Vasim Məmmədəliyev: “Muğama həvəsin artması efirdəki bayağı “şou”ları sıxışdıracaq”

Akademik Vasim Məmmədəliyevin SİA-ya müsahibəsini oxuculara çatdırırıq

- Vasim müəllim, Bakıda keçirilən Beynəlxalq Muğam Festivalı sizdə hansı təəssüratlar yaratdı?

- İştirakçısı olduğumuz muğam simpoziumu, Beynəlxalq Mügam Festivalı və Bakının mədəniyyət paytaxtı elan olunması çox böyük hadisələrdir. Mən bütün görülən işlərdə Azərbaycanın birinci xanımı Mehriban Əliyevanın əməyini xüsusi qeyd etmək istəyirəm. Onun böyuk əməyi sayəsində mötəbər konfranslar keçirildi. Mən böyük qürur hissi keçirirəm ki, məhz Azərbaycanda bir il ərzində bu qədər böyük və önəmli mədəniyyət tədbirləri keçirilir.

- Azərbaycanda muğamın inkişafı başqa ölkələrlə nisbətdə nə ilə fərqlənir?

- Bu gün Azərbaycan həqiqətən muğamın mərkəzidir. Bizim muğamımız başqa olkələrdəki muğamlardan dərinliyi, rəngarəgliyi, heyrətamiz ifa baxımı ilə fərqlənir. Elə buna görə də qalib seçildik. Bu gün Azərbaycan muğamına göstərilən qayğı dünyanın heç bir yerində yoxdur. Bu gün muğama daha da artan məhəbbət ölkə başçımız İlham Əliyevin düzgün siyasətinin bir nümunəsidir.

- Vasim müəllim, muğam simpoziumlarında iştirak edən əcnəbi qonaqlar bizim musiqilər barədə nə düşünürlər?

- Mən hesab edirəm ki, xarici qonaqlar bizim musiqiyə valeh olublar. Onlar dəfələrlə bu fikirləri etiraf edirlər. Onlar belə möhtəşəm konfransa çağrılıblar və böyük həvəslə iştirak ediblər. Dünyanın müxtəlif ölkələrinin görkəmli musiqiçilərinin, nəzəriyyəçilərinin çıxış etməsi konfransların elmi sanbalını çox artırdı. Həmçinin, Azərbaycanın dəyərli musiqişünasları, alimləri, muğam sənəti ilə məşğul olan elm adamları gözəl məruzələrlə çıxış etdilər. Ümumiyyətlə, simpoziumda 70-dən çox məruzə oxundu.

- Muğam sənətinin populyarlaşması sizcə efirlərdə tüğyan edən şou proqramlara öz təsirini göstərəcək?

- Hesab edirəm ki, şou verlişlərdən tamaşaçılar cana doyublar. Şouların baş alıb getdiyi bir zamanda muğama məhəbbətin artması, muğamın populyarlaşması əlbəttə ki, efirlərə də öz müsbət təsirini göstərəcək. Samballı musiqinin təbliğatı artdıqca tamaşaçıların zövqü, dünyagörüşü də artacaq. Şoular insanlarda zövqsüzlük yaradıb. Azərbaycan muğamını eşitməyən, sevməyən insanda vətənə məhəbbət də ola bilməz. Belə möhtəşəm festivalların təşkil olunması Azərbaycanın necə qədim, böyük sənətə malik bir ölkə, xalq olduğunu sübut edir. Sözügedən şoular moda xarekterlidir. Müvəqqəti və keçicidir. Güman edirəm ki, bütün səviyyəsiz verlişlər sona çatacaq.

- Bəs İslam dini musiqini necə qəbul edir?

- “Quran” yaxşı musiqini heç vaxt qadağan eləmir. “Quran” özü muğamlar üstündə oxunur. Hümayun, şur kimi muğamlar üstündə oxunursa bu özü muğamın ilahi bir musiqi olduğuna nümunədir. “Quran” özu buyurur : “Quranın” min sirri var. Onun birinci sirri gözəl səsdir”. Başqa bir hədisdə isə buyurulur: “Hər şeyin bir bəzəyi var. Quranın bəzəyi gözəl səsdir”. Hətta peyğəmbərimiz buyurur ki, “Quran”ı gözəl səslərlə bəzəyin. İslam bayağı musiqini sevmir. Məncə azan ən gözəl musiqidir, bu musiqi insanda ilahi hisslər oyadır. Muğam da insanı saflığa, ilahiyyətə çağırır.

Jalə

Səs.- 2009.- 2 aprel.- S. 10.