Sivilizasiyalararası dialoqda türk dünyasının rolu

Almatı şəhərində TÜRKSOY Beynəlxalq Təşkilatı, Qazaxıstan Respublikasının Mədəniyyət və Turizm Nazirliyi və Mədəniyyət Siyasəti və Sənətşünaslıq İnstitutu tərəfindən birgə təşkil olunmuş “Sivilizasiyalararası dialoqda türk dünyasının rolu” mövzusunda beynəlxalq simpoziumda, həmçinin, “Türkdilli xalqların ümumi qeyri-maddi mədəni irsinin inventarlaşdırılması” mövzusunda təşkil olunmuş TÜRKSOY-un iclasında Azərbaycan Respublikasının Mədəniyyət və Turizm Nazirliyini Qeyri-maddi mədəni irs bölməsinin müdiri Yaşar Hüseynli təmsil etmişdir. Sözügedən tədbirlərin iştirakçıları qismində TÜRKSOY Beynəlxalq Təşkilatının Baş Direktoru D.Kaseinov və Baş Direktorun müavini F.Purtaş, TÜRKSOY iştirakçı-dövlətlərinin rəsmi nümayəndələri, həmçinin, UNESKO üzrə Türkiyə Milli Komissiyasının Sədri M.Ekici, Qırğızıstan Respublikası Elmlər Akademiyasının Dil və Ədəbiyyat İnstitutunun direktoru A.Axmataliyev, Rusiya Elmlər Akademiyasının Şərqşünaslıq İnstitutunun direktor müavini İ.Zaytsev, Orta Asiya üzrə YUNESKO Tədqiqat İnstitutunun direktoru Ş.Mustafayev, Yaponiyalı professor X.Toşi, Rusiyada nəşr olunan “Konservator” jurnalının baş redaktoru R.Arifcanov, Qazaxıstan Respublikasının rəsmiləri və aparıcı ziyalıları və digərləri çıxış etmişlər.

Tədbirin sonunda Almatı Bəyanatı qəbul edilmişdir. “İnventarlaşdırma qeyri-maddi mədəni irsin dəstəklənməsi sistemində” mövzusunda elmi-tətbiqi məruzə ilə çıxışında, Azərbaycan Respublikası Mədəniyyət və Turizm Nazirliyinin nümayəndəsi müasir mədəni siyasi təsnifatda “qeyri-maddi mədəni irsin” həcmi, kompleksli məlumat bazasının yaradılması istiqamətində inventarlaşdırma ilə yanaşı hüquqi, inzibati, maliyyə, informasiya, kadr, maddi-texniki və beynəlxalq təminat mexanizmlərinin monitorinqi və qeyri-maddi mədəni irsin subyektləri (xalq tətbiqi və qeyri-tətbiqi yaradıcılığı ustaları və kollektivləri) və obyektlərinin (xalq yaradıcılığının örtülü və açıq “meydançaları” olan klub-park sistemi) pasportlaşdırılmasının zəruriliyini qeyd etdi.

Qeyd olunmalıdır ki, monitorinq, pasportlaşdırma və inventarlaşdırma kimi 3 prinsip əsasında kompleksli məlumat bazanın yaradılması və bunun əsasında Azərbaycanın qeyri-maddi mədəni irsinin qorunmasına, bərpasına və istifadəsinə yönəldilmiş milli və beynəlxalq menecment, marketinq, kartoqrafiya (“mappinq”), turizm, təşviqat (“promotion”), təbliğat (“piar”) və s. üzrə proqram və layihələrin hazırlanması, həyata keçirilməsi nazirliyin strukturunda ilk dəfə yaradılmış Qeyri-maddi mədəni irs sektorunun ilkin fəaliyyət proqramı kimi qəbul edilir.

Zümrüd

Səs.- 2009.- 6 may.- S. 12.