Azərbaycanı tarazlı inkişafa aparan Dövlət Proqramı

Azərbaycan regionlarının 2009-2013-cü illərdə sosial-iqtisadi inkişafı ilə bağlı Dövlət Proqramı ölkənin kompleks inkişafını təmin edəcək

Xəbər verdiyimiz kimi, aprelin 14-də Azərbaycan Prezidenti İlham Əliyev “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın təsdiq edilməsi haqqında fərman imzalayıb. Sənəddə göstərilir ki, regionların sosial-iqtisadi inkişafı ilə bağlı qəbul edilmiş sənədlərdə nəzərdə tutulmuş tədbirlərin uğurlu icrası ölkənin sosial-iqtisadi inkişafında keyfiyyətcə yeni mərhələnin başlanğıcını qoyub, qeyri-neft sektorunun davamlı inkişafına, yeni iş yerlərinin və müəssisələrin yaradılmasına, regionlarda kommunal, xidmət və sosial infrastruktur təminatının həcminin və keyfiyyətinin yüksəlməsinə təkan verib, sahibkarlıq mühitinin daha da yaxşılaşmasında, iqtisadiyyata investisiya qoyuluşlarının artmasında, əhalinin məşğulluq səviyyəsinin yüksəlməsində və yoxsulluğun azalmasında mühüm rol oynayıb.

Ölkədə iqtisadiyyatın diversifikasiyasına və onun dünya təsərrüfat sisteminə səmərəli inteqrasiyasına, infrastruktur və kommunal xidmətlərin səviyyəsinin daha da yaxşılaşdırılmasına, əhalinin həyat səviyyəsinin davamlı olaraq yüksəldilməsinə nail olmaq məqsədilə regionlarının 2009 - 2013-cü illərdə sosial-iqtisadi inkişafı Dövlət Proqramı təsdiq edilib.

Azərbaycan Respublikası regionlarının sosial-iqtisadi inkişafına dair Dövlət Proqramı (2004-2008) uğurla icra edildi. Ölkə başçısının prezidentliyinin birinci müddətində dövlətimizin nail olduğu iqtisadi uğurlarda bu Dövlət Proqramının əvəzsiz rolu oldu. Proqramın icrası nəticəsində Azərbaycanın bütün iqtisadi potensialı tam hərəkətə gətirildi, dinamik sosial-iqtisadi inkişaf təmin edildi. Azərbaycan sənaye istehsalının və ümumdaxili məhsulun artım tempinə, o cümlədən, yaradılan əlverişli biznes mühitinə görə dünyanın lider dövləti kimi möhkəmləndi.

Qeyd edək ki, ötən 5 ildə həyata keçirilmiş bu tipli proqramlar nəticəsində ölkədə 27,5 mindən çox yeni müəssisə yaradılıb, 547,5 min daimi yeni iş yeri açılıb, yoxsulluğun səviyyəsi 13,2 faizədək azaldılıb. Bu müddətdə ümumi daxili məhsulun real həcmi 2,6 dəfə, qeyri-neft sektorunda məhsul istehsalı 1,8 dəfə artıb, iqtisadiyyatın bütün sahələrində dinamik artım müşahidə edilib, o cümlədən, sənaye istehsalı 2,5 dəfə, kənd təsərrüfatının ümumi məhsulu 25,2 faiz, əhalinin gəlirləri 4 dəfə artıb.

“Azərbaycanın uzunmüddətli, dayanıqlı inkişafı təmin ediləcək, neft-qaz amilindən asılılıq daha da aşağı düşəcək. Beləliklə, ölkə öz inkişafını uğurla davam etdirəcək və Azərbaycan xalqı, Azərbaycan vətəndaşları bundan sonra da ildən-ilə daha da yaxşı yaşayacaqlar.” Prezident İlham Əliyev bildirir ki, məhz bu, 2004-cü ilin əvvəlində qarşıya qoyulan ən vacib məqsədlərdən biri idi.

