Azərbaycan Gəncləri Günü qeyd olundu

Azərbaycan Gəncləri Günü Rabitə və İnformasiya Texnologiyaları Nazirliyinin "Aztelekom" İstehsalat Birliyində də qeyd olundu. Bu münasibətlə fevralın 2-də birliyin "Konfrans zalı"nda gənclərin toplantısı keçirildi. Tədbiri giriş sözü ilə baş direktorun müavini Mehman Həsənov açdı. O, dövlət gənclər siyasətinin uğurlarından, gənclərin ölkəmizin ictimai-mədəni, sosial-iqtisadi həyatında fəal iştirakından, beynəlxalq tədbirlərdə, möhtəşəm idman yarışlarında Azərbaycanı layiqincə təmsil etdiklərindən iftixarla danışdı. Sonra Azərbaycan gənclərinin qazandıqları nailiyyətlər, onlara göstərilən dövlət qayğısı baradə film nümayiş etdirildi.

Tədbirdə "Aztelekom" İB-nin gənclər təşkilatının sədri Vüsalə Niftəliyeva çıxış edərək rəhbərlik etdiyi təşkilatın fəaliyyəti barədə qısa hesabat verdı. V.Niftəliyeva bildirdi ki, 2 fevral tarixinin Azərbaycan gəncləri üçün böyük önəmi var: "1996-cı il fevralın 2-də Azərbaycan gənclərinin I Forumu keçirildi. Bu, ölkədə gənclər hərəkatının vüsət almasına təkan verdi. Bu tədbir ümummilli liderimiz Heydər Əliyevin təşəbbüsü ilə keçirildi. Həmin günün əhəmiyyətini nəzərə alaraq ümummilli liderimiz 2 fevral tarixini Gənclər Günü kimi elan edərək müasir Azərbaycan tarixinə yazdı".

YAP Gənclər Birliyinin sədr müavini Bəxtiyar Ələsgərov gənclərin ötən il ictimai-siyasi proseslərdə fəal iştirak etdiklərini, ötən il partiyaya yeni üzv olan şəxslərin 52,3 faizini gənclər təşkil etdiyini bildirdi. O, qeyd etdi ki, Heydər Əliyevin, eyniz zamanda, İlham Əliyevin hakimiyyəti dövründə də gənclər siyasətinə xüsusi diqqət yetirilib.

Tədbir iştirakçıları Azərbaycan gənclərinin hazırkı durumu, onların qayğıları və müxtəlif məsələlərlə bağlı çıxış etdilər. Səslənən digər çıxışlarda da vurğulandı ki, ulu öndərimiz Heydər Əliyevin nurlu ideyalarına sadiq olan və onlardan bəhrələnən Azərbaycan gəncləri Prezident İlham Əliyev ətrafında sıx birləşərək, Vətənimizin tərəqqisi naminə var qüvvə ilə çalışırlar.

Tədbir "Aztelekom" İstehsalat Birliyinin 2008-ci ildə əldə etdiyi nailiyyətlərdə xüsusi əməyi olan, ictimai işlərdə fərqlənən gənclər fəxri fərmanla təltif olundular və qiymətli hədiyyələrlə mükafatlandırıldılar.

Sevinc NƏZƏROVA

Səs.- 2009.- 3 fevral.- S. 6.