İsmayıl Şıxlının 90 illik yubileyi qeyd olundu

Tədbirdə yazıçının ömrünün sonunda yazdığı “Ölən dünyam” kitabının təqdimatı olmuşdur

M.F.Axundov adına Milli Kitabxanada xalq yazıçısı, ədəbiyyatşünas alim, görkəmli ictimai xadim İsmayıl Şıxlının anadan olmasının 90 illik yubileyi ilə əlaqədar  tədbir keçirilib. Tədbirdə çıxış edən Milli Kitabxananın direktoru Kərim Tahirov, AMEA-nın müxbir üzvü, Milli Məclisin deputatı Nizami Cəfərov bildirmişlər ki, təbiiliyi, xarakteri, mərdliyi və özünəməxsusluğu ilə İsmayıl Şıxlı xalq arasında böyük nüfuz qazanmışdır. Xalqın ləyaqətli ziyalısı olan yazıçı, elin ağsaqqalı, gəncliyin dayağı olmuşdur. Onun 1990 - cı illərdə baş verən hadisələrlə bağlı dediyi “sapı özümüzdən olan baltalar” kəlamı millətə, xalqa olan sevgisindən yaranmışdı.

Tədbirdə qeyd olunmuşdur ki, hələ sovet ideologiyasının kəskin dövrlərində yaratdığı Cahandar ağa kimi mərd, cəsur milli bəy obrazı geniş əks-səda doğurmuşdur. Təkcə “Dəli Kür” romanı kifayət idi ki, İ.Şıxlı XX əsr Azərbaycan ədəbiyyatının klassikləri sırasına düşsün. Görkəmli yazıçı bütün əsərlərində canlı obrazlar qalereyası yaratmış, orijinallığı, özünəməxsusluğu ilə daim seçilmiş, cəsarəti, qorxmazlığı ilə ümumxalq məhəbbəti qazanmışdır.

İsmayıl Şıxlının ilk dəfə yazdığı “Quşlar” şeiri 1938 - ci ildə “Ədəbiyyat” qəzetində dərc olunmuşdur. O, ədəbi yaradıcılığa 1947-ci ildə “İnqilab və mədəniyyət” jurnalında çap etdirdiyi “Həkimin nağılı” hekayəsi ilə başlamışdır.  Yazıçı “Ayrılan yollar”, “Bizim qəribə taleyimiz”, “Dəli Kür” və milli düşüncəmizin inkişafına töhfə verən digər əsərləri ilə oxucuların ürəyində özünə əbədi heykəl ucaldaraq qəlblərdə yaşayacaq.

Sonda mərhum sənətkarın ömrünün sonunda yazdığı “Ölən dünyam” kitabının təqdimatı oldu.

Tədbirin sonunda yazıçının oğlu Elçin Şıxlı atasının xatirəsinə göstərilən ehtirama və yaradıcılığına verilən yüksək qiymətə görə öz təşəkkürünü bildirdi.

Zümrüd

Səs.- 2009.- 7 may.- S. 13.