Zəfər tarixini yazan qalib lider !

Ölkə rəhbərlərinin liderlik keyfiyyətləri adətən onların uğurlu siyasəti, uzaqgörənliyi, müdrikliyi, təkcə hərb meydanında deyil, həmçinin diplomatik müstəvidə də qələbələri ilə xarakterizə olunur. Bu baxımdan, sözün həqiqi mənasında, Azərbaycan şanslı ölkədir ki, cənab Ali Baş Komandan, Prezident İlham Əliyev kimi yüksək liderlik keyfiyyətlərinə sahib, hər zaman qalib olan rəhbəri var.

Dünya mətbuatında cənab Prezidentin müsahibələrinin, daha dəqiq desək, informasiya cəbhəsində də qələbələrinin təkcə vətəndaşlarımız deyil, bütün dünya ictimaiyyəti şahididir. İstər müharibədən əvvəlki dönəmdə, istər ikinci Qarabağ müharibəsi dönəmində, istərsə də müharibədən sonrkı dövrdə cənab Ali Baş Komandanın dünya mətbuatına müsahibələri hər bir Azərbaycan vətəndaşında qürur hissi doğurur. Çünki bu müsahibələrin hər birində ölkə başçısı milli maraqlardan, dövlət maraqlarından, xalqın mənafeyindən çıxış edərək, Azərbaycan həqiqətlərini, haqlı, ədalətli mövqeyimizi bütün dünyaya məharətlə bəyan edib və bunu hər kəs etiraf edir.

Bir neçə gün öncə Rusiyanın “Nasionalnaya oborona” jurnalına cənab Prezidentin müsahibəsi zamanı bir sıra məqamlar diqqətdən heç cür yayına bilməzdi. Belə ki, ölkə rəhbərinə sual ünvanlanarkən, ilk öncə onun nə dərəcədə sakit, təmkinli və eyni zamanda, inamlı olmağını hamının gördüyü vurğulanır. Həmçinin dövlət rəhbərimizin qətiyyəti, inamı və təmkinliyi, ədalətli olması etiraf edilir. Bütün bunlar, bu fikirlər Azərbaycan Prezidentinə, Ali Baş Komandana inamın, verilən yüksək qiymətin təzahürü idi və suallardan da görünür ki, mübarizəmizdə haqlı olduğumuz artıq beynəlxalq ictimaiyyət, ələlxüsus Rusiya cəmiyyəti tərəfindən ilk əvvəldən də qəbul edilirdi, elə indi də qəbul edilir və bu məsələdə ölkə başçısının, onun informasiya savaşında, diplomatik müstəvidə qələbələri ilə birbaşa əlaqədardır.

“Müharibənin informasiya tərkib hissəsi hərbi tərkib hissədən heç də az əhəmiyyət kəsb etmir. Biz erməni təbliğat maşınının necə işlədiyini, Azərbaycanın necə cavab verdiyini görürdük. “Rossiya” telekanalının “60 dəqiqə” proqramının efirə çıxdığı gün Siz də çıxış etdiniz, Paşinyan da, lakin Sizin çıxışınız siyasi zəfər, informasiya savaşında zəfər idi və bunu çoxları gördü, şahidi oldu ki, Siz öz mövqeyinizi son dərəcə sərrast, sakit, polad məntiqlə şərh etdiniz. Həm Azərbaycan, həm də cənab Prezident, şəxsən Siz müasir diplomatiya nümunələri, bəlkə də müasir diplomatiya tarixinə düşəcək nümunələr göstərdiniz”, deyə açıq-şəkildə etiraf edilir.

“Mən bütün müraciətlərə cavab verməyə razılaşırdım, çünki vəziyyət barədə həqiqəti – nələr baş verdiyini, münaqişənin səbəblərinin nədən ibarət olduğunu, kimin işğalçı və kimin işğal qurbanı olduğu barədə həqiqəti mümkün qədər çox ölkənin ictimaiyyətinin diqqətinə çatdırmağı vacib hesab edirdim”, deməklə cənab Prezident yenə də haqlı mübarizə apardığımızı xatırlatdı və bir daha ədalətin bərpası uğrunda mücadilə edildiyinə əminliyini ifadə etdi.

