“Prezident İlham Əliyev və mədəniyyət (2003-2008)” ikicildlik kitabın elektron versiyasının təqdimatı keçirildi

Dünən M.F.Axundov adına Milli Kitabxanada Mədəniyyət və Turizm Nazirliyinin növbəti layihəsi olan “Prezident İlham Əliyev və mədəniyyət (2003-2008)” ikicildlik kitabın elektron versiyasının təqdimat mərasimi keçirildi. İkicildlik kitab 2008-ci ilin oktyabr ayında geniş ictimaiyyətin və mütəxəssislərin ixtiyarına verilmişdir.

Respublikanın, habelə, xaricdəki təşkilatlardan, kitabxanalardan nazirliyə daxil olan çoxsaylı müraciətləri nəzərə alaraq, 2009-cu ildə kitabın elektron versiyası hazırlanmışdır. Kitabın I cildində Prezident İlham Əliyevin Azərbaycan və dünya mədəniyyət xadimləri ilə görüşləri, müxtəlif mədəniyyət müəssisələrində olan zaman çıxış və tövsiyələri, müsahibələri öz əksini tapmışdır.

Kitabın II cildində Prezident İlham Əliyevin mədəniyyət xadimlərinə göndərdiyi təbriklər, mədəniyyət sahəsində imzaladığı fərman, sərəncam və qanunlar, habelə, mədəniyyət, ədəbiyyat, tarixi-mədəni irs və milli-mənəvi dəyərlər haqqında fikirləri öz əksini tapmışdır. Kitabın hər iki cildində Prezident İlham Əliyevin mədəniyyət sahəsi ilə əlaqədar fotoşəkilləri verilmişdir.

Elektron kitab “Nurlar” Nəşriyyat-Poliqrafiya Mərkəzində hazırlanmışdır. Elektron kitabın hazırlanmasında AzərTac-ın materiallarıdan istifadə edilmişdir. Layihənin rəhbəri mədəniyyət və turizm naziri Əbülfəs Qarayev, buraxılışa məsul Teymur Mehdiyev, Sevda Məmmədəliyeva, Ədalət Vəliyev, tərtibçilər Lətifə Məmmədova və Mayıl Əhmədovdur. Nəşrin elmi məsləhəteiləri professor Teymur Əhmədov və hüquq elmləri namizədi Əli Eyvazovdur.

Tədbiri milli kitabxananın direktoru Kərim Tahirov açaraq, cənab Prezident İlham Əliyevin mədəniyyət sahəsində imzaladığı qanun və sərəncamların mədəniyyət işçiləri üçün əhəmiyyətindən danışdı. Daha sonra Azərbaycan Respublikasının mədəniyyət və turizm nazirinin müavini Sevda xanım Məmmədəliyeva giriş sözündə kitabın ictimaiyyət və mütəxəssislər arasında geniş maraq yaratdığını, bu səbəbdən elektron versiyasının hazırlanaraq kitabxanaların internet saytlarında yerləşdirilməsinin məqsədəuyğun olduğunu qeyd etdi. Milli Məclisin üzvü Aydın Mirzəzadə ölkə başçısının son illərdə apardığı uğurlu siyasəti vurğuladı. Daha sonra Azərbaycan Yazıçılar Birliyinin katibi, xalq yazıçısı Milli Kitabxananın Məsləhət Şurasının sədri Çingiz Abdullayev öz çıxışında qeyd etdi ki, heç bir ölkədə yaradıcı, xüsusən də, mədəniyyət adamlarına ölkə başçısı tərəfindən bu qədər diqqət və qayğı göstərilmir. Azərbaycan Respublikasının Prezidenti cənab İlham Əliyevin belə diqqəti mədəniyyət işçilərinə qayğının bariz nümunəsidir. Azərbaycan kitabxanaçılarının ağsaqqalı, əməkdar elm xadimi, professor Abuzər Xələfov öz çıxışında son dövrdə kitabxana siyasətinin uğurla həyata keçirilməsində Prezident İlham Əliyevin böyük xidmətlərindən bəhs etdi.

Təqdim edilən elektron kitab Üzeyir Hacıbəyovun “Koroğlu” operasının uvertürası ilə müşahidə edildi.

“Prezident İlham Əliyev və mədəniyyət (2003-2008)” elektron kitabın bütün oxucuların istifadəsinə təqdim etmək məqsədilə M.F.Axundov adına Milli Kitabxananın və C.Cabbarlı adına Respublika Gənclər Kitabxanasının Veb-saytlarında (anl.az http://ni.a/.) “Elektron kitabxana” bölməsində yerləşdirilmişdir.

Təqdimat mərasimində “Prezident İlham Əliyev və mədəniyyət (2003-2008)” ikicildlik kitabın hazırlanmasında xüsusi xidmətləri olan mütəxəssislərə, habelə, kitabxana-informasiya sahəsində fəallıq və təşəbbüskarlıqları ilə seçilən respublikanın şəhər (rayon) kitabxanalarının rəhbərlərinə nazirliyin Fəxri Fərmanı da təqdim olundu. Bundan başqa, təqdimat mərasiminin sonunda kitabxana-informasiya sahəsində ictimai fəallıq, təşəbbüskarlıq və səmərəli fəaliyyətinə görə bir sıra qadın-kitabxana rəhbərləri nazirliyin Fəxri Fərmanı ilə təltif olundu.

Nəzakət ƏLƏDDİNQIZI

Səs.- 2009.- 6 may.- S. 6.