Azərbaycanla Rusiya arasında əməkdaşlıq uğurla inkişaf edir

Prezident İlham Əliyev ordu generalı Vladimir Proniçevi qəbul edib

Prezident İlham Əliyev aprelin 24-də Rusiya Federasiyasının Federal Təhlükəsizlik Xidməti direktorunun birinci müavini - Sərhəd Xidmətinin rəhbəri, ordu generalı Vladimir Proniçevi qəbul edib.

Ordu generalı Vladimir Proniçev Azərbaycan, Rusiya və İranın sərhəd xidməti rəhbərlərinin Bakı görüşünün 2007-ci ildə dövlət başçılarının Tehran görüşü zamanı verdikləri tapşırıqlara əsasən təşkil olunduğunu vurğulayaraq, görüşdə Xəzər regionunun təhlükəsizliyi ilə əlaqədar məsələlərin müzakirə edildiyini bildirdi. O, Rusiya Sərhəd Xidməti ilə Azərbaycanın Dövlət Sərhəd Xidməti arasında dostluq münasibətlərinə əsaslanan əlaqələrin gələcəkdə də inkişaf edəcəyinə əminliyini ifadə etdi. Rusiya Federasiyasına səfərini xatırladan dövlətimizin başçısı Azərbaycan ilə Rusiya Federasiyası arasında ikitərəfli münasibətlərin bütün istiqamətlərdə, o cümlədən sərhəd xidməti sahəsində də uğurla inkişaf etdiyini vurğuladı. Prezident İlham Əliyev Azərbaycan, Rusiya və İran sərhəd xidmətləri rəhbərlərinin Bakıda keçirilən görüşünün həm ikitərəfli, həm də çoxtərəfli formatda müzakirələr aparmaq üçün yaxşı imkan yaratdığını bildirdi.

MƏTLƏB

Səs.- 2009.- 25 aprel.- S. 2.