“Bizim həqiqəti çatdırmağımız, əlbəttə, çox çətin idi, çünki bizim media resurslarımız ermənilərin müvafiq resursları ilə müqayisə edilə bilməzdi. Münaqişə medianın diqqətini cəlb etdi və mən nələr baş verməsi barədə həqiqəti çatdırmaq üçün bu imkandan istifadə etdim”, deyən Ali Baş Komandanın yenə də həqiqətlərin, Azərbaycan həqiqətlərinin, Azərbaycanın haqlı olduğunun dünyaya çatdırılmasını müqəddəs vəzifə saydığı öz isbatını tapır.

“44 günlük müharibə bu gün dünyanın aparıcı ölkələrinin baş qərargahlarında öyrənilir. Dünya səviyyəli hərbi ekspertlərin çoxu onu, ilk növbədə, dronlar müharibəsi adlandırırlar. Bu, XXI əsrin müharibəsi idi, bu münaqişəyə qədər istər Amerika Birləşmiş Ştatlarının, istərsə də hətta İsrailin bu cür yüksək texnoloji, uğurlu, səmərəli müharibə təcrübəsi yox idi”, deyə müsahibə zamanı cənab Prezidentə müraciət olunması Rusiya ictimai fikrinin nədən ibarət olduğunu, ölkə başçısının, Ali Baş Komandanın rəhbərliyi ilə Azərbaycanın apardığı müharibənin dünya təcrübəsində bir ilk olduğunu, bəyənildiyini göstərir. Onu göstərir ki, dünyanın aparıcı ölkələrinin baş qərargahlarında Azərbaycan nümunəsi, təcrübəsi öyrənilir və bundan bütün dünya da xəbərdardır. Bütün bunlar isə ölkəmizin qüdrəti, şəxsən Prezident İlham Əliyevin Ali Baş Komandan, qətiyyətli, səriştəli sərkərdə kimi layiqli rəhbər olduğu barədə etiraflardır.

Suallardan da aydın görünür ki, əks-hücum əməliyyatının aparılması zamanı qarşıya qoyulan vəzifələrdən biri də dinc əhali arasında itkiləri minimallaşdırmaq, istisna etmək olduğu qəbul edilir, buna inanılır və müharibəni beynəlxalq hüquq, müvafiq konvensiyalar, əlbəttə, məhz hərbi hədəflərin məhv edilməsi əsasında aparmaq vəzifəsinin qarşıya qoyulduğu da təkzib edilmir. Həmçinin müharibədən sonra işğaldan azad edilmiş ərazilərdə quruculuq, abadlıq işlərinin görülməsi, infrastrukturun bərpa edilməsi, Füzulidə beynəlxalq aeroportun tikilməsi, özü də görülən bu işlərin sürətinə heyrət hissi belə gizlədilmir. Azərbaycanın Cənubi Qafqazda sülhün, təhlükəsizliyin təminatçısı olduğu da birmənalı şəkildə qəbul edildiyi dilə gətirilir. Mədəni, tarixi abidələrin, mədəni irsin, memarlıq incilərinin bərpasına xüsusilə diqqət yetirildiyi də, suallardan aydın olur. Hətta ən sonda, “Siz Azərbaycanın rəhbəri kimi siyasət səmasında ən parlaq ulduz sayılan siyasi xadimsiniz”, deməklə, Ali Baş Komandanın böyük siyasi xadim olduğuna inam açıq-aşkar bildirilir və bu da göstərir ki, Azərbaycanın dövlət başçısı, onun fəaliyyəti təkcə ölkə daxilində deyil, ölkə hüdudlarından kənarda, bütün dünyada yüksək qiymətləndirilir.

