"Bakı İslam Mədəniyyətinin Paytaxtı-2009" mədəniyyət ilinin açılışı olacaq

Mərasimdə İSESKO-nun Baş direktoru Ə.O.Əl-Tuveycri iştirak edəcək

Bildiyimiz kimi, İSESKO-ya üzv dövlətlərin mədəniyyət nazirlərinin 21-23 noyabr 2007-ci il tarixində Liviyanın Tripoli şəhərində keçirilmiş V konfransının nəticələrinə görə, Bakı şəhəri 2009-cu ildə islam mədəniyyətinin paytaxtı elan edilmişdir. "Bakı İslam Mədəniyyətinin Paytaxtı-2009" mədəniyyət ilinin təntənəli açılış mərasimi fevral ayının 18-də Heydər Əliyev sarayında keçiriləcək. Mədəniyyət və Turizm Nazirliyinin mətbuat xidmətindən aldığımız məlumata əsasən, tədbirə bir sıra Avropa və islam dövlətlərinin şəhərlərinin merləri, eyni zamanda, mədəniyyət nazirləri dəvət edilmişdir. İSESKO-nun Baş direktoru Ə.O.Əl-Tuveycri açılış mərasimində iştirak edəcəkdir.

Açılış mərasimi çərçivəsində fevralın 18-i və 19-u şəhərimizin mərkəzi meydanlarında şənliklər, "Bakı-İslam Mədəniyyətinin Paytaxtı-2009" veb-saytının və "Qədim Bakı" kitabının təqdimatı keçiriləcək. Ümumiyyətlə, il ərzində mədəniyyət paytaxtı ili çərçivəsində yüzdən çox milli və beynəlxalq tədbirin keçirilməsi nəzərdə tutulur.

Qeyd etmək lazımdır ki, 2008-ci ilin 2-3 dekabr tarixlərində Bakıda Avropa Şurasına üzv dövlətlərin Mədəniyyət nazirlərinin "Mədəniyyətlərarası dialoq Avropa və ona qonşu regionlarda sülhün və davamlı inkişafın əsasıdır" mövzusunda konfransı keçirilmişdir. Konfransın gedişində Bakı Bəyannaməsi qəbul edilmiş, iştirakçı dövlətlər, eləcə də, tərəfdaş dövlətlərin mədəniyyətlərarası dialoq sahəsində mədəni əməkdaşlığını və fəaliyyətlərinin əlaqələndirilməsinin inkişaf etdirilməsini nəzərdə tutan "Bakı prosesi"nin əsası qoyulmuşdur.

Bu il, həmçinin, islam ölkələrinin mədəniyyət nazirlərinin VI konfransı keçiriləcəkdir. Azərbaycan tərəfi ənənəsinə sadiq qalaraq "Bakı Prosesi" çərçivəsində həmin konfransa bir sıra Avropa dövlətlərini də dəvət etməyi planlaşdırır.

Nəzakət

Səs.- 2009.- 6 fevral.- S. 12.