“Xocalıya Ədalət”

Leyla Əliyevanın təşəbbüsü ilə bu adda beynəlxalq kampaniya və kampaniyanın internet səhifəsinin təqdimat mərasimi keçirilib

Azərbaycan Respublikasının İngiltərədəki səfirliyinin mətbuat xidmətinin rəhbəri Polad Məmmədoğlunun “Səs” qəzetinə verdiyi məlumata əsasən, Böyük Britaniyanın tanınmış tədqiqat mərkəzlərindən sayılan İmperiya Hərb Muzeyində Xocalı soyqırımı qurbanlarının anma mərasimi və “Xocalıya Ədalət” beynəlxalq məlumatlandırma kampaniyasının təqdimat mərasimi keçirilib.

Tədbirdə Böyük Britaniya Parlamentinin üzvü Mayk Henkok, dövlət qurumlarının, o cümlədən, Xarici İşlər Nazirliyinin rəsmiləri, Londonda akkreditə olunmuş səfirliklərin nümayəndələri, Qafqaz regionu üzrə ixtisaslaşmış tədqiqat mərkəzlərinin təmsilçiləri, jurnalistlər və Azərbaycan və türk icmalarının üzvləri iştirak ediblər.

Tədbiri giriş sözü ilə açan ölkəmizin İngiltərədəki səfiri Fəxrəddin Qurbanov Xocalı faciəsinin xalqımızın tarixində qanlı səhifələrdən biri olduğunu vurğulayıb. Faciə qurbanlarının yalnız azərbaycanlı olduqları üçün kütləvi qətlə məruz qaldıqlarını qeyd edib. O, eyni zamanda, faciəyə indiyə qədər beynəlxalq ictimaiyyət və əlaqədar beynəlxalq təşkilatlar tərəfindən müvafiq qiymət verilmədiyinin təəssüfdoğurucu hal olduğunu diqqətə çatdırıb.

Daha sonra çıxış edən Cənubi Qafqaz üzrə tanınmış tədqiqatçı professor Tamara Draqadze faciənin miqyasından təfsilatlı şəkildə bəhs edib. Bu addımı yalnız Azərbaycan xalqına qarşı deyil, bütövlükdə bəşəriyyətə və bəşəri dəyərlərə qarşı törədilmiş cinayət kimi dəyərləndirib. O, hadisələrin baş verdiyi ərəfədə regionda olduğunu və faciənin əsil miqyası ilə çox yaxından tanış olduğunu diqqətə çatdırıb. Eyni zamanda, vurğulayıb ki, bir sıra cəhdlərə baxmayaraq, faciəyə indiyə qədər beynəlxalq ictimaiyyət və təşkilatlar tərəfindən həqiqi qiymət verilməyib və bu istiqamətdə Azərbaycan hökumətinin apardığı məlumatlandırma kampaniyasını yüksək qiymətləndirib.

Çıxışların ardınca Heydər Əliyev Fondu tərəfindən hazırlanmış və Xocalı faciəsini özündə əks etdirən videoklip nümayiş etdirilib.

Tədbir çərçivəsində İslam Konfransı Təşkilatının Gənclər Forumu və qurumun Mədəniyyətlərarası Dialoq üzrə baş koordinatoru Leyla Əliyevanın təşəbbüsü ilə başlanmış “Xocalıya Ədalət” beynəlxalq kampaniyasının və kampaniyanın internet səhifəsinin təqdimat mərasimi keçirilib. Beynəlxalq kampaniyanın Böyük Britaniya üzrə koordinatoru olan “Odlar Yurdu” cəmiyyətinin icraiyyə komitəsinin üzvü Britt Montimer çıxış edib və sözügedən kampaniya haqqında, kampaniya çərçivəsində hazırlanmış internet səhifəsi və kampaniyaya qatılmaq şərtləri ilə bağlı ətraflı məlumat verib. Geniş ekranda isə kampaniyanın internet səhifəsinin görüntüləri verilib.

Tədbirin gedişində Xocalı faciəsi və Qarabağ müharibəsindən bəhs edən kitab və broşuralar paylanıb, o cümlədən, “Xocalı uşaqların gözü ilə” adlı rəsm sərgisi nümayiş etdirilib.

KÜBRA ƏLİYARLI

Səs.- 2009.- 27 fevral.- S. 4.