Cənab Prezidentin Anadolu Agentliyinə müsahibəsi zamanı isə görürük ki, bu müharibə olmadan, itkilər verilmədən, yəni ATƏT-in Minsk Qrupunun həmsədrlərinin münaqişəyə zamanında ədalətli, düzgün yanaşması, işğal edən tərəfi, Ermənistanı sanksiyalarla doğru istiqamətdə addım atmağa, işğal etdiyi torpaqları müharibə olmadan geri qaytarmağa vadar etməyin mümkünlüyü barədə suallar verilir və əslində, suallardan da görünür ki, bunun bir həqiqət olduğu qəbul edilir. Cənab Prezident də öz növbəsində təsdiq edir ki, həqiqətən də ATƏT-in Minsk Qrupu torpaqların işğalda saxlanıldığı 30 il ərzində ikili standartlarla deyil, Ermənistanın tərəfini tutmaq, bu münaqişənin uzanmasına çalışmaqla deyil, ədalətli həllinə səy göstərməklə müharibə olmadan, itkilər verilmədən münaqişə həll oluna, ermənilər işğal altında saxladıqları torpaqları tərk edə, məsələ də bununla bitə bilərdi. Amma əfsuslar olsun ki, həqiqətən də, ATƏT-in Minsk Qrupu az qala 30 il ərzində bu münaqişəyə dırnaqarası yanaşdı, həmsədrlər daim ermənilərə tərəfkeşlik etdi, münaqişənin uzanmasına şərait yaratdılar, əslində, məsələnin həlli ilə bağlı səy belə göstərmədilər, baxmayaraq ki, indi atılıb ortaya düşüb bölgədə Azərbaycanın öz gücünə yaratdığı stabilliyi, sakitliyi pozmağa çalışırlar. Bəli, cənab Prezident də onlara kifayət qədər mesajlar verdi və bildirdi ki, heç kim, heç bir həmsədr bölgədəki vəziyyəti dəyişmək iqtidarında deyil, buna imkan da verilməyəcək.

Əslində, bütün müsahibələrində olduğu kim,i bu müsahibəsində də Ali Baş Komandan, cənab Prezident Azərbaycanın bu ədalətli mövqeyindən geri çəkilməyəcək qətiyyətli mövqeyini nəinki Minsk Qrupu həmsədrlərinə, eləcə də bütün dünyaya, ələlxüsus, Ermənistana və onun bütün havadarlarına bəyan elədi. Bu da sözsüz ki, informasiya savaşında da qələbə deməkdir və təsdiq edir ki, ölkə başçısı həqiqətən uzaqgörən, müdrik, bacarıqlı siyasətçi, qətiyyətli rəhbər, dünyəvi liderdir, zəfər tarixini yazan qalib lider.

Son günlər Azərbaycan Respublikasının Prezidenti cənab İlham Əliyevin digər bir müsahibəsi, Fransaya məxsus olan ”France-24” kanalına verdiyi müsahibəsi də beynəlxalq ictimaiyyətin diqqətini cəlb etməyə bilməzdi. Daha dəqiq desək, Fransaya məxsus mətbuat səhifəsinin provokativ suallarına ölkə başçısnın qətiyyətli, məntiqi, doğru, dürüst, səlis, tutarlı, arqumentlərlə dolu cavabı və yenə də ədalətli mövqeyi Ali Baş Komandanın bu dafə də işğalçı tərəf, onların havadarları üzərində diplomatik qələbəsi, informasiya cəbhəsində qalibiyyəti idi.

Fransaya məxsus olan kanalın ölkə başçısına ünvanladığı sualların belə qərəzli olduğu dərhal hiss olunurdu. Məsələn, dövlət başçımızım, “Əgər biz erməni faşizminin bir daha baş qaldırdığını görsək, yeni təhlükə görsək, heç bir tərəddüd etmədən erməni faşizmini yenidən əzəcəyik”, sözlərinə istinadə edərək, “bu, sülh mesajı kimi səslənmir, elə deyilmi?”, sualının ünvanlaması da təsdiq edir ki, Fransaya məxsus olan ”France-24” kanalı da təmsil etdiyi dövlətin ermənilərə tərəf olan nümayəndələri, erməni icmasının təsirinə məruz qalanların haqsız olan mövqelərini müdafiə etməsi, yenə də qərəzin bir nümunəsi kimi xarakterizə edilə bilər. Amma, cənab Prezident bu ölkənin mətbuat səhifəsinə də çox tutarlı cavablar verərək, onlara da həqiqətin kimin tərəfində olduğunu, bizim mücadiləmizin haqlı, ədalətli mücadilə, mübarizə olduğunu bir daha xatırladıb. Hətta Ali Baş Komandan Fransanın ikinci Qarabağ müharibəsi dönəmində, müharibə bitdikdən sonra da ədalətsiz yanaşması və mövqeyi barədə də xatırlatmalar edib.

