"Rüstəm İbrahimbəyovun teatrı" festivalının açılış mərasimi keçirilib

Moskvada Teatr Xadimləri İttifaqı Mərkəzində Azərbaycan kinematoqrafçısı, ssenarist və prodüser Rüstəm İbrahimbəyovun 70 illikyubileyinə həsr olunan "Rüstəm İbrahimbəyovun teatrı" festivalın açılış mərasimi keçirilib. Festivalın açılış mərasimində dramaturqun "Tartüf Aqayeviç" tamaşası nümayişi etdirilib.

Tanınmış Azərbaycan kinematoqrafçısi, ssenaristi və prodüseri Rüstəm İbrahimbəyovun 70 illik yubileyinə həsr olunmuş festival dramaturqun yaradıcılığının pərəstişkarları və müasir teatr həvəskarları üçün əsil hədiyyəyə çevrilib. Bir həftə ərzində müxtəlif teatrlarda tamaşaçılar Azərbaycanın "İbrus" Teatrının və Rusiya aktyorlarının ifasında müəllifin yeni və indiyədək yaxşı tanış olan əsərlərinə baxa biləcəklər.

Teatr Xadimləri İttifaqının sədri, Rusiyanın xalq artisti, aktyor və rejissor Aleksandr Kalyagin festivalın açılışında çıxış edərək teatr ictimaiyyəti adından Rüstəm İbrahimbəyovu yubileyi münasibətilə təbrik etmişdir. O demişdir ki, Rusiyada Rüstəm İbrahimbəyovu, onun "Səhranın bəyaz günəşi", 'Talismanım, qoru məni", "Sibir bərbəri" filmlərini, Moskvanın müxtəlif teatrlarında nümayiş etdirilən tamaşalarını, yaxud təsis etdiyi "Şərq-Qərb" kinofestivalını yaxşı tanıyır, sevir və qiymətləndirirlər.

Bu günlər Moskva tamaşaçısı İbrahimbəyovun "İbats" müəllif teatrının tamaşalarına baxa, müəllifin dramaturgiyasını, Azərbaycan aktyorlarının ifasını qiymətləndirə biləcəklər. Festival çərçivəsində"Şirə bənzər", "İvan Buninin son döyüşü", "Mənim əziz kişilərim" pyesləri nümayiş etdiriləcək.

Zümrüd

Səs.- 2009.- 20 fevral.- S. 12.