“Moskva dostlarını qarşılayır” Beynəlxalq Festivalı

Festival MDB üzvü olan ölkələrin Dövlətlərarası Humanitar Əməkdaşlıq Fondunun genişmiqyaslı layihəsidir

Azərbaycanın gənc skripkaçısı Elvin Qəniyev “Moskva dostlarını qarşılayır” Beynəlxalq festivalında ifası ilə Moskva tamaşaçılarını heyran etmişdir. Festival Vladimir Spivakov Beynəlxalq Xeyriyyə Fondunun 15-ci ildönümünə həsr edilmiş və Moskva hökumətinin elan etdiyi “Bərabər İmkanlar” ili çərçivəsində keçirilir.

K.S.Stanislavski və V.İ.Nemiroviç-Dançenko adına Moskva Akademik Musiqili Teatrında Elvin Qəniyev Q.Venyavskinin “Orijinal mövzuda variasiyalar” kompozisiyasını və F.Veraçininin “Larqo” kompozisiyasını yüksək səviyyədə ifa etmişdir. Gurultulu alqışlarla qarşılanan Elvin daha sonra böyük Azərbaycan bəstəkarı Qara Qarayevin “Yeddi gözəl” baletindən “Çiçəklərin rəqsi”ni ustalıqla ifa etmişdir.

Musiqi ailəsində anadan olmuş 12 yaşlı Elvin Qəniyev 5 yaşından babası, tanınmış musiqiçi, Azərbaycanın xalq artisti, professor Sərvər Qəniyevlə məşğul olmağa başlamışdır. Elvin 6 yaşında Bilkənd Universiteti yanında xüsusi musiqi məktəbinə daxil olmuş, 7 yaşında Vivaldinin iki skripka ilə orkestr üçün konsertində görkəmli skripkaçı Viktor Pikayzenlə birlikdə iştirak etməyə dəvət almışdır. Elvin Qəniyev bir çox beynəlxalq müsabiqələrin laureatı və qalibidir. O, dünyanın, demək olar, bütün məşhur musiqi səhnələrində çıxış etmişdir. Dünyanın tanınmış musiqişünasları Elvinin istedadını yüksək qiymətləndirirlər. Bir çox ölkələrin incəsənət xadimləri isə Elvin Qəniyevi Azərbaycanın Paqaninisi adlandırmışlar.

Azərbaycan Prezidenti İlham Əliyevin 2008-ci ilin yanvar ayında imzaladığı Sərəncamla Elvin Qəniyevin adı Azərbaycanın gənc istedadlarının Qızıl Kitabına daxil edilmiş və ona Prezident təqaüdü təyin edilmişdir. Elvin Qəniyev professor Sərvər Qəniyevin, habelə, professor Zaxar Bronun şagirdidir. Onun konsertmeysteri Nərminə Qəniyevadır.

Bu il keçirilən “Moskva dostlarını qarşılayır” festivalını MDB üzvü olan ölkələrin Dövlətlərarası Humanitar Əməkdaşlıq Fondu himayə etmişdir. Festival tədbirlərinə Azərbaycan, Gürcüstan, Qazaxıstan, Özbəkistan, Ukrayna, Belorus və digər ölkələrdən gənc nümayəndələr qatılmışlar. “Moskva dostlarını qarşılayır” festivalı MDB üzvü olan ölkələrin Dövlətlərarası Humanitar Əməkdaşlıq Fondunun ən genişmiqyaslı layihəsidir. Bu layihədə 2004-cü ildən dünyanın 60 ölkəsindən 8000-dən çox istedadlı uşaq iştirak etmişdir. Festival hər il keçirilir. Bu mühüm beynəlxalq tədbirdə maestro Vladimir Spivakov və onun “Moskva virtuozları” kollektivi daim iştirak edir.

Zümrüd

Səs.- 2009.- 3 iyun.- S. 12.