Göründüyü kimi, ölkə başçısına, “Sizin bəyanatlarınız olub ki, Ermənistanın paytaxtı İrəvan qədim Azərbaycan torpağıdır və Ermənistanın özünün hesab etdiyi ərazilərlə bağlı hər hansı iddianız varmı”, sualı özü də təxribatçı sual idi və bir növ Azərbaycanı da ərazi iddiaları olan ölkəyə, Ermənistana tay tutmaq, bərabər etmək niyyəti güdülürdü. Amma, Ali Baş Komandan çox qətiyyətli və məntiqi şəkildə başa saldı ki, bizim ərazi iddiamız yoxdur və 101 il bundan əvvəl, düz 1920-ci ildə sovet hakimiyyətinin Zəngəzuru Azərbaycandan qopararaq Ermənistana birləşdirilməsi ilə bağlı qərar qəbul edibsə də, bu nə həmin ərazilərin Ermənistana məxsus olması deməkdir, nə də o torpaqlara getmək istəyimiz, niyyətimiz ərazi iddiası demək deyil.

Digər tərəfdən ”France-24” kanalı Qarabağa muxtariyyət verilib-verilməyəcəyi barədə soruşmaqla da yenə öz mövqeyini, Ermənistana tərəf olduğunu büruzə verir. Məsələnin, münaqişənin öz həllini tapması barədə cənab Prezidentin fikirlərini xatırladan sözügedən kanal illər ərzində bu münaqişəyə vasitəçilik edən bir sıra ölkələrin, məsələnin həll edilmədiyi qənaətində olduğunu xatırlatması özü də Fransanın, onun ”France-24” telekanalının mövqeyini ifşa etmiş oldu. Lakin cənab İlham Əliyev bu yanaşmaya da tutarlı cavab verməyi bacardı və hətta “Öz ərazilərində erməniləri yerləşdirmək və öz ərazilərində ikinci Ermənistan dövləti yaratmaq üzərində düşünsünlər”, deyərək çox məntiqi tövsiyələr də ünvanladı.

Müsahibə əsnasında ölkə başçısı ümumilikdə Fransa barəsində elə həmin ölkənin ”France-24” kanalına cəsarətlə öz iradlarını bildirdi. “Bizim Fransa ilə Ermənistanın tarixi əlaqələrindən, Fransada fəal erməni icmasının olmasından və onların qərar qəbul edən şəxslərə mümkün təsirindən xəbərimiz var. Ancaq səmimi desəm, müharibə zamanı Fransa özünü dürüst vasitəçi kimi aparmadı. Fransa tərəf seçdi - Ermənistanın tərəfini”, deyən cənab Prezident çox qəti şəkildə ümumilikdə Fransanın ədalətsiz yanaşmasına diplomatik tərzdə etirazını bildirdi.

Ümumiyyətlə, Prezidentimizin hər dəfəki müsahibəsində milli, mənəvi dəyərlərimiz, xalqımızın haqlı mənafelərinin müdafiəsi, dövlətimizin mövqeyinin qorunması öz əksini tapır və ön planda durur. Bu isə sözün əsl mənasında məhz Ali Baş Komandana, prezidentə, siyasi xadimə xas olan ən böyük liderlik keyfiyyətləridir.

Dünyanın bir çox mətbuat səhifələrinə cənab Prezidentin müsahibələri zamanı aydın şəkildə bəlli olar ki, Azərbaycan Prezidentini dünya ictimaiyyəti qətiyyətli, uzaqgörən, müdrik, liderlik keyfiyyətlərinə malik ölkə rəhbəri olaraq tanıyır. Eyni zamanda, dünyanın tanınmış mətbuat səhifələrinin Azərbaycan Prezidentindən müsahibə almaq istəyi, marağı isə öz növbəsində Ali Baş Komandana, onun liderlik keyfiyyətlərinə verilən böyük qiymətin, ona olan inamın təzahürüdür. Bu, yəni dünyada ən tanınmış mətbuat səhifələrinin bir-birinin ardınca müsahibə götürməsi həm də ondan xəbər verir, eləcə də təsdiq edir ki, ölkə başçısının, Azərbaycan Prezidentinin qələbə, zəfər tarixini yazan qalib lider olduğu hər kəsə bəllidir.

İnam Hacıyev

Səs.- 2021.- 2 oktyabr.- S.2.