Regionların sosial-iqtisadi inkişafına dair Dövlət Proqramının qəbulu ilə regional inkişaf iqtisadi siyasətin əsas hədəfinə çevrilmiş, dövlət büdcəsindən maliyyələşdirilən proqramlarda regionların xüsusi çəkisi ildən-ilə artmışdır. Regionlarda güclü insan potensialının olduğunu önə çəkən dövlət başçısı İlham Əliyev Azərbaycanın gələcək inkişafının bölgələrin tərəqqisindən asılı olduğunu bildirdi, burada iqtisadi potensialın da yaradılacağını diqqətə çatdırdı.

Dövlət başçısı İlham Əliyev “Azərbaycan Respublikası regionlarının sosial-iqtisadi inkişafı (2004 - 2008-ci illər) Dövlət Proqramı”nın icrasının yekunlarına həsr olunmuş konfransda bir daha proqramın nə qədər əhəmiyyətli olduğunu statistik rəqəmlərlə diqqətə çatdırdı. Bu fikir xüsusi qeyd olundu ki, biz Azərbaycanda güclü sosial siyasət aparmağa çalışırıq, aztəminatlı ailələr dövlət tərəfindən dəstəklənməli, onlara verilən müavinət ildən-ilə artmalı və artacaq da.
Son 5 ildə iqtisadiyyat 2,6 dəfə artıb, adambaşına düşən gəlir 5500 dol-a çatıb. Sənaye istehsalı 3,7 dəfə artmış, sənayeləşmə prosesi geniş vüsət alıb. Bunun nəticəsində 766 min yeni iş yeri açılıb ki, bunların da 547 mini daimidir. Yoxsulluğun səviyyəsi 49 faizdən 13,2 faizə enib. Uğurlu neft strategiyası və iqtisadi islahatlar nəticəsində büdcə xərcləri 12 dəfədən çox artıb. Valyuta ehtiyatı 18 mlrd dol-dan artıqdır.

Prezident İlham Əliyevin qeyd etdiyi kimi, iqtisadi göstəricilər təkcə rəqəmlərdə deyil, insanların gündəlik həyatında da özünü göstərir. Son 5 ildə minimum əməkhaqqı 8,3 dəfə, minimum pensiya təxminən 4 dəfə artıb. Minlərlə ailənin ünvanlı sosial yardım alması güclü sosial siyasətin həyata keçirildiyini, iqtisadi imkanların aztəminatlı təbəqənin yaşayışının yaxşılaşdırılmasına yönəldildiyini təsdiqləyən əsas amillərdəndir.

Prezident İlham Əliyev minimum əməkhaqlarının ildə ən azı 2 dəfə artırılmasını qarşıya ən ümdə məqsədlərdən biri kimi qoyub. Bu onunla əsaslandırılır ki, ölkəmiz böyük iqtisadi potensiala malikdir. Zəngin təbii resurslardan səmərəli istifadə ölkəmizin iqtisadi qüdrətinin gündən-günə artmasına mühüm zəmin yaradır ki, bu da, ilk növbədə, maliyyə imkanlarının genişlənməsinə və uğurlu sosial siyasətin həyata keçirilməsinə öz müsbət təsirini göstərir.

Bu gün Azərbaycan ümummilli lideri Heydər Əliyevin müəllifi olduğu neft strategiyasının uğurlarını yaşayır. Böyük neft-qaz layihələrinin əsas iştirakçısı və təşəbbüsçüsü olan ölkəmiz hazırda dünyada iqtisadiyyatı sürətlə inkişaf edən dövlət kimi tanınmaqla yanaşı, əsil söz sahibinə çevrilib. Beynəlxalq maliyyə qurumları mütəmadi olaraq açıqladıqları hesabatlarında Azərbaycanın ÜDM istehsalının həcminə görə dünyada öncül yerdə dayanmasını, düzgün qurulan iqtisadi siyasət, neft və qaz istehsalının ildən-ilə artması ilə əlaqələndirirlər.

