Azərbaycanla İsveçrə arasındakı əlaqələr yüksək səviyyədədir

Prezident İlham Əliyev İsveçrənin iqtisadi məsələlər üzrə Dövlət Katibi Jan-Daniel Gerberi qəbul edib

Prezident İlham Əliyev aprelin 16-da İsveçrənin iqtisadi məsələləri üzrə dövlət katibi, hökumətlərarası iqtisadi komissiyanın həmsədri Jan-Daniel Gerberi qəbul edib. Jan-Daniel Gerber Dünya Bankının Azərbaycan üzrə nümayəndəsi olarkən ölkəmizdə bir neçə dəfə səfərdə olduğunu bildirdi, xalqımızın ümummilli lideri Heydər Əliyevlə görüşlərini ehtiramla xatırladı. O, ötən dövr ərzində Azərbaycanda çox böyük iqtisadi inkişaf proseslərinin getdiyini və əldə olunan bütün bu nailiyyətləri ümummilli lider Heydər Əliyevin və Prezident İlham Əliyevin misilsiz xidmətlərinin nəticəsi kimi dəyərləndirdi.

Dövlətimizin başçısı Azərbaycanla İsveçrə arasında ikitərəfli münasibətlərin yüksək səviyyədə olduğunu bildirdi. Prezident İlham Əliyev ölkəmizin beynəlxalq maliyyə qurumları ilə, o cümlədən Dünya Bankı ilə də səmərəli əməkdaşlıq etdiyini vurğuladı. Dövlətimizin başçısı əminliklə qeyd etdi ki, Jan-Daniel Gerberin ölkəmizə bu səfəri Azərbaycan-İsveçrə münasibətlərinin daha da genişlənməsinə öz töhfəsini verəcək.

MƏTLƏB

Səs.- 2009.- 17 aprel.- S. 2.