Cəlilabadda uşaq hüquqlarının vəziyyəti ilə bağlı regional konfrans keçirilib

Azərbaycan Gənc Alim, Aspirant və Magistrlər Cəmiyyəti (AGAAMC) UNİCEF-in dəstəyi və Azərbaycan Respublikasının İnsan Hüquqları üzrə müvəkkili (ombudsman) ilə qarşılıqlı əməkdaşlıq şəklində və "Uşaq Çətiri: Uşaq Hüquqları Aktivistləri Şəbəkəsinin yaradılması" adlı layihə çərçivəsində Cəlilabad rayonunda regionlarda uşaq hüquqlarının qorunması ilə bağlı regional konfrans keçirilib.

Regional konfransda Ombudsman Aparatının Cəlilabad regional bürosunun təmsilçisi, AGAAMC-nin sədri, fizika-riyaziyyat elmləri namizədi İlqar Orucov, layihənin eksperti texniki elmlər namizədi Ruslan Rəhimli, yerli icra və bələdiyyə qurumları, yerli təhsil şöbəsinin nümayəndələri, məktəb direktorları, məktəb psixoloqları, valideynlər Uşaq Çətiri şəbəkəsinin üzvləri iştirak ediblər.

Regional konfransda, əsasən, regionlarda uşaq əməyindən sui-istifadə halları, bununla bağlı məsuliyyət, uşaqların məktəbdən yayındırılması və fiziki işlərə, xüsusən, mövsümi əkin işlərinə cəlb edilməsi, uşaqlara qarşı ailədaxili, cəmiyyətdaxili zorakılıq halları, məktəbdaxili münasibətlər, nigah yaşına çatmayanların, əsasən, qızların nigaha məcbur edilməsi, yerli hakimiyyət qurumlarının, bələdiyyələrin lokal səviyyədə - kəndlərdə, qəsəbələrdə uşaqlarla bağlı gördüyü işlər, uşaqlarla əlaqədar siyasətin formalaşdırılması yolları, uşaq hüquqlarının regionlarda təbliği səviyyəsi və bu prosesdə yerli hakimiyyət qurumlarının, məktəb rəhbərliklərinin rolu və s. məsələlər müzakirə olunub. Regional konfransda BMT-nin Uşaqlar üçün Yararlı Dünya deklorasiyasının prinsipləri də müzakirə edilib və bu prinsiplər üzərində fəaliyyətin qurulmasının vacibliyi qeyd edilib.

Regional konfransın nəticəsindən məlum olub ki, əkin və məhsul yığımı mövsümlərində uşaqların məktəbdən yayındırılması halı bir adət halını alıb, uşaq əməyi ilə bağlı vəziyyət regionda qənaətbəxş deyil, uşaqlar onların fiziki sağlamlığına zərər verən müxtəlif işlərə cəlb edilir və bunun da əsas günahkarları valideynlərdir, valideynlərlə uşaq əməyindən istifadə mövzusunda təbliğat işi yetərincə deyil, valideynlərin uşaq əməyindən istifadə ilə bağlı bilik və informasiyaları çox aşağı səviyyədədir, uşaq əməyindən sui-istifadə hallarına qarşı məsuliyyətin tətbiq olunmasında problemlər var, fiziki təsir hələ də uşaqlara qarşı tərbiyə metodu kimi qəbul olunur və buna haqq qazandırılır, fiziki təsirlə tərbiyəetmənin bir adət-ənənə olduğu fikri üstünlük təşkil edir.

Konfransda o da məlum olub ki, qızların məktəbdən yayınması və erkən yaşda nigaha cəlb edilməsi halları çoxluq təşkil edir, bu səbəbdən də icbari təhsilin həddinin 9 il olması, nigah yaşının həm qızlarda, həm də oğlanlarda ən azı bir yaş artırılmasının vacibliyi fikri də qeyd olub. Eyni zamanda, məktəbdə olan bir psixoloqun bütün uşaqların problemlərini həll etmək gücündə olmadığı fikirləri də bildirildi və qeyd edildi ki, bələdiyyə nümayəndələrinin çox az bir qismi lokal səviyyədə uşaqlarla davamlı şəkildə işləyirlər, bələdiyyələrin uşaqlarla bağlı fəaliyyəti qənaətbəxş deyil və bu sahədə yeni yanaşmaya ehtiyac var.

Məlahət Mahmudqızı

Səs.- 2009.- 4 fevral.- S. 16.