Enerji sektorunda hüquqi yanaşma və struktur islahatları

Azərbaycan və Avropa Birliyi arasında energetika islahatlarının aparılması sürətlənir

Dünən Azərbaycan hökuməti ilə Avropa Birliyi arasında imzalanmış sazişə əsasən, Hyatt Regensy otelində Azərbaycanın Sənaye və Energetika Nazirliyi ilə Almaniyanın İqtisadiyyat və Texnoligiya Nazirliyi arasında energetika sahəsində Tvining layihəsi üzrə birgə tədbir keçirilib. 1999-cu ildən Avropa Birliyi ilə Azərbaycan əməkdaşlıq haqqında müqavilənin həyata keçirilməsinə dəstək məqsədilə Azərbaycan Sənaye və Energetika və Almaniyanın İqtisadiyyat və Texnologiya Federal nazirlikləri arasında energetika sahəsində Tvining layihəsinin hüquqi bazasının yaxınlaşdırılması, Azərbaycanın bu sektorda olan qanunvericiliyində tələb olunan struktur islahatların aparılmasına dəstək olmaq üçün davamlı şəkildə bu cür addımlar atılması planlaşdırılır.

Bu məqsədlə keçirilən tədbirdə çıxış edən Sənaye və Energetika nazirinin müavini Gülməmməd Cavadov məlumat verib. Onun sözlərin görə, bu cür addımların atılmasında əsas məqsəd Azərbaycanın enerji sektorunun hüquqi bazasını Avropa Birliyi qanunvericiliyinə yaxınlaşdırmaq, bu sektorda tələb olunan struktur islahatlarının aparılmasıdır. Azərbaycan tərəfindən layihəyə rəhbərlik edən İbrahim Ağayev əməkdaşlıq çərçivəsində enerji siyasətinin müəyyənləşdirilməsi üçün konkret addımların atıldığını qeyd edib. O bildirib ki, bu sahənin idarə edilməsinin təkmilləşdirilməsi, həmçinin, hüquqi bazanın təkmilləşdirilməsinin də nəzərdə tütulduğu planlaşdırılır. 2006-cı il noyabrın 17-də Azərbaycanla Avropa Birliyi arasında enerji sahəsində müqavilənin bağlandığını xatırladan layihə rəhbəri, enerji sahəsində sözügedən müqavilədə nəzərdə tutulan 4 sahədə əməkdaşlığın davam etdirildiyini bildirib. Onun sözlərinə görə, layihə çərçivəsində, Almaniyadan 14, Slovakiyadan isə 3 mütəxəssisin iştirakı gözlənilir.

Almaniya tərəfindən isə layihəyə rəhbərlik edəcək Güenter Vaşke bu cür layihələrin "NABUCCO" kimi proyektlərin həyata keçirilməsində mühüm rol oynadığını bildirdi. Layihənin 18 ay davam edəcəyini bildirən almaniyalı ekspert, müqavilənin büdcəsinin 1,1 milyon avro olduğunu söyləyib: "Tvininq layihəsinin iş planı bu sahədə həyata keçiriləcək vəzifələri detallıqla təsvir edir və bu, 5 komponentdən ibarətdir. Bu vəzifələrin içərisində birgə işçi qrupların yaradılması, seminarların və Avropaya tanışlıq səfərlərinin təşkil edilməsi də nəzərdə tutulur". Onun sözlərinə görə, bu layihənin əsas məğzi elektrik enerjisi və qaz sahəsində Azərbaycan qanunvericiliyinin Avropa Birliyinin bu sahədəki qanunvericiliyə (Asquis Sommunautare) yaxınlaşdırmaqdır.

Qeyd edək ki, Asquis Sommunutare energetika sahəsində 20 Avropa qanunvericilik aktını əhatə edir. Bu qanunlar elektrik enerjisi və qaz, istilik genetorları, effektiflik tələbləri, istehlakçıya verilən məlumat, binaların enerji istehlakı vəziyyəti alternativ enerji mənbələrinin stimulyasiyası və digər geniş enerji məsələlərini əhatə edir.

Tapdıq QURBANLI

Səs.- 2009.- 3 fevral.- S. 9.