Əli Həsənov: "Qoy ana dilimizin tətbiqinin əleyhinə çıxanlar özlərinə başqa sloqan tapsınlar"

"Azərbaycan dilinin dövlət dili olaraq ləğv edilməsi və ya onun başqa adla təqdim olunması ideyası yeni deyil

Hələ 1995-ci ildə ümummilli lider Heydər Əliyevin rəhbərliyi ilə hazırlanmış Konstitusiya layihəsinin müzakirəsi zamanı ana dilimizin adı ilə bağlı müxtəlif təkliflər, variantlar səslənsə də, əhalinin tam əksəriyyəti dilimizin Azərbaycan dili adlanmasına səs verdi və onun dövlət dili kimi tətbiq olunmasını zərurətə çevirdi. Bu gün Azərbaycan dilinin dövlət statusu ilə barışmayanlar, onu ikinci dərəcəli, məişət dili kimi digər dillərin içində əritməyə çalışanlar öz mövqelərini ulu öndərin məşhur "Bir millət, iki dövlət" kəlamı ilə əsaslandırmağa cəhd göstərirlər.

Lakin həmin təəssübkeşlər unutmamalıdırlar ki, ümummilli liderimiz azərbaycanlı olması, Azərbaycan dilində danışması, Azərbaycan mentalitetini, adət-ənənələrini daşıması ilə fəxr edib və öz davamçılarına Azərbaycan dilini dərindən öyrənməyi, onu yaşatmağı və qorumağı tövsiyə edib". Bu sözləri APA-ya açıqlamasında Prezidentin İcra Aparatının ictimai-siyasi məsələlər şöbəsinin müdiri Əli Həsənov Azərbaycanın efir məkanında verilişlərin ana dilində getməsi ilə bağlı Milli Televiziya və Radio Şurasının (MTRŞ) qərarına münasibət bildirərkən deyib.

Konstitusiyada Azərbaycan dilinin dövlət dili kimi təsbit olunmasının təşəbbüskarının da Heydər Əliyev olduğunu qeyd edən Ə. Həsənov məhz buna görə Azərbaycan dilini yaşatmağın, onun inkişafının qayğısına qalmağın hər bir Əliyevçinin və Heydər Əliyev siyasi kursunu davam etdirən siyasətçinin borcu olduğunu vurğulayıb: "Hər bir xalq kimi, Azərbaycan xalqının da öz dilinə malik olmaq, bu dildə danışmaq, öz dilində oxumaq, dinləmək hüququ var və heç kim xalqın bu hüququnu şübhə altına qoya bilməz. Azərbaycan dilinin böyük inkişaf yolu keçməsi, dillər ailəsində öz layiqli yerini tutması və artıq bütün beynəlxalq tribunalardan səslənməsi Azərbaycan xalqının istəyi və layiqli seçimi nəticəsində baş tutub."

Ə. Həsənovun sözlərinə görə, millətin ayrı-ayrı nümayəndələrinin və yaxud əksəriyyətinin hansısa xarici dili bilməsi, hətta bu dildə verilən verilişləri tam anlaması MTRŞ-yə əsas verə bilməz ki, Azərbaycan dilinin tətbiqinin, onun inkişafının və saflığının qorunmasının qayğısına qalmasın: "Milli Televiziya və Radio Şurası Azərbaycan qanunvericiliyinə uyğun və öz səlahiyyətləri çərçivəsində ana dilimizin inkişafına yönəlmiş qərarlar qəbul edib və tədbirlər həyata keçirir. Qoy ana dilimizin tətbiqinin əleyhinə çıxanlar özlərinə başqa sloqan tapsınlar".

Səs.- 2009.- 6 fevral.- S. 3.