Hər bir cəmiyyətdə qadın aparıcı qüvvədir

Yeni Azərbaycan Partiyası Səbail rayon təşkilatı Qadınlar Məclisinin keçirdiyi konfransda bu fikir dönə-dönə vurğulandı

Dünən Yeni Azərbaycan Partiyası Səbail rayon təşkilatı qadınlar Məclisinin konfransı keçirildi. Öncə YAP İdarə heyətinin üzvü, Səbail rayon təşkilatının sədri Zahid Qaralov  konfrans iştirakçılarını salamlayaraq, onlara bu siyasi yolda uğurlar arzuladı.

Z.Qaralov YAP  rayon təşkilatının və qadınlar şurasının rayonda gedən ictimai-siyasi proseslərdə yaxından iştirak etdiklərini, bu işdə xanımlarımızın daha aktiv və fəal olduğunu diqqətə çatdırdı: “Qadınlarımız istər 15 oktyabr prezident seçkilərində, istərsə də Konstitusiyamıza əlavə və dəyişikliklərlə bağlı martın 18-də keçirilən referendumda çox fəallıq nümayiş etdirdilər. Ulu öndər Heydər Əliyevin layiqli davamçısı Prezident İlham Əliyevin siyasi fəaliyyətində Ona dəstək olduğunuz üçün fürsətdən istifadə edib rayon təşkilatının sədri kimi hər birinizə dərin təşəkkürümü bildirirəm və respublikamızın, o cümlədən də, rayonumuzun ictimai-siyasi həyatında  bundan sonrakı işlərinizdə də uğurlar arzulayıram”.

Z.Qaralov onu da qeyd etdi ki, Səbail rayonu geniş, güclü potensiala malikdir və burada çox işgüzar, qabiliyyətli qadınlarımız yaşayır: “Hər bir cəmiyyətdə qadının rolu önəmlidir. Bu baxımdan, Yeni Azərbaycan Partiyasında qadınların kifayət qədər təmsil olunması təqdirəlayiqdir.”

YAP Səbail rayon təşkilatını sədrinin müavini Afət Xanbabayeva konfransın gündəliyində duran iki məsələ - Qadınlar Məclisinin hesabatı və YAP Respublika Qadınlar Şurasının Konfransına nümayəndələrin seçilməsi barədə tədbir iştirakçılarına məlumat verdi.

YAP Səbail rayon təşkilatı Qadınlar Məclisinin sədri, professor Nübar Muxtarova hesabat məruzəsi ilə çıxış etdi. O, dövlətimiz tərəfindən qadınlara göstərilən diqqət və qayğıdan danışdı, dövlətin idarə olunmasında, ictimai-siyasi proseslərin həyata keçirilməsində onların böyük rolu olduğunu vurğuladı: “Qadınlarımız rayonumuzda keçirilən bütün mədəni, kütləvi, ictimai tədbirlərdə yaxından iştirak etmiş, öz bilik və bacarıqlarını, əsirgəməmişlər. Keçirilən seçkilərdə rayon qadınlarının dairə, məntəqə seçki komissiyalarında fəal iştirakı təmin olunmuş, bu işdə də onlar öz vəzifələrinin öhdəsindən layiqincə gəlmişlər. Bundan sonra da YAP Səbail rayon təşkilatının 13 min 800 üzvü, o cümlədən, Qadınlar Məclisinin 113 nəfər üzvləri bu kimi mühüm aksiyalarda iştirak edib və edəcək. Qadınlarımız müstəqil ölkəmizin işıqlı gələcəyi uğrunda əllərindən gələni əsirgəməyəcəklər”.

Məruzə ətrafında çıxış edən partiya fəalları qadınlarımızın ictimai-siyasi fəallığından, cəmiyyətimizdə onların artan rolundan geniş bəhs etdilər. Bildirdilər ki, həm dövlət siyasətinin müəyyən edilməsində, həm də idarəçilikdə onların təmsilçiliyi gündən-günə artır. Bu da dövlətimizin və onun başçısının qadınlara olan qayğısının təzahürüdür.

N.Muxtarova yenidən YAP Səbail rayon təşkilatı Qadınlar Məclisinin sədri seçildi.

Həmçinin, tədbirdə YAP Qadınlar Şurasının konfransında iştirak etmək üçün 21 nəfrdən ibarət nümayəndələr seçildi.  

Sonda konfrans iştirakçıları adından ölkə Prezidenti, Yeni Azərbaycan Partiyasının Sədri İlham Əliyev cənablarına  müraciət qəbul olundu.

RƏFİQƏ KAMALQIZI

Səs.- 2009.- 10 aprel.- S. 10.