Azərbaycan folklorunun və ənənəvi biliklərin qorunması: erməni plagiatçılığı

 

Dövlət Muğam Teatrında Müəllif Hüquqları Agentliyi (MHA) 23 aprel - Ümumdünya Kitab və Müəlliflik Hüququ Günü və 26 aprel - Beynəlxalq Əqli Mülkiyyət Günü münasibətilə “Azərbaycan folklorunun və ənənəvi biliklərin qorunması: erməni plagiatçılığı” mövzusunda elmi-praktik konfrans keçirmişdir.

MHA-nın sədri Kamran İmanov respublikamızda müəllif hüquqlarının qorunması istiqamətində görülən işlərdən və dövlətin bu sahədə rolundan danışmışdır. Konfransda bildirilmişdir ki, Azərbaycanda milli əqli mülkiyyət sistemi ümummilli liderimiz Heydər Əliyevin dahiyanə uzaqgörənliyi nəticəsində yaradılmışdır. Ötən müddət ərzində Azərbaycan Respublikası əqli mülkiyyət hüquqlarının qorunması sahəsində geniş beynəlxalq əlaqələr qurmuşdur. 1995 - ci ildən Ümumdünya Əqli Mülkiyyət Təşkilatının (ÜƏMT) üzvü olan Azərbaycanın bu sahədəki əlaqələri getdikcə artır.

Bildirilmişdir ki, respublikamız YUNESKO-nun “Müəllif hüquqları haqqında Ümumdünya Konvensiyası”na qoşularaq, geniş beynəlxalq əməkdaşlığa cəlb olunmuşdur. Bütün bunlar  onu deməyə əsas verir ki, Azərbaycan müəlliflik hüquqları, əlaqəli hüquqlar və digər əqli mülkiyyət hüquqları sahəsində ən vacib konvensiya və sazişlərin hamısında iştirak edir.

Kamran İmanov son vaxtlar ermənilər tərəfindən Azərbaycan folklor nümunələrinin və müəllif əsərlərinin özününküləşdirilməsi faktlarının geniş miqyas aldığını bildirmiş, bununla bağlı mötəbər beynəlxalq təşkilatlara müraciət edildiyini diqqətə çatdırmışdır. O, erməni saxtakarlıqlarını ifşa etmək üçün biliklərin əsaslarına mükəmməl yiyələnməyin, milli mədəni irsimizin və tariximizin dərindən öyrənilməsinin vacibliyini qeyd etmişdir.

Mədəniyyət və turizm nazirinin müavini Sevda Məmmədəliyeva vurğulamışdır ki, bu gün Azərbaycanda müəllif hüquqlarının qorunması istiqamətində ciddi işlər görülür. Bu sahədə aparılan məqsədyönlü siyasətin nəticəsində Azərbaycan xalqına məxsus milli musiqi əsərləri, xalq mahnıları, folklor nümunələri bir daha toxunulmazlıq qazanmışdır. Aparılan işlərin bəhrəsi olaraq Azərbaycan xalqının zəngin mədəniyyətinin və tarixinin ən gözəl incilərindən biri olan muğam 2003 - cü ildə YUNESKO tərəfindən bəşəriyyətin qeyri-maddi irsinin inciləri siyahısına daxil edilmişdir. Bakıda “Muğam aləmi” Beynəlxalq festival keçirilmiş, Fransanın məşhur Luvr Muzeyində Azərbaycan aşıqlarının konserti təşkil edilmiş, dinləyicilər Azərbaycanın folklor nümunələri ilə yaxından tanış olmuşlar.

Konfransda müəllif hüquqlarının qorunması ilə bağlı məruzələr dinlənilmişdir.

Məruzə ətrafında müzakirələrdə agentliyin fəaliyyətindən, beynəlxalq təşkilat və qurumlarla əlaqəsindən söz açılmış, maraqlı təkliflər irəli sürülmüşdür.

Tədbirdə Nazirlər Kabinetinin şöbə müdiri İsmayıl Sadıqov, Prezident Administrasiyasının humanitar siyasət şöbəsinin sektor müdiri Cəlal Məmmədov, Milli Təhlükəsizlik Nazirliyinin aparat rəhbəri, general-mayor Fərhad Vahabov və digər rəsmi şəxslər iştirak etmişlər.

 

 

Zümrüd

 

Səs.- 2009.- 24 aprel.- S. 12.