Xocalı faciəsi Azərbaycanın ərazi bütövlüyünə qarşı yönəlmiş ənənəvi terror siyasətidir

ADPU-da Xocalı soyqırımının 17-ci ildönümü qeyd olundu

Dünən Azərbaycan Dövlət Pedaqoji Universitetdə (ADPU) Xocalı faciəsinin 17-ci ildönümünə həsr olunmuş tədbir keçirildi. Tədbir başlamazdan öncə Xocalı faciəsi zamanı, eləcə də Azərbaycanın suverenliyi, ərazi bütövlüyü və dövlətçiliyi uğrunda şəhid olmuş bütün soydaşlarımızın ruhları bir dəqiqəlik sükutla yad edildi.

Sonra çıxış edən universitetin prorektoru, professor Rafiq Baxşəliyev, qeyd etdi ki, Prezidentin İcra Aparatının rəhbəri Ramiz Mehdiyevin 16 fevral 2009-cu il tarixli sərəncamı ilə Xocalı soyqırımının 17-ci ildönümü ilə əlaqədar tədbirlər planı təsdiqlənib. Tədbirlər planına əsasən, xalqımız fevralın 26-da Xətai rayonundakı Xocalı soyqırımı qurbanlarının xatirəsinə ucaldılmış abidəni və Şəhidlər Xiyabanını ziyarət edəcəklər. Prorektor həmin gün həm də respublikamızın bütün ərazisində saat 17:00-da Xocalı faciəsi qurbanlarının xatirəsinin bir dəqiqəlik sükutla yad ediləcəyini diqqətə çatdırdı: “Xocalı soyqırımı haqqında həqiqətlərin dünya ictimaiyyətinə çatdırılması məqsədilə xarici kütləvi informasiya vasitələri, teleradio kanalları və internet şəbəkəsi ilə bu qanlı qırğına həsr olunmuş materialların yayılması və Azərbaycanın xarici ölkələrdəki səfirliklərində, nümayəndəliklərində və diaspor təşkilatlarında anım mərasimlərinin keçirilməsi nəzərdə tutulub. Tədbirlər planında eləcə də ölkəmizin televiziya və radiolarında, kütləvi informasiya vasitələrində Xocalı soyqırımı ilə bağlı materialların verilməsi, idarə və təşkilatlarda, ali və orta məktəblərdə tədbirlərin keçirilməsi nəzərdə tutulub”.

Bugünkü toplantının da məhz həmin sərəncam çərçivəsində həyata keçirildiyini vurğuladı. Bildirdi ki, ADPU-da Xocalı soyqırımına həsr edilmiş bir neçə tədbir keçirilib. Belə ki, fevralın 18-dən 26-dək universitetin bütün fakültə və şöbələrində bu qanlı hadisə ilə bağlı matəm mərasimləri keçirilib, soyqırımın şahidi olan insanlarla görüşlər təşkil edilib, faciəyə həsr edilmiş xüsusi bülletenlər hazırlanıb, söhbətlər və müzakirələr aparılıb. Fevralın 26-da universitetin bütün fakültələrində ilk dərs saatlarının və seminar məşğələlərin Xocalı soyqırımına həsr ediləcəyini söyləyən R.Baxşəliyev, həmin gün universitetin mühəndis-pedaqoji və bədii qrafika fakültəsində Xocalı soyqırımına həsr edilmiş rəsm sərgisinin keçiriləcəyini də nəzərə çatdırdı. ADPU-nun Tələbə-Gənclər Təşkilatı da kompüter mərkəzi ilə birlikdə internet saytlarına Xocalı qətliamına həsr edilmiş materiallar daxil ediblər.

Daha sonra çıxış edən Xocalı şəhər təhsil şöbəsinin müdiri Məhəmməd Şükürov, 1992-ci il fevralın 25-dən 26-na keçən gecə Xocalıda baş vermiş dəhşətli faciənin azərbaycanlıların  yaddaşından silinmədiyini bildirdi: “Xocalı faciəsi XX əsrdə ermənilər tərəfindən xalqımıza qarşı törədilmiş növbəti kütləvi qırğın olmaqla bərabər, həm də Azərbaycanın ərazi bütövlüyünə və dövlət müstəqilliyinə qarşı yönəlmiş ənənəvi terror siyasətinin əyani təzahürüdür. Bu soyqırımı həm də bəşəriyyətə və insanlığa qarşı yönəlmiş ən qəddar cinayətlərdən biridir. Beynəlxalq hüququn norma və prinsiplərinə əsla məhəl qoyulmadan həyata keçirilmiş bu soyqırım aktı xalqımızın azadlıq və müstəqillik istəyini məhv etməyə yönəldilmişdi”.

M.Şükürov Xocalı soyqırımının ermənilər tərəfindən  törədilmiş birinci qətliam olmadığını bildirdi. Mənfur ermənilərin hələ 1906 və 1918-ci illərdə bu şəhəri yandırıb külə döndərdiyini, əhalisini isə qırıb məhv etdiklərini tədbir iştirakçılarının diqqətinə çatdırdı: “Lakin namərd və xain qonşularımız olan ermənilər 1992-ci il fevralın 25-dən 26-na keçən gecə daha dəhşətli və daha qəddar bir cinayət törətdilər. Mübaliğəsiz demək olar ki, Xocalı faciəsi bəşər tarixində misli görünməmiş bir cinayət aktıdır. Həmin o dəhşətli gecədə 366-cı motoatıcı alay Xocalı şəhərini sakinləri ilə birgə tamamilə məhv etdi. Faciə zamanı 613 nəfər, o cümlədən 106 qadın, 63 uşaq, 70 qoca ermənilər tərəfindən vəhşicəsinə qətlə yetirildi, 1275 nəfər dinc sakin əsir götürüldü, 150 nəfər isə itkin düşdü”.

Gənclər və İdman Nazirliyinin Tələbə və Tələbə Təşkilatları ilə İş üzrə sektorunun müdiri, tarix elmləri namizədi Elşən Hüseynov isə öz çıxışında Xocalı soyqırımının işğalçı Ermənistanın Azərbaycana qarşı hərbi təcavüzünün əsil mahiyyətini və erməni vəhşiliyinin dəhşətlərini bütün çılpaqlığı ilə üzə çıxardığını dedi. Xocalı faciəsi ərəfəsində həmin dövrün tarixi-siyasi şəraiti üzərində dayanmağı məqsədəuyğun sayan E.Hüseynov, Xocalının erməni hərbi birləşmələri tərəfindən mühasirəsinin faktiki olaraq, 1991-ci ilin oktyabrından başladığını qeyd etdi.

Tədbirdə Xocalı faciəsinin şahidləri çıxış etdilər, faciəyə həsr olunan video çarxlar, o cümlədən, Prezident İlham Əliyevin soyqırımla bağlı bir dəqiqəlik nitqi nümayiş etdirildi.

KÜBRA ƏLİYARLI

Səs.- 2009.- 25 fevral.- S. 16.