistan hakimiyyətinin beynəlxalq hüquqla müəyyən edilmiş normaları qəbul etmək istəməməkdə israr etməsi ucbatından daha da pisləşir”, – deyə senator fikirlərinə əlavə edib.

Mövlud Çavuşoğlu: “Can Azərbaycan tək deyil, biz onu tək buraxmarıq”

Türkiyənin xarici işlər naziri Mövlud Çavuşoğlu Bəhreyndə keçirilən mətbuat konfransında söyləyib ki, “Can Azərbaycan tək deyil, tək də olmayacaq. Azərbaycanı tək buraxmarıq. Ermənistanın təxribatları Azərbaycan torpaqlarında terror hücumudur”. Nazir deyib: “Regionda sülh və sabitlik üçün birlikdə addımlar atacağıq. Ermənistan bununla razılaşarsa, biz də varıq. Amma Ermənistan belə təxribatlarla yalnız itirəcək”.

Mövlud Çavuşoğlu qeyd edib ki, Azərbaycan Ermənistana hərtərəfli sülh sazişi imzalamaq təklifi edib: "Yəni müharibədə qalib gələn və güclü olan tərəf bunu etdi. Ermənistan isə atəşkəsdən dərhal sonra bəzi əsgərlərini Azərbaycan torpaqlarına sızdıraraq əsgərimizə hücum etdi. Bu mövqe yanlışdır".

Yücel Karauz: “Dünyada Ermənistanın hörməti yoxdur: Əgər müharibə baş verərsə...”

"44 günlük müharibədən sonra dərsini almayan Ermənistan son 2 gündə daha genişmiqyaslı şəkildə təxribatlar törətməyə cəhd etsə də, Şanlı Azərbaycan Ordusunun layiqli cavabı ilə geri oturduldu. Mən düşünmürəm ki, bu baş verənlər səbəbindən yenidən müharibə başlasın".

Bu açıqlamanı Türkiyə generalı Yücel Karauz deyib və bildirib ki, son iki gündə baş verənlər də onların ordusunun necə acınacaqlı vəziyyətdə olduğunu göstərdi: "44 günlük müharibə zamanı Ermənistan ordusunun 60 faizi məhv edilib. Hazırda Ermənistan ordusunun bərpası üçün illər lazımdır. Ona görə Ermənistan KTMT və Rusiyadan yardım istəyib. Ancaq Rusiyanın və KTMT-nin də Ermənistanın bu oyununun fərqində olduğunu düşünürəm. Digər tərəfdən Azərbaycan öz milli təhlükəsizlik maraqlarının qorunması istiqamətində beynəlxalq hüquqa uyğun şəkildə hərbi, siyasi və digər fəaliyyətləri həyata keçirir və bu belə davam etməlidir. Əgər Ermənistan belə təxribat və terror fəaliyyətlərinə davam edərsə, İkinci Qarabağ müharibəsindən daha ağır məğlubiyyətə hazır olmalıdır”.

General deyib ki, Prezident İlham Əliyevin dəfələrlə lazımi addımlar atılacağı təqdirdə Ermənistanla sülh müqaviləsini müzakirə etməyə və imzalamağa hazır olduğunu bildirməsinə baxmayaraq, Ermənistan prosesi uzatmağa çalışır. Hələ bu addımları ilə kifayətlənməyib dezinformasiya yayaraq Rusiyanı, KTMT-ni, ATƏT-in Minsk Qrupunun həmsədrlərini köməyə çağırır, Azərbaycan tərəfindən təxribat törədildiyini iddia edir. Ancaq belə üsullar artıq köhnəlib və dünyada Ermənistanı ciddi qəbul etmirlər: “Əgər Ermənistan belə təxribat və terror fəaliyyətlərinə davam edərsə, İkinci Qarabağ müharibəsindən daha ağır məğlubiyyətə hazır olmalıdır. Əks halda "Dəmir Yumruq" yenə başlarını əzəcəkdir”.

Bəli, zaman və müddət heç nəyi dəyişməyib. Quldur Paşinyanın quldur siyasəti dəyişməyib. Və Ermənistan təxribatlar törətməklə qəsdən vəziyyəti gərginləşdirir, sülh və əməkdaşlıq tərəfdarı olmadığını göstərir. Və əgər Ermənistan və havadarları Azərbaycana qarşı təxribatları davam etdirərlərsə, başlarında növbəti “Dəmir yumruğu” görə bilərlər.

RƏFİQƏ HÜSEYNOVA

Səs.- 2021.- 24 noyabr. S. 8-9.