Dövlət başçısı çıxışlarında bu fikri hər zaman bildirir ki, neft-qaz amili bu gün və gələcəkdə ölkəmizin inkişafı üçün öz müsbət rolunu oynayacaq. Amma əsas vəzifə iqtisadiyyatın inkişafının neft amilindən asılılığını azaltmaq, qeyri-neft sektorunun inkişafını sürətləndirməkdir. Bunun üçün neft gəlirlərindən səmərəli istifadənin vacibliyi önə çəkilir. Dövlət Neft Fondunda toplanan vəsaitlərin böyük əksəriyyəti qeyri-neft sektorunun inkişafına yönəldilir.

“Azərbaycan xalqı daha yaxşı yaşamalıdır” deyən dövlət başçısı bunun üçün iqtisadi imkanların mövcudluğunu diqqətə çatdırır. Minimum əməkhaqqının və pensiyaların artırılmasının artıq ənənəyə çevrildiyini xüsusi vurğulayan Prezident İlham Əliyev insanların daha yaxşı yaşaması və öz tələbatlarını yüksək səviyyədə ödəmələri üçün bu addımların davamlı olacağını qeyd edir.

2007-ci ilin sonuna qədər dövlət başçısı aidiyyatı qurumların qarşısında bir dənə də olsun çadır şəhərciyinin qalmayacağı tapşırığını qoymuşdu. Bu məsələ öz müsbət həllini tapdı. Öz doğma yurd-yuvalarından didərgin düşmüş soydaşlarımız üçün yaşayış binaları tikilərək onların istifadəsinə verilir.

Təbii ki, bütün bunların həlli üçün xeyli məbləğdə vəsait sərf olunur. Dövlət Neft Fondunda toplanan vəsaitlərin böyük qismi, məhz yurd-yuvalarından didərgin düşmüş soydaşlarımızın sosial problemlərinin həllinə yönəldilir. Bu reallığı beynəlxalq maliyyə qurumlarının təmsilçiləri də etiraf edirlər ki, bu gün Azərbaycan Dağlıq Qarabağ problemini yaşamasaydı, iqtisadi qüdrəti indikindən qat-qat yüksək olardı.

Baxmayaraq ki, ölkəmiz müharibə şəratindədir, uğurlu daxili və xarici siyasəti ilə iqtisadiyyatını sürətlə inkişaf etdirdi, beynəlxalq aləmdə dinamik iqtisadi tərəqqiyə malik ölkə kimi tanındı və qəbul olundu.

Dövlət başçısı bu diqqət və qayğını bütün dövlət məmurlarının qarşısında əsas vəzifə kimi qoyur. “Biz, ilk növbədə, xalq üçün yaşamalıyıq. Onların qayğıları ilə maraqlanmalı, həlli istiqamətində səylər göstərməliyik.”

Son 10 ildə ölkə iqtisadiyyatına 42 mlrd dol investisiya qoyulub ki, bunun da 30 mlrd-dan çoxu son beş ilin payına düşür. Onu da qeyd edək ki, daxili investisiyaların da həcmi artıb. Prezident İlham Əliyevin qeyd etdiyi kimi yaxın gələcəkdə ölkədə işçi qüvvəsi qıtlığı yaranacaq.

2009-2013-cü illəri əhatə edəcək yeni Dövlət Proqramında vətəndaşlarımızı narahat edən bütün məsələlər, o cümlədən, hər bir kəndin problemləri öz əksini tapıb. Proqramın məqsədi ondan ibarətdir ki, növbəti 5 il ərzində regionların bütün sosial, iqtisadi, infrastruktur problemləri həll edilsin.

Son 5 ildə verilən vədlərin həyatda öz əksini tapması iqtidara xalqın etimadını daha da artırır. Bu gün hər bir ölkə vətəndaşı Dövlət Proqramının real nəticələrini öz gündəlik həyatında hiss edir. Növbəti 5 il üçün nəzərdə tutulan Dövlət Proqramında əksini tapan vəzifələrin uğurla icrası Azərbaycanın daha da qüdrətlənməsinə, zənginləşməsinə imkanlar açacaq.

Elçin Bayramlı

Səs.- 2009.- 18 aprel.- S. 5.