Kitabxanaların fəaliyyətinin yaxşılaşdırılması istiqamətində tədbir keçirilir

Dünən Badamdar qəsəbəsindəki 239 saylı orta məktəbdə Səbail rayon icra hakimiyyəti və “Azərbaycan” qəzetinin  birgə təşkilatçılığı ilə Azərbaycan Respublikası Prezidentinin “Azərbaycanda kitabxanalarının fəaliyyətinin yaxşılaşdırılması haqqında” 20 aprel 2007-ci il tarixli, 2106 saylı sərancamının və Azərbaycan Respublikası Nazirlər Kabinetinin 22 dekbar 2008-ci il tarixli qərarı ilə təsdiq edilmiş   məktəb kitabxanalarının maddi-texniki bazasının möhkəmləndirilməsinə və müasir informasiya texnologiyaları ilə təchizatına dair tədbirlər planının icrasına həsr olunmuş tədbir keçirildi.

Qeyd edim ki, tədbirdə orta məktəb direktorları, məktəb kitabxanaçıları, qəsəbə kitabxanasının rəhbərləri, Bakı şəhər təhsil idarəsinin, Bakı şəhər Mədəniyyət və Turizm İdarəsinin  nümayəndələri və b. iştirak edirdilər.  Tədbiri giriş sözü ilə   Səbail rayon icra hakimiyyətinin başçısı Sahib Ələkbərov açaraq bildirdi ki, kitabxanalara olan maraq məktəblilərin sərbəst fikir mübadiləsinə müsbət təsir göstərir. Kitabın ciddi bir varlıq olduğundan gənclər ona  maraq göstərməlidir. Aparılan sorğular nəticəsində verilən elementar suallara gənclik cavab vermir. Lakin bu hər kəsə şamil olunmur. Əlifbanın dəyişdirilməsi ilə əlaqədar bir sıra çətinliklər yaransa da, tezliklə bu problemin tamamilə aradan qalxacağına şübhə edilmir. Ölkə Prezidenti tərəfindən  bu sahədə önəmli addımlar atılmışdır. Məktəb kitabxanalarında maddi-texniki bazanın möhkəmləndirilməsi istiqamətində müəyyən işlər görülüb. Lakin bununla belə,  kitabxanalarda oxucuların sayı yetərincə deyil.

 Tədbirdə çıxış edən “Azərbaycan” qəzetinin baş redaktoru, millət vəkili Bəxtiyar Sadıxov, belə bir tədbirin rayon miqyasında keçirilməsini təqdirəlayiq bir hal kimi qiymətləndirdi. O, kitabla insan arasında olan 3 məqamı xatırlatdı: kitabın özü, onu oxuyan, oxuyanla onun arasındakı körpü.  O, qeyd etdi ki, bu gün çox ağıllı gənclik yetişir.  Onların vətənpərvər ruhda böyüməsinə mütaliə müsbət təsir göstərir. O, gənclik illərinə qayıdaraq, o vaxtkı gəncliyin kitablara necə maraq göstərdiyini qeyd etdi. Bu gün yaxşı mənada kitablara müraciət etmək üçün hansı metodlardan istifadə olunmasını bildirdi.

Tədbirdə çıxış edən 239 saylı məktəb kitabxanasının müdiri Kifayət Cəfərova  qeyd etdi ki,  kitabxana yetərincə  bədii ədəbiyyatla təmin olunub. Orta məktəb üçün uşaqların sinifdən xaric oxu dərslikləri alınıb. K.Cəfərova bildirdi ki, birinci sinif dərsliklərinə köklü şəkildə  dəyişikliklər edilib. Bu da kiçik yaşlı uşaqların dərslikləri daha yaxşı mənimsəməsinə müsbət təsir göstərir. Lakin bununla belə,  kitabxana  şəraiti ilə bağlı problemlərin olduğunu bildirdi. O, qeyd etdi ki, kitabxananın təmir olunmasına ehtiyac var. N.Nərimanov adına kütləvi kitabxananın direktoru  Arzu Soltan qeyd etdi ki, məktəblilərin kitaba cəlb olunması üçün onların maraqları nəzərə alınmalıdır. Onlara verilən tapşırıqlar əsasında araşdırmalar aparılmalıdır. Müasir dövrdə internet saytına maraq göstərən şagirdləri  kitaba marağından uzaq salır. O, bu gün uşaqların savadının artırılması, onların dünyagörüşünün genişlənməsində müəllimlərin üzərinə böyük vəzifə düşdüyünü qeyd etdi. Kitabların 70-80 faizinin kiril əlifbası ilə olduğundan onların maariflənməsinə çətinlik törədən səbəblərdən biri olduğunu vurğuladı. Kitabxanaların böyük texnologiya təchizatına ehtiyac olduğunu qeyd etdi.

Nazirlər Kabinetinin mətbuat katibi Akif Əliyev, həqiqətən də, bugünkü məktəblilərin mütaliəyə fikir verməsi  çox önəmlidir. Mütaliə siyasətin, mədəniyyətin tərkib hissəsidir. Kitabların təbliğ olunmasında müəllimlərin rolu böyükdür. Bu gün milyonlarla kitab çap olunub. Yeni nəslin təlim-tərbiyəsində müəllimlər qayğı göstərməlidir. Kitablar  isanların şəxsiyyət kimi yetişməsində, onun vətənpərvərlik ruhunda böyüməsinə müsbət təsir göstərir. Kitablar insanların maariflənməsinə, onun formalaşmasına, düzgün yol seçməsinə kömək edir. Bu gün uşaqların internetlə məşğul olmasına sədd çəkmək düzgün olmazdı. Çünki onların müxtəlif maraqları vardır. Lakin onların Azərbaycan dövlətində bir vətəndaş kimi yetişməsində, fərd kimi formalaşmasında rolu böyükdür.

“ Göyərçin” jurnalının baş redaktoru Rafiq Yusifoğlu, “Azərbaycan” məktəbi jurnalının baş redaktoru Nəcəf Nəcəfov, Beynəlxalq Təhsil Kompleksinin direktoru Sara Xanlarova, 160 saylı Klassik gimnaziyanın direktoru Fainə Ələkbərova və b. çıxış edərək, müəyyən təkliflər irəli sürərək, öz düşüncə və mövqeyindən yanaşdılar. Uşaqların maarifləndirilməsinə, onların kitablxanalara cəlb olunmasına təcrübələrinə əsaslanaraq fikirlərini bölüşdülər.

ZÜMRÜD

Səs.- 2009.- 7 may.- S. 11.